Abinadai ej kam̧ool n̄an Kiin̄ Noa

Abinadai ej Pād Im̧aan Kiin̄ Noa, jān Andrew Bosley

Māe 4–10

Mosaia 11–17

“Juon Meram … Emaron̄ Jab Tinaad”

Ļōmņak kōn waanjon̄ak eo an Abinadai kōn katakin gospel eo. Ta eo kwoj loe ilo Mosaia 11–17 me emaron̄ jipan̄ eok erom̧ juon rūkaki em̧m̧anļo̧k?

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

N̄an kōtļo̧k an ro uwaan kūlaaj eo kwaļo̧k juon men rekar ekkatak ippāer make ak katak jeje ko rekwojarjar an baam̧le, komaron̄ kajjitōk ippāer n̄an kamōj jentōj kein rej ellaajrak: Eļan̄n̄e n̄a eo ikar itōn kālet juon eoon jān Mosaia 11–17 n̄an kwaļo̧k ippān juon eo ij iakwe, enaaj kar .

pija ej bōk jikin katakin

Katakin Katak ko

Mosaia 11–13; 17

Jemaron̄ jutak kōn m̧ool eo, men̄e jej jutak make iaad.

• Mekarta n̄e eban āinwōt ro uwaan kūlaaj eo am̧ renaaj kaam̧jak er kōn mej kōn naan in kam̧ool ko aer, remaron̄ jelm̧ae jum̧ae kōn tōmak ko aer. Bōlen remaron̄ loe m̧akūtkūt ko ak eoon ko ilo Mosaia 11–13 im 17 ko me rej lelo̧k n̄an er peran n̄an jutak kōn m̧ool eo. Ta eo ekar kōm̧m̧an an Abinadai im Alma peran n̄an kajoor? Ewi wāween ad maron̄ pen im dim ilo jojomare m̧ool eo? Kout ko ilo “Kein Jipan̄ ko jet” remaron̄ letok jet ļōmņak ko.

• N̄an jipan̄ kūlaaj eo am̧ ekkatak jān waanjon̄ak ko an ro jet kōn peran ilo jojomare m̧ool eo, komaron̄ je Armej ro Rekar Jutak kōn Mool eo ioon boot eo. Komaron̄ jino ilo am̧ ekōnono kōn Abinadai, kajjitōk ippān ro uwaan kūlaaj eo n̄an kwaļo̧k jet men ko me rekar kabwilōn̄ er kōn Abinadai ilo aer riiti kōn e wiik in. Innām er remaron̄ ņaetan em̧m̧aan im kōrā ro jet—jān jeje ko rekwojarjar, baam̧le ko aer, ak en̄jake ko aer make—ro rej en̄jake ke rej waanjon̄ak ro kōn jutak kōn m̧ool eo. Ta eo jej im̧we n̄an kōm̧m̧ane kōnke kōn waanjon̄ak kein?

Mosaia 12:19–37

N̄e jej katak kōn naan ko an Anij, jej aikuj kōjerbal būruwōd n̄an ad meļeļe.

• Ilo aer kar katak Mosaia 12:19–37 wiik in, ro uwaan kūlaaj eo remaron̄ in bōk meļeļe ko kōn ta meļeļein n̄an kōjerbal būruwōd n̄an meļeļe naan an Anij. Ļōmņak in kajjitōk ippān jet iaer bwe ren kwaļo̧k ļōmņak ko aer. Ak bōlen komaron̄ in kōjerbal jet iien ilo kūlaaj n̄an kappukot eoon kein ippān doon im ekōnono kōn ta eo rej ļōmake waj kōn wāween eo n̄an kōm̧m̧an bwe katak gospel eo en ļapļo̧k meļeļein. N̄an waanjon̄ak, etke eaorōk n̄an jim̧or meļeļe kien ko an Anij im “kōjparoki”? (Mosaia 12:29).

• Ta eo ro uwaan kūlaaj eo am̧ remaron̄ ekkatak jān keidi m̧wil ko im imminene ko an pris ro an Noa ippān wāween eo jej aikuj in bōk n̄an katak gospel eo? Kajjitōk ippāer n̄an riiti Mosaia 12:19–37, pukot naan in kōnana ko me Abinadai ekar kwaļo̧ki kōn pris ro an Noa. Ta eo Abinadai emaron̄ ba kōn ad katak gospel eo rainin? Kajjitōk ippān ro uwaan kūlaaj eo bwe ren kwaļo̧k ta eo rej kōm̧m̧ane im ej jipan̄ er kōjerbal būruweer n̄an meļeļe im kobaik meļeļe eo eļapļo̧k n̄an ekkatak gospel eo aer.

  jemān im ļeo nejin rej riiti jeje ko rekwojarjar

  Wājabdik katak gospel eo ekitbuuj kōjerbal būruwōd n̄an meļeļe.

Mosaia 13:28–15:11

Lo̧mo̧o̧r ej itok jān Jisōs Kraist im Pinmuur eo An.

• N̄an kōtōmak juon jarlepju eo ebooļ aer kajjitōk kōn itok eo an Messaia eo, Abinadai ekar kouti juon naan in kanaan jān Aiseia (lale Mosaia 14). Ewōr jejjo wāween ko ro uwaan kūlaaj eo remaron̄ etali jebta in. Remaron̄ riiti jejjo eoon ilo juon ļo̧k juon im ekōnono kaki, ak komaron̄ ajije kūlaaj eo ilo kūrub in ekōnono ko reddik n̄an kōnono kōn eoon ko eļap meļeļeir, ekoba footnote ko, n̄an loi en̄jake ko jet. Rōjan̄ er n̄an kwaļo̧k ta eo rekar ekkatak kōn Rilo̧mo̧o̧r eo jān jebta in.

• Ro uwaan kūlaaj eo am̧ remeļeļe ke ta meļeļein an Jisōs Kraist kar “kabun̄-būruōn akweļap ko an jim̧we”? (Mosaia 15:9). N̄an jipan̄ er bōk juon meļeļe em̧m̧anļo̧k, komaron̄ jino riit ilo ami riit ippān doon “Ekajet” im “Tūriamo̧kake, Tūriamo̧” Unin Tōl eo n̄an Jeje Ko Rekwōjarjar (scriptures.ChurchofJesusChrist.org) ak “Ekajet” im “Tūriamo̧” ilo topics.ChurchofJesusChrist.org. Bōlen juon armej emaron̄ jipan̄ je juon meļeļe ekadu kōn kajjojo naan kein ioon boot eo. Innām remaron̄ riiti Mosaia 15:1–9 ippān doon. Ewi wāween an kar Jisōs Kraist kabun̄-buruōn akweļap ko an jim̧we? Ewi wāween An letok tūriamo̧ eo An n̄an kōj? Pija in alooj ko ļōmaki tok ilo “Kein Jipan̄ ko jet” rej kōjerbali bwebwenato ko im keidi bwebwenato n̄an kōmeļeļei tūriamo̧ eo an Rilo̧mo̧o̧r eo; alooje juon iaan pija in alooj kein emaron̄ jipan̄ ro uwaan kūlaaj eo ļōmņak kōn bwebwenato ko jet me rej kōmeļeļeiki wāween an Jisōs Kraist kabun̄-būruōn akweļap ko an jim̧we.

Mosaia 11; 12:33–37; 13:11–26

Kien ko rej aikuj in jeje ilo būruwōd.

• Komaron̄ jipan̄ ro uwaan kūlaaj eo meļeļe aorōk eo an wōr kien ko “rej jeje ilo [būruwō]” ilo am̧ kajjitōk ippāer ta eo rej ļōmņak ej meļeļe in naan in. Innām kajjitōk ippāer n̄an keidi kien ko Abinadai ekar katakin ilo Mosaia 12:33–37 im 13:11–26 ippān jerawiwi ko Kiin̄ Noa im armej ro an rekar kōm̧m̧ani (lale Mosaia 11:1–7, 14–15). Ewi wāween bwe kien ko ren “jeje ilo [būruwōd]” oktakļo̧k jān ad baj jeļā kaki? (Mosaia 13:11). Ewi wāween ad jeļā eļan̄n̄e kien ko rej jeje ilo būruwōd? Ta waanjon̄ak ko jemaron̄ kwaļo̧ki?

pija ej bōk jikin ekkatak

Kōketak Ekkatak ilo M̧weo

Ro uwaan kūlaaj eo renan̄in ke kar en̄jake āinwōt an kar Abinadai kar en̄jake—bwe kijejeto ko aer n̄an kwaļo̧k gospel eo rekar waan? Ba n̄an er bwe ilo Mosaia 18–26 renaaj riit kōn leen ko relutōkļo̧k kōn kijejeto eo an Abinadai.

pija ej bōk jikin kein jipan̄ ko

Kein Jipan̄ ko jet

Katak in kanaan ko kōn jutak kōn m̧ool eo.

Būreejtōn Russell M. Nelson ekar katakin: “Rikaļoor ro rem̧ool an Jisōs Kraist rej m̧ōņōņō in jenolo̧k jān ro jet, kōnono, im oktak jān armej ro an laļ in. … Ejjeļo̧k juon men epidodo ak enej make kōm̧m̧an n̄an erom kain rikaļoor rōt in ekajoor. Pedped eo ad aikuj in dim ilo Rilo̧mo̧o̧r eo im gospel eo An. Menin ej aikuj kijejeto ko ad kōļmenļo̧kjeņ n̄an reilo̧k n̄an E ilo aolep ļōmņak. Ak n̄e rej kōm̧m̧ane, pere ko ad im mijak ko ad rej jako” (“Bōktok Kajoor eo an Jisōs Kraist ilo Mour ko Ad,” Ensign ak Liaona, Eprōļ 2017, 40–41).

Būreejtōn Thomas S. Monson ekar ba: “Jen peran im pojak n̄an jutak kōn ta eo jej tōmake, im eļan̄n̄e jenaaj jutak iaad ilo iaļ in, jen peran ilo ad kōm̧m̧ane, kajoor kōn jeļā eo bwe ilo m̧ool jej jāmin make iaad n̄e jej jutak kōn Jemād ilo Lan̄” (“Dare to Stand Alone,” Ensign ak Liahona, Nov. 2011, 67).

Būreejtōn Gordon B. Hinckley ekar katakin: “Paul ekar jeje n̄an Timote: ‘Bwe Anij ear jab letok n̄an kōj jetōb in lōln̄o̧n̄; a jetōb in kajoor im yokwe im kajim̧we. Innām kwon jab jook kōn kōnnaan an ad Irooj’ (2 Tim. 1:7–8). Ij kōjatdikdik bwe aolep membōr ro an kabun̄ in renaaj likūt naan kein ijoko remaron̄ loi aolep jibbon̄ ilo an jino raan eo an. Renaaj letok n̄an kōj peran n̄an kōnono, renaaj letok n̄an kōj tōmak n̄an kajjieon̄, renaaj kōkajoorļo̧k kam̧ool eo an kōn Irooj Jisōs Kraist” (Teachings of Presidents of the Church: Gordon B. Hinckley [2016], 338).

Pija in alooj eo kōn ekajet im tūriamo̧ ilo ChurchofJesusChrist.org.

• “Handel’s Messiah: Debtor’s Prison”

• “The Mediator”

• “Where Justice, Love, and Mercy Meet”