“Hunio 29–Hulio 5. Alma 23–29: ‘Pulos a Dida Nagikay,’” Umaykayo Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Hunio 29–Hulio 5. Alma 23-29,” Umaykayo, Sumurot Kaniak—Para kadagiti Indibidual ken Pamilia: 2020
Ikalkali dagiti Anti-Nephi-Lehi dagiti Armasda a Pakigubat, ni Jody Livingston
Hunio 29–Hulio 5
Alma 23–29
“Pulos a di Nagikay”
Bayat ti panangbasam iti Alma 23–29, ania dagiti makitam a mensahe a para iti bagim ken iti pamiliam? Ania ti maibinglaymo kadagiti klasem iti Simbaan?
Isuratmo dagiti Impresionmo
No dadduma kadi ket masdaawka no pudno a makapagbalbaliw dagiti tattao? Nalabit a maburiboranka no maparmekmo met laeng dagiti biddut a pili a naaramidmo wenno dagiti dakes a galad a naparnuaymo, wenno mabalin a maburiboranka met maipapan kadagiti ay-ayatem. No kasta, matulongannaka ti estoria dagiti Anti-Nephi-Lehi. Dagitoy a tattao ket nagsapata a kabusor dagiti Nephite. Idi napagnunumuan ni Ammon ken dagiti kakabsatna a mangikasaba iti ebanghelio kadakuada, ket “kinatawaan[ida] nga inumsi” dagiti Nephite. Ti panangpapatay kadagiti Lamanite ti ad-adda a nakapappapati a pangrisut ngem iti panangbalbaliw kadakuada. (Kitaen iti Alma 26:23–25).
Ngem nagbalbaliw dagiti Lamanite—babaen ti mamagbalbaliw a bileg ti Apo. Idi naminsan a naam-ammo ida a “dagiti atap ken nasukir ken nakaam-amak a tattao” (Alma 17:14), “naam-ammoda babaen iti kinaregtada iti Dios” (Alma 27:27). Kinaagpaysuanna “pulos a dida nagikay” (Alma 23:6).
Nalabit addaanka kadagiti palso a tradision a panawan wenno idissoda dagiti “armas ti yaalsada” (Alma 23:7). Wenno mabalin a kasapulam laeng ti agbalin a naregregget bassit iti pammaneknekmo ken nalabit nga asidegka bassit iti mabalin nga ikakayakay. Ania man dagiti panagbalbaliw a kasapulam, Alma 23–29 makaipaay kenka iti namnama a, babaen iti pangsubbot a bileg ni Jesucristo, posible ti manayon a panagbalbaliw.
Dagiti Kapanunotan para iti Bukod a Panagadal iti Nasantuan a Kasuratan
Idi inawat dagiti annak ti Dios ti ebanghelio, simmaruno dagiti naindaklan a bendision.
Idi imbaga ti ari dagiti Lamanite nga “awan koma ti makalapped” iti balikas ti Dios kadagiti taona (kitaen iti Alma 23:1–5), linukatanna ti ruangan kadagiti naindaklan a bendision para kadakuada. Bayat ti panangbasam iti Alma 23–29, sapulem dagitoy a bendision. Kasano a masiguradom a ti balikas ti Dios ket “saan a makalapped” iti biagmo wenno iti pamiliam?
Binalbaliwan ti pannakapasurotko ken ni Jesucristo ken ti ebangheliona ti biagko.
Dagiti Lamanite a sinarungkaran ni Ammon ken dagiti kakabsatna ket kasla saan a nakasagana para iti pannakapasurot wenno panagbalbaliw—napalab-oganda kadagiti kannawidan dagiti ammada ken ti bukodda a kinadangkes. Ngem adu kadakuada ti immawat iti ebanghelio ni Jesucristo ken nakaaramidda kadagiti napapateg a panagbalbaliw iti biagda. Kas maysa a simbolo ti bukodda a pannakapasurot, inawagan dagitoy a Lamanite ti bagbagida iti Anti-Nephi-Lehi. (Ti kaipapanan ti “anti” itoy a kasasaad ket saan a kapada ti “anti” iti “anti-Cristo.”)
Iti panangpampanunot iti pannakapasurot dagitoy a Lamanite ket mabalin a mangguyugoy kenka a mangutob ti bukodmo a pannakapasurot wenno kumbersion “iti Apo” (Alma 23:6). Maysa a wagas a pakaadalandagitoy a kapitulo ket ti mangilasin iti no kasano a ti pannakapasurot wenno kumbersion dagiti Anti-Nephi-Lehi ket namagbalbaliw iti biagda. Matulongannaka a mangirugi dagiti sumaganad a bersikulo.
Bayat ti panangutobmo kadagiti panagbalbaliw dagiti Anti-Nephi-Lehi, ibilangmo no kasano a balbaliwannaka ti bukodmo a pannakapasurot wenno kumbersion ken ni Cristo. Ania ti mariknam a kasapulam pay a balbaliwan tapno maaddaan iti dakdakkel a bileg ti ebanghelio iti biagmo?
Manangngaasi ti Dios.
Idinto a kasla maigiddiat dagiti basol a nasken a parmeken da Ammon ken dagiti Anti-Nephi-Lehi iti ania man a banag iti biagmo, agpannuraytayo amin iti asi ti Dios. Ania ti masarakam iti Alma 24:7–19 ken 26:17–22 a mangtulong a mangipaawat kenka iti kaasina? Bayat ti panagbasam, nalabit a mapanunotmo dagitoy a banag: dagiti wagas a nakaawisam nga agbabawi, dagiti padasmo iti panagbabawi, kasano a pinadasmo ti mangliklik nga agbasol manen, ken dagiti bendision a simmangbay kenka babaen ti panagbabawi. No basaem dagiti bersikulo iti kastoy a wagas, aniat masursurom maipapan iti kaasi ti Dios iti biagmo?
Mangisangbay iti rag-o ti panagserbi iti Apo.
Iti baet dagiti agduduma a padasda, inyebkas da Ammon ken Alma ti agpadpada a riknada maipapan kadagiti aramidda kas misionario. Ibilang ti panangbasa iti Alma 26 ken 29 ken pagdasigen ida. Ania ti madlawmo a pagpapadaan? Ania dagiti balikas wenno ragup ti balikas ti naulit? Ania ti masursurom manipud kada Ammon ken Alma maipapan no kasano ti mangsapul iti pudno a rag-o iti laksid dagiti pannubokmo? (Tapno marebyu dagiti karit a nakaipasanguan ni Alma, kitaen dagiti paulo ti kapitulo para iti Alma 5–16. Tapno mangrebyu kadagiti karit ni Ammon ken kakabsatna, kitaen dagiti paulo ti kapitulo para iti Alma 17–28.)
Ania dagiti binettek ken sarusar?
Iti panawen ti panagapit, masansan a maummong ti dawa kadagiti rineppet a maawagan iti binettek ken maikabil kadagiti pagidulinan, no dadduma maawagan kadagiti sarusar. Imbinglay ni Elder David A. Bednar ti kayulogan ti simbolismo iti Alma 26:5: “Dagiti binettek iti daytoy a pangngarig ket mangibagi kadagiti kabumbuniag a miembro ti Simbaan. Dagiti sarusar ket dagiti nasantuan a templo” (“Honorably Hold a Name and Standing,” Ensign wenno Liahona, Mayo 2009, 97). Ibilang no ania ti isuro kenka ti pangngarig iti Alma 26:5–7 maipapan iti kinapateg dagiti katulagan iti templo.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 24:6–19
Apay nga inkali dagiti Anti-Nephi-Lehi dagiti armasda a “nauneg iti daga”? (Alma 24:16). Nalabit a magustuan dagiti miembro ti pamilia nga isurat kadagiti papel dagiti banag a kayatda a parmeken wenno panawan. Kalpasanna agkalida iti abut ket gaburanda dagiti papel.
Alma 24:7–12
Ti panangadal kadagitoy a bersikulo ket makatulong iti pamiliam a makaawat iti nakaskasdaaw a sagut ti panagbabawi. Ania ti inaramid dagiti Anti-Nephi-Lehi tapno makapagbabawi iti basbasolda? Kasano a tinulongan ida ti Apo nga agbabawi? Ania ti masursurotayo manipud iti daytoy a pangngarig?
Alma 24:20–27
Ania ti nakitatayo a mangipaneknek iti kinapudno ti imbaga ni Mormon: “Kasta ti pannakakitatayo nga adu a wagas ti maaramid ti Apo iti pannakaisalakan dagiti taona”? (Alma 24:27).
Alma 26:2
Kasano a sungbatan ti pamiliam dagiti saludsod ni Ammon iti Alma 26:2? Nalabit a makaramidka iti listaan dagiti saludsodda iti dakkel a papel ket isab-itmo daytoy iti lugar a makita ti tunggal maysa. Allukoyem dagiti miembro ti pamilia a mangnayonda iti daytoy bayat ti panangpanunotda iti dadduma pay a bendision ti Dios nga “intedna kadatayo.”
Alma 29:9
Kasano a makapagbalin da Ammon ken Alma a ramit kadagiti ima ti Dios ? Ibilangmo ti panangkita kadagiti remienta ken ramit iti pagtaenganyo ket pagsasaritaan no kasano a makatulong ti tunggal maysa kadagitoy iti pamiliam. Kasano a mangtulong daytoy a mangipaawat kadatayo no kasano a makapagbalin ti tunggal maysa kadatayo a “ramit kadagiti ima ti Dios”?
Para iti ad-adu pay a kapanunotan para iti panagisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agusar iti nadumaduma. Ti panangbaliwbaliwmo iti wagas [approach] iti sangapamiliaan a panagadal iti nasantuan a kasuratan ket makatulong kadagiti miembro ti pamilia nga agtalinaed nga interesado ken makiraman. Kas pagarigan, kalpasan a malpas nga agbasa ti maysa a miembro ti pamilia iti maysa a bersikulo, mabalinna a kiddawen kadagiti dadduma pay a miembro ti pamilia nga uliten nga isao iti bukodda a balikas no ania ti kabasbasa laeng.
Ladawan dagiti Anti-Nephi-Lehi a mangikalkali kadagiti armasda ni Dan Burr