“13–19 junio. 1 Samuel 8–10; 13; 15–18: Li yalok, a’an re li Qaawa’,” Kim, Taaqehin—Choq’ re li Tzoleb’aal reheb’ li Kok’al: Li Najter Chaq’rab’ 2022 (2021)
“13–19 junio. 1 Samuel 8–10; 13; 15–18,” Kim, Taaqehin—Choq’ re li Tzoleb’aal reheb’ li Kok’al: 2022
Laj David ut laj Goliat, xb’aan laj Steve Nethercott
13–19 junio
1 Samuel 8–10; 13; 15–18
Li yalok, a’an re li Qaawa’
Us ta eb’ li kok’ k’anjel a’in k’uub’anb’ileb’ choq’ reheb’ li kok’al toj kok’eb’ malaj ninqeb’, naru nakawoksi a’ yaal b’ar wan reheb’ re xtenq’ankileb’ li kok’al.
Tz’iib’a li nakak’oxla
Xkanab’ankileb’ chi wotzok
K’ut lix jalam-uuch laj David ut laj Goliat li wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al naq te’xwotz li neke’xnaw chirix li seraq’, ut oksiheb’ patz’om li tixtenq’aheb’ chixjultikankil b’ayaq chik xcha’al li seraq’.
Xk’utb’al li tzol’leb’: Kok’al toj ka’ch’ineb’ xyu’am
Li Qaawa’ naxnaw k’a’ru wan sa’ li waam.
Xwotzb’al li seraq’ naq li Qaawa’ kixye re laj Samuel naq tixsik’ ru laj David jo’ rey naru naxtenq’aheb’ li kok’al chixnawb’al naq li Qaawa’ naxnaw qu chiqajunjunqal.
Kok’ k’anjel naru chi b’aanumank
-
Wotz chan ru naq li Qaawa’ kixye re laj Samuel naq laj David a’anaq chik li rey re Israel (chi’ilmanq 1 Samuel 16:1–13). Naq taawotz li seraq’, naru nakak’e junaq ch’ina al chireetalinkil laj Samuel. A’an naru naxk’e jun koroon re junaq chik ch’ina al, li taareetali laj David. Wotz xnawom aach’ool naq li Qaawa’ kixnaw ru li raam laj David ut naq naxnaw qu chiqajunjunqal.
-
Wotx junaq aanumsihom b’ar wi’ xaweek’a naq li Qaawa’ yoo chawilb’al. B’ichahomaq jun li b’ich li naxk’ut naq li Kolonel naxnaw qu ut nokoxra, maare “Li Jesus narahok qe” (B’ichleb’aal choq’ reheb’ li Kok’al, 37).
Lim paab’aal chirix li Jesukristo naru tixk’e xkawilal inch’ool.
Eb’ li kok’al sa’ junpaat neke’xjuntaq’eeta rib’ rik’in laj David xb’aan naq, us ta ka’ch’in laj David, kinumta sa’ xb’een jun nimla ch’a’ajkilal. Tenq’aheb’ chixk’eeb’al reetal naq lix kawil xch’ool ut lix kawil xmetz’ew kichal chaq xb’aan lix paab’aal chirix li Jesukristo.
Kok’ k’anjel naru chi b’aanumank
-
Ilomaq li seraq’ chirix laj David ut laj Goliat (chi’ilmanq “David y Goliat” sa’ Relatos del Antiguo Testamento), ut k’eheb’ xhoonal re te’xk’utb’esi li seraq’. Ye re li ch’ina al li na’eetalink re laj Goliat naq tixye: “K’ehomaq chaq we junaq winq re taayaloq wik’in” (1 Samuel 17:10). Ye re li ch’ina al li na’eetalink re laj David naq tixye: “Laa’in ok we chi yalok aawik’in sa’ xk’ab’a’ li Qaawa’ ” (1 Samuel 17:45). Ch’olob’ xyaalal naq wi wan qapaab’aal chirix li Qaawa’, a’an tixk’e xkawil qach’ool jo’ laj David.
-
Oksi li perel re kok’ k’anjel re li xamaan a’in re xk’utb’al jo’ k’ihal xnimal roq laj Goliat ut chan ru xka’ch’inal laj David. Ch’olob’ naq li ch’uut aj pleet aj Israel ke’xxuwa ru laj Goliat. Patz’ reheb’ li kok’al naq te’xpak’ xxiw. Chirix a’an, k’ut jun xjalam-uuch li Jesukirsto ut ye reheb’ li kok’al naq xb’aan naq laj David kiwan xpaab’aal chirix li Qaawa’, kiwan xkawil xch’ool. Patz’ reheb’ naq te’xaqliiq chanchan ta wi’ naq kaweb’ xch’ool.
-
Patz’ reheb’ li kok’al naq te’b’eeq chanchan ta wi’ naq laj David yoo chi xik chi pleetik rik’in laj Goliat, ut teeb’icha jun li b’ich chirix li kawil ch’oolej, maare “Kawaq inch’ool” (B’ichleb’aal choq’ reheb’ li Kok’al, 85).
Eb’ li chaab’il amiiw naru neke’rosob’tesi inyu’am.
Lix wanjikeb’ laj Jonatan ut laj David jo’ ramiiweb’ rib’ naru naxk’ut li osob’tesiik nak’ulman xb’aaneb’ li chaab’il amiiw.
Kok’ k’anjel naru chi b’aanumank
-
Yiib’ wiib’ kok’ kristiaan chiru li pizarron, jun taareetali laj David ut li jun chik taareetali laj Jonatan. Yaab’asi junjunq ch’ol aatin sa’ 1 Samuel 18:1–4 reheb’ li kok’al li neke’aatinak chirix lix rahomeb’ chirib’ileb’ rib’ li wiib’ chi aamiiw a’an. K’e reheb’ li kok’al xjalam-uuch jun aamej, ut patz’ reheb’ chan ru te’xk’ut xrahom chiru junaq ramiiweb’. Chirix naq li junjunq chi kok’al tixwotz lix na’leb’, patz’ re naq tixlatz lix jalam-uuch aamej chiru li pizarron.
-
Wotz resil junaq aawamiiw li nakatxtenq’a chixyu’aminkil li evangelio malaj chixkawob’resinkil laa paab’aal chirix li Jesukristo , ut patz’ reheb’ li kok’al naq te’xwotz ajwi’ ani natenq’ank reheb’ a’an. Patz’ reheb’ li kok’al naq te’xtenq’a junaq ramiiweb’.
Xk’utb’al li tzol’leb’: Kok’al ak ninqeb’
1 Samuel 8:6; 9:15–17; 10:1–24; 16:1–13
Li neke’k’anjelak sa’ li Iglees b’oqb’ileb’ xb’aan li Dios.
Eb’ li seraq’ li neke’xye naq li Dios kixsik’ ru laj Sawlo ut laj David re naq te’wanq choq’ rey naru neke’xtenq’aheb’ li kok’al chixtawb’al ru chan ru naq neke’b’oqe’ li komon neke’k’anjelak sa’ li Iglees anajwan. Eb’ li seraq’ a’in naru naxnimob’resi xpaab’aaleb’ naq eb’ li b’oqb’il k’anjel neke’chal chaq rik’in li Dios rik’ineb’ lix moos wankeb’ xliceens.
Xjalam-uuch laj Samuel naq naxyul laj Sawlo, © Lifeway Collection/licensed from goodsalt.com
Kok’ k’anjel naru chi b’aanumank
-
Chiru kok’ hu, tz’iib’aheb’ li na’leb’ ut raqal a’in: li kristiaan ke’raj jun li rey (1 Samuel 8:6); li Qaawa’ kixye re laj Samuel naq laj Sawlo a’anaq li rey (1 Samuel 9:15–17); laj Samuel kixyul laj Sawlo (1 Samuel 10:1); laj Samuel kixxaqab’ laj Sawlo chiru li tenamit (1 Samuel 10:24). Patz’ reheb’ li kok’al naq te’ril ruheb’ li raqal ut te’xk’e sa’ tz’aqal lix tusulaleb’.
-
Tzolomaq li ro’ xraqalil li paab’aal sa’ komonil. Ch’olob’ chiruheb’ li kok’al chan ru naq xak’ul laa b’oqb’il k’anjel re k’utuk sa’ li Tzoleb’aal reheb’ li Kok’al. Chan ru nakanaw naq b’oqb’ilat xb’aan li Dios? Ch’olob’ xyaalal naq li Dios naxmusiq’aheb’ laj jolominel re te’xb’oqeb’ li komon chi k’anjelak.
“Li Qaawa’ naril li ch’oolej”
Maare ak re naq neke’qatz’il b’ayaq rix li qas qiitz’in ka’ajwi’ rik’in li k’a’ru naqil, a’b’an jo’ xcha’al li qak’anjel re wulak jo’ li Jesus, a’an xtzolb’al ilok jo’ na’ilok a’an—rilb’al “li ch’oolej” (1 Samuel 16:7).
Kok’ k’anjel naru chi b’aanumank
-
Patz’ reheb’ li kok’al naq te’xk’oxla naq xpatz’man reheb’ naq te’xsik ru junaq komon re taawanq choq’ rey. K’a’ raj ru lix chaab’ilal te’xsik’? Ilomaq 1 Samuel 16:6–7 re xsik’b’al k’a’ru kixye li Qaawa’ re laj Samuel naq yoo chixsik’b’al jun li ak’ rey choq’ re Israel. K’a’ru naqatzol rik’in lix na’leb’ li Qaawa’?
-
K’utb’esi chiruheb’ li kok’al naq li tz’ilok-ix naqab’aanu ka’ajwi’ rik’in “chan ru na’ilok junaq” (raqal 7) maare ink’a’ jwal us. Naru taak’ut chiruheb’ jun xtib’el wa malaj junaq li hu chi lanlo rix malaj chi muqmu sa’ junaq ka’a’q re ru jalan tz’aqal. K’a’ru naxye 1 Samuel 16:7 ut li ch’ina na’leb’ a’in chirix chan ru tento taqil qib’ laa’o ut eb’ li qas qiitz’in?
-
Wotz junaq aanumsihom b’ar wi’ xatzol k’a’ut naq tento “taawil li ch’oolej”, ut ink’a’ ka’ajwi’ “chan ru na’ilok junaq” (raqal 7). Kanab’eb’ li kok’al chixwotzb’aleb’ xnumsihom chanchan laa we laa’at. B’ichahomaq jun li b’ich li tixtz’aqob’resi ru li na’leb’ a’in, maare “Aawik’in tinb’eeq laa’in” (B’ichleb’aal choq’ reheb’ li Kok’al, 78–79).
Li Jesukristo naru nikinixtenq’a chixq’axb’aleb’ ru li ch’a’ajkilal.
Eb’ li kok’al maare yookeb’ chi nume’k sa’ ch’a’ajkilal li maare ch’a’aj chanchan numtaak sa’ xb’een junaq nimla kristiaan jo’ laj Goliat. Li k’a’ru kixb’aanu laj David naru naxtenq’aheb’ chixpaab’ankil naq te’tenq’aaq xb’aan li Qaawa’ sa’eb’ lix ch’a’ajkilal.
Kok’ k’anjel naru chi b’aanumank
-
Patz’ reheb’ li kok’al naq te’xyiib’ xjalam-uuch junjunq xcha’al li seraq’ wan sa’ 1 Samuel 17:20–54. K’uteb’ li jalam-uuch chi tustuukeb’ ru chiru li pizarron ut patz’ reheb’ li kok’al naq te’xwotz li seraq’ rik’in roksinkileb’ li jalam-uuch xe’xyiib’. K’a’ru naraj li Qaawa’ naq taqatzol sa’ li seraq’ a’in?
-
Tenq’aheb’ li kok’al chixtz’iib’ankil chiru li pizarron junjunq reheb’ li ch’a’ajkilal naru naxnumsi junaq kristiaan. Patz’ reheb’ naq te’xsik’ k’a’ru kixye laj David li naru naxwaklesi xch’ool junaq kristiaan li wan sa’ ch’a’ajkilal (chi’ilmanq 1 Samuel 17:26, 32, 34–37, 45–47). Ye reheb’ li kok’al chan ru naq li Qaawa’ nakatxtenq’a sa’eb’ li ch’a’ajkilal.
Xb’oqb’aleb’ chi tzolok sa’ kab’l
Patz’ junaq na’leb’ reheb’ li kok’al li xe’xtzol anajwan. Tz’iib’a li patz’om a’an ut k’e reheb’ chixjunil li kok’al re naq te’xk’am sa’ rochoch ut te’xwotz rik’ineb’ lix junkab’al.
Xkawresinkil qib’ jo’ aj k’utunel
Tenq’aheb’ li kok’al chixtzolb’aleb’ li loq’laj hu. Wan naq neke’ab’in wi’chik chi us li kok’al naq neke’ril xjalam-uuch li yookat wi’ chi aatinak. K’oxla roksinkileb’ li jalam-uuch sa’ li Hu reheb’ li Jalam-uuch re li Evangelio malaj sa’ ChurchofJesusChrist.org.