“13–19 junio. 1 Samuel 8–10; 13; 15–18: Li yalok, a’an re li Qaawa’,” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)
“13–19 junio. 1 Samuel 8–10; 13; 15–18,” Kim, Taaqehin—Choq’ reheb’ li komon ut li junkab’al: 2022
Laj David ut laj Goliat, xb’aan laj Steve Nethercott
13–19 junio
1 Samuel 8–10; 13; 15–18
Li yalok, a’an re li Qaawa’
Li na’leb’ sa’ li tusleb’ aatin a’in naru nakatxtenq’a chixk’eeb’al reetal li na’leb’ aajel ru ut xnimal ru sa’eb’ li ch’ol a’in. Naru taataw xkomon chik li na’leb’ naq yookat chi tzolok.
Tz’iib’al li nakak’oxla
Chalen chaq naq ke’kana lix teepal laj Israel sa’ li yeechi’inb’il ch’och’, xik’ ilb’ileb’ xb’aaneb’ laj Filisteo. Li Qaawa’ ak kixkoleb’ laj Israelita k’iila sut chiruheb’ li xik’ neke’ilok reheb’. A’b’anan, eb’ li xb’eenil re Israel ke’relaji, “Tento twanq junaq li qarey … a’anaq laj k’amol qab’e ut laj jolominel sa’ li yalok” (1 Samuel 8:19–20). Kiq’unb’esiik xch’ool li Qaawa’, ut kiyule’ laj Sawlo choq’ rey. A’ut, naq li nimla winq aj Goliat kixjap re chixyeeb’al reheb’ li teep aj pleet aj Israelita naq te’chalq chixpleetinkil, laj Sawlo—jo’ ajwi’ chixjunil lix teep aj pleet—“k’a’jo’ naq ke’chalk xxiw” (1 Samuel 17:11). Sa’ li kutan a’an, maawa’ li rey aj Sawlo li kikolok re laj Israel, a’an b’an jun saaj aj ilol karneer, laj David xk’ab’a’, li maak’a’ xkolb’a-ib’ aq’, a’b’an tiqib’anb’il sa’ xkawil xpaab’aal chirix li Qaawa’. Li yalok a’in kixk’ut xyaalal chiru laj Israel, ut chiru yalaq ani nayalok sa’ musiq’ej, naq “li Qaawa’ ink’a’ nakolok rik’in ch’iich’ chi moko rik’in jutz’ che’,” ut naq li yalok, a’an re li Qaawa’ (1 Samuel 17:47).
Li na’leb’ re xtzolb’aleb’ li loq’laj hu aajunes
Li Jesukristo a’an lin Rey.
Naq nakawil 1 Samuel 8, k’e reetal k’a’ru kireek’a li Qaawa’ chirix li rajomeb’ laj Israelita chixxaqab’ankil jun li rey sa’ xna’aj li Qaawa’. K’a’ru naraj naxye xsik’b’al ru naq li Qaawa’ “taataqlanq sa’ aab’een”? (1 Samuel 8:7). Naru ajwi’ taak’oxla chan ru aalenb’ilat chixtaaqenkil lix maa’usil b’e li ruchich’och’ ruuchil xtaaqenkil li Qaawa’. Chan ru taak’ut naq taawaj naq li Jesukristo taawanq choq’ Junelikil Rey sa’ aab’een?
Chi’ilmanq ajwi’ Jueces 8:22–23; Mosiah 29:1–36; Neil L. Andersen, “Numtaak sa’ xb’een li ruchich’och’,” Jolomil ch’utub’aj-ib’ re abril 2017.
1 Samuel 9:15–17; 10:1–12; 16:1–13
Li Dios naxb’oqeb’ li kristiaan rik’in profeetil aatin re k’anjelak sa’ li rawa’b’ejihom.
Li Dios kixsik’ ru naq te’wanq laj Sawlo ut laj David choq’ rey rik’in li profeetil aatin ut li k’utb’esinb’il na’leb’ (chi’ilmanq 1 Samuel 9:15–17; 10:1–12; 16:1–13). Chi jo’ka’in ajwi’ naq naxb’oqeb’ li winq ut li ixq chi k’anjelak sa’ lix Iglees sa’ li kutankil a’in. K’a’ru nakatzol sa’eb’ li seraq’ a’in chirix li naraj naxye li aatin “taab’oqe’q xb’aan li Dios, rik’in profeetil aatin”? (Eb’ lix Raqalil li Paab’aal 1:5). K’a’ru li osob’tesiik li nachal naq b’oqb’ilo ut k’ojob’anb’ilo xb’aaneb’ lix moos li Qaawa’?
Xjalam-uuch laj Samuel naq naxyul laj Sawlo, © Lifeway Collection/licensed from goodsalt.com
“Jwal us paab’ank chiru mayejak”
Us ta nim roq laj Sawlo, kireek’a naq “ka’ch’in lix wankil” naq ki’ok choq’ rey (1 Samuel 15:17). A’b’anan, sa’ xk’ulb’al naab’al li chaab’ilal, ki’ok chixq’etq’etinkil rib’ ut kisach li Qaawa’ sa’ xch’ool. Ma naru nakak’e reetal a’an sa’ 1 Samuel 13:5–14; 15? Wi ta katwan rik’in laj Sawlo, k’a’ raj ru kaye re li tixtenq’a raj chi numtaak sa’ xb’een xpo’jik xch’ool ut xjipil xk’a’uxl? (1 Samuel 15:23).
Chi’ilmanq ajwi’ 2 Nefi 9:28–29; Helaman 12:4–5; Tzol’leb’ ut Sumwank 121:39–40; Thomas S. Monson, “Examina la senda de tus pies,” Liahona, noviembre 2014, 86–88.
“Li Qaawa’ naril li ch’oolej”
Chan ru naq eb’ li kristiaan neke’raqok aatin a’ yaal “chan ru na’ilok junaq”? K’a’ru naraj naxye rilb’al “li ch’oolej,” jo’ naxb’aanu li Qaawa’? (1 Samuel 16:7). K’oxla chan ru taayu’ami li na’leb’ a’in sa’ rilb’aleb’ laa was aawiitz’in—ut rilb’al aawib’ ajwi’ laa’at. Chan ru naq xb’aanunkil a’an tixchaab’ilob’resi laa wanjik rik’ineb’ laa was aawiitz’in?
Rik’in xtenq’ li Qaawa’, naru tinnumtaaq sa’ xb’een yalaq ch’a’ajkilal.
Naq nakawil 1 Samuel 17, k’oxla raatineb’ li kristiaan sa’ li ch’ol a’in (wan xk’ab’a’eb’ rub’el a’in). K’a’ru naxk’ut li raatineb’ chirixeb’? Chan ru naq li raatin laj David naxk’ut xkawilal xch’ool ut xpaab’aal chirix li Qaawa’?
-
Laj Goliat: eb’ li raqal 8–10, 43–44
-
Laj Eliab: raqal 28
-
Laj Sawlo: raqal 33
-
Laj David: eb’ li raqal 26, 32, 34–37, 39, 45–47
K’oxlaheb’ li yalok yookat chixnumsinkil. K’a’ru nakataw sa’ 1 Samuel 17 li naxkawob’resi laa paab’aal naq li Qaawa’ naru tatxtenq’a?
Chi’ilmanq ajwi’ Gordon B. Hinckley, “Venzamos a los Goliats de nuestra vida,” Liahona, febrero 2002, 2–6.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
1 Samuel 9:15–21; 16:7.Rilb’aleb’ li raqal a’in rochbe’een li raatin li Elder Dieter F. Uchtdorf naru texxtenq’a chixtz’ilb’al rix k’a’ut naq li Qaawa’ kixsik’ ru laj Sawlo ut laj David: “Wi naqil qib’ yal sa’ li qilob’aal re li ruchich’och’ a’in, maare ink’a’ taqak’oxla naq tz’aqal chaab’il wanko. Li qaChoxahil Yuwa’ b’an nokoril jo’ wanko chi yaal” (“Chaab’il nak’anjelak!” Jolomil ch’utub’aj-ib’ re octubre 2015). Jo’ junkab’al, naru tex’aatinaq chirix li chaab’ilal nekeril sa’ eech’ool cherib’il eerib’ (chi’ilmanq 1 Samuel 16:7).
-
1 Samuel 10:6–12.Jo’q’e xqil li Dios chirosob’tesinkil junaq rik’in musiq’ejil wankilal re xb’aanunkil jun k’anjel, jo’ chanru naq kirosob’tesi laj Sawlo? Ma wan qanumsihom li naru taqawotz naq “li Dios kixjal li qach’ool” malaj “koo’echaniik xb’aan lix musiq’ li Dios” naq yooko chi k’anjelak chiru? (eb’ li raqal 9–10).
-
1 Samuel 17:20–54.Maare taawulaq cheru rilb’al li seraq’ chirix laj David ut laj Goliat (“David y Goliat” sa’ Relatos del Antiguo Testamento naru texxtenq’a) malaj rilb’al li video “El Señor me librará” (ChurchofJesusChrist.org). Chirix a’an, naru tex’aatinaq chirixeb’ li ch’a’ajkilal naqak’ul li chanchan “laj Goliat.” Naru teetz’iib’a li ch’a’ajkilal a’an chiru xjalam-uuch laj Goliat, ut chi junjunqal teekut k’a’aq re ru chiru (maare kok’ t’orol hu).
Naru ajwi’ teeril ru xch’olob’ankil li kolb’a-ib’ aq’ej ut li k’anjeleb’aal re pleet wan re laj Goliat (che’ilmanq li raqal 4–7). K’a’ru wan re laj David? (che’ilmanq li raqal 38–40, 45–47). K’a’ru naxk’e li Qaawa’ qe re numtaak sa’ xb’eeneb’ li Goliat sa’ qayu’am?
-
1 Samuel 18:1–4.Chan ru naq chaab’il ramiiweb’ rib’ laj David ut laj Jonatan? Chan ru xoohe’xtenq’a li qamiiw? K’a’ru taqab’aanu re wank choq’ chaab’il amiiw—chiru ajwi’ li qajunkab’al?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Kawaq inch’ool,” B’ichleb’aal choq’ reheb’ li Kok’al, 85.
Xkawresinkil qib’ jo’ aj k’utunel
Ye xnawom aach’ool chi kok’ aj xsa’. “Wi yal taaye chi anchal aach’ool lix nawom aach’ool chirix li yaal, naru taatoch’ xch’ool [laa junkab’al]. Q’axal wi’chik nim xwankil jun xnawom ch’oolej naq k’eeb’il chi tiik ut rik’in x’anchalil li ch’oolej. Ink’a’ na’ajman ru naq ch’ina-usaq malaj nimaq ru” (Li k’utuk jo’ li Kolonel, 11).
Xjalam-uuch laj David, xb’aan li xDilleen Marsh