xRut ut xNohemi

B’ar tatxik laa’at, xb’aan li xSandy Freckleton Gagon

6–12 junio

Rut; 1 Samuel 1–3

“K’a’jo’ naq nasaho’ lin ch’ool rik’in li Qaawa’ ”

Naq taawil Rut ut 1 Samuel 1–3, patz’ re li qaChoxahil Yuwa’ chan ru taatenq’aheb’ li kok’al chixtzolb’aleb’ li na’leb’ sa’eb’ li ch’ol a’in. Tz’iib’a li na’leb’ nakak’ul.

Tz’iib’a li nakak’oxla

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xwotz k’a’ru neke’xnaw chirix xRut, xNohemi, xAna, malaj laj Samuel. Naru ajwi’ taak’uteb’ jalam-uuch, maare li wankeb’ sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Li xRut

Naru nink’ut inrahom ut inchaab’ilal chiruheb’ li wankeb’ chinsutam.

Naq kikam lix b’eelom xRut, xru raj xkana sa’ lix tenamit, a’b’an xko’o chi wank rik’in lix na’ xb’eelom, xNohemi xk’ab’a’. K’oxla chan ru naq li k’a’ru kixb’aanu xRut naru naxmusiq’aheb’ li kok’al chi wank rik’in rahok rik’ineb’ li wankeb’ chixsutam.

Kok’ k’anjel naru chi b’aanumank

• Patz’ reheb’ li kok’al naq te’reetali xNohemi, xRut, aj Bohos, ut xkomoneb’ chik naq taawotz li seraq’ sa’ li hu Rut (chi’ilmanq ajwi’ “Rut y Noemi” sa’ Relatos del Antiguo Testamento). Patz’ reheb’ li kok’al naq te’xtaqsi li ruq’ rajlal sut naq te’rab’i jun chaab’il b’aanuhom sa’ li seraq’. K’a’ru naqeek’a naq eb’ li kristiaan neke’xk’ut xrahom chiqu? K’a’ru naqeek’a naq naqak’ut qarahom chiruheb’ li qas qiit’zin?

• B’ichahomaq jun li b’ich chirix li rahok, maare “Wik’in laa’in natikla li chaab’ilal” (B’ichleb’aal choq’ reheb’ li Kok’al, 83). Tenq’aheb’ li kok’al chixk’oxlankil chan ru te’xk’ut xrahom chiruheb’ lix junkab’al ut li ramiiw. Wi neke’raj xtenq’ankil, k’uteb’ xjalam-uuch kristiaan chiruheb’ li neke’xb’aanu li k’a’ru chaab’il. Rik’in li junjunq chi na’leb’ te’xye, kanab’eb’ li kok’al chixyiib’ankil jun aamej chiru li pizarron.

1 Samuel 1:1–18

Lin Choxahil Yuwa’ narab’iheb’ ut naxsumeheb’ lin tij.

Naq li xAna ra xch’ool xb’aan naq ink’a’ naru nawan xkok’al, kixsik’ li Qaawa’ rik’in paab’aal ut a’an kixsume lix tij. Tenq’aheb’ li kok’al chixk’eeb’al reetal naq junelik naru neke’tijok chiru li qaChoxahil Yuwa’, mas wi’chik naq raheb’ xch’ool.

Kok’ k’anjel naru chi b’aanumank

• Rik’in aawaatin, ye reheb’ li kok’al k’a’ut naq ra xch’ool li xAna (chi’ilmanq 1 Samuel 1:2–8; chi’ilmanq ajwi’ “Ana” sa’ Relatos del Antiguo Testamento). K’a’ru naru naqab’aanu naq ra qach’ool? Yaab’asi 1 Samuel 1:10 reheb’ li kok’al, ut patz’ reheb’ naq te’rab’i k’a’ru kixb’aanu xAna. Patz’ reheb’ li kok’al k’a’ru neke’reek’a naq neke’tijok. Yaab’asi li raqal 18 re xch’olob’ankil naq chirix lix tij, xAna “ink’a’ chik kiraho’ sa’ xch’ool.”

  xAna ut laj Samuel

  Xintz’aama naq tixk’e we li k’uula’al a’in, xb’aan li xElspeth Young

• Oksi li perel re kok’ k’anjel re li xamaan a’in re xk’utb’al chiruheb’ li kok’al naq naru neke’tijok chiru li qaChoxahil Yuwa’ ut te’tenq’aaq xb’aan a’an. Naq eb’ li kok’al yooqeb’ chi b’onok, chi b’ichank, malaj chirab’inkil junaq li b’ich nak’utuk chirix li tijok, maare “Natijok jun ch’ina al” (B’ichleb’aal choq’ reheb’ li Kok’al, 6–7).

1 Samuel 2:1–10

Li Qaawa’ ak xb’aanuhom k’iila sachb’a-ch’oolejil k’a’aq re ru choq’ we.

Li xAna kib’antioxin chiru li Qaawa’ rik’in jun xchaq’al ru utz’u’ujinb’il aatin. Li kixb’aanu a’an naru naxtenq’aheb’ li kok’al chixk’oxlankil chixjunil li k’a’ru naru neke’xb’antioxi chiru li qaChoxahil Yuwa’.

Kok’ k’anjel naru chi b’aanumank

• Yaab’asi reheb’ li kok’al jun reheb’ li na’leb’ kixye xAna chirix naq ki’osob’tesiik xb’aan li Qaawa’ rik’in jun ralal (chi’ilmanq 1 Samuel 2:1–2). Wotz rik’ineb’ li kok’al jun aawosob’tesinkil kixk’e li Qaawa’ ut k’a’ru xaweek’a chirix a’an. Chirix a’an, patz’ reheb’ li kok’al naq te’aatinaq chirix li osob’tesiik naxk’e li Qaawa’ reheb’. Chan ru naru toob’antioxinq chiru a’an?

• B’ichahomaq jun li b’ich li naxch’olob’ junjunq li osob’tesiik naxk’e qe li Qaawa’, maare “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 16–17). Patz’ reheb’ li kok’al naq te’xyiib’ xjalam-uucheb’ li osob’tesiik neke’xk’ul rik’in li Qaawa’.

reetalil li k‘utuk

Xk’utb’al li tzol’leb’: Kok’al ak ninqeb’

Li xRut

Naru ninpaab’ li Qaawa’.

Li xRut kimayejak re wank chi tiik chiru li Qaawa’ ut re wank chi tiik xch’ool chiru xNohemi. Chan ru taatenq’aheb’ li kok’al chi tzolok chirix li k’a’ru kixb’aanu xRut?

Kok’ k’anjel naru chi b’aanumank

• K’ut junaq xjalam-uuch xRut ut xNohemi (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Chirix a’an tz’iib’a oxib’ li aatin chiru li pizarron: Yale’k, B’aanuhom, Osob’tesiik. Patz’ reheb’ li kok’al naq te’ril Rut 1:3–5, 8, 16; 2:1–3, 8–12; 4:13–17, ut te’xtz’iib’a rub’eleb’ li oxib’ chi aatin li k’a’ru te’xtaw sa’eb’ li raqal a’in. Chan ru naq li xRut kixk’ut xpaab’aal chirix li Qaawa’? Wotz chan ru naq nakat-osob’tesiik xb’aan naq wan aapaab’aal chirix li Jesukristo, ut kanab’eb’ li kok’al chixwotzb’al ajwi’ a’an.

• B’ichahomaq jun li b’ich chirix li paab’aal, maare “Laa’at lin saqen” (Eb’ li B’ich, 47) malaj “Li paab’aal” (B’ichleb’aal choq’ reheb’ li Kok’al, 50–51). K’a’ru naxk’ut li b’ich chirix xkanab’ankil qib’ sa’ ruq’ li Qaawa’? Chan ru naru nawan qapaab’aal chirix li Jesukristo us ta ch’a’aj ru li kutan?

1 Samuel 1

Lin Choxahil Yuwa’ narab’iheb’ ut naxsumeheb’ lin tij.

Naq “k’a’jo’ xrahil xch’ool” li xAna, kitijok chiru li qaChoxahil Yuwa’ (1 Samuel 1:10). Chan ru taawaklesi xch’ooleb’ li kok’al chixb’aanunkil ajwi’ a’an?

Kok’ k’anjel naru chi b’aanumank

• Re xtenq’ankileb’ li kok’al chi tzolok chirix xAna sa’ 1 Samuel 1, jek’i junjunq raqal reheb’ re naq te’ril (malaj k’ut li video “La fe de Ana,” ChurchofJesusChrist.org). Chirix a’an, kut junaq ch’ina b’olotz’ re jun li ch’ina al ut patz’ re naq tixwotz b’ayaq li seraq’ ut chirix a’an tixkut li b’olotz’ re junaq chik ch’ina al re naq tixwotz xkomon chik li seraq’. Naq taatz’aqloq ru li seraq’, patz’ reheb’ li kok’al naq te’xwotz junaq na’leb’ xe’xtzol chirix xAna.

• Ilomaq 1 Samuel 1:15, ut aatinanqex chirix k’a’ru naraj naxye xteeb’al li qaam chiru li Qaawa’. Tz’iib’ahomaq li k’a’aq re ru naru naqaye sa’ jun li tij rik’in li Dios. B’ichahomaq jun li b’ich chirix li tijok, maare “Natijok jun ch’ina al” (B’ichleb’aal choq’ reheb’ li Kok’al, 6─7). Ch’olob’ xyaalal lix rahom li Dios choq’ reheb’ li ralal xk’ajol ut li rajom chirab’inkileb’ ut chixsumenkil lix tij.

• Patz’ reheb’ li kok’al naq te’xye (sa’ junjunq malaj sa’ ch’uut) xk’ab’a’eb’ li kristiaan re li loq’laj hu li ke’tijok chiru li qaChoxahil Yuwa’. (Wi neke’raj xtenq’ankil, naru taak’e reheb’ Lukas 22:41–43; Enos 1:2–6; Jose Smith—Resilal 1:14–17.) Patz’ reheb’ naq te’xwotz k’a’ru neke’xtzol sa’eb’ li seraq’.

1 Samuel 3:1–10

Naru nawab’i ut ninb’aap lix yaab’ xkux li Qaawa’.

Naq laj Samuel ch’ina al chaq, kirab’i xyaab’ xkux li Qaawa’, a’b’an sa’ xtiklajik moko kixnaw ta k’a’ru a’an. Chan ru taatenq’aheb’ li kok’al chirab’inkil ut chixtaaqenkil li na’leb’ neke’xk’ul?

Kok’ k’anjel naru chi b’aanumank

• Patz’ re jun ch’ina al naq tixk’oxla naq a’an laj Samuel ut jun chik tixk’oxla naq a’an laj Eli naq taawil 1 Samuel 3:1–10 (malaj k’ut li video “Samuel y Elí,” ChurchofJesusChrist.org). K’a’ru naqatzol rik’in laj Samuel chirix rab’inkil xyaab’ xkux li Qaawa’? Chan ru naqak’utb’esi naq naqaj rab’inkil li Qaawa’ naq nokoraatina?

• Patz’ reheb’ li kok’al naq te’xk’oxla chan raj ru te’xch’olob’ re junaq kristiaan chan ru naq na’aatinak li Qaawa’. Patz’ reheb’ naq te’xsik’ xsumenkil a’an sa’eb’ li raqal a’in: Tzol’leb’ ut Sumwank 6:22–23; 8:2–3; 9:7–9.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixk’oxlankil junaq kristiaan malaj k’a’aq re ru li naru neke’tijok wi’ chiru li xamaan a’in. Moqon, k’e xhoonaleb’ re naq te’xwotz chan ru naq li qaChoxahil Yuwa’ xsume lix tijeb’.

Xkawresinkil qib’ jo’ aj k’utunel

Eb’ li kok’al wankeb’ xmajelal. Okan sa’ li perel web disability.ChurchofJesusChrist.org re taanaw chan ru taatenq’aheb’ li kok’al wankeb’ xmajelal.

perel re kok’ k’anjel: Lin Choxahil Yuwa’ narab’iheb’ ut naxsumeheb’ lin tij