“Māe 11–17. Mosaia 18–24: ‘Em̧ōj Ad Deļo̧n̄e juon Bujen Ippān,’” Itok, Loor Eō—N̄an Kajjojo Armej im Baam̧le ko: Bok in Mormon 2020 (2020)
“Māe 11–17. Mosaia 18–24,” Itok, Loor Eō—N̄an Kajjojo Armej im Baam̧le ko: 2020
Minerva K. Teichert (1888-1976), Ko eo an Kiin̄ Limai im Armej ro Doon, 1949-1951, oil ilo masonite, 35 7/8 x 48 inches. Brigham Young University Museum of Art, 1969.
Māe 11–17
Mosaia 18–24
Emōj Ad Deļo̧n̄e juon Bujen Ippān
Būreejtōn Thomas S. Monson eaar katakin, “Ilo ad riit im kejōkļo̧kjeņ kōn jeje ko rekwojarjar, jenaaj en̄jake unoojdikdik ko rem̧m̧an an Jetōb eo n̄an jetōb ko ad” (“Jej Jamin Etetal Make Iaad,” Ensign ak Liaona, Nob. 2013, 122).
Je En̄jake ko rej Im̧we Eok
Bwebwenato in armej ro an Alma ilo Mosaia 18; 23–24 ej kwaļo̧k ta meļeļein “itok ilo wōrwōr an Anij” (Mosaia 18:8). Ke raar peptaij, raar kōm̧m̧an juon bujen ippān Anij n̄an “jerbal n̄an E im kōjparok kien ko An” (Mosaia 18:10). Ke menin ekar juon kallim̧ur eļap n̄an kajjojo armej, eaar barāinwōt kōn wāween aer kar kōm̧m̧an n̄an doon. Aaet, iaļ in n̄an jepļaak n̄an ippān Jemedwōj Ilan̄ ej an juon make im kajjojo armej, im ejjeļo̧k juon emaron̄ kōjparok bujen ko ad n̄an kōj, ak ejjab meļeļein jej make iaad. Jej aolep aikuji doon. Āinwōt membōr ro ilo Kabun̄ eo an Kraist, jej bujen n̄an jerbal n̄an Anij ilo ad jipan̄ im jerbal n̄an doon ilo iaļ in, “ineek eddo ko an doon” (Mosaia 18:8–10). Armej ro an Alma rekar lukkuun eddodo, āinwōt bar kōj. Im juon wāween Irooj ej jipan̄ kōj, ej “kotak eddo ko [ad] ilo ejjeļo̧k pen” (Mosaia 24:15) ej ilo leļo̧k kapijuknen in Armej ro Rekwojarjar ro em̧ōj aer kar kallim̧ur n̄an buromōj ippād im kaenōm̧m̧an kōj, āinwōt ad kar kallim̧ur n̄an kōm̧m̧an āindein n̄an er.
Ļōmņak ko n̄an Ekkatak Jeje ko Rekwojarjar eo Ippem̧ make
Peptaij ekitbuuj juon bujen n̄an jerbal n̄an Anij im jutak āinwōt juon An rikam̧ool.
Mosaia 18:8–10 epād ie katak ko an Alma kōn bujen in peptaij, ak kallim̧ur eo jej kōm̧m̧ane n̄an Anij ilo iien peptaij. Ilo am̧ riiti eoon kein, kejōkļo̧kjeņ kōn kajjitōk kein rej elaajrak:
-
Ta eo kwoj ekkatak jān eoon kein kōn kallim̧ur ko kwaar kōm̧m̧ani ilo iien peptaij? Ta eo Anij ej kallim̧uri eok kake?
-
Ewi wāween an bujen in n̄an jerbal n̄an Anij (lale eoon 10) iookļo̧k kijejeto ko ad n̄an karejar n̄an ro jet? (lale eoon 8–9).
-
Ta eo kwoj kōm̧mane n̄an kōjparok kallim̧ur ko am̧?
-
Ewi wāween an bujen eo am̧ ke kwaar peptaij jipan̄ eok “obrak kōn Jetōb”? (Mosaia 18:14). Ewi wāween an Jetōb jipan̄ eok kōjparok bujen ko am̧?
N̄e ij kōm̧m̧ane bujen ko aō ippān Anij, ij bōk kōjeraam̧m̧an ko An.
Bwebwenato in ej barāinwōt kwaļo̧k lukkuun jejjet in peptaij. Ta eo kwoj ekkatak ilo eoon ko 14–17 kōn wāween an peptaij kōm̧m̧an? Bar ta eo kwoj ekkatak kōn peptaij jān Matu 3:16; Rom 6:3–5; 3 Nipai 11:21–28; im Katak im Bujen ko 20:72–74?
Bar lale Katak im Bujen ko 20:37, 77, 79.
Armej ro an Anij rej aikuj kuk ippān doon.
Ke Alma im armej ro an rekar kile bwe, ļoor Jisōs Kraist jet iien meļeļein joļo̧k wāween mour eo kwaar imenene kake n̄an juon mour ekāāl im eoktak. Ak armej ro an Alma raar bōk kajoor jān doon āinwōt m̧ōttan ļo̧k wōt “kabun̄ eo an Kraist” (Mosaia 18:17). Ewi wāween an katak ko ilo Mosaia 18:17–30 im̧we eok n̄an erom̧ juon membōr eo em̧m̧an ilo Kabun̄ in? Ta eo komaron̄ kōm̧m̧ane n̄an jipan̄ membōr ro ilo ward ak branch eo am̧ bwe ren “kuk ippān doon ilo bōrokuk im ilo iakwe”? (Mosaia 18:21).
Lale barāinwōt Henry B. Eyring, “Our Hearts Knit as One,” Ensign ak Liaona, ob. 2008, 68–71.
Naan ko an rikanaan ro renaaj kūrm̧ool.
Abinedai eaar kanaan kōn ta eo enaaj waļo̧k n̄an Kiin̄ Noa im armej ro an eļan̄n̄e remakoko in ukweļo̧k. Ijoke, n̄an jet armej rej likūt bwe kanaan kein rejjab m̧ool (lale Mosaia 12:1–8, 14–15), eļaptata kōn an RiNipai ro kar anjo̧ ņae riLaman ro ium̧win epaakeļo̧k 50 iiō ko (lale Mosaia 9:16–18; 11:19). Ak aolep naan ko an rikanaan ro renaaj kūrm̧ool—ilo raan kein eļapļo̧k āinwōt ilo iien ko an Abinedai.
Ta eo kwoj loe ilo Mosaia 19–20 me ekar tōl Gideon n̄an kwaļo̧k bwe kanaan eo an Abinedai em̧ōj an kūrm̧ool? (lale Mosaia 20:21). Ewi wāween an bwebwenato in kōkajoor tōmak eo am̧ ilo kakkōl im kapilōk ko an rikanaan ro an Anij im kalim̧m̧ur eo am̧ n̄an ļoor naan ko aer? N̄āāt eo kwaar lo an kanaan ko an rikanaan ro kūrm̧ool ilo raan kein?
Anij emaron̄ kōmeraiki eddo ko aō.
Limai im armej ro an rekar jim̧or pād ilo kōm̧akoko, men̄e kōn un ko im jekjek ko reokkōtaktak. Ta eo komaron̄ ekkatak jān e ilo am̧ keidi bwebwenato in armej ro an Limai ilo Mosaia 19–22 im armej ro an Alma ilo Mosaia 18; 23–24? Komaron̄ je wāween an kurup kein kajjojo anjo̧ jān kōm̧akoko ak wāween an kajjojo kar maron̄ rōļļok. Ilo am̧ kōm̧m̧ane, pukōt enaan ko me rekkar n̄an mour eo am̧. N̄an waanjon̄ak, ta eo komaron̄ ekkatak jān bwebwenato kein me enaaj jipan̄ eok ineek eddo ko am̧?
Imaron̄ lōke Irooj.
Men̄e rekar ukweļo̧k jān jerawiwi ko aer, Alma im armej ro an rekar kile ke rej pād wōt ilo kōm̧akoko. En̄jake ko aer ej kwaļo̧k bwe lōke Irooj im mour kōn bujen ko ejjab bōbrae men ko reppen aolep iien, ak ej jipan̄ kōj eļļā jāni. Ilo am̧ riiti Mosaia 23:21–24 im 24:8–17, je naan ko im jentōj ko me remaron̄ jipan̄ eok ekkatak n̄an lōke Anij, jekdoon jekjek ta ko kopād ie.
Lale barāinwōt Thomas S. Monson, ““I Jamin Likjab jān Eok, ak Ilo̧k jān Eok,” Ensign ak Liaona, Nob. 2013, 85–87.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Mosaia 18:1–4
Ewōr juon jabōn kōnnaan me ej ba komaron̄ bwini ine ko ilo juon abōļ, ak koban bwini abōļ ko me rej waļo̧k jān juon ine. Juon wōt armej eaar oktak kōn naan in kam̧ool eo an Abinedai, ak armej in—Alma—eaar kōm̧m̧an oktak eļap ilo epepen ko an RiNipai ro. Bolen komaron̄ kōjerbal juon leen wōjke ippān ine n̄an kwaļo̧k katak in. Ewi wāween an ennaan in iookļo̧k baam̧le eo ad? Ta eo jemaron̄ kōm̧m̧ane n̄an kwaļo̧k naan in kam̧ool ko ad n̄an ro jet?
Mosaia 18:8–10
Ta eo jemaron̄ ekkatak kōn bujen peptaij eo ad jān eoon kein? (lale barāinwōt K&B 20:73, 77–79). Ta eo jej kōm̧m̧ane n̄an kōpooj kōj ak kōjparok bujen ko ad ke jaar peptaij?
Mosaia 18:30
Ewi wōt jikin ko me ewōr meļeļeier n̄an kōj kōnke jaar en̄jake jetōb ke jaar pād ie?
Mosaia 21:11–16; 24:10–15
Ta eo jej ekkatak jān e ilo ad keidi kamakoko eo an armej ro an Alma im armej ro an Limai?
Mosaia 21:15; 24:11–15
Ta eo eoon kein rej katakin kōj kōn jet iaan wāween ko me Irooj ej uwaaki jar ko ad?
N̄an elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok Ļoor Eō—N̄an Būraimere.
Kōkm̧anm̧anļo̧k Ekkatak Ippem̧ Make
Pukōt juon iien me emeļak n̄an kwe. Ekkā an pidodo n̄an ekkatak n̄e komaron̄ ekkatak jān jeje ko rekwojarjar ilo an ejjeļo̧k kabōņōņō. Pukōt juon iien eo emeļak n̄an eok, im kōm̧m̧an jon̄an wōt am̧ maron̄ n̄an ekkatak emakijkij ilo iien ņe kajjojo raan.
Dān Ko in Mormon, jān Jorge Cocco