laj David sa’ xb’een li k’ojarib’aal

Laj David sa’ xb’een li k’ojarib’aal, xb’aan laj Jerry Miles Harston

20–26 junio

2 Samuel 5–7; 11–12; 1 Reyes 3; 8; 11

“Laa k’ojarib’aal k’ojk’ooq sa’ xna’aj chi junelik”

Naq nakawil li loq’laj hu, li Santil Musiq’ej tixk’e aana’leb’ ut tatxmusiq’a chixnawb’al k’a’ru li taawanq xyaalal choq’ reheb’ li kok’al.

Tz’iib’a li nakak’oxla

reetalil li wotzok

Xkanab’ankileb’ chi wotzok

Patz’ reheb’ li kok’al naq te’aatinaq chirix xnumsihomeb’ naq neke’ril li loq’laj hu (sa’ junesal, sa’ xjunkab’aleb’, malaj sa’ li iglees). Jo’q’e ut b’ar neke’ril li loq’laj hu? K’a’ru neke’reek’a naq neke’ril li loq’laj hu? K’a’ru li osob’tesiik neke’xk’ul xb’aan xpaab’ankil li taqlahom a’in?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

2 Samuel 5:19, 23

Wi nawaj inb’eresinkil, naru ninpatz’ re li qaChoxahil Yuwa’.

Eb’ li raqal a’in neke’xch’olob’ chan ru naq laj David kitijok re xpatz’b’al xb’eresinkil ut xk’amb’al xb’e jo’ rey re Israel. Chan ru taawaklesi xch’ooleb’ li kok’al re naq te’xsik’ li Dios sa’ li tij naq te’raj ru xtenq’ankil?

Kok’ k’anjel naru chi b’aanumank

• Ch’olob’ chiruheb’ li kok’al naq sa’ li hoonal naq laj David naraj ru xtenq’ankil, “kipatz’ok” malaj kitijok re xtawb’al xsumenkil. Naq taayaab’asi 2 Samuel 5:19, 23, patz’ reheb’ li kok’al naq te’rab’i li aatin “kipatz’ok” ut te’xq’alu lix tel naq te’rab’i. Ch’olob’ xyaalal naq junelik naru nokotijok chiru li qaChoxahil Yuwa’ naq naqaj qatenq’ankil.

• Re xtenq’ankileb’ li kok’al chixk’oxlankil k’a’ raj ru te’xye naq te’tijoq, patz’ reheb’ chan raj ru te’xtz’aqob’resi ru li ch’ol aatin: “Naqab’antioxi aawe …” ut “Naqatz’aama aawe …” Patz’ reheb’ naq te’xyiib’ xjalam-uuch li k’a’ru raj te’xb’aanu re b’antioxink malaj patz’ok sa’ li tij.

  jun ixqa’al natijok

  Naru nokotijok chiru li qaChoxahil Yuwa’ re xk’ulb’al qatenq’ankil ut qab’eresinkil.

• Wotz rik’ineb’ li kok’al resil junaq hoonal b’ar wi’ xattijok re xpatz’b’al aatenq’ankil re li qaChoxahil Yuwa’. Chan ru xsume laa tij? Ma chaab’il xab’aanu xb’aan naq a’an xatxtenq’a? Patz’ reheb’ li kok’al naq te’xwotz xnumsihomeb’ a’an.

2 Samuel 7:16

Li Jesukristo a’an Rey chiqu.

Naq laj David a’an li rey re Israel, li Qaawa’ kixye re naq “lix k’ojarib’aal k’ojk’ooq sa’ xna’aj chi junelik” (2 Samuel 7:16). Li yeechi’ihom a’an, a’an li Jesukristo , li qajunelikil rey, li kiyo’la sa’ xyanqeb’ li ralal xk’ajol laj David.

Kok’ k’anjel naru chi b’aanumank

• Patz’ re jun reheb’ li kok’al naq taareetali jun li rey malaj ixqi rey. Wi naru, k’e re li ch’ina al kok’ k’a’aq re ru re naq tixchap. K’a’ru a’an jun li rey malaj ixqi rey? K’a’ru neke’xb’aanu? Ye reheb’ li kok’al naq laj David a’an jun li rey ut jun xxe’ xtoon li Jesukristo, li ani naqaye naq a’an li “Awa’b’ej sa’ xb’eeneb’ li awa’b’ej” (Apokalipsis 19:16). Tenq’aheb’ li kok’al chixk’oxlankil chan ru naru naqak’ut naq naqapaab’ naq li Jesukristo a’an li qajunelikil rey.

• Naq eb’ li kok’al te’xnujob’resi li perel re kok’ k’anjel re li xamaan a’in, b’ichahomaq malaj ab’ihomaq jun li b’ich li naxye naq li Kristo a’an li qarey, maare “B’oqb’ilo choq’ xmoos,” “Li Kristo wan choq’ rey” malaj “Ninpaab’ li Kristo” (B’ichleb’aal choq’ reheb’ li Kok’al, 159–160; Eb’ li B’ich, 33, 75). Patz’ reheb’ li kok’al naq te’rab’i li aatin “rey” ut te’xtaqsi chi kutankil jun xjalam-uuch li Jesus naq te’rab’i. K’a’ru naqeek’a naq nokob’ichan chirix li Jesus?

1 Reyes 8:57–58

Naru nikinb’eek sa’eb’ lix b’e li Dios.

Choq’ reheb’ laj Israelita, xyiib’ankil ut rosob’tesinkil li santil ochoch a’an jun hoonal re xq’ajsinkil li raameb’ rik’in li Qaawa’ ut xteneb’ankileb’ wi’chik rib’ “re naq te’wanq jo’ naraj” (1 Reyes 8:58). Chan ru taatenq’aheb’ li kok’al chi “wank jo’ naraj”?

Kok’ k’anjel naru chi b’aanumank

• K’ut chiruheb’ li kok’al xjalam-uuch jun santil ochoch toj ak’ ut ajwi’ li santil ochoch kixkab’la laj Salomon (chi’ilmanq li tusleb’ aatin re li xamaan a’in sa’ Kim,Taaqehin—Choq’ reheb’ li komon ut li junkab’al). Ch’olob’ naq sa’ li hoonal naq laj Salomon kixkab’la li santil ochoch choq’ reheb’ laj Israelita, kixwaklesi xch’ooleb’ “chi wank jo’ naraj li Qaawa’ ” (1 Reyes 8:58). Ch’olob’ chiruheb’ li kok’al chan ru naq neke’tenq’aak xb’aan li santil ochoch chi wank jo’ naraj li Qaawa’. Patz’ reheb’ li kok’al naq te’xwotz k’a’ru neke’reek’a chirix li santil ochoch. B’ichahomaq jun li b’ich chirix li santil ochoch, maare “Sa’ li santil ochoch” (B’ichleb’aal choq’ reheb’ li Kok’al, 99).

• K’e xjalam-uuch aamej reheb’ junjunq li kok’al ut re lix komoneb’ chik xjalam-uuch oqej chiru hu. Yaab’asi 1 Reyes 8:58 ut patz’ reheb’ li kok’al naq te’xtaqsi li aamej naq taaye li aatin “qach’ool” ut te’xtaqsi li oqej naq taaye “wank jo’ naraj.” Tenq’aheb’ li kok’al chixtawb’al ru naq nokowan jo’ naraj a’an naq naqataaqe li Jesus ut naqayal wulak jo’ a’an. Patz’ reheb’ li kok’al k’a’ru neke’xb’aanu re wank jo’ naraj li Kolonel. Naru nekeb’icha jun li b’ich chirix xtaaqenkil li Jesus, maare “Chinwanq raj joʼ li Jesus” (B’ichleb’aal choq’ reheb’ li Kok’al, 40–41).

reetalil li k‘utuk

Xk’utb’al li tzol’leb’: Kok’al ak ninqeb’

2 Samuel 7:16–17

Li Jesukristo a’an Rey chiqu.

Chixjunileb’ li rey li naqil resil sa’ li Najter Chaq’rab’ moko tz’aqaleb’ ta re ru ut ke’xk’ul li sachk—us ta jwal chaab’ileb’. A’b’an li rey kiyeeman naq taachalq sa’ xyanqeb’ li ralal xk’ajol laj David, a’ li Jesukristo, tz’aqal re ru ut taa’awa’b’ejinq chi junelik.

Kok’ k’anjel naru chi b’aanumank

• Patz’ reheb’ li kok’al naq te’ril k’a’ru kixye li profeet aj Natan re li rey aj David sa’ 2 Samuel 7:16–17, ut patz’ reheb’ k’a’ru neke’xk’oxla naq naraj naxye li profeetil aatin a’an. Chan raj ru naq maajun wa taa’oso’q li rawa’b’ejihom laj David? Tenq’aheb’ li kok’al chixtawb’aleb’ ut chirilb’aleb’ li raqal neke’xk’ut naq li Jesukristo, jun ralal xk’ajol laj David, a’an jun li rey, maare Lukas 1:32–33; Jwan 18:33–37; ut Apokalipsis 19:16. Chan ru naq li Jesukristo juntaq’eet rik’in jun li rey? Chan ru naru naqak’utb’esi naq li Jesukristo a’an li qajunelikil rey?

• B’ichahomaqeb’ junjunq li b’ich li neke’xye naq li Kristo a’an li qarey, maare “Chalqat, xReyeb’ li rey,” “Li Kristo wan choq’ rey,” malaj “Kristo, li tuulan xyo’la” (Eb’ li B’ich, 29, 33, 114). K’a’ru neke’xk’ut li b’ich a’in chirix li naraj naxye naq li Jesukristo a’an li qarey?

2 Samuel 11

Naru ninnumta sa’ xb’een li aaleek.

Eb’ li kok’al wan k’a’ru neke’xsik’ ru xb’aanunkil rajlal kutan, maare kok’eb’ a’b’an aajeleb’ ru. Chan ru taatenq’aheb’ chixtawb’al ru naq aajel ru xsik’b’al ru li us, us ta ch’a’aj?

Kok’ k’anjel naru chi b’aanumank

• Il 2 Samuel 11 aawochb’eeneb’ li kok’al ut aatinan chirix k’a’ru kixsik’ ru xb’aanunkil laj David. Patz’ reheb’ li kok’al k’a’ raj ru li us tento raj kixsik’ ru xb’aanunkil laj David. K’a’ru naru naqab’aanu naq noko’aaleek li naru nokoxtenq’a chixsik’b’al ru li us?

• Re xwotzb’al junaq seraq’ chirix junaq kristiaan li kinumta sa’ xb’een li aaleek, patz’ reheb’ li kok’al ma najultiko’ reheb’ li seraq’ chirix laj Jose ut li rixaqil laj Potifar (chi’ilmanq Genesis 39:7–12). Naru nakawil li seraq’ a’in rik’ineb’ li kok’al ut taatenq’aheb’ chixjuntaq’eetankil rik’in li seraq’ chirix laj David. K’a’ru naqatzol sa’ li seraq’ chirix laj David ut laj Jose chirix numtaak sa’ xb’een li aaleek?

reetalil li tzolok

Xb’oqb’aleb’ chi tzolok sa’ kab’l

Tenq’aheb’ li kok’al chixk’oxlankil k’a’ru te’xb’aanu re roksinkil sa’ xyu’ameb’ li k’a’ru xe’xtzol anajwan. Chirix a’an, waklesi xch’ooleb’ chixb’aanunkil.

Xkawresinkil qib’ jo’ aj k’utunel

Patz’ ma yookeb’ chixb’aanunkil li neke’xtzol. Naq taak’eheb’ xb’oqb’al li kok’al chi k’anjelak a’ yaal li neke’xtzol, sa’ li tzolok chal re, patz’ reheb’ chan ru naq xe’xk’anjela li b’oqb’ileb’ chixb’aanunkil. A’an naxk’ut chiruheb’ li kok’al naq laa’at nakawaj xnawb’al chan ru naq li evangelio yoo chirosob’tesinkil xyu’ameb’ a’an. Naq nakawotz aanumsihom, te’xkawob’resi rib’ ut te’xtenq’a rib’ chirib’ileb’ rib’ chixyu’aminkil li evangelio.

perel re kok’ k’anjel: Naru nikinb’eek sa’eb’ lix b’e li Dios