li Jesus nab’eek rik’ineb’ li karneer

Na’ilok we Jehova, xb’aan laj Yongsung Kim, havenlight.com

8–14 agosto

Salmos 1–2; 8; 19–33; 40; 46

“Li Qaawa’ a’an laj k’aak’alehom we”

Sa’ li tusleb’ aatin a’in wankeb’ junjunq li xchaq’al ru raqal re Salmos li taarosob’tesiheb’ li kok’al, a’b’an moko ka’ajwi’ ta a’an naru nakawoksi. Taaqe lix b’eresihom li Musiq’ej.

Tz’iib’a li nakak’oxla

reetalil li wotzok

Xkanab’ankileb’ chi wotzok

Wiib’ oxib’ kutan rub’elaj, patz’ reheb’ junjunq li kok’al naq te’xk’am chaq jalam-uuch li te’reetali li k’a’aq re ru xe’ril a’an ut eb’ lix junkab’al sa’ Salmos chiru li xamaan a’in, maare jun aj ilol karneer (chi’ilmanq Salmos 23:1), jun li sek’ (chi’ilmanq Salmos 23:5), malaj jun li aamej (chi’ilmanq Salmos 24:4). Patz’ reheb’ naq te’aatinaq chirix lix jalam-uucheb’ ut li raqal b’ar natawman a’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Salmos 19:1; 33:5

“Li choxa naxye resil xloq’al li Qaawa’.”

Salmos 19 ut 33 nekexk’ut naq naru naqataw reetalil lix loq’al ut lix chaab’ilal li Dios sa’ qasutam rik’in rilb’al xchaq’alil ru lix yo’ob’tesihom. Tenq’aheb’ li kok’al chixtzolb’al rilb’al li ruq’ li Dios sa’ li ruchich’och’ wan chixsutameb’.

Kok’ k’anjel naru chi b’aanumank

• K’ut chiruheb’ li kok’al junjunq xjalam-uuch li xchaq’al ru k’a’aq re ru xyo’ob’tesi li Dios, malaj ilonqex sa’ li ventaan re rilb’aleb’ li k’a’aq re ru a’an. Patz’ reheb’ li kok’al k’a’ru nawulak chiruheb’ sa’ xyanq chixjunil lix yo’ob’tesihom li qaChoxahil Yuwa’. Yaab’asi Salmos 19:1 malaj 33:5, ut patz’ reheb’ li kok’al k’a’ru neke’reek’a chirix li qaChoxahil Yuwa’ naq neke’ril lix yo’ob’tesihom.

• B’ichahomaq jun li b’ich na’aatinak chirix lix yo’ob’tesihom li Dios, maare “Li ch’och’ ch’ina-us” (B’ichleb’aal choq’ reheb’ li Kok’al, 123). Patz’ reheb’ li kok’al naq te’xsik’ ru jun reheb’ lix yo’ob’tesihom li Dios (maare k’a’ru yeeb’il sa’ li b’ich) ut te’xyiib’ xjalam-uuch re te’xwotz rik’ineb’ lix junkab’al.

Salmos 23

“Li Qaawa’ a’an laj k’aak’alehom we.”

Wi eb’ li kok’al sa’ xka’ch’inaleb’ neke’xtzol naq li Qaawa’ a’an laj k’aak’alehom reheb’, anchal chik naq te’xtaaqe “sa’ li tiikil b’e.”

Kok’ k’anjel naru chi b’aanumank

• Ke’ reheb’ chixjunil li kok’al li perel re kok’ k’anjel re li xamaan a’in chiru jun perel li hu. Patz’ reheb’ naq te’ab’inq naq taawil ru Salmos 23. Patz’ reheb’ naq te’xye malaj te’xk’ut jun jalam-uuch naq te’rab’i naq nayeeman sa’ li salmo. Wotz lix nawom aach’ool naq li Jesus nokoxk’aak’ale, jo’ naq laj ilol karneer narileb’ li karneer.

• Ch’olob’ chiruheb’ li kok’al chan ru nakanaw naq li Kolonel nokoxra. Patz’ reheb’ li kok’al naq te’xaqliiq chi junjunqal ut te’xwotz chan ru neke’xnaw naq neke’rahe’ xb’aan li Jesus. B’ichahomaq jun li b’ich li naru naxk’e xna’leb’eb’, maare “Ninnaw naq raab’ilin” (B’ichleb’aal choq’ reheb’ li Kok’al, 42─43).

Salmos 30:6

Li Jesukristo naru naxq’ajsi li rahil ch’oolejil choq’ sahil ch’oolejil.

K’oxla chan ru taatenq’aheb’ li kok’al chixtawb’al xnawomeb’ xch’ool chirix li sahil ch’oolejil naxyeechi’i qe li Jesukristo naq ra qach’ool.

Kok’ k’anjel naru chi b’aanumank

• Patz’ reheb’ li kok’al naq te’xpak’ xyaab’ naq taawil Salmos 30:6, “Ewu taawanq yaab’ak.” Chirix a’an patz’ reheb’ naq te’saho’q xch’ool naq taawil: “A’b’an eq’la a’ chik li sahil ch’oolej.” K’iilasuti li ch’ol aatin a’an ut ch’olob’ chiruheb’ li kok’al naq sa’ xk’ab’a’ li Jesukristo, li rahil ch’oolejil naqeek’a sa’ li yu’am a’in naru najale’ ru rik’in sahil ch’oolejil.

• K’ut jun xjalam-uuch li Kolonel ut seraq’i reheb’ li kok’al junjunq reheb’ li k’a’aq re ru xb’aanuhom choq’ aawe li neke’xk’e xsahil aach’ool. K’e xhoonaleb’ chixjunileb’ li kok’al chixchapb’al li jalam-uuch ut te’xwotz k’a’ru xb’aanuhom li Jesus choq’ reheb’ li naxk’e xsahil xch’ooleb’.

reetalil li k‘utuk

Xk’utb’al li tzol’leb’: Kok’al ak ninqeb’

Salmos 23; 27–28; 32; 46

Li Qaawa’ naxk’e xtuqub’ankil inch’ool, inmetz’ew, ut xk’amb’al inb’e.

Naab’aleb’ re li Salmo neke’xch’olob’ xyaalal li rosob’tesihom li Qaawa’ sa’ li qayu’am. Naru nakawoksi Salmos re xtenq’ankileb’ li kok’al chixtzolb’al xkanab’ankil rib’ sa’ ruq’ a’an ut chi sutq’iik rik’in a’an.

Kok’ k’anjel naru chi b’aanumank

• Tz’iib’a chiru li pizarron Li Qaawa’ a’an . Kanab’eb’ li kok’al chixsik’b’al ru jun reheb’ li raqal a’in re te’ril: Salmos 23:1; 27:1; 28:1; 28:7; 32:7; 46:1. Patz’ reheb’ naq te’xtz’aqob’resi ru li ch’ol aatin chiru li pizarron rik’in li neke’xtzol sa’ li loq’laj hu. Tenq’aheb’ li kok’al chixtz’ilb’al rix k’a’ru neke’xk’ut chiqu li eetalil a’in chirix li Qaawa’.

• K’ut chiruheb’ li kok’al jun xjalam-uuch jun karneer. Patz’ reheb’ naq te’xye junjunq k’a’aq re ru neke’raj ru li karneer re naq us wanqeb’ ut kawaqeb’, ut waklesi xch’ooleb’ chixsik’b’al xna’leb’eb’ sa’ Salmos 23:1–4. Chirix a’an k’ut xjalam-uuch jun ch’ina al. K’a’ru naqaj ru re naq us wanqo ut kawaqo sa’ musiq’ej? Ilomaq Salmos 23, ut patz’ reheb’ li kok’al chan ru naq li k’a’ru naxb’aanu laj ilok karneer chanchan chik li naxb’aanu li Jesukristo choq’ qe.

santil ochoch re Concepción Chile

Tento naq saqaq qu sa’ musiq’ej re ok chiru rilob’aal li Qaawa’.

Salmos 24:3–5

Naru neke’ok sa’ li santil ochoch, “ka’ajwi’ li saq ru li ruq’ ut saq ru xch’ool.”

Naq eb’ li kok’al te’royb’eni li hoonal naq te’ok sa’ li santil ochoch, tenq’aheb’ chixtawb’al ru naq naru neke’xkawresi rib’ wi neke’xsaqob’resi rib’ sa’ musiq’ej rik’in lix tojb’al rix li maak xb’aan li Kolonel.

Kok’ k’anjel naru chi b’aanumank

• K’ut chiruheb’ li kok’al jun xjalam-uuch li santil ochoch. Patz’ reheb’ naq te’ril Salmos 24:3 ut te’xtaw aatin ut ch’ol aatin li tixjultika li santil ochoch reheb’. Chirix a’an, ilomaq li raqal 4 re xnawb’al ani naru na’ok sa’ li santil ochoch (ch’olob’eb’ li aatin ch’a’aj xtawb’al ru). Chan ru naq neke’tz’ajno’ li quq’? Chan ru naq neke’tz’ajno’ li quq’ ut li qaam sa’ musiq’ej? Chan ru neke’qach’aj li quq’? Chan ru nokoxtenq’a li Kolonel chixch’ajb’al li quq’ ut li qaam sa’ musiq’ej? (Wi nak’anjelak, ch’olob’ naq li “uq’ej” sa’ li raqal a’in naru neke’reetali li k’a’ru naqab’aanu ut li “ch’oolej” naru nareetali li k’a’ru naqaj).

• Il rik’ineb’ li kok’al k’a’ru na’ajman re xk’ulb’al jun li recomendacion re li santil ochoch (chi’ilmanq Russell M. Nelson, “Aatin re xraqb’al li jolomil ch’utub’aj-ib’,” Jolomil ch’utub’aj-ib’ re octubre 2019; malaj patz’ re junaq komon re li obispil naq taa’aatinaq chirix li k’a’ru na’ajman sa’ li tzoleb’aal). Patz’ reheb’ li kok’al naq te’xsik’ ru junaq k’a’aq re ru li te’reek’a naq tento te’xb’aanu re xkawresinkileb’ rib’ re naq saqaqeb’ xch’ool re ok sa’ li santil ochoch.

Salmos 46:11

“Chʼanchʼo chexwanq, ut chenaw naq laaʼin li Dios.”

Li wank rik’in oxloq’ ut chi ch’anch’o, us ta xiikil li choqink sa’ qasutam, naru nokoxtenq’a chixkab’lankil lix nawom qach’ool naq li Dios yo’yo.

Kok’ k’anjel naru chi b’aanumank

• Tenq’aheb’ li kok’al chixkanab’ankil sa’ xk’a’uxleb’ li xb’een raqal sa’ Salmos 46:11: “Chexwanq chi ch’anch’o ut chek’e reetal naq laa’in li Dios.” Aatinan rik’ineb’ chirix li maare naraj naxye “wank chi ch’anch’o,” maare sa’ tib’elej malaj sa’ k’a’uxlej. Wotz rik’ineb’ li kok’al resil junaq hoonal b’ar wi’ naq li wank “chi ch’anch’o” kixkawob’resi lix nawom aach’ool chirix li qaChoxahil Yuwa’. Patz’ reheb’ li kok’al naq te’xwotz ajwi’ xnumsihomeb’ a’an. K’a’ut naq toj aajel ru a’an re xnawb’al naq li Dios yo’yo?

• Patz’ reheb’ li kok’al naq te’xseraq’i aawe k’a’ru neke’xb’aanu chiru li kutan. Tenq’aheb’ chixk’oxlankileb’ li hoonal b’ar wi’ naru neke’xyal wank “chi ch’anch’o” ut reek’ankil naq nach’ wankeb’ rik’in li qaChoxahil Yuwa’. Waklesi xch’ooleb’ chixk’eeb’al junaq xmeta re naq te’roksi li hoonal a’an chiru li xamaan chal re, re xkawob’resinkil lix paab’aaleb’ chirix li qaChoxahil Yuwa’.

• Patz’ reheb’ li kok’al naq te’xtz’iib’a junjunq reheb’ li k’a’aq re ru naru neke’qab’aanu re xnawb’al qajunes naq li qaChoxahil Yuwa’ yo’yo ut naq nokoxra. Patz’ reheb’ naq te’xsik’ ru junaq reheb’ li na’leb’ xe’xtz’iib’a ut te’xb’aanu.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xsik’ ru jun li raqal nawulak chiruheb’ sa’ Salmos li xex’aatinak wi’ anajwan. Waklesi xch’ooleb’ chixwotzb’al li raqal a’an rik’in junaq komon sa’ lix junkab’aleb’ malaj junaq ramiiweb’.

Xkawresinkil qib’ jo’ aj k’utunel

K’e reetal k’a’ru neke’raj ru li kok’al. Jo’ aj k’utunel, tento naq taak’e reetal chi us k’a’ru neke’raj ru li kok’al. Laa nawom ut li k’a’ru nakanaw chirixeb’ li kok’al ut lix b’eresihom li Musiq’ej tate’xtenq’a chixnawb’al k’a’ru taab’aanu re xtenq’ankileb’ li kok’al chixkawob’resinkil lix paab’aaleb’ chirix li qaChoxahil Yuwa’ ut li Jesukristo.

perel re kok’ k’anjel: “Li Qaawa’ a’an laj k’aak’alehom we”