Navu le Lalelei, saunia e Larry Winborg

25–31 Oketopa

Mataupu Faavae ma Feagaiga 124–125

“Se Fale mo Lo’u Igoa”

O a lesona mai le Mataupu Faavae ma Feagaiga 124-25 e manaomia ona aoao e tamaiti? Manatunatu loloto i lenei fesili ao e suʻesuʻe i lenei vaiaso.

Tusi Faamaumau Ou Lagona Uunai

Valaaulia le Fefaasoaai

Faaali atu se ata o le malumalu e sili ona lata ane ia te oe. Fesili i tamaiti pe o le a se mea latou te iloa e uiga i malumalu. Tuu atu ia i latou e faasoa mai o latou lagona e uiga i le o atu i le malumalu i se aso.

Aoao atu le Aoaoga Faavae: Tamaiti Laiti

Mataupu Faavae ma Feagaiga 124:15, 20

E fiafia Iesu pe a ou taumafai e fai le mea sao.

I le faaaliga na faamaumauina i le vaega e 124, na faaalia ai e le Alii Lana faamaoniga mo Ailama Samita ma Siaosi Miller ona sa la taumafai e mulimuli ia te Ia. E faapefea ona e fesoasoani i tamaiti ia latou iloa e fiafia le Alii pe a latou taumafai e faia mea lelei?

Gaoioiga e Mafai Ona Fai

• Fesoasoani i tamaiti e mafaufau i mea e mafai ona latou faia e lelei. Faʻaali atu ni ata e tuʻuina atu ai ia i latou ni manatu (e mafai ona e mauaina nisi i le Tusi Ata o le Talalelei po o mekasini a le Ekalesia). Fai atu i tamaiti e faasino i nei mea lelei. Faitau le Mataupu Faavae ma Feagaiga 124:15 i tamaiti, ma fai atu ia i latou e faalogo pe o le a se lagona o le Alii ina ua filifili Ailama Samita e fai le mea sao. O a lagona o Iesu pe a tatou taumafai e faia mea lelei?

• Tufa atu i tamaiti pepa fatu, ma fai atu ia i latou e tusi ata o i latou lava o faia ni mea lelei. Valaaulia i latou e faasoa mai mea na latou tusia i le vasega. O a ni o tatou lagona pe a tatou filifili e fai se mea lelei? Molimau atu e fiafia Iesu pe a tatou taumafai e fai le mea sao.

• Usu se pese e faatatau i le faia o mea e finagalo Iesu tatou te faia, e pei o le “E Manao Iesu Ia Ou Fai ma Sulu” (Tusipese a Tamaiti,38).

Mataupu Faavae ma Feagaiga 124:28–29, 39

Ua poloaiina e Iesu Ona tagata ina ia fausia malumalu.

O malumalu ua leva ona avea ma se vaega i le fuafuaga a lo tatou Tamā Faalelagi mo Lana fanau. O le malamalama i lenei mea o le a fesoasoani i tamaiti o loo e aoaoina ia lagonaina le sili atu ona faaaloalo mo le malumalu.

Gaoioiga e Mafai Ona Fai

• Fesoasoani i tamaiti ina ia malamalama ina ua maua e le Au Paia se fale fou i Navu, na faatonuina i latou e le Alii e fausia se malumalu (tagai “Mataupu 49: O le Au Paia i Navu,” Tala o le Mataupu Faavae ma Feagaiga. 183-84, po o le vitio talafeagai i luga o le ChurchofJesusChrist.org). Valaaulia tamaiti e faafoliga faapea o loo latou fauina se malumalu.

• Faitau ma tamaiti lenei fuaitau: “O loʼu fale paia, lea ua poloaiina loʼu nuu i taimi uma ia fausia mo loʼu igoa paia” (Mataupu Faavae ma Feagaiga 124:39). Tuu atu i tamaiti e uu se ata o se malumalu anamua (tagai Tusi Ata o le Talalelei, nu. 52 po o le itulau o gaoioiga o lenei vaiaso) ma se ata o se malumalu i lou eria. Faamalamalama atu na poloaiina e le Tama Faalelagi ma Iesu Keriso o latou tagata ina ia fausia malumalu - i aso anamua ma o tatou aso. Faasoa atu upu ma fuaitau mai le Mataupu Faavae ma Feagaiga 124:28-29 e fesoasoani i tamaiti e malamalama i le mafuaaga e finagalo ai le Alii e fausia malumalu.

• Valaaulia tamaiti e faamaea le itulau o gaoioiga o lenei vaiaso e fesoasoani ai ia i latou ia malamalama o tatou o tagata o le Atua ma o tagata o le Atua ua poloaiina i taimi uma e fausia malumalu.

Aoao atu le Aoaoga Faavae: Tamaiti Matutua

Mataupu Faavae ma Feagaiga 124:12–21

E fiafia le Alii pe a ou faamaoni.

I le vaega 124, sa viia e le Alii nisi o le Au Paia mo lo latou faamaoni. O Ana upu e mafai ona fesoasoani i tamaiti e iloa ai uiga e tatau ona latou atiina ae.

Gaoioiga e Mafai Ona Fai

• Filifili nisi o uiga lelei o loʻo taʻua i totonu o le Mataupu Faavae ma Feagaiga 124:12-21, ma tusi i luga o le laupapa faataamilo i se ata o le Faaola. Fai atu i tamaiti e suesue le fuaiupu 12--21, saili mo upu nei. Fesoasoani ia latou malamalama i upu atonu latou te le masani i ai. E tusa ai ma nei fuaiupu, o le a le lagona o le Alii e uiga i tagata na atiina ae nei uiga lelei?

• Tusi le upu amio sa’o i luga o le laupapa. Valaaulia tamaiti e aoao po o le a le fetalaiga a le Alii e uiga i le amio sa’o i totonu o le Mataupu Faavae ma Feagaiga 124:15, 20. Ina ia fesoasoani i tamaiti ia malamalama i le uiga o le amio sa’o, faitau lenei faamatalaga: “O le amio sa’o o lona uiga o le mafaufau ma le faia o le mea tonu i taimi uma, tusa lava po o a taunuuga” (Mo le Malosi o le Autalavou,19). E mafai foi ona e faasoa ni faataitaiga o se tamaitiiti o loo faatinoina le amio sa’o mai lou oe lava aafiaga pe mai mekasini o le Uo po o le Liahona . Lu’i tamaiti e faatu se sini ia atili ona amio sa’o i lenei vaiaso.

Mataupu Faavae ma Feagaiga 124:28–30, 38–41

Ua poloaiina e Iesu Ona tagata ina ia fausia malumalu.

O tamaiti o loo e aoaoina o le a toeitiiti lava le matutua e o atu ai i le malumalu ma auai i sauniga o le malumalu. O le a se mea e mafai ona e faia e fesoasoani ai e tapena i latou?

Gaoioiga e Mafai Ona Fai

• Ufiufi se atapue po o se ata tusi o le malumalu. Valaaulia tamaiti e faitau le Mataupu Faavae ma Feagaiga 124:38-41 mo faailoilo e uiga i mea o loo i totonu o le ata. Tuu atu i tamaiti e aveese le ufiufi mai le ata ma talanoaina mea o loo aoao mai e nei fuaiupu e uiga i le mafuaaga e finagalo ai le Alii tatou te fausia malumalu.

• Valaaulia tamaiti e faitau le Mataupu Faavae ma Feagaiga 124:28-30 e vaavaai mo mafuaaga na tuuina atu e le Alii ia Iosefa Samita mo le fausiaina o le Malumalu o Navu. Faasoa atu ou lagona e uiga i le malumalu ma soo se aafiaga na e mauaina i le faia o papatisoga mo e ua maliliu. Fesoasoani i tamaiti e filifili po o le a le umi ona oo lea i lo latou matutua e faia ai papatisoga mo e ua maliliu i totonu o le malumalu.

• Afai o ia te oe se pepa faataga o le malumalu, ia faaali atu i tamaiti, pe valaaulia se talavou i le uarota e faaali atu i tamaiti lana pepa faataga. Faamatala atu i tamaiti pe aisea e taua ai se pepa faataga o le malumalu ma mea e tatau ona tatou faia ina ia maua ai se pepa faataga. Fautuaina i latou ia amata saunia nei e maua a latou lava pepa faataga.

  

  O Iosefa Samita i le Malumalu o Navu, saunia e Gary E. Smith

Mataupu Faavae ma Feagaiga 124:91–92

O se faamanuiaga faapeteriaka e mafai ona tuuina mai ia te au le taitaiga musuia.

Afai ua e mauaina se faamanuiaga faapeteriaka, toe iloilo ao lei aoaoina tamaiti e uiga i nei faamanuiaga. Aisea e te faafetai ai mo lou faamanuiaga faapeteriaka? E faʻapefea ona e faʻamalosia tamaiti e sauni e maua a latou lava faamanuiaga faapeteriaka?

Gaoioiga e Mafai Ona Fai

• Valaaulia se tasi o tamaiti e faitau le Mataupu Faavae ma Feagaiga 124:91-92, ma valaaulia le vasega e faalogo mo mea na valaauina e le Alii ia Ailama Samita e fai. O a mea ua iloa e tamaiti e uiga i faamanuiaga faapeteriaka? Afai ua e mauaina se faamanuiaga faapeteriaka, ia faaali atu i tamaiti le foliga. (Manatua o mataupu patino o lou faamanuiaga faapeteriaka e paia.) Faamalamalama atu o faamanuiaga faapeteriaka o ni faamanuiaga faapitoa tatou te maua mai peteriaka. O nei faamanuiaga e mafai ona fesoasoani tatou te aoao atili ai e uiga ia i tatou lava ma mea e finagalo le Tama Faalelagi tatou te faia.

• Mafaufau e valaaulia se matua po o se tei o se tasi o tamaiti o loo e aoaoina e faasoa atu i le vasega pe aisea latou te faafetai ai mo lo latou faamanuiaga faapeteriaka. Fai atu ia i latou e faasoa mai pe na faapefea ona latou filifili latou te mananao e maua a latou faamanuiaga. Tuu atu lau molimau e uiga i faamanuiaga faapeteriaka.

Uunaia le Aoaoina i le Aiga

Valaaulia tamaiti e faasoa atu i se tagata o le aiga se mea se tasi na latou aoaoina e uiga i malumalu ma pe aisea latou te mananao ai e o atu i le malumalu i se aso.

Faaleleia o Lo Tatou Aoao Atu

E mafai ona iloa e tamaiti le uunaiga a le Agaga. Aoao atu i tamaiti o lagona o le filemu, alofa, ma le mafanafana latou te mauaina, pe a latou talanoa pe usuina le pese e uiga ia Iesu Keriso ma Lana talalelei e mai le Agaga Paia. E mafai e nei lagona ona fausia a latou molimau.