Malumalu o Katelani

Malumalu o Katelani, saunia e Jon McNaughton

27 Setema–3 Oketopa

Mataupu Faavae ma Feagaiga 109–110

“O Lou Maota Lava, o se Afioaga mo Lou Paia”

Ina ia maua ni aafiaga faaleagaga ao suesueina le Mataupu Faavae ma Feagaiga 109-10 ma tamaiti o lau vasega, saili muamua ia maua ni aafiaga faaleagaga ao e suesueina nei mau.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Faaali atu ni ata e mafai ona fesoasoani i tamaiti e manatua ma faasoa mai se mea na latou aoaoina e uiga i mataupu faavae po o mea na tutupu i le Mataupu Faavae ma Feagaiga 109-10. Mo se faataitaiga, e mafai ona e faaali atu se ata mai le otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 109:12–13; 110:1–7

O le malumalu o le maota o le Alii.

Mafaufau pe faapefea ona e fesoasoani i tamaiti e lagona le migao mo le maota o le Alii ma taulai atu i le aso o le a mafai ai ona latou ulufale atu i “[Lona] afioaga paia” (Mataupu Faavae ma Feagaiga 109:13).

Gaoioiga e Mafai Ona Fai

• Fai atu i tamaiti e faamatala atu ia te oe mea latou te fiafia ai i o latou aiga. Faaali atu i tamaiti se ata o le Malumalu o Katelani, ma faaaoga le Mataupu Faavae ma Feagaiga 109:12-13; 110:1–7 e tau atu ai ia i latou e uiga i le aso na faapaiaina ai le malumalu ma avea ma maota o le Alii (tagai foi “Mataupu 39: Ua Faapaiaina le Malumalu o Katelani,” Tala o le Mataupu Faavae ma Feagaiga,154). Ina ia faaali atu o le malumalu o le maota o le Atua, faitau le vaega lenei mai le tatalo o le faapaiaga na faia e Iosefa Samita: “O lou maota lava, o se afioaga mo lou paia” (Mataupu Faavae ma Feagaiga 109:13). Tuu atu i tamaiti e faasoa mai mea latou te fiafia ai i le malumalu.

• Tuu atu i tamaiti taitoatasi se ata o se malumalu, pe valaaulia i latou e tusi se ata o se malumalu. Usu faatasi ma tamaiti se pese e faatatau i malumalu, e pei o le “Ou Te Fia Vaai i le Malumalu” (Tusipese a Tamaiti,99). Valaaulia tamaiti e uu i luga a latou ata i soo se taimi latou te usua ai le upu “malumalu.” Faasino atu ia i latou isi upu i totonu o le pese lea e aoao mai ia i tatou se mea taua e faatatau i le malumalu. Tau atu i tamaiti ou lagona e faatatau i le malumalu ma le auala e te iloa ai o le malumalu o le maota o le Alii.

Mataupu Faavae ma Feagaiga 110

O ki o le perisitua lea na manaomia e faataunuu ai le galuega a le Atua o loo i ai i le taimi nei i le Ekalesia.

E taua le Malumalu i Katelani i le talafaasolopito o le Ekalesia. Na faaali atu ai Iesu Keriso iina, faapea ma isi perofeta anamua. Na tuuina atu e nei perofeta ki o le perisitua ia Iosefa Samita lea e manaomia e fai ai galuega a le Atua i aso e gata ai.

Gaoioiga e Mafai Ona Fai

• Faaaoga le itulau o gaoioiga o lenei vaiaso po o le “Mataupu 40: Faaaliga i le Malumalu o Katelani” (Tala o le Mataupu Faavae ma Feagaiga, 155-57) e faamatala atu ai i tamaiti e uiga i avefeau paia na asia le malumalu. Faasoa fasifuaitau mai le Mataupu Faavae ma Feagaiga 110 ia e fesoasoani ia te oe ma tamaiti e malamalama ai i le paia o nei mea na tutupu.

• Faaali i tamaiti nisi o ki ma fesili i ai po o le a le mea e faaaoga i ai nei ki. Ia feauaua’i tamaiti i le uuina o ki ma faafoliga o latou tatalaina se faitotoa o loo loka. Ao latou faia, faamalamalama atu na maua e Iosefa Samita ki o le Perisitua i le Malumalu o Katelani. O nei ki e matala ai le mana ma faamanuiaga ina ia mafai ona tatou faia le galuega a le Atua i Lana Ekalesia, e pei o le faasoaina atu o le talalelei ma le faia o galuega i le malumalu.

• Ina ia fesoasoani i tamaiti ia malamalama i ki na tuuina atu e Elia ia Iosefa Samita, usu faatasi se pese e faatatau ia Elia po o le talafaasolopito o aiga, e pei o le “Truth from Elijah” (Children’s Songbook, 90–91). Faamatala atu e uiga i se aafiaga na fesoasoani e liliu atu ai lou loto i ou tuaa. Tuu atu i tamaiti e faasoa mai se mea latou te iloa e uiga i se tama/tina matua po o se tuaa.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 109; 110:1–10

O le malumalu o le maota o le Alii.

E faapefea ona e faasoa atu i tamaiti lou alofa mo le maota o le Alii? Manatunatu pe faapefea ona e musuia i latou e talia le lu’i a Elder Quentin L. Cook “mo i tatou taitoatasi, po o fea lava o tatou nonofo ai, ia vaai atu ia i tatou lava i totonu o le malumalu” (“Vaai ia Oe Lava ia i totonu o le Malumalu,” Ensign po o le Liahona, Me 2016, 98).

Gaoioiga e Mafai Ona Fai

• Filifili fuaiupu mai le vaega 109 po o le110 e te lagona o faaalia ai faamanuiaga o le malumalu (o nisi o loo fautuaina i le otootoga o lenei vaiaso i le Mulimuli Mai ia te A’u—Mo Tagata Taitoatasi ma Aiga). Lisi nei faamanuiaga i luga o le laupapa, ma valaaulia tamaiti e saili fuaiupu na e filifilia e sue ai na faamanuiaga. Mata e faapefea ona tatou faamatalaina i se tasi pe aisea e taua ai le malumalu ia i tatou?

• Valaaulia tamaiti e faitau lemu le Mataupu Faavae ma Feagaiga 110:1-10, ma valaaulia i latou e faasoa mai se mea na latou aoaoina mai i nei fuaiupu e uiga ia Iesu Keriso po o le malumalu. Valaaulia tamaiti e tusi se ata o i latou lava ma le Faaola i luma o le malumalu.

• Fai atu i tamaiti e vaai faalemafaufau e faapea, o loo taumafai se uo e su’e le latou fale. E faapefea ona tatou fesoasoani i le tatou uo ia iloa po o fea le tatou fale? E faapefea ona tatou iloa o le malumalu o le maota o le Alii? Faitau le Mataupu Faavae ma Feagaiga 109:12-13. ma tamaiti, ma ta’u atu ia i latou pe aisea e te iloa ai o le malumalu o le maota o le Alii. Faaali atu ata o malumalu, ma tuu atu i tamaiti e faasoa mai o latou lagona e uiga i maota o le Alii.

• Usu faatasi ma tamaiti “O Le Agaga o le Atua” (Viiga, nu. 2), ma ta’u atu ia i latou sa lagiina i le faapaiaga o le Malumalu o Katelani—ma i faapaiaga o malumalu i aso nei. Aisea na lelei ai lenei pese mo le faapaiaga o le Malumalu o Katelani?

  O totonu o le Malumalu o Katelani

  E tofu uma itu o le Malumalu o Katelani ma pulelaa mo taitai o le perisitua.

Mataupu Faavae ma Feagaiga 110:11-16

O ki o le perisitua lea na manaomia e faataunuu ai le galuega a le Atua o loo i ai i le taimi nei i le Ekalesia.

Na faapea mai Elder Gary E. Stevenson, “[Sa] loka i fafo fanau uma a le Tama Faalelagi mai sauniga faaola o le talalelei a Iesu Keriso—seia oo ina faatinoina se toefuataiga faalelagi e [Mose, Elia, Elaia]” (“O Fea o I Ai Ki ma le Pule o le Perisitua?” Ensign po o le Liahona, Me 2016, 30).

Gaoioiga e Mafai Ona Fai

• Valaaulia tamaiti e suesue le Mataupu Faavae ma Feagaiga 110:11–16 e saili ai igoa o perofeta anamua ia na faaali mai i le Malumalu o Katelani. Ona fesoasoani lea ia i latou e sailia upu i nei fuaiupu e faamatala ai le mea na “tautino,” pe na tuuina atu e perofeta taitasi, ia Iosefa Samita ma Oliva Kaotui. E mafai ona e maua se faʻamatalaga aoga i totonu o le “Mataupu 40: O Faaaliga i le Malumalu o Katelani” (Tala o le Mataupu Faavae ma Feagaiga, 156-57).

• Faasoa atu lenei faamatalaga o ki o le perisitua na saunia e Peresitene Russell M. Nelson: “I lau taga atonu o i ai se ki o lou fale po o le taavale. O ki o le perisitua i se isi itu, e faitino ma e mafai ona vaaia. Latou te ‘ki e faaola’ le pule o le perisitua” (“Tiutetauave o le Tagata i le Perisitua,” Ensign po o le Liahona, Nov. 2003, 45-46). Ina ia faapupulaina le taua o ki o le perisitua, ia talanoaina ma tamaiti ia faafitauli o le leiloa o se ki o le fale po o se ki o le taavale. E faapefea ona tutusa lenei mea ma faafitauli o ki o le perisitua ua leiloloa? Fesoasoani i tamaiti ia malamalama po o ai o loo umiaina ki o le perisitua i le asō ma le auala e faaaogaina ai nei ki e tatala ai faamanuiaga mo fanau uma a le Atua (tagai “Ki o le Perisitua,” Faamaoni i le Faatuatua, 126–27).

• Ina ia faamalamalama atili atu ia ki na toefuatai mai i le Malumalu i Katelani, ia faaali le vitio “By the Hand of Elijah the Prophet” (ChurchofJesusChrist.org). Ia talanoaina mea e mafai ona tatou faia e auai ai i le galuega ona o ki a Elia. Pe faaali le vitio “Gatherers in the Kingdom” (ChurchofJesusChrist.org) ma talanoa e uiga i auala e mafai ai ona tatou fesoasoani e toe aumai fanau a le Tama Faalelagi ia te Ia.

aikona o le aoaoina

Uunaia le Aoaoina i le Aiga

Valaaulia tamaiti e faaaoga le itulau o gaoioiga o lenei vaiaso po o se ata na latou tusia i le vasega e aoao ai lo latou aiga i se mea na latou aoaoina i le asō e uiga i malumalu po o ki o le perisitua.

Faaleleia o Lo Tatou Aoao Atu

Fatufatuaʻi se siosiomaga alofa ma le migao. “O au faataitaiga o loo i ai se faatosinaga mamana i uiga faaalia o [tamaiti]. … Faatasi ai ma au upu ma au taga, faaali atu ia i latou e te alofa i le talalelei ma e te popole e uiga i lo latou tuputupu a’e faaleagaga” (Aoao Atu i le Ala a le Faaola, 15).

itulau o gaoioiga: o ki o le perisitua sa toefuatai mai i le Malumalu i Katelani