“Hunio 29–Hulio 5. Alma 23–29: “Pulos a Dida Nagikay,’” Umaykayo, Sumurot Kaniak—Para iti Primary: Libro ni Mormon 2020 (2020)
“Hunio 29–Hulio 5. Alma 23–29,” Umaykayo, Sumurot Kaniak—Para iti Primary: 2020
Dagiti Anti-Nephi-Lehi a mangikalkali kadagiti armasda, ni Jody Livingston
Hunio 29–Hulio 5
Alma 23–29
“Pulos a Dida Nagikay”
Sikakararag nga adalen ti Alma 23–29, nga agkalikagum a manggun-od iti pammaregta maipapan no ania ti kasapulan dagiti ubbing ken no kasano a matulongan ida.
Isuratmo Dagiti Impresionmo
Yawis ti Panagbibinninglay
Mangidrowing ti naragsak a rupa iti maysa a papel, ket saggaysa a paiggaman kadagiti ubbing daytoy. Bayat ti panangiggemda iti papel, awisem ida a manginagan iti maysa a banag a nasursuroda manipud iti Libro ni Mormon a mangted kadakuada iti rag-o.
Isuro ti Doktrina: In-inaudi nga Ubbing
Mabendisionannak no tungpalek dagiti karik.
Ania ti nasursurom iti panagadalmo ti Alma 24:6–24 a makatulong kadagiti ubbing a makaawat iti kinapateg ti panagtungpal iti nalinteg a kari?
Dagiti Mabalin nga Aktibidad
-
Basaem dagiti sumagmamano kadagiti bersikulo wenno ragup ti balikas manipud iti Alma 24:6–24 tapno isurom kadagiti ubbing maipapan kadagiti Anti-Nephi-Lehi, dagiti kari nga inaramidda, ken no kasano a nagtungpalda iti kari. Mabalinmo met nga usaren ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia wenno “Kapitulo 26: Dagiti Tao ni Ammon” (Dagiti Estoria iti Libro ni Mormon, 73–74 wenno iti maitutop a video iti ChurchofJesusChrist.org).
-
Iladawan no kasano a tinungpal dagiti Anti-Nephi-Lehi ti karida babaen iti panangikalida kadagiti armasda. Awisem dagiti ubbing a mangidrowing iti ladawan ti maysa nga espada ket kalpasanna agpammarangda nga agkalkali iti maysa nga abut ket ikalida ti espadada. Tulongam dagiti ubbing nga agpanunot kadagiti kari nga aramidenda. Apay a napateg a tungpalen dagiti kari? Ilawlawag a no mabuniagantayo, agaramidtayo kadagiti kari iti Nailangitan nga Ama ket agaramid Isuna kadagiti kari kadatayo. Maawagan dagitoy iti katulagan. Paneknekan a mabendisionantayo no tungpalentayo dagiti karitayo iti Dios.
Mangisangbay iti rag-o kaniak ti ebanghelio, ken mabalinko nga ibinglay daytoy a rag-o kadagiti dadduma.
Ni Ammon, a nangtulong a mangisuro iti ebanghelio kadagiti Anti-Nephi-Lehi, ket nakaawat iti naindaklan a rag-o manipud iti panangikasabana iti ebanghelio. Ni Alma, a nangisuro met iti ebanghelio kadagiti adu a tattao, ket nakaawat iti kastoy met laeng a rag-o. Mapadasantayo ti isu met laeng a rag-o no ibinglaytayo dagiti pammaneknektayo kadagiti dadduma.
Dagiti Mabalin nga Aktibidad
-
Mangpili iti sumagmamano a ragup dagiti balikas manipud iti Alma 26 wenno 29 a mangisarita iti rag-o, ket ibasa dagitoy kadagiti ubbing (kitaen, kas pagarigan, iti Alma 26:11, 13 wenno Alma 29:13–14). Awisem dagiti ubbing a tumakder iti tunggal kanito a manggegda ti balikas a “rag-o” wenno “agrag-o.” Tulongam dagiti ubbing a makaawat a ti panangibinglay iti ebanghelio ket nangparagsak kada Alma ken Ammon. Ibinglay ti maysa a padasmo idi naragsakanka a nangibinglay iti ebanghelio.
-
Awisem dagiti ubbing a mangidrowing kadagiti ladawan dagiti banag a nangparagsak kadakuada. Awisem ti tunggal ubing nga itedda ti drowingda iti sabali a kaklase ket ilawlawag daytoy. Ilawlawag a no mangisangbay ti maysa a banag iti rag-o kadatayo—kas iti ebanghelio—dumakkel no kua ti rag-otayo no ibinglaytayo daytoy.
-
Ikkam ti maysa nga ubing iti kopia ti Libro ni Mormon, ken bay-am isuna a sanayenna nga ibinglay daytoy iti sabali a miembro ti klase. Kiddawen kadagiti ubbing amangilawlawag no kasano ti riknada maipapan iti Libro ni Mormon. Kasano a maibinglaytayo ti Libro ni Mormon kadagiti dadduma?
Matulongak dagiti gayyemko nga agtungpal iti ebanghelio.
Sinalakniban dagiti Nephite dagiti Anti-Nephi-Lehi manipud kadagiti kabusorda ken tinulonganda ida a mangtungpal kadagiti katulagan nga inaramidda iti Apo.
Dagiti Mabalin nga Aktibidad
-
Isaritam kadagiti ubbing ti estoria dagiti Anti-Nephi-Lehi a nagaramid iti kari a saandan a pulos a makiranget pay (kitaen iti Alma 27:20–30). Ilawlawag a gapu iti kari dagiti Anti-Nephi-Lehi, saanda a masalakniban dagiti bagida manipud kadagiti kabusurda. Basaem ti Alma 27:23, ket ilawlawag a pinili a salakniban dagiti gayyemda kadagiti Nephite pinilida a salakniban dagiti Anti-Nephi-Lehies tapno matungpalda ti karida. Kasano a makatulongtayo kadagiti gagayyemtayo a mangtungpal kadagiti karida? Isaritam maipapan iti panawen iditinulonganaka ti maysa gayyem nga agtungpal iti karim iti Dios.
-
Yakem a kaduam dagiti ubbing dagiti kasasaad idi, iti naasi a wagas, a nakatulongda kadagiti dadduma nga agpili iti rumbeng. Kas pagarigan, ania ti maibagatayo iti maysa a gayyem a kayatna ti agulbod wenno agtangsit?
Isuro ti Doktrina: In-inauna nga Ubbing
Dagiti katulagan ket dagiti kari nga aramidek iti Dios ken aramidenna kaniak.
Inkali dagiti Anti-Nephi-Lehi dagiti armasda ken inkarida a saandan pulos a pumatay pay. Kasta met, mabalin dagiti ubbing a sursuruam ti agtungpal kadagiti katulaganda.
Dagiti Mabalin nga Aktibidad
-
Ikkam dagiti ubbing kadagiti babassit a bato, ken awisem ida a mangisurat iti balikas a katulagan iti batoda. Ilawlawag a ti katulagan ket maysa a kari iti nagbaetan ti Nailangitan nga Ama ken dagiti Annakna. Kasano a papigsaen wenno “patibkerennatayo” dagiti katulagantayo a kas iti maysa a bato? (Alma 24:19). Aggigiddan a basaen ti Alma 24:16–25 tapno masursuro no ania ti katulagan nga inaramid dagiti tao ni Ammon ken no kasano a dinayawda ti katulaganda. Awisem dagiti ubbing a mangyawid kadagiti bato iti pagtaenganda kas maysa a palagip a tungpalenda dagiti katulaganda.
-
Basaem kadagiti ubbing ti Alma 24:16–19, ket ilawlawag no ania ti inaramid dagiti Anti-Nephi-Lehi a mangipakita iti Dios a nagbabawida. Ania ti katulagan nga inaramidda a saanda nga aramiden? Ilawlawag a dagiti katulagan nga aramidentayo ket “maysa a pammaneknek iti Dios” a kayattayo a tungpalen dagiti bilin ti Dios (bersikulo 18). Ania dagiti katulagan nga inaramid dagiti ubbing?
-
Awisem dagiti ubbing a mangidrowing kadagiti ladawan dagiti armas dagiti Anti-Nephi-Lehi. Kalpasanna awisem ida a mangisurat, iti likud dagiti armas, iti maysa a banag a mariknada a nasken a balbaliwanda tapno ad-adda a surotenda ni Jesucristo. Pagpammarangen ida a mangikalkali kadagiti armasda ken agaramid iti plano nga aramidenda ti naisuratda.
Alma 24:7–10; 26:23–34; 27:27–30
Gapu ta manangngaasi ti Nailangitan nga Ama, makapagbabawi ken makapagbalbaliwtayo.
Itay nabiit nasursuro dagiti ubbing maipapan kada Alma, Ammon, ken dagiti Anti-Nephi-Lehi. Kasano a mausarmo dagitoy a pakasaritaan amangiladawan a ti Nailangitan nga Ama ket manangngaasi kadagiti sipupudno nga agbabawi?
Dagiti Mabalin nga Aktibidad
-
Isurat ti Sakbay ken Kalpasan iti pisarra. Kiddawem iti sumagmamano nga ubbing a mangbasa kadagiti sumaganad a bersikulo tapno maammuan no ania ti kita dagiti Lamanite sakbay a sinuruan ida da Ammon ken dagiti kabsatna: Alma 17:14–15; 26:23–24. Kiddawem kadagiti ubbing a mangbasa kadagiti sumaganad a bersikulo tapno maammuan no kasano a nagbalbaliw dagiti Lamanite: Alma 26:31–34; 27:27–30. Awisem dagiti ubbing a mangilista iti baba dagiti paulo no ania ti naammuanda. Kalpasanna awisem ida nga ammuen, iti Alma 24:7–10, no kasano a naan-anay unay a nagbalbaliw dagiti Lamanite. Ipaneknekmo maipapan iti bileg ti balikas ti Dios a mangpakawan kadatayo ken makatulong kadatayo nga agbabawi ken agbalbaliw.
-
Awisem dagiti ubbing nga aggigiddana mangbasa iti Mateo 26:21-22, nga agsapsapul kadagiti bendision a sumangbay kadagiti agbabawi. Awisem dagiti ubbing a mangiladawan kadagiti sumagmamano a bendision iti bukodda a balikas.
Mangisangbay iti rag-o kaniak ti ebanghelio, ken mabalinko nga ibinglay daytoy a rag-o kadagiti dadduma.
Napno dagitoy a kapitulo kadagiti pagarigan ti rag-o a sumangbay manipud iti panagtungpal ken panangibinglay iti ebanghelio. Kasano a mausarmo ti Alma 26 ken 29 tapno mangparegta kadagiti ubbing a mangsapul kadaytoy a rag-o?
Dagiti Mabalin nga Aktibidad
-
Tulongam dagiti ubbing a mangsapul kadagiti balikas a “rag-o” ken “agrag-o” iti Alma 26 ken 29. Aggigiddan a mangbasa iti sumagmamano a bersikulo a masarakanda, ken paglilinnawagan no ania kadagitoy a bersikulo ti mangisuro maipapan iti rag-o. Ania ti nangparag-o kada Ammon ken Alma? Ibinglay ti maysa a padas idi nariknam iti rag-o manipud iti panagtungpal wenno panangibinglay iti ebanghelio, wenno awisem dagiti ubbing a mangibinglay kadagiti bukodda a padas.
-
Awisem ti dua nga ubbing nga agsinnangoda ket kitaem no asino ti umuna a makapaisem iti sabali nga ubing. Ania ti sumagmamano a wagas a mabalin a pakaiwarasantayo iti rag-o kadagiti dadduma? Kasano a mangiwaras iti rag-o ti panangibinglay iti ebanghelio? Tulongam dagiti ubbing a mangpanunot kadagiti wagas a mabalinda a pangibinglayan iti rag-o ti ebanghelio kadagiti gagayyem ken pamiliada.
Yallukoy ti Panagsursuro iti Pagtaengan
Awisem dagiti ubbing nga agtungpal kadagiti karida kas iti inaramid dagiti Anti-Nephi-Lehi.
Panangpadur-as iti Panangisurotayo
Sursuruem ti maysa a nasantuan a kasuratan. Pumili iti maysa a binatog iti nasantuan a kasuratan wenno ababa a binatog nga iti panagkunam ket makatulong kadagiti ubbing iti klasem, ken tulongam ida a mangikabesa iti daytoy. Makatulong met dagiti pangtulong a ladawan [visual aid] ken dagiti garaw ti ima.