“Agosto 16–22. Doktrina ug mga Pakigsaad 89–92: ‘Usa ka Baruganan uban sa Saad,’” Dali, Sunod Kanako—Alang sa Primary: Doktrina ug mga Pakigsaad 2021 (2020)
“Agosto 16–22. Doktrina ug mga Pakigsaad 89–92,” Dali, Sunod Kanako—Alang sa Primary
Agosto 16–22
Doktrina ug mga Pakigsaad 89–92
“Usa ka Baruganan uban sa Saad”
Samtang ikaw magtuon sa mga kamatuoran sa Doktrina ug mga Pakigsaad 89–92, palandunga ang bag-o ug mamugnaong mga paagi nga imong matabang sa mga bata nga makasabut niini.
Irekord ang Imong mga Impresyon
Dapita ang Pagpaambit
Dapita ang mga bata sa pagdrowing ug paghisgot sa maayong mga butang nga ilang nahimo niining semanaha sa pag-atiman sa ilang mga lawas ug mga espiritu.
Itudlo ang Doktrina: Mas Gagmay nga mga Bata
Ako mapanalanginan samtang ako mosunod sa Pulong sa Kaalam.
Tudloi ang mga bata nga ang atong mga lawas mga gasa gikan sa Langitnong Amahan ug Siya gusto nga kita moatiman niini.
Ang atong mga lawas mga gasa gikan sa Dios.
Posible nga mga Kalihokan
-
Aron matabangan ang mga bata nga makasabut sa mga sugo sa Ginoo sa Doktrina ug mga Pakigsaad 89:10–17, pagdrowing o pagpakita og mga litrato sa maayong mga butang nga atong kan-on o maayong mga butang nga atong mahimo aron ang atong mga lawas mahimsog (tan-awa usab sa pahina sa kalihokan niining semanaha). Tabangi usab ang mga bata nga makasabut nga ang alkohol, tabako, tsa, kape, ug ubang makadaot nga mga drugas makadaot sa atong lawas ug ang Ginoo mipasidaan nato nga dili mogamit niini. Dapita ang mga bata sa pagpili og butang nga ilang mahimo niining semanaha sa paghimo sa ilang mga lawas nga mahimsog.
-
Dapita ang mga bata sa pagpuli-puli sa pagdrowing og litrato diha sa pisara nga nagrepresentar og butang nga gitudlo sa Pulong sa Kaalam. Tuguti ang ubang mga bata nga motag-an unsa ang gidrowing sa matag tawo. Hisguti ang sugo sa Ginoo sa seksyon 89 nga may kalabutan sa drowing.
-
Gamita ang mosunod nga ehemplo, o ang uban nga imong mahunahunaan, sa pagpakita kon sa unsa nga paagi kita mapanalanginan sa pagsunod sa Pulong sa Kaalam (tan-awa sa Doktrina ug mga Pakigsaad 89:18–21). Pagbuhat mo og yanong ehersisyo, sama sa paglakaw o pagdagan nga diha ra sa nahimutangan, ug dayon magpakaaron-ingnon nga “naluya” o “kakuyapon” (bersikulo 20). Pagpamatuod sa mga saad sa Ginoo.
-
Ipakita ang usa ka litrato sa templo, ug hangyoa ang mga bata sa paghulagway unsay ilang nakita. Gamit og kanta mahitungod sa pisikal nga kahimsog, sama sa “Ang Ginoo Naghatag Kanako og Templo” (Songbook sa mga Bata, 73), sa pagtudlo sa mga bata nga ang atong mga lawas sama sa mga templo alang sa atong mga espiritu ug ang Dios gusto nga ang atong mga lawas mahimsog. Tabangi ang mga bata sa paghunahuna og mga paagi nga kita makaatiman sa atong mga lawas, ug tuguti ang mga bata nga modrama niini.
Doktrina ug mga Pakigsaad 90:5
Ang Dios mihatag nato og mga propeta sa paggiya ug pagpanalipod nato.
Tabangi ang mga bata nga makasabut sa unsa nga paagi nga ang mga propeta sa Ginoo makatabang nato nga makakaplag og kasiguroan gikan sa mga unos sa kinabuhi.
Posible nga mga Kalihokan
-
Ipakita sa mga bata ang mga litrato sa karaang mga propeta, ug sultihi sila sa unsa nga paagi nga kini nga mga propeta mipasidaan sa katawhan sa ilang panahon. (Alang sa mga ideya, tan-awa sa “Sunda ang Propeta,” Songbook sa mga Bata, 58–59.)
-
Ngano nga kita kinahanglang maminaw sa mga propeta sa Dios? Ipakita ang usa ka litrato sa propeta karon, ug ipakigbahin ang pipila ka butang nga iyang gitudlo o gipasidaan kanato karong bag-o. Dapita ang mga bata sa paghunahuna og mga paagi nga kita makasunod sa propeta. Ipakigbahin ang imong pagpamatuod sa mga kamatuoran nga gitudlo sa Doktrina ug mga Pakigsaad 90:5. (Hinumdumi nga ang “mga orakulo” nagpasabut nga mga pagpadayag o mga propeta kinsa modawat niini.)
Itudlo ang Doktrina: Mas Dagko nga mga Bata
Ang Pulong sa Kaalam nagtabang nako nga mahimsog sa lawas ug sa espiritu.
Si Elder Gary E. Stevenson mitambag sa mga batan-on sa pagplano sa sayo pa unsay ilang himoon kon tintalon nga mogamit og alkohol o mga drugas. Dayon siya mitudlo, “Inyong makita nga ang tintasyon wala kaayoy kontrol diha kaninyo. Nakahimo na kamo og desisyon kon unsaon ninyo paglihok ug unsay inyong buhaton. Dili na kamo kinahanglan mohimo og desisyon sa matag higayon” (“Basahon sa mga taktika ug mga angayang buhaton [Playbook] sa Imong Pagkapari,” Liahona, Mayo 2019, 48). Awhaga ang mga bata nga imong gitudloan sa paghukom karon—alang sa nahibilin sa ilang kinabuhi—sa pagsunod sa Pulong sa Kaalam.
Posible nga mga Kalihokan
-
Bahina ang mga bata ngadto sa duha ka grupo, ug hangyoa ang usa ka grupo sa pagbasa sa Doktrina ug mga Pakigsaad 89:1–4 ug ang laing grupo sa pagbasa sa mga bersikulo 18–21. Hangyoa sila sa pagpamalandong sa mga pangutana sama sa mosunod: Ngano nga ang Ginoo mihatag nato sa Pulong sa Kaalam? Sa unsang paagi nga ang pagsunod sa Pulong sa Kaalam nakapanalangin kanako sa pisikal ug sa espirituhanong paagi?
-
Paghimo og fill-in-the-blank nga mga pamahayag gamit ang mga pulong gikan sa Doktrina ug mga Pakigsaad 89, sama sa “ gitugutan alang sa paggamit sa tawo ug sa mga kahayopan” o “Ug mo ug dili makuyapan” (mga bersikulo 14, 20). Dapita ang mga bata nga magparis aron sa pagpangita sa mga tubag sa seksyon 89. Ang mga bata mahimong mobahin-bahin sa mga pamahayag ngadto sa mosunod nga mga kategoriya: maayong mga butang alang sa atong mga lawas, dili maayo nga mga butang alang sa atong mga lawas, ug mga panalangin.
-
Dapita ang usa ka bata sa pagbasa sa Doktrina ug mga Pakigsaad 89:4 ug ang lain sa pagbasa sa kinutlo gikan ni Elder Stevenson sa ibabaw. Ngano nga kita mohukom karon nga mosunod sa Pulong sa Kaalam kay sa maghulat hangtud sa higayon sa pagtintal? Tabangi ang mga bata nga modrama unsaon nila sa pagtubag kon ang usa ka tawo, bisan usa ka higala, motanyag nila og butang nga batok sa Pulong sa Kaalam. Sa unsa nga paagi nga ang pagsunod sa Pulong sa Kaalam manalipod kanato?
Doktrina ug mga Pakigsaad 90:2, 5, 14–16
Ang Unang Kapangulohan naghupot “sa mga yawe sa gingharian.”
Ang mga instruksyon sa Ginoo mahitungod sa Unang Kapangulohan niadtong 1833 (Joseph Smith, Sidney Rigdon, ug Frederick G. Williams) makatabang sa mga bata paglig-on sa ilang pagpamatuod sa Unang Kapangulohan karon.
Posible nga mga Kalihokan
-
Dapita ang mga bata sa pagsiksik sa Doktrina ug mga Pakigsaad 90:14–16 ug mosulat sa pipila ka mga butang nga gisugo sa Ginoo nga buhaton sa Unang Kapangulohan. Ipakita sa mga bata ang usa ka litrato sa Unang Kapangulohan karon, ug pakigbahin mahitungod kanila. (Mabasa nimo ang ilang mga biyograpiya ubos sa “Living Prophets and Church Leaders” sa ChurchofJesusChrist.org.) Ipakigbahin ang imong pagpamatuod sa ilang balaan nga mga calling ug sa mga panalangin nga imong nadawat tungod sa pagsunod sa ilang tambag.
-
Ribyuha uban sa mga bata ang butang nga gitudlo sa usa ka sakop sa Unang Kapangulohan. Dayon basaha pagdungan ang Doktrina ug mga Pakigsaad 90:5. Itudlo nga ang “mga orakulo” mao ang mga pagpadayag o ang mga propeta kinsa nakadawat niini. Unsa ang gipasabut sa “pagdawat sa mga orakulo … nga wala hatagig bili”? Unsaon nato sa pagpakita nga ang mga propeta ug ang mga butang nga ilang gitudlo importante kanato?
Ang Espiritu makatabang kanako nga makahibalo unsa ang tinuod.
Samtang ikaw magbasa unsa ang gisulti sa Ginoo ni Joseph Smith mahitungod sa Apokripa, hunahunaa kon sa unsa nga paagi nga kini nga tambag makatabang sa mga bata nga makaila tali sa kamatuoran ug sayop nga ilang masugatan sa ilang tibuok kinabuhi.
Posible nga mga Kalihokan
-
Basaha pagdungan ang ulohan sa seksyon sa Doktrina ug mga Pakigsaad 91 aron matabangan ang mga bata nga makasabut unsa ang Apokripa (tan-awa usab sa Giya ngadto sa mga Kasulatan, “Apocrypha,” scriptures.ChurchofJesusChrist.org). Tabangi ang mga bata nga maghunahuna sa ubang mga dapit, sama sa media, diin mahimo natong makita ang “daghang mga butang … nga tinuod” ug “daghang mga butang … nga dili tinuod” (mga bersikulo 1–2). Dayon dapita ang mga bata sa pagsiksik sa seksyon 91 aron makat-unan unsa ang gisulti sa Ginoo nga atong mabuhat sa pag-ila tali sa kamatuoran ug sayop.
-
Basaha pagdungan ang Doktrina ug mga Pakigsaad 91:4–6, ug pangutan-a ang mga bata unsa ang gitudlo niini nga mga bersikulo mahitungod sa Espiritu Santo. Dapita ang mga bata sa pagpakigbahin og personal nga kasinatian sa dihang “ang Espiritu [mipadayag] sa kamatuoran” ngadto kanila. Ipakigbahin usab ang imong kaugalingong mga kasinatian. Unsa ang ubang paagi nga ang Espiritu makatabang kanato?
Awhaga ang Pagkat-on diha sa Panimalay
Dapita ang mga bata sa pagpakigbahin uban sa ilang pamilya unsa ang ilang nakat-unan karon mahitungod sa pag-atiman sa ilang lawas ug espiritu o sa ilang mga tumong tungod sa pagsunod sa Pulong sa Kaalam.
Pagpalambo sa Atong Pagtudlo
Pagtinguha og imong kaugalingon nga inspirasyon. Kini nga mga outline dili mga instruksyon nga imong sundon samtang ikaw magtudlo. Hinoon, kini makasugod sa imong kaugalingong inspirasyon samtang ikaw mamalandong sa mga panginahanglan sa mga bata nga imong gitudloan. (Tan-awa sa Pagtudlo sumala sa Pamaagi sa Manluluwas, 7.)