enjeļ eo ej waļo̧k n̄an Alma im ļaddik ro nejin Mosaia

Oktaktok eo an Alma eo Edik, jān Gary L. Kapp

Māe 18–24

Mosaia 25–28

“Im Raar Kūr er Armej ro an Anij”

Wāween eo em̧m̧antata n̄an m̧aanjabpopo n̄an katakin kōn Mosaia 25–28 ej n̄an riiti jebta kein im mour kōn pedped in katak ko rej katakin. Ilo am̧ kōm̧m̧an āindein, Jetōb eo emaron̄ im̧we eok n̄an katakin ta eo enaaj lukkuun aorōk n̄an ro uwaan kūlaaj eo am̧.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jet uwaan kūlaaj eo emaron̄ in pen aer aolep iien katak jeje ko rekwojarjar ippāer make im ippān baam̧le ko aer. En̄jake ko an ro jet uwaan kūlaaj eo renaaj ke jipan̄? Bōlen komaron̄ jino kūlaaj eo am̧ ilo am̧ kajjitōk ippān ro uwaan kūlaaj eo bwe ren kwaļo̧k juon men eo rekar kōm̧m̧ane ilo aer katak jeje ko rekwojarjar ippāer make ak ippān baam̧le eo aer me ekar tōprak.

pija ej bōk jikin katakin

Katakin Katak ko

Mosaia 26:15–31; 27:23–37

Anij ej m̧ōņōņō in jeorļo̧k an ro rej ukweļo̧k bōd.

• Ukweļo̧k im jeorļo̧k bōd rej unin kōnono ko ekkā an waļo̧k ilo jebta kein. Komaron̄ etali unin kōnono kein ilo am̧ je Ukweļo̧k im Jeorļo̧k bōd ioon boot eo im kajjitōk ippān ro uwaan kūlaaj eo n̄an kōllaajrake ium̧win naan ko ilōn̄ kōn ta eo ej itok n̄an kōļmenļo̧kjeņ n̄e rej ļōmņak kōn naan kein. Innām remaron̄ lale Mosaia 26:22–24, 29–31; im 27:23–27 kōn naan ko im meļeļe ko me rej katakin kōn ukweļo̧k im jeorļo̧k bōd. Ro uwaan kūlaaj eo remaron̄ in kobaik naan kein im meļeļe kein n̄an laajrak eo ioon boot eo. Ewi wāween an Anij en̄jake kōn ro rej ukweļo̧k im pukot jeorļo̧k bōd?

• Jet armej remaron̄ bōlen eļan̄n̄e ukweļo̧k eo aer ekar bwe n̄an an Anij jeorļo̧k aer bōd. N̄an jipan̄ jabdewōt armej ilo kūlaaj eo am̧ me remaron̄ in en̄jake wāween in, komaron̄ kajjitōk ippān ro uwaan kūlaaj eo am̧ bwe ren pijaiki ilo kōļmenļo̧kjeņ eo aer eļan̄n̄e er rej Alma Elder eo im bwe juon membōr in Kabun̄ eo ilo Zarahemla ekar kajjitōk ippāer wāween aer bōk jeorļo̧k bōd in jerawiwi ko an (bōlen komaron̄ in ikkure ak role-play kōn bwebwenato in). Ta eo Alma ekar ekkatak jān Irooj ilo Mosaia 26:15–31 me emaron̄ kar jipan̄ in uwaan Kabun̄ in? (bar lale Moronai 6:8; K&B 58:42–43). Ennaan in jān Būreejtōn Henry B. Eyring emaron̄ barāinwōt jipan̄: “Eļan̄n̄e kwaar en̄jake kajoor eo an Jetōb Kwojarjar rainin, komaron̄ bōke āinwōt juon kam̧ool bwe Pinmuur eo ej jerbal ilo mour eo am̧” (“Gifts of the Spirit for Hard Times,” Ensign, June 2007, 23).

Mosaia 27:8–24

Anij ej ron̄jake jar ko ad im naaj uwaaki ekkar n̄an Ankilaan.

• Elōn̄ iaad remaron̄ in keidi n̄an en̄jake ko an Alma Elder eo, eo me ļaddik eo nejin ekar “kōpata ņae Anij” (Mosaia 27:11). Bōlen ro uwaan kūlaaj eo remaron̄ in ekōnono kōn wāween aer maron̄ kōjerbale bwebwenato eo ilo Mosaia 27:8–24 n̄an leļo̧k kōjatdikdik n̄an juon armej eo me ewōr juon uwaan baam̧le eo an ejōbwābwe mour eo an. Meļeļe bwe jejjab maron̄ kajjitōk im kipel n̄an bōk juon menin kabwilōn̄lōn̄ ak jeerļo̧k anemkwoj eo an juon armej, ta eo emaron̄ ekkar bwe jen jar kake ej n̄e juon eo jej iakwe em̧ōj an etal im jōbwābwe. (bar lale Alma 6:6).

Mosaia 27:8–28:4

Aolep em̧m̧aan im kōrā ro rej aikuj bar ļotak.

• Erkein rej jet iaan kajjitōk ko me remaron̄ jipan̄ ro uwaan kūlaaj eo ekkatak kōn maron̄ bar ļotak: Ta meļeļein n̄an bar ļotak ilo jetōb? (lale Bible Dictionary, “Conversion”). Ewi wāween an kajjieon̄ m̧akūtkūt ņae ro jet n̄e rej bar ļotak ilo jetōb? N̄an jipan̄ ro uwaan kūlaaj eo uwaake kajjitōk kein, komaron̄ in kajjitōk ippāer n̄an lale Mosaia 27:22–28:4 n̄an kōkkaļļe ko me Alma im ļaddik ro nejin Mosaia rekar bar ļotak ilo jetōb.

• Aolep armej ewōr juon an bwebwenato in oktak eo an, bwe āinwōt an Alma kar ba, “aolep armej … reaikuj bar ļotak” (Mosaia 27:25; italic ko kar kobaiktok). Bōlen jejjo ro uwaan kūlaaj eo remaron̄ in kwaļo̧k wāween aer kar erom̧ oktaktok n̄an gospel eo an Jisōs Kraist—mekarta kōn kajoor in m̧akūtkūt in jetōb eo ilo mour ko aer ak kōn juon jerbal in oktak eo kar kile ālkin wōt an waļo̧k juon men ilo mour. Komaron̄ barāinwōt leļo̧k iien n̄an an ro uwaan kūlaaj eo je en̄jake ko aer. (Eļan̄n̄e ejjeļo̧k iien n̄an kōm̧m̧ane menin ilo kūlaaj, komaron̄ in kajjitōk bwe ren kōm̧m̧ane ilo m̧weo.) N̄an kwaļo̧k bwe oktaktok eo ad ej aikuj in etal wōt, komaron̄ kwaļo̧k bwe ro uwaan kūlaaj eo en emakijkij aer etale ta eo rekar je im kobaikļo̧k en̄jake ko aer rekāāl.

• Alma im ro jet ilo jeje ko rekwojarjar rekar kōjerbal naan in bar ļotak n̄an kōmeļeļeiki oktak eo me gospel eo an Jisōs Kraist ej bōktok n̄an mour ko ad. Elder David A. Bednar ekar keidi oktak in n̄an juon kukam̧bōr ej erom̧ juon pikōļ (lale “Kein Jipan̄ ko jet”). N̄an jipan̄ ro uwaan kūlaaj eo kejōkļo̧kjeņ kōn ta ko keidi kein rej katakin kōn oktaktok, komaron̄ bōktok juon kukam̧bōr im juon pikōļ n̄an kūlaaj. Ak komaron̄ in kajjitōk ippān juon bwe en bōktok juon niknik im ekōnono kōn etke ļotak ej juon waanjon̄an em̧m̧an kōn ta eo ekar waļo̧k n̄an Alma im ļaddik ro nejin Mosaia. (Lale Mosiah 27:23–28:7.)

Alma eo Edik kar kotakeļo̧k n̄an m̧weo im̧ōn jemān.

Jemān Ekar Lan̄lōn̄, jān Walter Rane

pija ej bōk jikin ekkatak

Kōketak Ekkatak ilo M̧weo

N̄an im̧we ro uwaan kūlaaj eo n̄an riiti Mosaia 29–Alma 4 wiik eo tok juon, komaron̄ ba n̄an er bwe ilo jebta kein, armej ro an Nipai rekar bōk juon ennaan jān kien eo aer. Ta eo jemaron̄ ekkatak jān en̄jake ko aer ilo ad kajjieon̄ kareel jukjukin pād ko ad n̄an em̧m̧an?

pija ej bōk jikin kein jipan̄

Kein Jipan̄ ko jet

Juon jerbal ebōk aolepān iien mour.

Elder D. Todd Christofferson ekar katakin: “Maron̄ bar ļotak, ejjab āinwōt ļotak eo ad ilo ānbwin, ej juon jerbal eļapļo̧k jān juon iien m̧akūtkūt. Im ekkejelļo̧k wōt ippān jerbal eo ej dilepān jibadbad eo an mour in” (Born Again,” Ensign ak Liahona, May 2008, 78).

Oktaktok im Pikōļ ko

Elder David A. Bednar ekar kwaļo̧k waanjon̄ak in keidi bar ļotak ilo jetōb n̄an kōjparoki kukam̧bōr ko:

“Juon pikōļ ej juon kukam̧bōr eo ekar oktak ekkar n̄an juon baj iiōk im lelkan bun̄tōn ko. Bun̄tōn eo kein kajuon ilo jerbal in ukōte juon kukam̧bōr n̄an juon pikōļ rej m̧aanjabpopo im karreo. …

“Bun̄tōn eo juon ilo jerbal in ukōte eo rej katuļo̧ke im katutu aolepān kukam̧bōr ko ilo dān eo ejo̧o̧ļ ium̧win eaitok. … Kukam̧bōr ko remaron̄ erom̧ pikōļ ko wōt eļan̄n̄e rej lukkuun tuļo̧k ilo dān eo ejo̧o̧l ium̧win iien eo kar kōmeļeļeiki. Jerbal in kōjparok eo lukkuun ukōte nememe eo m̧okta an kukam̧bōr eo im ejaake nememe eo eoktak im nemen juon pikōļ. Juon iien uttidikdik ak juon iien katuļo̧k ilowaan dān eo ejo̧o̧ļ ejjab maron̄ ejaake oktak in emenin aikuj. Ijjelo̧kin, pojak, rie, im lukkuun tulo̧k ej aikuji kōņaan oktak eo bwe en waļo̧k.

“Bun̄tōn eo āliktata ilo jerbal eo ej aikuji kalbobo eo edim an pikōļ ko ilo nine ko bwe ren maron̄ m̧anļo̧k kij im kareeo. Pikōļ ko rej kanni ilo nine ko, kalbubuiki kōn dān in jo̧o̧ļ eo ebwil, im kōpooje ilo juon dān ebwil. Aolep ettonoon ko rej aikuj in jako jim̧or jān pikōļ ko im bato ko bwe jerbal eo ededeļo̧k maron̄ in kōjparoke im kakoņe. …

“Baj āinwōt juon kukam̧bōr eo eaikuj in kōpooje im karreoki m̧okta jān an oktak n̄an juon pikōļ, barāinwōt kwe im n̄a maron̄ in m̧aanjabpopo kōn ‘naan in tōmak ko im kōn katak em̧m̧an’ (1 Timōte 4:6) im jino karreo kōn kain̄i ko im bujen ko kōm̧m̧ani jān maron̄ eo an Priesthood eo an Aron. …

“Baj āinwōt juon kukam̧bōr ej oktak n̄an juon pikōļ āinwōt ej tulo̧k ium̧win dān im katutu aolepān kōn dān in jo̧o̧ļ, barāinwōt kwe im n̄a jej bar ļotak āinwōt ad jerbal jān im ilo gospel eo an Jisōs Kraist. … Meļeļe in kōn jerbal in oktak ej bōk iien, kijejeto, im kijenmej. …

“… Dān in jojo eo ebwil ej ejaake im kōmaron̄ an pikōļ ko jim̧or kōjparok im kakoņ ium̧win juon iien eaitok. Ilo juon wāween āinwōt in, jej eddōkļo̧k im erom̧ erreo im kwojarjar āinwōt kwe im n̄a kōjro ej karreo ilo bōtōktōkin ļaam̧ eo, jej bar ļotak, im bōk kain̄i ko im kautiej bujen ko me rej kōm̧m̧an jān maron̄ eo an Priesthood eo an Melkisedek” (“Ye Must Be Born Again,” Ensign ak Liahona, May 2007, 19–21).

Kōkōm̧anm̧an Ad Katakin

M̧aanjabpopo kōn armej eo ilo kōļmenļo̧kjeņ. “N̄e kwoj m̧aanjabpopo, kōm̧m̧an bwe meļeļe eo am̧ kōn armej ro kwoj katakin ren tōl karōk ko am̧. … Rūkaki ro rej āinwōt Kraist rejjab kallim̧ur n̄an juon wōt kain jekjek in katakin ak kōļ, rej kallim̧ur n̄an jipan̄ armej ro kalōk tōmak ilo Jisōs Kraist im erom̧ eļapļo̧k āinwōt E” (Teaching in the Savior’s Way, 7).