li Jesus rik’in li xam

Xkolb’al li k’a’ru sachb’il, xb’aan laj Michael T. Malm

15–21 agosto

Salmos 49–51; 61–66; 69–72; 77–78; 85–86

Tinch’olob’ jo’nimal kixb’aanu li Qaawa’ choq’ re li waam

Laa b’aanuhom naq nakatzol li evangelio naru nawan xwankil sa’ xyu’ameb’ li kok’al. Wotz rik’ineb’ a’an laa musiq’ejil numsihom naq nakatzol li evangelio.

Tz’iib’a li nakak’oxla

reetalil li wotzok

Xkanab’ankileb’ chi wotzok

Wotz rik’ineb’ li kok’al jun raqal re Salmos malaj jun li b’ich li natenq’ank aawe chireek’ankil lix rahom li Kolonel. K’e xhoonaleb’ li kok’al chixb’aanunkil ajwi’ a’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Salmos 51:12

Naq ninb’aanu li k’a’ru ink’a’ us, li Jesukristo naru nikinixtenq’a chi jalaak.

Tenq’aheb’ li kok’al chixtawb’al ru naq li sachk a’an xcha’al li qayu’am sa’ ruchich’och’ ut naq naru naqak’ul xtenq’ li Jesukristo re numtaak sa’ xb’een.

Kok’ k’anjel naru chi b’aanumank

• Wotz junaq ch’ina seraq’ chirix laa yu’am malaj re li hu Amigos malaj li Liahona, chirix junaq ch’ina al li kixsik’ ru xb’aanunkil li k’a’ru ink’a’ us a’b’an kixk’ul xtenq’ankil rik’in li Kolonel re xjalb’al a’an. Il Salmos 51:12, ut wotz li sahil ch’oolejil nakaweek’a naq li Kolonel naxk’e aawe jun “tiikil ch’oolej ut saq ru.”

• K’ut chiruheb’ li kok’al li perel re kok’ k’anjel re li xamaan a’in. K’uteb’ li junjunq chi jalam-uuch chiruheb’ ut patz’ reheb’ naq te’xch’olob’ k’a’ru neke’ril. Yaab’asiheb’ li seraq’ re xtenq’ankileb’ li kok’al chixtzolb’al li jalb’a-k’a’uxlej ut li kuyuk maak.

Salmos 71:8

Naru nikin’aatinak chirix li Jesukristo rik’ineb’ li was wiitz’in.

Li raatin jun ch’ina al rik’in paab’aal wan xwankil li naxtoch’eb’ li aamej. Ye reheb’ li kok’al naq lix nawom xch’ooleb’ chirix li Jesukristo naru naxtenq’aheb’ li ras riitz’in.

wiib’eb’ li kok’al chunchuukeb’ sa’ jun li tem

Naru noko’aatinak rik’ineb’ li qas qiitz’in chirix li k’a’ru xb’aanuhom li Jesus choq’ qe.

Kok’ k’anjel naru chi b’aanumank

• Yaab’asi Salmos 71:8 reheb’ li kok’al ut yiib’ jun xtz’uumal e chiru li pizarron. Patz’ reheb’ naq tate’xtenq’a “chixnujob’resinkil” li xtz’uumal e rik’in k’a’aq re ru li naru naqaye reheb’ li qas qiitz’in chirix li Jesukristo.

• Numsi jun xjalam-uuch li Jesukristo sa’ xyanqeb’ li kok’al. Patz’ reheb’ li kok’al naq te’xchap li jalam-uuch ut te’xye junaq na’leb’ neke’xnaw chirix. K’a’ru xb’aanuhom choq’ qe? (Eb’ li jalam-uuch sa’ li Hu reheb’ li Jalam-uuch re li Evangelio naru te’xk’e eena’leb’.)

Salmos 86:7

Lin Choxahil Yuwa’ narab’iheb’ ut naxsumeheb’ lin tij.

Naab’al reheb’ li salmo chanchaneb’ chik li tijok chiru li Dios re xpatz’b’al li tenq’, b’eresinkil, ut kolb’a-ix. K’oxla chan ru taatenq’aheb’ li kok’al chixnimob’resinkil lix paab’aal naq li qaChoxahil Yuwa’ na’ab’in ut nasumen naq neke’tijok.

Kok’ k’anjel naru chi b’aanumank

• Patz’ reheb’ li kok’al chan ru neke’aatinak rik’ineb’ li kristiaan li wankeb’ chi najt. K’uteb’ k’a’aq re ru li naru neke’qoksi re raatinankil qib’ chi najt, maare jun celular malaj junaq li hu. Yaab’asi Salmos 86:7 reheb’. Chan ru “naqayaab’a” xk’ab’a’ li qaChoxahil Yuwa’? Chan ru naq nokoxsume?

• Patz’ reheb’ li kok’al naq te’xk’utb’esi li neke’xb’aanu wulaj wulaj, maare li ajk, xik sa’ li eskweel, malaj yoklaak. Tenq’aheb’ chixtawb’al li hoonal chiru li kutan b’ar wi’ naru neke’tijok chiru li qaChoxahil Yuwa’. Ch’olob’ xyaalal chiruheb’ naq a’ yaal jo’q’e naru nokotijok chiru ut a’an junelik toorab’i.

• B’ichahomaq jun li b’ich na’aatinak chirix li tijok, maare “Natijok jun ch’ina al” (B’ichleb’aal choq’ reheb’ li Kok’al, 6–7). Seraq’i junaq hoonal b’ar wi’ li Dios xsume laa tij.

Salmos 77:12

“Najultiko’ we li xninqal ru xb’aanuhom li Qaawa’.”

Li loq’laj hu naru naxkawob’resi li qapaab’aal chirix li Jesukristo naq nokoxtenq’a chixjultikankil li “sachb’a-ch’oolej kixb’aanu junxil.”

Kok’ k’anjel naru chi b’aanumank

• Yaab’asi Salmos 77:12 reheb’ li kok’al ut ye reheb’ chan ru nakayal “xjultikankil li xninqal ru xb’aanuhom li Qaawa’,” jo’ ajwi’ li k’a’ru xb’aanuhom sa’ laa yu’am. Patz’ reheb’ li kok’al naq te’xyiib’ xjalam-uuch li k’a’ru xb’aanuhom a’an choq’ reheb’ re naq te’xjultika.

• K’uteb’ li jalam-uuch wankeb’ sa’ li hu a’in malaj sa’ Kim, Taaqehin—Choq’ reheb’ li komon ut li junkab’al re xjultikankil reheb’ li kok’al li seraq’ ak xe’xtzol sa’ li Najter Chaq’rab’ chirix li k’a’ru xninqal ru xb’aanuhom li Qaawa’ choq’ re lix tenamit. Patz’ reheb’ b’ar wan reheb’ li seraq’ a’in nawulak chiruheb’ ut k’a’ut.

reetalil li k‘utuk

Xk’utb’al li tzol’leb’: Kok’al ak ninqeb’

Salmos 51

Li jalb’a-k’a’uxlej a’an xjalajik li ch’oolej.

Sa’ Salmos 51 wankeb’ naab’al li na’leb’ chirix li jalb’a-k’a’uxlej. Chan ru taatenq’aheb’ li kok’al chixk’eeb’aleb’ reetal li na’leb’ a’an?

Kok’ k’anjel naru chi b’aanumank

• K’e re li junjunq chi kok’al jun raqal re li loq’laj hu li wankeb’ sa’ li perel re kok’ k’anjel re li xamaan a’in. Patz’ reheb’ naq te’xsik’ aatin li tixk’ut junaq na’leb’ chiruheb’ chirix li jalb’a-k’a’uxlej. Kanab’eb’ chixtz’iib’ankil li aatin a’an chiru li pizarron. Chirix naq chixjunileb’ xe’xwotz lix na’leb’, patz’ reheb’ li kok’al chan raj ru te’xsume li patz’om a’in re junaq ramiiweb’: “K’a’ru naraj naxye li jalb’a-k’a’uxlej?”

• Yiib’ xjalam-uuch jun aamej chiru li pizarron. Patz’ reheb’ li kok’al naq te’xye junjunq li maak nokoraale chixb’aanunkil laj Satanas. Tz’iib’aheb’ li maak a’an sa’ li aamej chiru li pizarron. Patz’ reheb’ li kok’al naq te’xsik’ li aatin ch’oolej sa’ Salmos 51:12, 19. K’a’ru neke’xk’ut li raqal a’an chiqu chirix li jalb’a-k’a’uxlej? (chi’ilmanq ajwi’ li raqal 8). Tenq’aheb’ li kok’al chixtawb’al ru naq, us ta naqakanab’ li maakob’k, li qaam tento taajalaaq re naq a’anaq tz’aqal li jalb’a-k’a’uxlej. Patz’ reheb’ li kok’al naq te’xsachb’esi li maak sa’ li aamej chiru li pizarron ut te’xtz’iib’a li ak’ aatin chirix lix jalajik li qach’ool naq naqajal qak’a’uxl. Wotz xnawom aach’ool naq li Dios naru naxk’e qe “jun tiikil ch’oolej ut saq ru” naq naqajal qak’a’uxl (raqal 12).

Salmos 66:16; 77:12; 78:7

“Najultiko’ we li xninqal ru xb’aanuhom li Qaawa’.”

Eb’ laj Israelita ke’xk’uteb’ li sachb’a-ch’oolej chiruheb’ li ralal xk’ajol li kixb’aanu li Dios choq’ reheb’ re naq eb’ li kok’al “kawaqeb’ xch’ool rik’in li Dios” (Salmos 78:7).

Kok’ k’anjel naru chi b’aanumank

• Patz’ reheb’ li kok’al naq te’xwotz junjunq reheb’ li seraq’ neke’wulak chiru sa’ li loq’laj hu (eb’ li jalam-uuch sa’ li Hu reheb’ li Jalam-uuch re li Evangelio naru naxtenq’aheb’ chixjultikankileb’ li seraq’). K’a’ut naq nawulak chiruheb’ li seraq’ a’an? K’a’ru neke’xk’ut chiqu li seraq’ a’an chirix li Qaawa’? Ilomaq Salmos 77:12; 78:7. K’a’ut naq aajel ru naq “najultiko’ we li xninqal ru xb’aanuhom li Qaawa’ ”?

• Patz’ reheb’ li kok’al naq te’ril Salmos 66:16 ut te’xk’oxla malaj te’xtz’iib’a xsumenkil li patz’om, “K’a’ru xb’aanuhom li Qaawa’ choq’ re li waam?” Chirix a’an, kanab’eb’ chixwotzb’al lix sumehomeb’, wi neke’raj. K’a’ru naru naqab’aanu re “naq junelik taajultijo’q” qe (Moroni 4:3; 5:2) li k’a’ru xb’aanuhom li Qaawa’ choq’ qe?

Salmos 86:5, 13, 15

Li Qaawa’ naraj kuyuk maak.

Naq nokomaakob’k, laj Satanas naraj naq taqak’oxla naq maajun wa tixkuy qamaak li Qaawa’. Tenq’aheb’ li kok’al chixkawob’resinkil lix paab’aaleb’ naq li Qaawa’ a’an “aj kuyul maak; ut maaka’ch’in xnimal li ruxtaan” (Salmos 86:5).

Kok’ k’anjel naru chi b’aanumank

• K’ut junaq xjalam-uuch li Kolonel (maare li wan sa’ Kim, Taaqehin—Choq’ reheb’ li komon ut li junkab’al), ut patz’ reheb’ li kok’al k’a’ raj chi aatinul te’roksi re aatinak chirix. Patz’ reheb’ naq te’xsik’ aatin li neke’aatinak chirix a’an sa’ Salmos 86:5, 13, 15. Wi na’ajman ru, tenq’aheb’ chixtawb’aleb’ ru li aatin a’an. K’a’ raj ru taqaye re junaq qamiiw li nareek’a naq li Dios yoo xjosq’il rik’in xb’aan naq namaakob’k?

• B’ichahomaq jun li b’ich li taatenq’anq reheb’ chixtawb’al ru naq li Kolonel nakuyuk maak, maare “Sachso ninkana” (Eb’ li B’ich, 118). Wotz lix nawom aach’ool naq li Jesukristo naraj xkuyb’al qamaak.

reetalil li tzolok

Xb’oqb’aleb’ chi tzolok sa’ kab’l

Patz’ re chixjunileb’ li kok’al naq te’xye k’a’ut naq neke’xra li qaChoxahil Yuwa’ ut li Jesukristo. Waklesi xch’ooleb’ chixwotzb’al a’an rik’in junaq komon sa’ lix junkab’aleb’. Ch’olob’ xyaalal naq li raatineb’ taarosob’tesi li kristiaan a’an.

Xkawresinkil qib’ jo’ aj k’utunel

Ye reheb’ lix chaab’ilal. “Wi eb’ li saaj neke’reek’a naq nakawil xchaab’ilaleb’, taanimanq lix kawailal xch’ooleb’ chirix lix choxahil eechanihom. … Ye reheb’ rik’in rahok naq nakanaw naq naru te’xteneb’ rib’ chi tzolok” (Li k’utuk jo’ li Kolonel, 28).

perel re kok’ k’anjel: Naq ninb’aanu li k’a’ru ink’a’ us, li Jesukristo naru nikinixtenq’a chi jalaak