oxib’ li winq neke’aatinak rik’in jun chik li winq chunchu

Lix yalb’al rix laj Job, xb’aan laj Joseph Brickey

1–7 agosto

Job 1–3; 12–14; 19; 21–24; 38–40; 42

Toj tinkanab’ wib’ chiru

Naq yookat chixtzolb’al li seraq’ chirix laj Job, k’a’ru li na’leb’ xataw choq’ re laa yu’am? B’ar wan reheb’ li na’leb’ a’an nakak’oxla naq te’raj ru rab’inkil li kok’al?

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut chiruheb’ li kok’al jun xjalam-uuch laj Job (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Patz’ reheb’ li kok’al k’a’ru neke’xk’oxla naq nareek’a li winq sa’ li jalam-uuch. Patz’ reheb’ naq te’xwotz li k’a’ru neke’xnaw chirix laj Job.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Job 1–2; 13:15

Li qaChoxahil Yuwa’ ut li Jesukristo tine’xtenq’a sa’eb’ li hoonal ch’a’aj wi wan inpaab’aal chirixeb’.

Laj Job kixkanab’ rib’ sa’ ruq’ li Dios ut kikana chi paab’ank chi tiik us ta jwal kaw lix yalb’al rix. Li seraq’ chirix laj Job naru naxtenq’aheb’ li kok’al chixkawob’resinkil lix paab’aal chirix li qaChoxahil Yuwa’ ut li Jesukristo re naq kawresinb’ilaqeb’ naq te’wulaq li ch’a’ajkil yale’k-ix.

Kok’ k’anjel naru chi b’aanumank

• Patz’ reheb’ li kok’al naq te’xwotz k’a’ru neke’xnaw chirix laj Job ut tenq’aheb’ chixtawb’al ru li kixk’ul (chi’ilmanq Job 1–2; “Job” sa’ Relatos del Antiguo Testamento). Patz’ reheb’ li kok’al k’a’ raj ru te’reek’a wi ta a’aneb’ laj Job. Ani naru natenq’ank qe naq nachal li rahilal sa’ qayu’am? K’ut jun xjalam-uuch li Jesukristo ut ch’olob’ naq laj Job kitenq’aak sa’ lix yalb’al rix xb’aan lix paab’aal chirix li Qaawa’ (chi’ilmanq Job 1:21).

• Yaab’asi reheb’ li kok’al li raatin laj Job sa’ Job 13:15: “Tinkanab’ wib’ sa’ ruq’.” Re xtenq’ankileb’ li kok’al chixtawb’al ru k’a’ru naraj naxye xkanab’ankil qib’ sa’ ruq’ li Dios, patz’ reheb’ naq te’xye aniheb’ li kristiaan li neke’xkanab’ wi’ rib’. K’a’ru li tz’aqal naqanaw naq te’xb’aanu li qana’ qayuwa’? K’a’ru li tz’aqal naqanaw naq te’xb’aanu laj tzolol qe? K’a’ru li tz’aqal naqanaw naq tixb’aanu li qaChoxahil Yuwa’ ut li Jesukristo? Ye naq laa’at nakakanab’ aawib’ sa’ ruq’ li qaChoxahil Yuwa’ ut li Jesukristo, ut tenq’aheb’ li kok’al chixk’oxlankil chan ru naru te’xk’ut naq neke’xraheb’ ut neke’xkanab’ rib’ sa’ ruq’eb’.

Job 19:25

Li Jesukristo, a’an aj Tojol wix.

Laj Job kixkuy xnumsinkileb’ lix yalb’al rix xb’aan lix paab’aal chirix li Qaawa’. Chan ru taatenq’aheb’ li kok’al chixnimob’resinkil lix paab’aaleb’ chirix li Jesukristo, aj Tojol qix?

Kok’ k’anjel naru chi b’aanumank

• K’ut jun xjalam-uuch li Jesus chiru li krus malaj re lix muqb’al (chi’ilmanq Hu reheb’ li Jalam-uuch re li Evangelio, 57, 58). Patz’ reheb’ li kok’al naq te’xch’olob’ k’a’ru nak’ulman sa’ li jalam-uuch. Yaab’asi reheb’ li kok’al lix nawom xch’ool laj Job sa’ Job 19:25. K’ut jun xjalam-uuch li Kolonel chi waklijenaq chi yo’yo (chi’ilmanq Hu reheb’ li Jalam-uuch re li Evangelio, 59, 60; chi’ilmanq ajwi’ li perel re kok’ k’anjel re li xamaan a’in), ut ch’olob’ xyaalal naq li Jesukristo kiwakli chi yo’yo ut yo’yo anajwan. K’a’ut naq naqab’antioxi naq kiwakli chi yo’yo li Jesus?

• K’ut jun xjalam-uuch laj Job ut ch’olob’ naq xiikil xmay lix tib’el laj Job xb’aan naq mich’il lix tz’uumal lix tib’el. Kisachman lix junkab’al chiru ut eb’ lix kok’al ke’kam. A’b’an laj Job naxnaw jun na’leb’ li kituqub’an xch’ool. Yaab’asi Job 19:25 ut patz’ reheb’ li kok’al k’a’ru naxnaw laj Job. Wotz rik’ineb’ li kok’al chan ru naq nakanaw naq yo’yo li Jesukristo, ut patz’ reheb’ naq te’xwotz xnawom xch’ool chirix a’an.

  jun winq na’ilok taqe’k

  Laj Job, xb’aan laj Gary L. Kapp

• Patz’ reheb’ li kok’al naq te’xb’on li perel re kok’ k’anjel re li xamaan a’in. Naq yooqeb’ chixb’aanunkil a’an, ab’ihomaq malaj b’ichahomaq jun li b’ich chirix li wakliik chi yo’yo, maare “Ma yaal naq li Jesus xwakli?” malaj “Xwakli Jesus” (B’ichleb’aal choq’ reheb’ li Kok’al, 45, 44). Patz’ reheb’ naq te’xwotz k’a’ru neke’reek’a chirix li Jesus ut tenq’aheb’ chixtawb’al ru naq naru neke’qak’ul li chaab’il eek’ahom rik’in li Santil Musiq’ej re qatenq’ankil chixnawb’al naq li Jesukristo yo’yo.

reetalil li k‘utuk

Xk’utb’al li tzol’leb’: Kok’al ak ninqeb’

Job 1–2; 12; 19

Li qaChoxahil Yuwa’ ut li Jesukristo tine’xtenq’a chixnumsinkileb’ lin ch’a’ajkilal naq taawanq inpaab’aal chirixeb’ a’an.

Chixjunileb’ li kristiaan neke’wan xch’a’ajkilal ut junjunqeb’ neke’b’ay chi us lix ch’a’ajkilaleb’. Laj Job kitenq’aak chixnumsinkileb’ lix yalb’al rix xb’aan lix paab’aal chirix li Dios. K’oxla chan ru naq li seraq’ a’in naru naxtenq’aheb’ li kok’al chixkawob’resinkil lix paab’aaleb’ chirix li qaChoxahil Yuwa’ ut li Jesukristo re naq te’xnumsi lix yalb’aleb’ rix, anajwan ut moqon.

Kok’ k’anjel naru chi b’aanumank

• Patz’ reheb’ li kok’al naq te’xwotz k’a’ru neke’xnaw chirix laj Job. Chan chaq ru lix yu’am laj Job? K’a’ru kixk’ul? Chan ru naq kixnumsi lix ch’a’ajkilal? K’eheb’ li raqal re Job 1–2 reheb’ li kok’al re xtenq’ankileb’ chixwotzb’al li seraq’ (chi’ilmanq Job 1:1, 13–22; 2:7–10; chi’ilmanq ajwi’ “Job” sa’ Relatos del Antiguo Testamento). Patz’ reheb’ li kok’al naq te’xwotz li neke’xk’oxla naq a’an li tz’aqal na’leb’ naxk’ut li seraq’ chirix laj Job.

• K’uteb’ junjunq xjalam-uuch li Jesukristo naq na’aatinak rik’ineb’ li kristiaan, ut patz’ reheb’ li kok’al k’a’ru neke’xk’ut li jalam-uuch a’an chirix ani li Jesukristo ut chan ru lix yu’am. K’a’ru chik naqanaw chirix? Patz’ reheb’ li kok’al naq te’ril junjunq reheb’ li raqal a’in re te’xtaw junjunq li na’leb’ naxnaw laj Job chirix li Qaawa’: Job 12:10, 13, 16; 19:25–27. K’a’ut naq aajel ru xnawb’aleb’ li na’leb’ a’in chirix li Kolonel?

• Patz’ reheb’ li kok’al naq te’ril Job 19:14–19 ut patz’ reheb’ k’a’ru neke’xye li raqal a’an chirix li neke’xb’aanu li kristiaan rik’in laj Job. K’a’ raj ru taqeek’a wi ta taa’uxmanq a’in sa’ li qayu’am? Patz’ reheb’ li kok’al naq te’ril Job 19:23–27 re te’xtaw chan ru naq laj Job kixtaw xk’ojob’ankil xch’ool. K’a’ru neke’xk’ut chiqu li raqal a’in chirix li Kolonel? K’a’ut naq aajel ru xnawb’al naq a’an yo’yo ut naq nokoxra? (chi’ilmanq Jwan 17:3).

• B’ichahomaq jun li b’ich na’aatinak chirix li Kolonel, maare “Ninnaw naq yo’yo inKolonel” (Eb’ li B’ich, 77). K’a’ru naxye li b’ich chirix xnawb’al naq yo’yo li Jesukristo? Ye reheb’ li kok’al chan ru naq nakanaw naq yo’yo li Kolonel ut k‘a’ut naq nakab’antioxi li nawom a’an. Waklesi xch’ooleb’ chixwotzb’al ajwi’ li reek’ahomeb’ ut lix nawom xch’ooleb’.

Job 19:13–19; 22:5

Eb’ li chaab’il amiiw neke’xtenq’a rib’ ut neke’xwaklesi xch’ooleb’ chirib’ileb’ rib’.

Naq laj Job yoo chixyalb’al xq’e, eb’ li ramiiw ke’xye naq yoo chi k’ehe’k sa’ tojb’a-maak xb’aan li Dios xb’aan naq kimaakob’k. Li seraq’ a’in naru nakatxtenq’a chixk’utb’al chiruheb’ li kok’al k’a’ raj ru te’xye re junaq ramiiweb’ li wan xch’a’ajkilal (chi’ilmanq Job 16:1–5).

Kok’ k’anjel naru chi b’aanumank

• Patz’ reheb’ li kok’al naq te’ril li k’a’ru ch’a’aj kixnumsi laj Job (chi’ilmanq Job 1:13–19; 2:7). Ilomaq Job 19:14, 19, ut sik’omaq k’a’ru ke’xye li ramiiw laj Job chirix lix yalb’al rix (chi’ilmanq ajwi’ Job 22:1–5). Patz’ reheb’ li kok’al naq te’xk’oxla naq a’aneb’ li ramiiw laj Job—chan raj ru te’xyal xtenq’ankil? Waklesi xch’ooleb’ chixjultikankil junaq ramiiweb’ li maare wan sa’ junaq hoonal ch’a’aj, ut te’xk’uub’ k’a’ raj ru te’xb’aanu re xk’utb’al xrahomeb’ ut xtenq’ chiru li ramiiw.

• Patz’ reheb’ li kok’al naq te’xtz’iib’a junjunq xchaab’ilaleb’ li chaab’il amiiw ut naq te’xye xk’ab’a’ junaq ramiiweb’ li wan xchaab’ilal chi jo’kan. K’ut jun xjalam-uuch li Jesukristo. Chan ru naq li Jesus a’an jun chaab’il amiiw choq’ qe chiqajunil? Chan ru naru taqab’aanu jo’ kixb’aanu a’an?

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’in xjunkab’aleb’ malaj junaq ramiiweb’ chan ru naq naru neke’tenq’aak xb’aan li qaChoxahil Yuwa’ ut li Jesukristo naq wankeb’ sa’ jun hoonal ch’a’aj.

Xkawresinkil qib’ jo’ aj k’utunel

Ch’olob’ xyaalaleb’ li osob’tesihom yeechi’inb’il. Naq li Qaawa’ naxk’e jun taqlahom, chi kok’ aj xsa’ naxyeechi’i li osob’tesink re li ani na’ab’ink chiru li taqlahom a’an. Rajlal sut naq nakak’e xb’oqb’aleb’ li kok’al chixyu’aminkil junaq na’leb’, aatinan chirix li yeechi’ihom li naxk’e li Dios reheb’ li nekeyu’amink re li na’leb’ a’an. Maare taach’olob’ ajwi’ xyaalaleb’ li osob’tesink xak’ul laa’at xb’aan xyu’aminkil li na’leb’ a’an.

perel re kok’ k’anjel: Li Jesukristo a’an aj Tojol wix