lalaki nga agkarkararag

Panangiladawan ni Joshua Dennis

Hulio 20–26

Alma 36–38

“Kumitaka iti Dios ken Agbiag”

Bayat ti sikakararag a panagadalmo ti Alma 36–38, mabalin nga umay kenka dagiti impresion maipapan kadagiti ubbing a sursuruam. Isuratmo dagitoy nga impresion; ket mabalin a mangtignayda kadagiti kapanunotan para kadagiti aktibidad iti panangisuro.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay iti maysa a banag nga insuro kadakuada dagiti nagannakda. Saludsodem kadakuada no ammoda no ania ti insuro ni Alma kadagiti annakna a lallaki.

icon iti panangisuro

Isuro ti Doktrina: In-inaudi nga Ubbing

Alma 36:6,20, 24

Mangyeg kaniak iti rag-o ti panagbabawi.

Ti panangisuro kadagiti ubbing maipapan iti rag-o ti panagbabawi no ubbingda pay ket makaparegta kadakuada nga agbabawi bayat ti panagdakkelda.

Dagiti Mabalin nga Aktibidad

• Ibasa ti Alma 36:20 kadagiti ubbing, ket kiddawem kadakuada a dumngeg no kasano ti narikna ni Alma. Awisem dagiti ubbing a manginagan iti sumagmamano a banag a mangyeg kadakuada iti rag-o. Mangipakita iti ladawan ti Mangisalakan, ket ilawlawag a narikna ni Alma ti rag-o gapu ta pinakawan ni Jesucristo dagiti basolna.

• Ikkam ti tunggal ubing iti maysa a papel nga addaan iti naragsak a rupa iti maysa a bangir ken iti naliday a rupa iti sabali pay a bangir. Kiddawem kadakuada a dumngeg bayat ti panangbasam iti Alma 36:6 ken agpilida no ania a rupa ti nasken nga itag-ayda. Ilawlawagmo a nagbabawi ni Alma ken nariknana ti rag-o gapu ta pinakawan isuna ni Jesucristo kadagiti dakes a pilina. Kiddawem kadagiti ubbing a dumngeg bayat iti panangbasam iti Alma 36:24 maipapan kadagiti nasayaat a pili nga inaramidna iti kamaudiananna ken itag-ayda ti husto a rupa.

• Aggigiddan nga agkansion iti kanta a maipapan ken ni Jesucristo, kas iti “He Sent His Son” (Children’s Songbook, 34–35). Paneknekam nga immay ni Jesucristo iti daga tapno isalakannatayo manipud kadagiti basoltayo ken mangyeg kadatayo iti rag-o.

Alma 37:6–7

“Babaen dagiti babassit ken gagangay a banag agbalindanto a dadakkel a banag.”

Kasano a maisurom kadagiti ubbing a mangilasin nga us-usaren ti Apo dagiti babassit wenno gagangay a banag a mangipatungpal iti aramidna?

Dagiti Mabalin nga Aktibidad

• Basaem ti Alma 37:6–7, ken awisem dagiti ubbing nga agrukobda iti tunggal mabasam ti balikas a “bassit.” Mangipakita kadakuada iti sumagmamano a babassit a banag a mangpasamak iti dadakkel a banag wenno mangpagaraw iti dadakkel a banag, kas iti maysa a bateria wenno maysa a tulbek ti lugan. Ania dagiti dadakkel a banag a mapasamak wenno magaraw gapu kadagitoy a babassit a banag? Tulongam dagiti ubbing a mangpanunot iti sumagmamano a babassit wenno gagangay a banag a kayat ti Dios nga aramidentayo. Ania dagiti dadakkel a banag a mabalin a mapasamak gapu kadagitoy a babassit wenno gagangay a bilin?

• Mangipakita iti maysa wenno dua a ladawan ti babassit a banag a maurnong iti dadakkel a banag, kas iti bulong ti ruot ken maysa a talon, wenno tedted ti tudo ken maysa a dan-aw. Paneknekam nga uray dagiti babassit, gagangay a tignay ket makaaramid iti dakkel a pagdumaan iti biagtayo ken iti biag dagiti dadduma. Allukoyem dagiti ubbing nga agsarita maipapan kadagiti sumagmamano a gagangay, nasayaat a banag nga aramidenda iti inaldaw, wenno ibinglaymo dagiti bukodmo a pagwadan. Awisem dagiti ubbing nga agpili iti maysa a gagangay, nasayaat a banag a mabalinda nga aramiden ita a lawas ken mangigdrowing iti maysa a ladawan ti bagbagida nga a mangar-aramid iti daytoy. Awisem ida a mangyawid kadagiti drowingda ken ibinglayda dagitoy kadagiti pamiliada.

Alma 37:38–47

Matulongannatayo dagiti nasantuan a kasuratan iti inaldaw.

Uray no saan pay a makabasa dagiti adu a babassit nga ubbing, matulongam ida a makagun-od iti pamaneknek iti bileg dagiti nasantuan a kasuratan a mangiturong kadakuada iti inaldaw a panagbiagda.

Dagiti Mabalin nga Aktibidad

• I-display ti ladawan ti Liahona (kas iti Libro ti Arte ti Ebanghelio, num. 68), wenno awisem dagiti ubbing a mangidrowing iti maysa bayat iti pannangibinglayda no ania ti malagipda maipapan iti daytoy (kitaen iti 1 Nephi 16:10, 28–29). Ipakitam dagiti nasantuan a kasuratan, ket kiddawem kadagiti ubbing nga ibinglayda no kasano a maipada dagiti nasantuan a kasuratan iti Liahona. Usarem ti Alma 37:38–47 kenti panid ti aktibidad iti daytoy a lawas a mangnayon iti daytoy a panaglilinnawag.

• Aggigiddan a kantaen ti maysa a kansion maipapan iti panagadal ti nasatuan a kasuratan, kas iti “Search, Ponder, and Pray” wenno “Search the Holy Scriptures” (Children’s Songbook, 109; Hymns, no. 277). Ania dagiti bendision ti panangadal iti nasantuan a kasuratan a nadakamat iti kanta?

  babai nga agbasbasa kadagiti nasantuan a kasuratan

  Isuro kadatayo ti nasantuan a kasuratan no kasano ti mangsurot ti Dios.

icon iti panangisuro

Isuro ti Doktrina: In-inauna nga Ubbing

Alma 36

Mabalinak a “maipasngay iti Dios” no surotek ni Jesus ken agbabawi kadagiti basolko.

“Ti pannakapasurot … ket maysa a panagbalbaliw iti mismo a kinataotayo. Maysa daytoy a napateg a panagbalbaliw nga ibagbaga ti Apo ken dagiti propetana a pannakayanak manen” (“Conversion,” Gospel Topics, topics.ChurchofJesusChrist.org).

Dagiti Mabalin nga Aktibidad

• Irebyu kadagiti ubbing ti estoria maipapan iti pannakapasurot ni Alma nga Ub-ubing iti Alma 36:6–21. Isurat iti babassit a papel dagiti balikas ken ragup dagiti balikas manipud kadagitoy a bersikulo a mangiladawan no kasano ti narikna ni Alma, ket ikabil dagitoy iti pisarra. Kiddawem kadagiti ubbing nga urnosenda dagiti babassit a papel iti dua a grupo: dagiti banag sakbay a nalagip ni Alma no ania ti insuro ni amana maipapan iti Mangisalakan ken dagiti banag a nariknana kalpasan a nalagipna. Aggigiddan a basaenyo ti Alma 36:17–20, ken paneknekkam kadagiti ubbing a pakawanennatayo ni Jesucristo no agbabawitayo.

• Isurat ti Maipasngay iti Dios ken dagiti sumaganad a nasantuan a kasuratan iti pisarra: 1 Juan 4:7; Mosiah 5:7; 27:25–26; Alma 5:14; 22:15. Tulongam dagiti ubbing a mangbasa kadagiti bersikulo ken mangsapul kadagiti ragup dagiti balikas a mangiladawan no ania ti kaipapanan ti maipasngay iti Dios. Kasano nga agtignay ti maysa a tao kalpasan ti pannakaipasngayna iti Dios? Kasano a maipakitatayo a naipasngaytayo iti Dios?

Alma 37:6–9, 38–47

“Babaen dagiti babassit ken gagangay a banag agbalindanto a dadakkel a banag.”

Tulongam dagiti ubbing a sursuruam a kitaenda a ti panagbasa kadagiti nasantuan a kasuratan iti uray apagbiit laeng iti tunggal aldaw ket makaisangbay kadakuada kadagiti naidaklan a bendision.

Dagiti Mabalin nga Aktibidad

• Idrowing wenno i-display ti maysa a timba. Mano a tedted ti danum ti mangpunno iti timba? Tulongam dagiti ubbing a mangilasin nga adu a babassit a tedted ti danum ti kasapulan a mangpunno iti timba. Kasano a mainaig daytoy iti Alma 37:6–7? Kasano a maipada ti panagbasa kadagiti nasantuan a kasuratan iti panangnayon iti babassit a tedted ti danum iti maysa a timba?

• Awisem dagiti ubbing a mangsapul iti Alma 37:6–9 dagiti bendision a sumangbay manipud kadagiti “kasuratan,” wenno nasantuan a kasuratan. Kas maysa a klase, mangaramid iti listaan no ania ti masarakanda. Kasano a bendisionan ti biagtayo ti panagbasa kadagiti nasantuan a kasuratan? Ibinglaymo ti pammaneknekmo maipapan kadagiti nasantuan a kasuratan, ken allukoyem dagiti ubbing nga aramidenda met ti kastoy.

• Ipakita wenno i-display ti maysa a ladawan ti Liahona (kas iti Libro ti Arte ti Ebanghelio, num. 68), wenno kiddawem kadagiti ubbing nga irebyuda no ania ti malagipda maipapan iti Liahona manipud iti 1 Nephi 16:10, 28. Tulongam dagiti ubbing a basaenda ti Alma 37:38–42. Kasano a nagtrabaho ti Liahona? Kasano a maipada daytoy iti wagas a panagtrabaho ti nasantuan a kasuratan? Aggigidan a basaen ti bersikulo 43–47 tapno masungbatan daytoy a saludsod. Awisem dagiti ubbing a mangkompleto iti panid ti aktibidad kas maysa a paset daytoy nga aktibidad.

icon iti panagsursuro

Yallukoy ti Panagsursuro iti Pagtaengan

Allukoyem dagiti ubbing a mangibinglay ti maysa a gapu ti panagyamanda kadagiti nasantuan a kasuratan ket awisem dagiti miembro ti pamiliada a kasta met ti aramidenda.

Panangpadur-as iti Panangisurotayo

Tulongam dagiti ubbing nga agbalin a nalalaing nga agad-adal. Ti panggep iti panangisurom kadagiti ubbing ket saan laeng a mangibinglay iti kinapudno kadakuada. Nasken a tulongam pay ida nga agbalin a mapagpannuray iti bukodda a kabaelan nga agsapsapul iti kinapudno. Kas pagarigan, imbes a panangibagam laeng kadagiti ubbing dagiti kinapudno a masarakan iti estoria maipapan iti pannakapasurot ni Alma, mabalinmo a planuen dagiti aktibidad bayat ti pannakatakuatda kadagiti kinapudno iti estoria para iti bagbagida.

panid ti aktibidad: dagiti nasantuan a kasuratan ti mangyas-asideg kadatayo ken ni Cristo