xEster natijok

Li xEster, xb’aan laj James Johnson

25–31 julio

Ester

“Xatwulak … re qatenq’ankil sa’ li rahilal a’in”

Chixjunil li loq’laj hu neke’xch’olob’ xyaalal li Jesukristo. K’oxla chan ru taatenq’aheb’ li kok’al chirilb’al lix wankil li Kolonel sa’ li seraq’ chirix xEster.

Tz’iib’a li nakak’oxla

reetalil li wotzok

Xkanab’ankileb’ chi wotzok

Numsi reheb’ li kok’al jun xjalam-uuch xEster (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Naq eb’ li kok’al te’xchap li jalam-uuch, patz’ reheb’ naq te’xwotz li neke’xnaw chirix xEster.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Ester 2:5–7

Naru nink’anjelak chiru lin junkab’al.

Naq eb’ lix na’ xyuwa’ xEster ke’kam, kikana rik’in laj Mardokeo, li rikan. Naru nakawoksi li k’a’ru kixnumsi re tat-aatinaq chirix li k’anjelak chiruheb’ li komon sa’ li qajunkab’al.

Kok’ k’anjel naru chi b’aanumank

• Chiru li pizarron, yiib’eb’ xjalam-uuch kok’ k’a’aq re ru li te’reetali xEster, lix na’ xyuwa’, ut laj Mardokeo, li rikan. Ch’olob’ naq eb’ lix na’ xyuwa’ xEster ke’kam, xb’aan a’an naq xEster kiraj ru jun li kristiaan li taa’iloq re. Yaab’asi Ester 2:7 reheb’ li kok’al ut patz’ reheb’ naq te’rab’i k’a’ru kixb’aanu laj Mardokeo. Tenq’aheb’ li kok’al chixk’oxlankil k’a’ raj ru li maare te’raj ru lix junkab’al b’ar wi’ te’ruuq chi tenq’ank li kok’al.

• Patz’ reheb’ junjunq li kok’al naq te’xk’utb’esi junaq chaab’il tenq’ank li naru neke’xb’aanu choq’ re junaq komon sa’ lix junkab’aleb’, ut patz’ reheb’ lix komon naq te’xq’ehi k’a’ru yookeb’ chixb’aanunkil. Patz’ reheb’ naq te’aatinaq chirix k’a’ru neke’xb’aanu re rosob’tesinkileb’ lix junkab’al ut seraq’i ajwi’ k’a’ru nakab’aanu laa’at.

• B’ichahomaq jun li b’ich chirix xtenq’ankileb’ li qajunkab’al, maare “Naq yooko chi tenq’ank” (B’ichleb’aal choq’ reheb’ li Kok’al, 108). Ch’olob’ xyaalal naq lix tenq’ankil li qajunkab’al naxk’e xsahil qach’ool.

Ester 4:15–16

Naru ninwan chi kaw inch’ool.

Eb’ li kok’al te’xnumsi hoonal b’ar wi’ te’raj ru xtenq’ li Qaawa’ re naq te’kawuuq xch’ool. Chan ru taatenq’aheb’ chixtzolb’al li kixb’aanu xEster re xk’utb’al xkawil xch’ool?

Kok’ k’anjel naru chi b’aanumank

• Ma neke’xnaw li kok’al k’a’ru naraj naxye li wank chi kaw li ch’oolej? Ch’olob’ naq “li wank chi kaw li ch’oolej naraj naxye xb’aanunkil li us maak’a’ naxye wi wan li qaxiw.” Wotz li seraq’ chirix xEster (chi’ilmanq “Ester” sa’ Relatos del Antiguo Testamento), ut tenq’aheb’ li kok’al chirilb’al lix kawil xch’ool xEster. Kanab’eb’ li kok’al chiroksinkileb’ li kok’ jalalm-uuch wan sa’ li perel re kok’ k’anjel re li xamaan a’in re naq te’xwotz wi’chik li seraq’.

• K’ut jun xjalam-uuch xEster (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). B’ichahomaq junaq li b’ich na’aatinak chirix li kawil xch’oolej, maare “Kawaq inchʼool” (B’ichleb’aal choq’ reheb’ li Kok’al, 85). Wotzeb’ li aatin neke’aatinak chirix xEster ut ch’olob’ xyaalal naq li Kolonel naru naxtenq’aheb’ li kok’al chi wank chi kaweb’ xch’ool.

• Wotz rik’ineb’ li kok’al resileb’ li hoonal b’ar wi’ li Jesukristo kiwan chi kaw xch’ool; naq kixnumsi rahilal sa’ xk’ab’a’ li qamaak sa’ Getsemani ut chiru li krus (chi’ilmanq Mateo 26:36–39; 27:33–35). Patz’ reheb’ li kok’al naq te’xseraq’i junaq hoonal b’ar wi’ xe’wan chi kaw xch’ool (maare taawaatinaheb’ junjunq li junkab’al chi rub’elaj re xpatz’b’al reheb’ junjunq li eetalil). K’a’ru xtenq’ank reheb’ chi wank chi kaweb’ xch’ool? Ye reheb’ li kok’al chan ru naq li Qaawa’ nakatxtenq’a chi wank chi kaw aach’ool naq wan aaxiw?

  xEster ut li rey

  Li xEster chiru li rey, xbʼaan li xMinerva K. Teichert

reetalil li k‘utuk

Xk’utb’al li tzol’leb’: Kok’al ak ninqeb’

Ester 4:14

Naru tinwanq choq’ k’anjeleb’aal sa’ ruq’ li Dios.

Naq xEster kixuwak, kiwaklesiik xch’ool xb’aan laj Mardokeo ut kixk’ut chiru naq maare li Qaawa’ kixk’e choq’ xna’eb’ li tenamit “anajwan” (Ester 4:14). K’oxla chan ru naq li Qaawa’ yoo chixkawresinkileb’ li kok’al re naq te’ruuq chirosob’tesinkileb’ li ras riitz’in.

Kok’ k’anjel naru chi b’aanumank

• Patz’ re junaq kristiaan naq taawulaq chixtoch’b’al junaq li b’ich choq’ reheb’ li kok’al sa’ junaq k’anjeleb’aal, malaj k’ut xjalam-uuch junaq kristiaan naq naxtoch’ junaq k’anjeleb’aal. Ch’olob’ k’a’ru naraj naxye wank choq’ k’anjeleb’aal sa’ ruq’ li Dios. Il li seraq’ chirix xEster rik’ineb’ li kok’al (chi’ilmanq “Ester” sa’ Relatos del Antiguo Testamento), ut patz’ reheb’ naq te’xye chan ru naq xEster kiwan jo’ jun k’anjeleb’aal re naq li Qaawa’ tixtz’aqob’resi ru li rajom. Chan ru toowanq choq’ k’anjeleb’aal sa’ ruq’ li Qaawa’?

• Chirix rilb’al li seraq’ chirix xEster, tz’iib’a xk’ab’a’eb’ li kristiaan re li seraq’ chiru kok’ hu ut latz sa’ xxaal rixeb’ li kok’al. Patz’ reheb’ li kok’al naq te’xyal xq’ehinkil ani aj k’ab’a’ li wank xxaal rixeb’ rik’in roksinkileb’ patz’om jo’ “Ma tiik xch’ool li kristiaan a’an?” malaj “Ma ixq li kristiaan a’an?” Chirix a’an, yehomaq chan ru naq laj Mardokeo ut xEster ke’wan jo’ k’anjeleb’aal choq’ re li Qaawa’ re xkolb’aleb’ rix laj Judio.

Ester 3:1–11; 4:10–17

Li qaChoxahil Yuwa’ naxk’e xkawil inch’ool naq wan inxiw.

Ma aawilomeb’ li kok’al chi kaweb’ xch’ool? Ma naru nakawotz jun seraq’ chirix junaq hoonal b’ar wi’ xawaj ru xtenq’ li Qaawa’ re taakawuuq aach’ool?

Kok’ k’anjel naru chi b’aanumank

• Tz’iib’a chiru li pizarron Laj Mardokeo kixk’ut xkawil xch’ool naq … ut Li xEster kixk’ut xkawil xch’ool naq … Patz’ re junjunqeb’ li kok’al naq te’ril Ester 3:1–11 ut lix komoneb’ chik te’ril Ester 4:10–17. Patz’ reheb’ naq te’roksi li xe’ril re xtz’aqob’resinkileb’ ru li ch’ol aatin chiru li pizarron. Chirix a’an tz’iib’a Tink’ut xkawil inch’ool naq … ut patz’ reheb’ li kok’al naq te’xtz’iib’a li k’a’aq re ru naraj li qaChoxahil Yuwa’ naq te’xb’aanu ut li naraj kawil ch’oolej. Chan ru naru nokowan jo’ laj Mardokeo ut xEster?

• Patz’ reheb’ li kok’al naq te’xk’oxla li hoonal neke’xnumsi b’ar wi’ maare ch’a’aj xb’aanunkil li us. Tz’iib’a chiru li pizarron li raatin xEster: “Laa’in tinwulaq rik’in li rey, …ut wi tine’xkamsi, kamqin” (Ester 4:16). Tenq’aheb’ li kok’al chiroksinkil li raatin xEster choq’ reheb’ rik’in xjalb’al ru “Laa’in tinwulaq rik’in li rey” rik’in junaq na’leb’ ch’a’aj te’xb’aanu a’b’an chaab’il. Chirix a’an patz’ reheb’ naq te’xjal ru “tine’xkamsi” rik’in li k’a’ru maare ink’a’ raj us taachalq xb’aan xb’aanunkil li us. K’a’ut naq chaab’il xb’aanunkil li us, us ta wan li k’a’ru ink’a’ us nachal?

Ester 4:1–3, 10–17

Li kuyuk sa’ naru nikinixtenq’a ut narosob’tesiheb’ li was wiitz’in.

Sa’ li hoonal re ajok-u, xEster ut eb’ laj Judio ke’xkuy xsa’. Chan ru taatenq’aheb’ li kok’al chixtawb’aleb’ ru li musiq’ejil osob’tesiik neke’chal xb’aan li kuyuk sa’?

Kok’ k’anjel naru chi b’aanumank

• Patz’ reheb’ li kok’al naq te’xtz’iib’a li k’a’aq re ru li te’xkuy raj wi’ xsa’ (wi na’ajman ru, naru neke’ril “Ayuno y ofrendas de ayuno” sa’ Leales a la Fe, 23–26). Chirix a’an patz’ reheb’ naq te’ril Ester 4:1–3, 10–17 re xnawb’al k’a’ut naq eb’ laj Judio ut xEster ke’xkuy xsa’. Waklesi xch’ooleb’ li kok’al chixk’oxlankil k’a’ raj ru li maare te’raj wi’ xtenq’ li Qaawa’ ut ye reheb’ naq naru te’xkuy xsa’ chirix a’an sa’ li domingo re kuyuk sa’.

• Patz’ reheb’ li kok’al naq te’xtzol chan raj ru te’xch’olob’ chiru junaq ramiiweb’ k’a’ut naq neke’xkuy xsa’. K’a’ raj ru te’xye? Ye reheb’ naq te’xik sa’ li K’utul Raqal reheb’ li Loq’laj Hu ut te’ril “Kuyuk sa’ ” wi neke’raj xtenq’ankil. Wotz junaq aanumsihom b’ar wi’ xakuy aasa’ re xk’ulb’al xtenq’ li Qaawa’. Patz’ reheb’ li kok’al naq te’xwotz xnumsihomeb’ rik’in li kuyuk sa’.

reetalil li tzolok

Xb’oqb’aleb’ chi tzolok sa’ kab’l

B’ichahomaq jun li b’ich na’aatinak chirix jun na’leb’ xetzol sa’ li kutan a’in (chi’ilmanq li tusleb’aal na’leb’ sa’ li B’ichleb’aal choq’ reheb’ li Kok’al re xtawb’al eena’leb’). Patz’ reheb’ li kok’al naq te’xb’icha li b’ich a’an rik’ineb’ lix junkab’al.

Xkawresinkil qib’ jo’ aj k’utunel

Yu’ami li nakak’ut. Wan xwankil li nakak’ut wi nakawotz xnawom aach’ool chirixeb’ li osob’tesihom neke’k’ulman sa’ xyu’aminkil li evangelio. Naq yooqat chixsik’b’aleb’ ru li na’leb’ li taak’ut chiruheb’ li kok’al, k’oxla chan ru naru nakayu’amiheb’ li na’leb’ a’an chi chaab’il wi’chik. (Chi’ilmanq Li k’utuk jo’ li Kolonel, 13–14.)

perel re kok’ k’anjel: Naru ninwan chi kaw inch’ool