Ni Ammon a makisarsarita ken ni Ari Lamoni

Da Ammon ken Ari Lamoni, ni Scott M. Snow

Hunio 22–28

Alma 17–22

“Aramidenkayonto a Ramit”

Kas met laeng kada Lamoni ken dadduma pay iti daytoy a pakaammuan a naaddaan kadagiti naespirituan a padas a mangbalbaliw iti biag, mabalin a maaddaan dagiti ubbing a sursuruam kadagiti naespirituan a padas kadagiti nasantuan a kasuratan a makaimpluensianto iti biagda iti adu a tawen nga umay. Laglagipem dagitoy bayat ti panangutobmo no kasano a suruam ida.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ipakitam ti ladawan a mangiladawan iti maysa a pasamak iti Alma 17–22 (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Kiddawem kadagiti ubbing a mangibaga kenka maipapan iti no ania ti makitada iti ladawan.

icon iti panangisuro

Isuro ti Doktrina: In-inaudi nga Ubbing

Alma 17–19

Maibinglayko ti ebanghelio kadagiti dadduma.

Kasano a maparegta ti pagwadan dagiti lallaki nga annak ni Mosiah ti klasem tapno mangibinglay kadagiti pammaneknekda iti dadduma?

Dagiti Mabalin nga Aktibidad

• Tulongam dagiti ubbing a mangyakem ti estoria ni Ammon iti Alma 17–19. Mabalinmo ti agibasar iti “Kapitulo 23: Ammon: Naindaklan a Katulongan” (Dagiti Estoria iti Libro ni Mormon, 64–68, wenno ti maitutop a video iti ChurchofJesusChrist.org). No iti panagkunam a maragsakan dagiti ubbing iti daytoy, mangitugot kadagiti simple a costume ken props. Ibagam kadagiti ubbing no ania ti masursurom manipud iti estoria, ken awisem ida nga aramidenda met ti kastoy.

• I-display ti maysa a ramit wenno alikamen, ket isaritam kadagiti ubbing no ania ti pakausaranna. Ania dagiti dadduma pay nga alikamen nga ammo dagiti ubbing? Awisem ida nga agpammarang a mangusar ti maysa nga alikamen. Ilawlawag a kas met la iti panangusartayo kadagiti alikamen wenno ramit tapno mangileppas a maaramid dagiti bambanag, mausarnatayo met ti Nailangitan nga Ama a mangaramid iti aramidna. Basaem ti Alma 17:11, ket ilawlawagmo a da Ammon ken dagiti kakabsatna dagiti ramit ti Nailangitan nga Ama a mangtulong kadagiti Lamanite a masursuruan iti ebanghelio.

• Awisem dagiti ubbing nga agtaray iti lugar ken agpammarangda nga agtuktok kadagiti ridaw kabayatan ti panangisaritam iti estoria ni Abish a namalaybalay a mangibagbaga kadagiti tao maipapan iti bileg ti Dios (kitaen iti Alma 19:16–34). Tulongam dagiti ubbing nga agpanunot kadagiti wagas a pakapagbalinanda a kas ken ni Abish ken mangibinglay iti ebanghelio kadagiti dadduma.

• Awisem dagiti ubbing nga agdrowing iti ladawan ti bagbagida a mangibingbinglay iti ebanghelio iti maysa a tao. Tulongam ida nga agpanunot kadagiti nalawag a bambanag a mabalinda nga ibinglay. Aggigiddan nga agkansion iti maysa a kanta maipapan iti panangibinglay iti ebanghelio kas iti “I Want to Be a Missionary Now” (Children’s Songbook, 168). Ikkam ida iti gundaway a mangibinglay kadagiti riknada maipapan kadagiti banag nga insuro ni Ammon.

Alma 17:21–25; 20:9–27

Matulongak dagiti dadduma nga umasideg ken ni Cristo babaen ti panangipakitak iti ayatko para kadakuada.

Ti ayat ken panagserbi ni Ammon ti nangpalukneng iti puso ni Ari Lamoni ken ti amana. Ania ti masursuro dagiti ubbing manipud kadagitoy a pakaammuan?

Dagiti Mabalin nga Aktibidad

• Gupgopem ti Alma 17:21–25 para kadagiti ubbing, a mangyunay-unay a kayat ni Ammon ti agserbi ken ni Lamoni. Awisem dagiti ubbing a mangibinglay kadagiti padas idi nagserbida iti maysa a tao. Ipalagip kadagiti ubbing a ti naindaklan a panagserbi ni Ammon ti nakatulong ken ni Ari Lamoni tapno agtarigagay nga agsursuro maipapan iti ebanghelio (kitaen iti Alma 18:15–23). Awisem dagiti ubbing a mangpanunot iti maysa a tao a mabalinda a pagserbian iti agdama, ken mangilawlawag no kasano a makapagserbida iti dayta a tao.

• Isaritam kadagiti ubbing ti pakasaritaan iti Alma 20:8–27. Mabalinmo nga usaren ti “Kapitulo 24: Maam-ammo ni Ammon ti Ama ni Ari Lamoni” (Dagiti Estoria iti Libro ni Mormon, 69–70, wenno ti maitutop a video iti ChurchofJesusChrist.org). Kiddawem kadagiti ubbing a mangpanunot iti nadumaduma a tignay a maaramidda iti tunggal kanito a dakamatem da Ammon, Lamoni, wenno ti ama ni Lamoni. Ilawlawag a ti maysa a rason a nakapagbalbaliwan ti puso ti ama ni Lamoni ket gapu ta ay-ayaten unay ni Ammon ni Lamoni. Awisem dagiti ubbing a mangidrowing iti ladawan ti maysa a banag a mabalinda nga aramiden a mangipakita iti ayat para iti maysa a tao.

icon iti panangisuro

Isuro ti Doktrina: In-inauna nga Ubbing

Alma 17:1–4

Bumileg ti pammaneknekko no agbasaak kadagiti nasantuan a kasuratan, agkararag, ken agayunoak.

Dimakkel a napigsa dagiti lallaki nga annak ni Mosiah iti ebanghelio ken nagbalinda a nabileg a misionario gapu ta sireregta a nagadalda kadagiti nasantuan a kasuratan, nagkararag, ken nagayunoda. Makatulong met kadagiti ubbing a sursuruam dagitoy met laeng a banag.

Dagiti Mabalin nga Aktibidad

• Mangitugot iti klase kadagiti banag a mangibagi iti nasantuan a kasuratan, panagkararag, ken panagayuno, a kas maysa a set dagiti nasantuan a kasuratan, ladawan ti maysa a tao nga agkarkararag, ken maysa a ladawan ti taraon, ket ilawlawagmo no ania ti ibagi ti tunggal banag. Basaem ti Alma 17:1–4, ket kiddawen kadagiti ubbing no kasano a nakatulong dagitoy a banag kadagiti lallaki nga annak ni Mosiah. Kasano a makatulong kadatayo ti panagbasa kadagiti nasantuan a kasuratan, panagkararag, ken panagayuno nga umas-asideg iti Nailangitan nga Ama?

• Usarem ti topics index iti Children’s Songbook a mangtulong kadagiti ubbing a mangsapul kadagiti kanta maipapan iti panagadal iti nasantuan a kasuratan ken panagkararag. Aggigiddan nga agkansion kadagitoy sumagmamano a kanta, ken tulongam dagiti ubbing a mangilasin iti no ania ti isuro dagiti kanta maipapan iti no kasano a bendisionannatayo ti panangaramid kadagitoy a banag.

Alma 17–18; 22:1–3

Matulongak dagiti dadduma nga umasideg ken ni Cristo babaen ti panangipakitak iti ayatko para kadakuada.

Ti tarigagay ni Ammon nga agbalin a katulongan ni Lamoni ti nangiturong idi agangay iti gundaway a mangisuro ken ni Lamoni idi nakalukat ti pusona ken nakasaganan nga umawat iti ebanghelio.

Dagiti Mabalin nga Aktibidad

• Tulongam dagiti ubbing a mangbasa kadagiti bersikulo manipud iti Alma 17:21–39 a mangisalaysay iti pakaammuan maipapan iti panagserbi ni Ammon ken ni Ari Lamoni. Awisem ida a mangidrowing kadagiti ladawan ti tattao wenno pasamak iti estoria ket kalpasanna isarita ti estoria iti bukodda a balikas. Tulongam dagiti ubbing a makaawat no kasano a nakaimpluensia iti ari ti panagserbi ni Ammon (kitaen iti Alma 18:9–23). Ania ti masursurotayo manipud iti daytoy a pakasaritaan maipapan iti no kasano a matulongantayo dagiti dadduma nga agtarigagay a makasursuro iti ad-adu pay maipapan iti ebanghelio?

  Ni Ammon a mangisalsalakan iti karnero ti ari

  Minerva K. Teichert (1888–1976), Ni Ammon a Mangisalsalakan kadagiti Arban ti Ari, 1935–1945, oil on masonite, 35 x 48 a pulgada. Brigham Young University Museum of Art

• Basaen ti Alma 22:1–3, ket kiddawen kadagiti ubbing a dumngeg iti no kasano nga inaringan ti nasayaat a pagwadan ni Ammon ti ama ni Ari Lamoni. Awisem ida a mangpanunot iti maysa a tao nga am-ammoda nga agkasapulan a mangammo ti maipapan iti ebanghelio. Isingasing kadagiti ubbing a ti ayat ken nasayaat a pagwadanda ti makatulong a makita daytoy a tao no kasano ti kinaindaklan ti ebanghelio. Tulongam dagiti ubbing a mangpanunot kadagiti wagas a pakapagbalinanda a nasayaat a pagwadan ken pangipakitaanda iti ayatda kadagiti tao a napanunotda.

• Awisem dagiti full-time a misionario wenno iti kasubsubli a misionario a mangibinglay ti estoria ni Ammon iti Alma 17–18. Kiddawem kadakuada a mangibinglay iti no ania ti nasursuroda maipapan iti aramid ti misionario manipud ken ni Ammon ken ti papel nga ak-akmen ti panagserbi kadagiti panagkagumaanda. Ilawlawag kadagiti ubbing dagiti wagas a pakasurotanda iti pagwadan ni Ammon.

• Kas maysa a klase, mangisurat iti listaan iti pisarra kadagiti banag a mabalin nga aramiden dagiti ubbing nga agserbi kadagiti miembro ti pamiliada. Kasano a mabendisionan ti sibubukel a pamilia iti panangaramidmo kadagitoy a tignay ti panagserbi?

Alma 18:24–43; 19:16–34

Maibinglayko ti ebanghelio kadagiti dadduma.

Kasano a mausarmo dagiti pakaammuan kadagitoy a bersikulo a mangparegta kadagiti ubbing nga agbalin a misionario a kas kada Ammon ken Abish?

Dagiti Mabalin nga Aktibidad

• Ipakita dagiti ladawan a mangibagi iti sumagmamano kadagiti kinapudno nga imbinglay ni Ammon ken ni Ari Lamoni a masarakan iti Alma 18:24–40 (kitaen iti panid ti aktibidad iti daytoy a lawas). Awisem dagiti ubbing nga agpammarang a misionario ken ibinglayda no ania ti ammoda maipanggep kadagitoy a kinapudno.

• Basaen ti pakasaritaan ni Abish a kadua dagiti ubbing (kitaen iti Alma 19:16–20, 28–29). Awisem dagiti ubbing nga agsisinnublatda nga agpammarang a kas Abish babaen iti panagtuktok iti ridaw iti siled ti klase ken agpaneknek no ania ti napasamak iti Alma 19:1–17. Kasano nga agbalintayo a kas ken ni Abish ken agpaneknek kadagiti kinapudno nga ammotayo?

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a nainkararagan a mangaramid iti paggep a tun-oyen a kadua ti pamiliada tapno mangibinglay iti ebanghelio iti maysa a tao.

Panangpadur-as iti Panangisurotayo

Surnadan kadagiti awis nga agtignay. No awisem dagiti ubbing nga agtignay iti no ania ti nasursuroda, surnadam iti dayta nga awis kabayatan ti sumaruno a klase. Mangipakita daytoy kadagiti ubbing a maseknanka maipapan iti no kasano ti panangbendision ti ebanghelio ti biagda. Bayat ti panangibinglayda kadagiti padasda, mapapigsadanto ken agtitinnulongdanto nga agbiag iti ebanghelio (kitaen iti Panangisuro iti Wagas ti Mangisalakan, 35).

panid ti aktibidad: Maibinglayko ti ebanghelio kadagiti dadduma