“Hulio 13–19. Alma 32-35: ‘Imulayo Daytoy a Balikas iti Puspusotayo,’” Umaykayo, Sumurot Kaniak—Para iti Primary: Libro ni Mormon 2020 (2020)
“Hulio 13–19. Alma 32–35,” Umaykayo, Sumurot Kaniak—Para iti Primary: 2020
Hulio 13–19
Alma 32–35
“Imulayo Daytoy a Balikas iti Puspusoyo”
Panunotem dagiti ubbing a sursuruam bayat iti nainkararagan a panagadalmo iti Alma 32–35. No aramidem daytoy, sumangbayto kenka dagiti kapanunotan ken impresion maipapan iti no kasano ti panangisurom kadakuada. Isurat ken itignaymo dagitoy mga impresion.
Isuratmo Dagiti Impresionmo
Yawis ti Panagbibinninglay
Ikabil ti nagan ti tunggal ubing iti maysa a container. Kiddawen iti maysa nga ubbing a mangala iti maysa kadagiti nagan, ken awisem ti dayta nga ubing a magibinglay iti maysa a banag a nasursurona itay nabiit manipud iti Libro ni Mormon. Ituloy daytoy agingga a naaddaan ti tunggal maysa iti gundaway, ngem saanmo a piliten ti asinoman a mangibinglay.
Isuro ti Doktrina: In-inaudi nga Ubbing
Matulongak a dumakkel ti pammatik ken ni Jesucristo.
Pamiliar a banag dagiti bukbukel, kaykayo, ken bunga a makatulong kadagiti ubbing a makaawat kadagiti masinunuo a pagbatayan kas iti pammati ken pammaneknek. Utobem no kasano a mausarmo ti analohia ni Alma a mangisuro kadagiti ubbing.
Dagiti Mabalin nga Aktibidad
-
Gupgopem ti Alma 32:28–43; mabalinmo nga usaren ti “Kapitulo 29: Mangisuro ni Alma maipapan iti Pammati ken ti Balikas ti Dios” (Dagiti Estoria iti Libro ni Mormon, 81, wenno ti maitutop a video iti ChurchofJesusChrist.org). Ipakitam dagiti ladawan ti maysa a mula iti nadumaduma nga addang ti panagdakkel, ken kiddawem kadagiti ubbing a mangtulong kenka nga ikabil dagiti ladawan iti husto nga urnos. Ilawlawag a no tungpalentayo ti ebanghelio, dumakkel ti pammaneknektayo—mangrugi daytoy iti bassit a kas iti maysa a bukel ngem makapagbalin daytoy a maysa a dakkel a kayo.
-
Ipakitam kadagiti ubbing iti maysa a bukel, ken ibasam kadakuada dagiti sumagmamano nga umuna a linia ti Alma 32:28. Ibagam kadagiti ubbing a maipada iti maysa a bukel ti balikas ti Dios. Saludsodem no kasano a makatulongtayo iti panagdakkel ti bukel. Kiddawen kadagiti ubbing nga agpammarangda nga agmula iti maysa a bukel, agsibug iti daytoy, ken tulongan a dumakkel daytoy. Ilawlawag a saantayo a makita ti bukel kalpasan nga imulatayo daytoy, ngem ammotayo nga adda daytoy ken dumakdakkel; saantayo met a makita ti Nailangitan nga Ama ken ni Jesucristo, ngem ammotayo a pudnoda ken ay-ayatendatayo. Tulongam dagiti ubbing a mangpanunot kadagiti banag a maaramidda a makatulong a mangpadakkel iti pammatida ken ni Jesucristo.
-
Idrowing ti maysa a kayo iti pisarra, ken panayonam kadagiti ubbing iti maysa a bulong wenno bunga tunggal mapanunotda ti maysa a banag a maaramidda a makatulong a mangpabileg iti pammatida ken ni Jesucristo. Awisem ida nga agaramid kadagiti simple a tignay a mangibagi kadagiti banag a napanunotda.
Denggennak ti Nailangitan nga Ama no agkararagak.
Maminsan laeng nga agkararag dagiti Zoramite iti makalawas (kitaen iti Alma 31:22–23). Insuro da Alma ken Amulek a mabalintayo ti agkararag iti uray ania man nga oras maipapan iti ania man a naespirituan wenno pisikal a kasapulantayo.
Dagiti Mabalin nga Aktibidad
-
Basaem dagiti ragup dagiti balikas a pinilim manipud iti Alma 33:4–11 a mangiladawan kadagiti lugar a mabalintayo a pagkararagan, ken tulongam dagiti ubbing nga agpanunot kadagiti lugar a mabalinda a pagkararagan. Kalpasanna awisem ida a mangidrowing kadagiti ladawan ti bagbagida nga agkarkararag kadagita a lugar. Paneknekam a mabalinda nga agkararag iti sadino man a lugar, uray pay no agkarkararagda a siuulimek.
-
Agpili ti ragup dagiti balikas manipud iti Alma 34:17-27 a mangiladawan kadagiti banag a mabalintayo nga ikararagan, ken ibasam dagitoy kadagiti ubbing. Tulongam dagiti ubbing nga agpanunot kadagiti banag a mabalinda nga ibaga iti Nailangitan nga Ama no agkararagda, ken awisem ida a mangidrowing kadagiti ladawan dagitoy a banag. Paneknekam a mabalinda a kasarita ti Nailangitan ng Ama maipapan iti ania man a banag a pampanunoten wenno marikriknada. Ibinglaymo ti maysa a padas idi dinengngeg ti Nailangitan nga Ama dagiti kararagmo.
-
Kansionen ti maysa kanta a mangisuro maipapan iti kararag, kas iti “A Child’s Prayer” wenno “We Bow Our Heads” (Children’s Songbook, 12–13, 25). Tulongam ida a mangkita no ania ti isuro ti kanta maipapan iti kararag.
Isuro ti Doktrina: In-inauna nga Ubbing
No napakumbabaak, maisuronak ti Apo.
Nagballigi da Alma ken Amulek iti panangisuro kadagiti Zoramite a napakumbaba ken nakasagana a dumngeg ti balikas ti Dios. Ibilangmo no kasano a maallukoymo dagiti ubbing a pilienda ti agbalin a napakumbaba.
Dagiti Mabalin nga Aktibidad
-
Saludsodem kadagiti ubbing no ania ti malagipda a nasursuro iti naudi a lawas maipapan kadagiti Zoramite (kitaen iti Alma 31:8–24). Ipalagip kadakuada a ti maysa a rason a nadanagan ni Alma maipapan kadakuada ket ti kinamanagpannakkelda (kitaen iti Alma 31:24–28). Aggigiddan a basaen ti Alma 32:1-5, ket kiddawen kadagiti ubbing a gupgopenda no ania ti napasamak kadagiti Zoramite a nakurapay. Awisem dagiti ubbing a basaenda ti bersikulo 12–13 tapno maammuan no apay a narikna ni Alma a ti pannakapapanaw kadagiti sinagogada (wenno simbaan) ket maysa a nasayaat a banag para kadagiti Zoramite. Ania dagiti sumagmamano a bendision a sumangbay manipud iti panagbalin a napakumbaba?
-
Tulongam dagiti ubbing a mangsarak iti kayulogan ti pakumbaba wenno kinapakumbaba iti Pangiwanwan iti Nasantuan a Kasuratan wenno iti maysa a diksionario. Ania dagiti dadduma pay a pamugtuan maipapan iti kaipapanan dagitoy a balikas a masarakanda iti Alma 32:13-16? Awisem dagiti ubbing a mangpanunot iti nadumaduma a wagas a mangileppas iti maysa a binatog a kas iti “Agpakpakumbabaak no .”
Pumigsa ti pammaneknekko ken ni Jesucristo no taraonak daytoy.
Tulongam dagiti ubbing a sursuruam a takuatenda no ania ti mabalinda nga aramiden tapno “imula” ti balikas ti Dios iti puspusoda.
Dagiti Mabalin nga Aktibidad
-
I-display ti maysa a natangken, solido a banag (kas iti bato) a mangibagi iti natangken wenno napannakkel a puso ken maysa a banag a nalamuyot (kas iti daga) a mangibagi iti nalamuyot wenno napakumbaba a puso. Bay-am a riknaen dagiti ubbing dagitoy nga agpada a banag [objects]. Kalpasanna ipakita kadagiti ubbing ti maysa a bukel a mangibagi iti balikas ti Dios. Awisem ida a mangpadas a pespesen ti bukel iti natangken ken nalamuyot a banag. Agiggidan a basaen ti Alma 32:27–28, ken pagsasaritaan no ania ti mabalin a kaipapanan ti “mangted iti lugar”(bersikulo 27) para iti balikas ti Dios iti puspusotayo.
-
Bayat ti panangbasayo iti Alma 32:26–43 nga aggigiddan, agsardeng iti sagpaminsan ket awisem dagiti ubbing a mangidrowing iti maysa a ladawan ti bukel wenno mula a mailadladawan—kas pagarigan, maysa a bukel ken maysa a napatubo a bukel (bersikulo 28), maysa a dumakdakkel a mula (bersikulo 30), ken maysa a dakkel a mula nga agbungbunga (bersikulo 37). Allukoyem ida a markaanda dagiti ladawanda a nga addaan kadagiti reperensia manipud iti manipud iti Alma 32. Kasano a maipada ti panangtaraon iti maysa a bukel iti panangtaraon iti pammaneknektayo maipapan ken ni Jesuscristo? Kasano ti panagtaraontayo kadagiti pammaneknektayo? Awisem dagiti ubbing a siuulimek nga agpanunot maipapan iti no kasano ti panagdakkel dagiti pammaneknekda ken no ania ti aramidendanto a panangtaraon kadagitoy.
Denggennak ti Nailangitan nga Ama no agkararagak.
Palso ti pagarup dagiti Zoramite maipapan iti kararag, makitatayo pay laeng ti sumagmamano kadagitoy iti agdama. Insuro da Alma ken Amulek dagiti nabileg a kinapudno a mangparmek kadagitoy palsoa pagarup.
Dagiti Mabalin nga Aktibidad
-
Tulongam dagiti ubbing a mangsukisok iti Alma 33:2–11 kadagiti napapateg a balikas ken ragup dagiti balikas a mainaig iti kararag a madagdagullit. Ania ti maisuro kadatayo dagitoy a balikas ken ragup dagiti balikas maipapan iti kararag?
-
Tulongam dagiti ubbing nga agaramid iti listaan dagiti kasasaad a mabalinda nga agkararag, agraman dagidiay nadakamat iti Alma 33:4–10 ken 34:17–27 kasta met dagiti kasasaad iti biagda. Awisem dagiti ubbing nga agpanunot maipapan wenno mangibinglay kadagiti padasda idi nagkararag ken nariknada a sinungbatan ti Dios dagiti kararagda.
Yallukoy ti Panagsursuro iti Pagtaengan
No mabalin, ikkam ti tunggal ubing kadagiti bukel nga iyawid ken imula a mangipalagip kadakuada a makamulong a mangpabileg kadagiti pammaneknekda ken ni Jesucristo. Allukoyem ida nga ibagada kadagiti pamiliada no ania ti nasursuroda maipapan iti panangaramat kadagiti pammatida ken ni Jesucristo.
Panangpadur-as iti Panangisurotayo
Ipaneknek maipapan kadagiti naikari a bendision. No awisem dagiti ubbing a mangtungpal iti maysa a pagbatayan iti ebanghelio, ibagam kadakuada maipapan kadagiti kari ti Dios kadagiti agtungpal iti dayta a pagbatayan (see Panangisuro iti Wagas ti Mangisalakan, 35).