Sisifo Mamao, saunia e Al Rounds

11–17 Oketopa

Mataupu Faavae ma Feagaiga 115–120

“O Le a Sili Atu Le Paia o Lana Taulaga Ia te Aʼu Nai Lo Ona Faatelega”

Tuu atu i le Agaga e taitaia oe i mataupu faavae e sili ona manaomia e tamaiti. E mafai ona e mauaina ni manatu fesoasoani i gaoioiga mo tamaiti laiti po o tamaiti matutua.

Tusi Faamaumau Ou Lagona Uunai

Valaaulia le Fefaasoaai

I nisi taimi, atonu e lelei le talanoa muamua i matua o se tasi o tamaiti ma fautuaina e sau saunia le tamaitiiti i le vasega e faasoa se mea na ia aoaoina i le fale. Atonu e fiafia le tamaitiiti e taitaia se gaoioiga na ia faia ma tagata o lona aiga i le vasega.

Aoao atu le Aoaoga Faavae: Tamaiti Laiti

Mataupu Faavae ma Feagaiga 115:4–5

Ou te auai i le Ekalesia a Iesu Keriso o le Au Paia o Aso e Gata Ai.

E faapefea ona e fesoasoani i tamaiti ia iloa faamanuiaga o le avea ma se vaega o le Ekalesia a Iesu Keriso?

Gaoioiga e Mafai Ona Fai

• Fai atu i tamaiti pe mafai e se tasi o i latou ona taʻu le igoa atoa o le Ekalesia. Faaali atu ia i latou le tagavai a le Ekalesia (i luga o se lomiga a le Ekalesia po o pine a faifeautalai), tusi le igoa i luga o le laupapa, pe faitau atu foi ia i latou mai le Mataupu Faavae ma Feagaiga 115:4. Fai i tamaiti tou te taʻuina faatasi le igoa ao e faasino atu i upu taitasi. Faailoa atu upu taua i le igoa, ma fesoasoani i tamaiti ia malamalama pe aisea e taua ai nei upu (tagai “Mataupu 43: Ua Faaigoa e lesu Keriso Lana Ekalesia,” Tala o le Mataupu Faavae ma Feagaiga,164).

• Usu faatasi le “O Le Ekalesia a Iesu Keriso,” (Tusipese a Tamaiti,48), ma fefaasoaai ma tamaiti pe o le a sou lagona i le avea ai ma se tasi o le Ekalesia a Iesu Keriso. Tuu atu ia i latou e faasoa mai o latou lagona e uiga i le Ekalesia.

• Valaaulia tamaiti e tutu pe a e faitauina le upu “tutulai” i totonu o le Mataupu Faavae ma Feagaiga 115:5. Valaaulia i latou e faaloloa o latou tamatamailima e pei o ave o le la pe a e faitau “susulu atu.” Usu faatasi se pese e uiga i le avea o se malamalama i isi, e pei o “E Pei A‘u o se Fetu” (Tusipese a Tamaiti84). Faamanatu atu i tamaiti o lo tatou malamalama e mai ia Iesu Keriso, ma fesoasoani ia i latou e mafaufau i ni auala e mafai ona latou “susulu atu ai.”

Mataupu Faavae ma Feagaiga 117:6

Na faia e Iesu Keriso le lalolagi ma mea uma o i ai.

Ina ia uunaia William Marks ma Newel K. Whitney e ositaulaga a laua meatotino ma siitia atu i Misuri, na faamanatu atu e le Alii ia i laua na Ia foafoaina mea uma i luga o le fogaeleele. E faapefea ona faamanuiaina fanau i le iloaina o lenei upumoni?

Gaoioiga e Mafai Ona Fai

• Aumai pe tusi ata o le foafoaga i totonu o le Mataupu Faavae ma Feagaiga 117:6 na fetalai le Alii na Ia faia (pe valaaulia tamaiti e tusi a latou lava ata). Valaaulia tamaiti e uu i luga pe faasino i ata ao e faitauina le fuaiupu. Tau atu i tamaiti pe aisea e taua ai ia te oe le iloa na foafoaina e Iesu Keriso nei mea.

• Usu faatasi ma tamaiti se pese e uiga i foafoaga a le Alii, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). Tuu atu i tamaiti e talanoa e uiga i nisi o mea na foafoaina e le Atua e fesoasoani latou te lagonaina ai Lona alofa.

Mataupu Faavae ma Feagaiga 119–20

O le sefuluai e fesoasoani i le Ekalesia e faia ai galuega a le Atua.

O le toatele o tamaiti o loo e aoaoina atonu e laiti tele e maua se tupe ma totogi ai le sefuluai, ae e lelei mo i latou le malamalama pe faapefea ona saofaga le sefuluai i le galuega maoae o loo faia e le Ekalesia i le lalolagi atoa.

Gaoioiga e Mafai Ona Fai

• Faamatala pe faapefea ona tatou totogiina le sefuluai ma pe o le a le mea e faaaoga ai (tagai “Mataupu 44: Sefuluai,” Tala o le Mataupu Faavae ma Feagaiga, 165-66, po o le vitio talafeagai i luga o le ChurchofJesusChrist.org). Tusi ni tupe siliva se 10 i luga o le laupapa, ma fai i tamaiti e fesoasoani ia te oe e faitauina. Fuafua po o le a le tele e tuuina atu i le Alii mo le sefuluai.

• Usu faatasi se pese e faatatau i le sefuluai, e pei o le “I Want to Give the Lord My Tenth” (Children’s Songbook, 150), ma ta’u i tamaiti pe aisea ua e filifili ai e totogi le sefuluai. Pe a mafai, faasoa atu se tala patino.

Aoao atu le Aoaoga Faavae: Tamaiti Matutua

Mataupu Faavae ma Feagaiga 115:4–6

O a’u faataitaiga e mafai ona fesoasoani i isi e o mai ia Keriso ma maua le saogalemu.

O tamaiti o loʻo e aoaoina atonu latou te iloa tagata o loʻo aʻafia i afa o le olaga ma e manaʻomia le “sulufaiga” (fuaiupu 6) o loo saunia e le Ekalesia. Mafaufau pe o le a faapefea ona e musuia tamaiti e “tutulai ma susulu atu” (fuaiupu 5) ma fefaasoaai lo latou malamalama i nei tagata.

Gaoioiga e Mafai Ona Fai

• Faasolo se moliuila, se ata o le la, po o se isi mea e suitulaga i le malamalama o le talalelei a le Faaola. A oo i le taimi latou te uuina ai le malamalama, valaaulia tamaiti e faitau Mataupu Faavae ma Feagaiga 115:4--5 ma taʻu mai se mea e mafai ona latou faia e “susulu atu” e pei o se malamalama mo isi (tagai 3 Nifae 18:24).

• Valaaulia tamaiti e tusi se ata e faaalia ai le Mataupu Faavae ma Feagaiga 115:6. Mo se faataitaiga, e mafai ona latou tusia se afā, faatasi ai ma tagata o loo sulufaʻi i se fale o le Ekalesia. O a nisi o mea e ono faʻatusalia ai le afa? E faapefea ona mafai ona tuuina atu e le Ekalesia le fesoasoani tau-sulufaiga mai nei mea?

Mataupu Faavae ma Feagaiga 117

O aʻu taulaga e paia i le Alii.

I le vaega 117, na fautuaina ai e le Alii ia William Marks ma Newel K. Whitney e ositaulaga a laua meatotino i Katelani mo faamanuiaga sili atu i Misuri. Na ia faamamaluina foi Oliver Granger mo osigataulaga sa ia faia. O a mea e te lagona e mafai ona aʻoaʻoina e tamaiti mai a latou faataitaiga?

Gaoioiga e Mafai Ona Fai

• Ia valaaulia tamaiti e vaai faalemafaufau o i latou o le pule o se faleoloa manuia i Katelani, e pei o Newel K. Whitney. O a ni o latou lagona pe afai e talosagaina i latou e le Alii e tuua lo latou faleoloa ma siitia atu i se nofoaga fou? Faitau atu i tamaiti le Mataupu Faavae ma Feagaiga 117:1-11, ma fai atu i tamaiti e taofi oe pe a latou faalogo i se mea o le a fesoasoani ia i latou e maua ai le faatuatua e faia ai ni osigataulaga ma usiusitai i le Alii. O a mea tatou te ositaulagaina nei e usitai ai i le Alii?

• Faamatala faapuupuu i tamaiti pe aisea na tatau ai ona tuua e le Au Paia ia Katelani, pe tuu atu i se tasi o tamaiti e faia (tagai “Mataupu 41: O Faalavelave i Katelani,” Tala o le Mataupu Faavae ma Feagaiga, 158–60). Faamalamalama atu na talosagaina e le Alii ia Oliver Granger e nofo i Katelani ma totogi aitalafu a le Ekalesia. Aisea o le a avea ai lena mea ma galuega faigata? O le a le fetalaiga a le Alii i totonu o le Mataupu Faavae ma Feagaiga 117:13 e mafai ona fesoasoani ia Oliva—po o soo se tasi oi tatou—faia osigataulaga e usitai i le Alii?

Mataupu Faavae ma Feagaiga 119–20

O le sefuluai e fesoasoani i le Ekalesia e fai ai le galuega a le Atua.

Mafaufau loloto pe faapefea ona e fesoasoani i tamaiti ia malamalama pe faapefea ona avea le sefuluai—e tusa lava pe itiiti le aofai latou te totogi—e saofagā i le fausiaina o le malo o le Alii (tagai Faamaoni i le Faatuatua, 180--82).

Gaoioiga e Mafai Ona Fai

• Valaaulia tamaiti e vaai faalemafaufau faapea ua vaai se uo i se fale o le Ekalesia ma fesili mai, “E faapefea ona totogi e lau Ekalesia lena fale?” E faʻapefea ona tatou faʻamatalaina le sefuluai i lenei uo? Fautua atu e faasino tamaiti i le Mataupu Faavae ma Feagaiga 119:4; 120:1 ao latou mafaufau i lenei fesili.

• Fesoasoani i tamaiti e mafaufau i mea e mafai e le Ekalesia ona faia ona o le sefuluai. E faapefea e nei mea ona faamanuiaina o tatou olaga? Faasoa atu ou lagona e uiga i le tulafono o le sefuluai ma le auala ua faamanuiaina ai oe.

  

  O le totogiina o le sefuluai, e mafai ai ona tatou faaali atu lo tatou alofa mo le Atua ma fesoasoani i Lana galuega.

Uunaia le Aoaoina i le Aiga

Valaaulia tamaiti e matau po o a ni o latou lagona i o latou loto po o mafaufauga na oo mai i o latou mafaufau i le taimi o le Peraimeri i le aso. Fautuaina i latou e faasoa atu o latou lagona ma mafaufauga ma o latou aiga.

Faaleleia o Lo Tatou Aoao Atu

Lagolago i matua. Saili ni auala e faasoa atu ai i matua mea o loo aoaoina e a latou fanau i le Peraimeri, ma fesili ia i latou pe mafai faapefea ona e lagolagoina a latou taumafaiga i le avea ai ma matua (tagai Aoao Atu i le Ala a le Faaola, 25).