“Agosto 23–29. Doktrina ug mga Pakigsaad 93: ‘Makadawat sa Iyang Kahingpitan,’” Dali, Sunod Kanako—Alang sa Primary: Doktrina ug mga Pakigsaad 2021 (2020)
“Agosto 23–29. Doktrina ug mga Pakigsaad 93,” Dali, Sunod Kanako—Alang sa Primary
Nakita Ko ang Anak sa Tawo nga Nagtindog sa Tuo nga Kilid sa Dios, ni Walter Rane
Agosto 23–29
Doktrina ug mga Pakigsaad 93
“Makadawat sa Iyang Kahingpitan”
Ang mga bata nga imong tudloan bililhong espiritu nga mga anak nga lalaki ug mga anak nga babaye sa Langitnong mga Ginikanan ug nagpuyo uban Kanila sa wala pa moanhi sa yuta. Human makatuon sa Doktrina ug mga Pakigsaad 93, unsay gibati nimo nga ikaw dinasig nga mobuhat aron pagtabang niining mga bata nga molambo “diha sa kahayag ug kamatuoran”? (bersikulo 40).
Irekord ang Imong mga Impresyon
Dapita ang Pagpaambit
Ipakita ang mga hulagway sa Manluluwas (sama niadtong anaa sa Libro sa mga Hulagway sa Ebanghelyo, o mga magasin sa Simbahan), ug hangyoa ang mga bata sa pagpaambit sa unsay ilang nahibaloan mahitungod Kaniya. Ang mas dagko nga mga bata mahimong mopaambit og usa ka kasulatan gikan sa Doktrina ug mga Pakigsaad 93 nga nakatabang nila nga makakat-on mahitungod ni Jesukristo.
Itudlo ang Doktrina: Mas Gagmay nga mga Bata
Doktrina ug mga Pakigsaad 93:2–21
Si Jesukristo mao ang Anak sa Dios.
Importante nga ang mga bata nga imong gitudloan makakat-on kinsa si Jesukristo ug nganong kinahanglan silang mosunod Kaniya. Ang mga kamatuoran mahitungod ni Jesukristo nga makita diha sa seksyon 93 makatabang.
Madawat nato ang kahayag ni Jesukristo kon motuman kita sa Iyang mga sugo.
Posible nga mga Kalihokan
-
Pagpili og pipila ka kamatuoran nga imong nakat-unan mahitungod sa Manluluwas diha sa seksyon 93 nga alang nimo makapadasig. Alang sa matag kamatuoran nga imong gipili, basaha sa mga bata ang bersikulo kon asa kini makit-an, ug hatagi sila og mahinungdanon nga pulong nga paminawon samtang magbasa ka. Pagpaambit og mubo nga pagpamatuod bahin sa Manluluwas, ug tuguti ang mga bata sa pagpaambit sa kaugalingon nilang pagpamatuod. Ang mosunod nga lista sa mga kamatuoran makahatag nimo og mga ideya:
Gihimo ni Jesukristo ang mga buluhaton sa Amahan (bersikulo 5).
Si Jesukristo mao ang Kahayag sa Kalibutan (bersikulo 9).
Si Jesukristo mao ang Tiglalang sa kalibutan (bersikulo 10).
Nadawat ni Jesukristo ang tanang gahum sa langit ug sa yuta (bersikulo 17).
Si Jesukristo diha na uban sa Dios sa sinugdanan (bersikulo 21).
-
Hangyoa ang mga bata sa pagpaminaw sa butang nga ilang nakat-unan mahitungod sa Manluluwas samtang imong i-summarize sa kaugalingon nimong mga pulong ang pipila ka kamatuoran nga gitudlo diha sa seksyon 93. (Mahimo usab nimong gamiton ang “Kapitulo 33: Usa ka Pagpadayag kalabut kang Jesukristo” [Mga Istorya sa Doktrina ug mga Pakigsaad, 126–27].)
Doktrina ug mga Pakigsaad 93:23, 29
Nagpuyo ko uban sa Langitnong Amahan sa wala pa ko moanhi sa yuta.
Ngano kaha nga importante man ang pagtabang sa mga bata nga imong gitudloan nga makasabut nga sila nagpuyo uban sa Langitnong Amahan sa wala pa sila matawo? Sa unsang paagi nga ang pagkahibalo niini nga kamatuoran nakapanalangin nimo?
Posible nga mga Kalihokan
-
Balika uban sa mga bata ang mga pulong nga “Kamo usab diha sa sinugdanan uban sa Amahan” (Doktrina ug mga Pakigsaad 93:23). Ipasabut nga sa wala pa kita matawo sa yuta, nagpuyo kita uban sa Langitnong Amahan didto sa langit. Kantaha og dungan ang “Ako Anak sa Dios” o “Langit Gipuy-an Ko” (Songbook sa mga Bata, 2–3, 140).
-
Dapita ang mga bata nga koloran ang pahina sa kalihokan ug sa pagdrowing og mga hulagway sa ilang kaugalingon uban sa Langitnong Amahan ug ni Jesukristo didto sa kinabuhi sa wala pa dinhi sa yuta. Ipaambit ang imong pagpamatuod nga ang Dios nahigugma kanatong tanan ug nga kitang tanan Iyang mga anak.
Itudlo ang Doktrina: Mas Dagko nga mga Bata
Doktrina ug mga Pakigsaad 93:2–21
Si Jesukristo mao ang Anak sa Dios.
Kon mas nakasabut kita mahitungod ni Jesukristo, mas lawom ug sinsero kitang mosimba Kaniya ug moduol ngadto sa Amahan pinaagi Kaniya (tan-awa sa Doktrina ug mga Pakigsaad 93:19).
Posible nga mga Kalihokan
-
Ipakita ang usa ka hulagway sa Manluluwas, ug pangutan-a ang mga bata nganong importante nga mahibalo kita mahitungod ni Jesukristo. Dapita sila sa pagpangita sa dugang nga mga tubag diha sa Doktrina ug mga Pakigsaad 93:19. Dapita sila sa paghunahuna og usa ka paagi nga mas makakat-on sila mahitungod ni Jesus sa umaabut nga semana, ug hatagi sila og kahigayunan nga mopaambit sa ilang mga ideya.
-
Paghunahuna og usa ka mamugnaong paagi sa pag-awhag sa mga bata nga mobasa mahitungod sa Manluluwas diha sa seksyon 93. Mahimo nimong isulat diha sa mga ginunting nga papel ang pipila ka pakisayran ngadto sa mga bersikulo gikan sa seksyon 93 nga nagtudlo og mga kamatuoran mahitungod ni Jesukristo (sama pananglit, tan-awa sa mga bersikulo 5, 9–10, 17, 21). Ibutang ang mga ginunting nga papel sa usa ka sudlanan, ug papuli-puliha ang mga bata sa pagpili og usa ug sa pagbasa og tudling sa mga kasulatan ngadto sa klase. Unsay atong makat-unan mahitungod ni Jesukristo gikan niini nga mga tudling?
Doktrina ug mga Pakigsaad 93:23, 29, 38
Nagpuyo ko uban sa Langitnong Amahan sa wala pa ko moanhi sa yuta.
Ang Manluluwas mipasabut og maayo sa ikatulo ka higayon diha sa seksyon 93 nga nagpuyo kita uban sa Dios “sa sinugdanan” (mga bersikulo 23, 29, 38). Nganong ganahan man Siya nga mahibalo kita niini? Sa unsang paagi kaha nga ang pagkahibalo niining kamatuoran makapanalangin sa mga bata nga imong gitudloan?
Posible nga mga Kalihokan
-
Basaha ang Doktrina ug mga Pakigsaad 93:23, 29, 38 nga magdungan, ug dapita ang mga bata sa pagpangita og kamatuoran mahitungod sa ilang kaugalingon nga gibalik-balik dinhi niining mga bersikulo. Hangyoa ang mga bata sa pagpaambit og bisan unsa nga ilang nahibaloan mahitungod sa atong kinabuhi uban sa Langitnong Amahan sa wala pa kita matawo. Hatagi ang matag bata og usa sa mosunod nga mga pakisayran sa kasulatan, ug tabangi sila sa pagpangita og butang nga gitudlo niining mga kasulatan mahitungod sa kinabuhi sa wala pa kita moanhi sa yuta: Jeremias 1:5; Doktrina ug mga Pakigsaad 138:53–56; Moises 3:5; Abraham 3:22–26.
-
Kantaha og dungan ang “Ako Anak sa Dios” o “Langit Gipuy-an Ko” (Songbook sa mga Bata, 2–3, 140). Unsa nga mga kamatuoran ang atong makat-unan gikan niining kanta mahitungod sa atong katuyoan sa pag-anhi sa yuta?
Doktrina ug mga Pakigsaad 93:24
Ang kamatuoran mao ang kahibalo bahin sa mga butang sa nangagi, sa karon, ug sa umaabut.
Ang kalibutan adunay daghang nagkalain-lain nga mga panglantaw kon unsa ang kamatuoran ug unsaon sa pagpangita niini. Unsaon nimo pagtabang sa mga bata nga imong gitudloan nga makasabut nga ang kamatuoran tinuod bisan unsa pa ang isulti sa uban ug nga ang Langitnong Amahan nasayud sa tanang kamatuoran?
Posible nga mga Kalihokan
-
Isulat ang pulong nga kamatuoran diha sa pisara, ug hangyoa ang mga bata sa pagsulat og usa ka kahulugan tupad niini. Basaha og dungan kon unsa ang kahulugan nga gihatag sa Ginoo sa kamatuoran diha sa Doktrina ug mga Pakigsaad 93:24. Kanta og usa ka himno mahitungod sa kamatuoran, sama sa “Sulti Unsa ang Kamatuoran?” (Mga Himno, nu. 170), ug dapita ang mga bata sa pagpangita diha sa himno sa ubang mga paagi sa paghulagway sa kamatuoran.
-
Aron matabangan ang mga bata sa paggamit sa mga kamatuoran diha sa Doktrina ug mga Pakigsaad 93, pagsulat og pipila ka pakisayran sa kasulatan gikan niining seksyon diha sa mga piraso sa papel. Sa laing mga piraso sa papel, isulat ang mga kamatuoran nga gitudlo sa matag usa niining mga bersikulo. Dapita ang mga bata nga magtinabangay sa pagbasa sa mga bersikulo ug sa pagpares sa mga kamatuoran ngadto sa mga bersikulo nga ilang gibasa. Nganong mapasalamaton man kita nga makabaton og kahibalo bahin sa kamatuoran?
Awhaga ang Pagkat-on diha sa Panimalay
Dapita ang mga bata sa pagsulat o pagdrowing og usa ka butang nga ilang nakat-unan diha sa klase ug sa pagpaambit niini sa ilang mga pamilya kon moabut na sila sa ilang panimalay.
Pagpalambo sa Atong Pagtudlo
Tabangi ang mga bata nga makaila sa Espiritu. Samtang ikaw adunay espiritwal nga mga kasinatian uban sa mga bata (sama pananglit, samtang nagbasa sa mga kasulatan uban nila, naminaw sa ilang mga pagpamatuod, o nanganta og dungan), tabangi sila nga makaila sa impluwensya sa Espiritu Santo.