Armej ro an Limai rej ko

Minerva K. Teichert (1888-1976), Escape of King Limhi and His People, 1949-1951, oil on masonite, 35 7/8 x 48 inches. Brigham Young University Museum of Art, 1969

Māe 11–17

Mosaia 18–24

Em̧ōj Am kar Deļo̧n̄e juon Bujen Ippān

Ilo am̧ riiti Mosaia 18–24, ļōmņak kōn armej ro kwoj katakin. Ta eo kwojeļā kōn er? Jetōb Kwojarjar eo emaron̄ im̧we ļōmņak ko am̧ im jipan̄ eok kalikkari m̧ool ko an gospel eo me renaaj lukkuun jejjet n̄an er.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ro uwaan kūlaaj eo bwe ren ļōm̧ake waj jet pedped in katak ko, ak ennaan ko kōn m̧ool eo, me rekar loi ilo aer kar katak jān Mosaia 18–24. (Jet pedped in katak ko rej ellaajrak ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko.) Rōjan̄ er bwe ren kwaļo̧k ippān ro jet eoon ko jān Mosaia 18–24 me rej katakin pedped in katak kein. Ta en̄jake ko ewōr ippāer kōn m̧ool kein?

pija ej bōk jikin katakin

Katakin Katak ko

Mosaia 18:1–16

Peptaij ekitbuuj juon bujen n̄an jerbal n̄an Anij im jutak āinwōt juon rikam̧ool kōn E.

• Ilo am̧ riiti Mosaia 18 im m̧aanjabpopo n̄an katakin, komaron̄ en̄jake im̧we n̄an jipan̄ ro uwaan kūlaaj eo am̧ etali im kejōkļo̧kjeņ kōn bujen peptaij ko aer. En̄in ej juon wāween komaron̄ kōm̧m̧ane menin: Kajjitōk ippān ro uwaan kūlaaj eo n̄an jerbal ippān doon n̄an kōllaajrake ioon boot eo jon̄an wōt elōn̄ naan ko me remaron̄ keememej rejelet kōmeļeļe eo an Alma kōn bujen peptaij eo. N̄e em̧ōj aer kōm̧m̧ane, ro uwaan kūlaaj eo remaron̄ riiti Mosaia 18:8–10 im kobaiki jabdewōt men n̄an laajrak eo me remaron̄ jako ioon boot eo. ((Remaron̄ barāinwōt kobaiki naan ko jān K&B 20:37, 77, im 79.) Emaron̄ lukkuun in jipan̄ n̄an kajjitōk ippāer ta meļeļein kajjojo naan ko im ta eo remaron̄ in kōm̧m̧ane n̄an kōjparok m̧ōttan bujen peptaij eo. Ewi wāween an Irooj kōjeraam̧m̧an kōj ilo ad kajjieon̄ kōjparok m̧ōttan bujen in?

• Ilo an rikaļoor ro m̧ōttan Alma m̧aanjabpopo n̄an peptaij, Alma ekar katakin er bwe itok “ilo wōrwōr an Anij” ej aikuj kōm̧m̧an juon bujen n̄an ļoor Anij im kōjparok ajri ro Nejin (lale Mosaia 18:8–9). Bōlen ro uwaan kūlaaj eo remaron̄ kwaļo̧k en̄jake ko n̄e er ak juon armej rejeļā ke ekar kajoorļo̧k jān juon armej ej kakūrm̧ool bujen peptaij eo kōmeļeļeiki ilo Mosaia 18:8–10. N̄an waanjon̄ak, n̄āāt eo juon armej ekar kaenōm̧m̧an er ak kar jipan̄ er ineek eddo ko aer? Ewi wāween an en̄jake kein im̧we kōj n̄an kōjparok bujen ko ad? Komaron̄ barāinwōt kakeememej ro uwaan kūlaaj eo kōn wāween an Abinadai kar jutak “āinwōt [juon rikam̧ool] an Anij ilo iien otemjeļo̧k im ilo men otemjeļo̧k, im ilo jikin otemjeļo̧k” (eoon 9). Ta eo jemaron̄ ekkatak jān waanjon̄ak in an ilo ad pukot n̄an kakūrm̧ool m̧ōttan in an bujen peptaij in?

peptaij ilo lo̧jet

N̄e jej peptaij, jej kōm̧m̧an bujen n̄an jerbal n̄an Anij im ro jet.

Mosaia 18:17–31

Armej ro an Anij rej ippān doon.

• Mosaia 18:17–31 ej kōmeļeļeiki kien ko Alma ekar leļo̧k n̄an armej ro an n̄an jipan̄ er ippān doon āinwōt ro uwaan Kabun̄ eo an Kraist. N̄an jipan̄ ro uwaan kūlaaj eo ļōmņak kōn wāween an kien kein jerbal n̄an er, komaron̄ kajjitōk ippāer n̄an kappukot eoon kein ilo kūrub ko reddik im kōm̧m̧ane juon laajrak in kien ko rej loi. Ewi wāween n̄e ļoori kien kein jipan̄ ro uwaan ward eo en̄jake eļapļo̧k ippān doon? Ewōr ke jabdewōt kōttōbar ko me ro uwaan kūlaaj eo am̧ emaron̄ kōm̧m̧ane bwe kajjojo armej ak āinwōt juon kūrub en ļoor waanjon̄an eo an armej ro an Alma?

• Jet armej rej bwilōn̄, etke jej aikuji juon kabun̄? N̄an jipan̄ ro uwaan kūlaaj eo uwaak n̄an kajjitōk in, komaron̄ jin̄aiki juon laajrak in juon m̧ōnjar an Kabun̄ in ioon boot eo im je kajjitōk in ium̧win. Ro uwaan kūlaaj eo remaron̄ etale Mosaia 18:17–31 im je ioon boot eo uwaak ko rej loi ilo eoon kein. Remaron̄ barāinwōt pukot uwaak ko ilo m̧ōttan jidikdik eo bōk jān kōnono eo Elder Christofferson ilo “Kein Jipan̄ ko jet.” Bōlen komaron̄ tōl jet uwaan kūlaaj eo ikkure kōn wāween aer naaj uwaake juon m̧ōttāer eo ejjab tōmak aikuj eo bwe juon kabun̄ ellaajrak. Etke jej kam̧oolol bwe jej uwaan Kabun̄ in?

• Ilo ad kōņaan ļōmņak bwe aolep armej rej en̄jake aer ruwainene ilo kabun̄ in, ilo m̧ool, ejjab aolep armej rej en̄jake menin. Ta eo jej ekkatak jān armej ro an Alma ilo Alma 18:17–31 me remaron̄ jipan̄ kōj ejaake juon jikin ijo aolep armej rej en̄jake rej m̧ōttāer wōt?

Mosaia 21–24

Irooj emaron̄ kōm̧m̧an bwe eddo ko ad ren mera.

• Eddo ko ro uwaan kūlaaj eo am̧ rej ineeki roktak jān ko armej ro an Limai ak armej ro an Alma rekar ineeki ke rekar pād ilo kōmakoko. Bōtaab ennaan eo an bwebwenato kein rej jerbal n̄an jabdewōt ro rej en̄jake aer eddo kōn apan̄ ak jekjek ko reppen. Kajjitōk ippān ro uwaan kūlaaj eo bwe ren kwaļo̧k ippān ro jet ta ko rekar ekkatak jān Mosaia 21–24 kōn wāween an Anij maron̄ jipan̄ kōj ilo ilubwilijin mālijjon̄ ko ad. (Kōn juon kōmeļeļe ekadu kōn bwebwenato kein, lale L. Tom Perry, “The Power of Deliverance,” Ensign ak Liahona, May 2012, 94–97.) Ro uwaan kūlaaj eo remaron̄ barāinwōt jaake iien eo n̄e rekōņaan, āinwōt armej ro an Alma, rekar en̄jake kūrm̧ool in kallim̧ur eo an Anij eo im E enaaj kōmeraikļo̧k eddo ko im loļo̧k er ilo en̄taan ko aer (lale Mosaia 24:14).

• Emaron̄ lukkuun ļap meļeļein n̄an ro uwaan kūlaaj eo n̄an joļo̧k jejjo minit je apan̄ ko aer make rekar jelm̧ai im kejōkļo̧kjeņ kōn wāween ko Irooj ej jipan̄ er ineek eddo ko aer. Eoon kein jān Mosaia 21–24 rej ke im̧we er n̄an oktakļo̧k n̄an Irooj ilo iien apan̄ ko? Ewi wāween an kallim̧ur eo an Irooj n̄an armej ro an Alma ilo Mosaia 24:14 ekkejelļo̧k n̄an bujen ko jej kōm̧m̧ani ippān Irooj ilo iien peptaij eo? (lale Mosaia 18:8–10).

pija ej bōk jikin ekkatak

Kōketak Ekkatak ilo M̧weo

N̄an im̧we ro uwaan kūlaaj eo n̄an riiti Mosaia 25–28, kajjitōk ippāer n̄an ļōmņak kōn juon armej eo im rejeļā kajjien eo ekar jōbwābwe jān gospel eo. Ba n̄an er bwe ilo aer riiti jebta kein, remaron̄ loe en̄jake ko kōn wāween n̄an jipan̄ armej eo ro̧o̧ltok.

pija ej bōk jikin kein jipan̄ ko

Kein Jipan̄ ko jet

Etke jej aikuji Kabun̄ eo?

Elder D. Todd Christofferson ekar ba: “Ij kile bwe ewōr ro rej ļōmņak er rej rikabun̄ ak ekwojarjar aaet rej m̧akoko in bōk koņaer ilo juon kabun̄ ak m̧akūtkūt emenin aikuj n̄an doulul eo. Imminene an Kabun̄ ej n̄an er ro rerreo. Aaet Kabun̄ in ej ejaak jān E ilo eo ad ekwojarjar ej men eo ioļapļapān—Jisōs Kraist. Eaorōk n̄an bōjrak jidik im ļōmņak etke Ej kālet n̄an kōjerbal juon kabun̄, Kabun̄ eo An, Kabun̄ eo an Jisōs Kraist im Armej ro Rekwojarjar ilo Raan-ko Āliktata, n̄an kowaanm̧aanļo̧k jerbal eo An im An Jemān.”

Innām Elder Christofferson ekar kwaļo̧k un ko Irooj ekar ejaake juon Kabun̄ (lale “Why the Church,” Ensign ak Liahona, Nov. 2015, 108–11):

• “N̄an kwaļo̧k nuuj ko rem̧m̧an an gospel eo an Jisōs Kraist im jerbali kain̄i in lo̧mo̧o̧r ko—ilo bar jet naan, n̄an bōktok armej ro n̄an Kraist.”

• “N̄an ejaake juon jukjukin pād an Armej ro Rekwojarjar rej rie doon ilo ‘iaļ in erānin̄ im eaidik eo ej tōlļo̧k n̄an mour indeeo’ [2 Nipai 31:18]. … Koba ippān doon ilo tōmak, jej katakin im lan̄lōn̄ ippān doon im kajjieon̄ kepaak jon̄ak eo elikio an rikaļoor.”

• N̄an “leļo̧k juon kuk ippān kajjojo wiik jān kakkije im kōkāāl, juon iien im jikin n̄an etal jān men ko an laļ in—Jabōt.”

• “N̄an bōk menin aikuj ko me jejjab maron̄ kōttōbraki kajjojo armej ak kūrub ko reddik [ekoba] jelm̧ae jeramōļ, … [bōk] gospel eo n̄an laļ in … [kalōk im kōjerbale] tampeļ ko, m̧ōko im̧ōn Irooj, ijo kain̄i ko raorōk im bujen ko maron̄ kōm̧m̧ani ie.”

• N̄an kōm̧m̧an an pojak kii ko an priesthood eo, ippān eo “priesthood opiija ro an Kabun̄ in rej kōjparok erreo eo an katak ko an Kraist im m̧ool eo an kain̄i in lo̧mo̧o̧r ko An, … jipan̄ kōpooj ro rej kōņaan in būki, ekajeti ekkar im erreo eo an ro rej mour kaki, innām kōm̧m̧ani … [im] kalikkare jim̧or m̧ool im riab.”