Joseph Smith nagdawat sa Melchizedek nga Pagkapari

Pagpahiuli, ni Liz Lemon Swindle

Hulyo 26–Agosto 1

Doktrina ug mga Pakigsaad 84

“Ang Gahum sa Pagka-diosnon”

Samtang magbasa ka sa Doktrina ug mga Pakigsaad 84, unsa nga mga kamatuoran ang imong gibati nga imong hatagan og gibug-aton ngadto sa mga bata nga imong gitudloan? Isulat ang mga ideya nga moabut kanimo gikan sa Espiritu Santo.

Irekord ang Imong mga Impresyon

pagpaambit nga icon

Dapita ang Pagpaambit

Hangyoa ang mga bata sa pagpakigbahin sa mga butang nga ilang nahibaloan mahitungod sa pagkapari. Mahimo kang mopakita og litrato sa usa ka tawo nga gipanalanginan sa gahum sa pagkapari, sama sa Libro sa Hulagway sa Ebanghelyo, nu. 103–10, ug mangutana sa mga bata sa unsa nga paagi nga ang pagkapari nanalangin sa mga pamilya.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 84:19–22, 26–27

Ang pagkapari mao ang gahum sa Dios.

Nahibalo ba ang mga bata nga imong gitudloan sa mga katuyoan sa pagkapari? Sa Doktrina ug mga Pakigsaad 84, ang Ginoo mipadayag og usa ka katuyoan: sa pagtabang nato nga makabalik ngadto sa Langitnong Amahan. (Aron makat-on pa og dugang, tan-awa sa Gospel Topics, “Pagkapari,” topics.ChurchofJesusChrist.org.)

Posible nga mga Kalihokan

• Basaha ang Doktrina ug mga Pakigsaad 84:20, ug hangyoa ang mga bata sa pagbarug kon sila makadungog sa pulong nga “mga ordinansa.” Aron matabangan sila nga makasabut unsa ang ordinansa, ipakita ang mga litrato sa daghang mga ordinansa sa pagkapari, sama sa Libro sa Hulagway sa Ebanghelyo, nu. 103–8, ug hangyoa ang mga bata sa paghulagway unsay nahitabo sa matag litrato (tan-awa sa Giya ngadto sa mga Kasulatan, “Mga Ordinansa,” scriptures.ChurchofJesusChrist.org). Ipasabut nga ang Langitnong Amahan mihatag kanato niini nga mga ordinansa aron matabangan kita nga makabalik sa pagpuyo uban Kaniya.

• Tuguti nga koloran sa mga bata ang pahina sa kalihokan. Samtang ilang buhaton, ipasabut ang nagkalain-laing mga ordinansa nga gipakita sa pahina ug ngano nga kamo mapasalamaton alang niadto nga mga ordinansa.

Doktrina ug mga Pakgisaad 84:77

Ako higala ni Jesus kon ako mosunod Kaniya.

Unsaon nimo sa pagtabang ang mga bata nga makahibalo nga ang Manluluwas nahigugma kanato gani mas labaw pa sa pagmahal sa usa ka higala?

Posible nga mga Kalihokan

• Ipakita ang litrato sa Manluluwas samtang magbasa ka sa Doktrina ug mga Pakigsaad 84:77. Dapita ang mga bata sa pagtudlo sa litrato sa Manluluwas matag higayon nga sila makadungog sa pulong nga “mga higala.” Ipasabut nga kon kita maningkamot sa pagtuman sa mga sugo, kita nagpakita ni Jesus nga kita nahigugma Kaniya. Ipakigbahin unsa ang gipasabut nganha kaninyo nga si Jesus inyong higala.

• Tabangi ang mga bata nga maglista sa pipila ka butang nga ilang mahimo sa pagpakita sa ilang mga higala nga sila nahigugma kanila. Unsa ang gibuhat ni Jesus sa pagpakita nato nga Siya mao ang atong higala? Unsay atong mahimo sa pagpakita sa Manluluwas nga kita Iyang mga higala? Panganta og dungan sa usa ka awit mahitungod ni Jesus, sama sa “Si Jesus Ang Atong Mahigugmaong Higala” (Songbook sa mga Bata, 37).

Doktrina ug mga Pakigsaad 84:88

Ang Langitnong Amahan nagtabang sa Iyang mga misyonaryo.

Ang ideya nga mahimong misyonaryo sa umaabut mahimong makapadasig apan usab makahadlok alang sa ubang mga bata. Ang Doktrina ug mga Pakigsaad 84:88 makatudlo nila unsaon sa pagtabang sa Langitnong Amahan kadtong Iyang ipadala sa pagsangyaw sa Iyang ebanghelyo.

Posible nga mga Kalihokan

• Tabangi ang mga bata sa paghunahuna og mga misyonaryo nga ilang nailhan. Sultihi sila nga ang Langitnong Amahan mihimo og espesyal nga saad ngadto sa mga misyonaryo. Basaha ang Doktrina ug mga Pakigsaad 84:88, ug tabangi ang mga bata sa paghunahuna sa mga aksyon nga giubanan og mga saad niini nga bersikulo. Isulti ang usa ka panahon sa dihang ikaw nagserbisyo sa Ginoo ug mibati nga Siya nagauban kanimo, sumala sa gihulagway diha sa bersikulo 88.

• Ipakigbahin ang istorya sa upat ka tuig nga batang lalaki sa mensahe ni Elder Takashi Wada “Magbusog sa mga Pulong ni Kristo” ( Liahona, Mayo 2019, 38–40). Tabangi ang mga bata sa paghunahuna og butang nga ilang masulti sa pagpakigbahin sa ilang pagpamatuod ngadto sa usa ka tawo—sama sa pagpakigbahin sa usa ka artikulo sa hugot nga pagtuo. Hangyoa ang matag bata nga magpakaaron-ingnon nga mopakigbahin sa ebanghelyo ngadto sa usa ka higala. Ipamatuod nga ang Langitnong Amahan nagtabang nato unsay isulti kon kita makigsulti sa uban mahitungod sa ebanghelyo.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 84:4–5, 18–28, 30

Ang mga ordinansa sa pagkapari motabang nako sa pagpangandam sa pagpuyo pag-usab sa Langitnong Amahan.

Samtang sila magkadako, ang mga bata nga imong gitudloan makahimo sa pag-apil sa daghang mga ordinansa sa pagkapari, lakip sa mga bunyag ug mga kumpirmasyon alang sa mga patay diha sa templo. Unsaon nimo sila sa pagtabang nga makasabut sa mga katuyoan ug gahum sa mga ordinansa sa pagkapari?

Posible nga mga Kalihokan

• Isulat diha sa pisara ang Aaronic nga Pagkapari ug ang Melchizedek nga Pagkapari. Basaha pagdungan ang Doktrina ug mga Pakigsaad 84:18, 26–28, 30, ug tabangi ang mga bata nga molista sa mga kamatuoran nga ilang nakat-unan mahitungod sa Aaronic nga Pagkapari gikan niini nga mga bersikulo. Dayon basaha pagdungan ang Doktrina ug mga Pakigsaad 84:18–25, ug ilista ang mga kamatuoran mahitungod sa Melchizedek nga Pagkapari.

• Dapita ang mga bata sa paglista sa mga ordinansa sa pagkapari nga ilang giapilan o gisaksihan, sama sa bunyag, kumpirmasyon, mga panalangin sa pagkapari, o sa sakramento. Hangyoa sila sa pagpaambit sa ilang mga kasinatian niini nga mga ordinansa. Basaha pagdungan ang Doktrina ug mga Pakigsaad 84:20 (tabangi sila nga makasabut sa dili pamilyar nga mga pulong). Ngano nga ang Ginoo nagdapit nato sa pag-apil sa mga ordinansa? Sa unsa nga paagi nga ang pagkapari makatabang nato nga makabalik ngadto sa Langitnong Amahan?

  mga bata nag-ambit sa sakramento

  Ang mga ordinansa makatabang nato sa paghinumdom sa atong mga saad ngadto sa Dios.

• Paghimo og puzzle gamit ang litrato sa templo. Basaha uban sa mga bata ang Doktrina ug mga Pakigsaad 84:5, ug hangyoa sila sa pagpaminaw unsay gisugo sa Ginoo nga tukuron sa mga Santos. Hatagi ang matag bata og piraso sa puzzle, ug hangyoa sila sa pagpakigbahin og butang nga ilang mahimo sa pag-andam sa pagsulod sa templo.

Doktrina ug mga Pakigsaad 84:64–72, 81–88

Ang Ginoo manalipod ug mohatag og pagtugot sa mga misyonaryo.

Kini nga mga bersikulo naglakip sa mga saad nga gihimo sa Ginoo ngadto niadtong Iyang gitawag sa pagsangyaw sa ebanghelyo. Kini nga mga saad makadasig usab sa mga bata samtang sila mopakigbahin sa ebanghelyo ni Jesukristo ngadto sa uban.

Posible nga mga Kalihokan

• Pares-paresa ang mga bata, ug hatagi ang matag pares og pipila ka bersikulo nga basahon gikan sa Doktrina ug mga Pakigsaad 84:64–72, 81–88. Dapita sila sa pagsiksik sa mga saad nga gihatag sa Ginoo ngadto niadtong kinsa mopakigbahin sa ebanghelyo. Hangyoa sila sa pagpakigbahin unsay ilang nakat-unan diha sa klase. Tabangi ang mga bata sa paghunahuna sa mga tawo nga ilang nailhan, o sa mga tawo diha sa mga kasulatan, kinsa nakadawat sa tabang sa Ginoo sa dihang nagsangyaw sa ebanghelyo (sama ni Samuel ang Lamanite [tan-awa sa Helaman 13:2–4; 16:6–7] o Ammon [tan-awa sa Alma 17:32–38]). Ipakigbahin ang usa ka kasinatian sa dihang ikaw mibati sa suporta sa Ginoo samtang ikaw nagserbisyo Kaniya.

• Pagdala og mga baso o ubang susama nga mga sudlanan ngadto sa klase. Isulat sa piraso sa papel ang mga paagi nga ang mga bata mahimong mga misyonaryo karon, ug ibutang ang matag piraso sa papel diha sa baso. Sikita pagpundok ang mga baso, pabaruga, diha sa salog. Dapita ang mga bata sa pagpulipuli sa pag-itsa og gamay nga butang ngadto sa usa sa mga baso ug dayon himoon ang unsay anaa sa papel niana nga baso. Sa unsa nga paagi nga ang Langitnong Amahan motabang nato kon kita mopakigbahin sa ebanghelyo ngadto sa uban, bisan kon kini lisud o kita mobati nga gikulbaan?

• Tabangi ang mga bata nga makakita nga kitang tanan mga miyembro sa Ang Simbahan ni Jesukristo sa mga Santos sa Ulahing mga Adlaw tungod sa misyonaryo nga buhat—ang mga misyonaryo mitudlo sa ebanghelyo kanato, kon dili man gani sa atong mga ginikanan, o sa atong mga katigulangan. Sultihi ang mga bata giunsa ka pagtabang sa mga misyonaryo o ang imong mga katigulangan nga modawat sa ebanghelyo. Tuguti ang mga bata nga mopakigbahin sa susama nga mga kasinatian. Awhaga sila sa pagpangutana sa ilang mga ginikanan kon sa unsa nga paagi nga ang unang mga miyembro sa Simbahan sa ilang pamilya nakakat-on mahitungod sa ebanghelyo.

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagbuhat og butang niining semanaha sa pagpakigbahin sa ebanghelyo uban sa usa ka tawo sa ilang panimalay o sa usa ka higala. Awhaga sila sa pagpangayo og tabang sa Langitnong Amahan ug sa pagbantay sa unsay Iyang buhaton sa pagtabang kanila.

Pagpalambo sa Atong Pagtudlo

Paggamit sa mga balatian [senses]. “Kadaghanan sa mga bata (ug mga hamtong) labing makakat-on kon maapil ang daghang mga balatian. Pangita og mga paagi sa pagtabang sa mga bata nga magamit ang ilang mga balatian sa pangtan-aw, pangdungog, ug panghikap samtang sila nagkat-on” (Pagtudlo Sumala sa Pamaagi sa Manluluwas, 25).

Jesus ang akong higala