“Hulio 6–12. Alma 30–31: ‘Ti Saguday ti Balikas ti Dios,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Hulio 6–12. Alma 30–31,” Umaykayo, Sumurot Kaniak—Para kadagiti Indibidual ken Pamilia: 2020
Ipaneknek ti Amin a Banag nga Adda Dios (Alma ken Korihor) ni Walter Rane
Hulio 6–12
Alma 30–31
“Ti Saguday ti Balikas ti Dios”
Nagpaneknek ni Alma iti “nabileg nga epekto” ti balikas ti Dios (Alma 31:5). Bayat ti panangbasam iti Alma 30–31, ilistam dagiti impresionmo kabayatan ti pannakariknam iti nabileg nga epekto ti balikas ti Dios kenka.
Isuratmo dagiti Impresionmo
Silalawag nga ipakita dagiti pakaammuan iti Alma 30–31 ti bileg dagiti balikas—para iti dakes ken para iti nasayaat. Dagiti “makapatiray-ok” ken “sipapanakkel a balikas” ti palso a mannursuro nga agnagan iti Korihor ket nangbutbuteng a “pukawen[na] ti adu a kararua” (Alma 30:31, 47). Maipada, dagiti pannursuro ti maysa a simmina a Nephite nga agnagan iti Zoram ket nagbanag iti pannakatnag ti sibubukel a grupo ti tattao “iti dakkel a biddut” ken “binarusngida dagiti wagas ti Apo” (Alma 31:9, 11).
Ti kasupadina, addaan ni Alma iti di maisin a pammati a ti balikas ti Dios ket “nabilbileg nga amang ti ibungana iti panunot dagiti tao ngem ti espada, wenno ania man a banag” (Alma 31:5)—agraman dagiti balikas da Korihor ken Zoram. Impeksa dagiti balikas ni Alma ti agnanayon a kinapudno ket nangala kadagiti bileg ti langit a nangpaulimek ken ni Korihor (kitaen iti Alma 30:39–50), ket inyawisda dagiti bendision ti langit kadagitoy kimmuyog kenkuana a mangisubli kadagiti Zoramite iti kinapudno (kitaen iti Alma 31:31–38). Dagitoy ti napapateg a pagarigan para kadagiti pasurot ni Cristo iti agdama,no dagiti “sipapannakkel a balikas” ken “dakkel a biddut” ket adda manen nabileg nga epektoda iti pampanunot dagiti tao (Alma 30:31; 31:9). Ngem masarakantayo ti kinapudno babaen iti panagtalek, kas iti inaramid ni Alma, “ti saguday” ti balikas ti Dios (Alma 31:5).
Dagiti Kapanunotan para iti Bukod a Panagadal iti Nasantuan a Kasuratan
Ania ti anti-Cristo?
Iti Alma 30:6, naawagan ni Korihor iti “Anti-Cristo.” Ti anti-Cristo ket “maysa a tao a mangipapan a kapadpadana ni Cristo ngem iti kinaagpaysuanna sumupsuppiat ken ni Cristo (1 Juan 2:18–22; 4:3–6; 2 Juan 1:7). Iti nalawlawag a kaipapanan daytoy ket asino man wenno ania man a palso a panangtulad iti pudno nga ebanghelio wenno plano ti pannakaisalakan ken nailantad wenno nalimed a panangsuppiat ken ni Cristo” (Pangiwanwan iti Nasantuan a Kasuratan, “Anticristo”).
Ania “dagiti palso a panangtulad iti pudno nga ebanghelio” a madlawmo iti lubong iti agdama? Kas pagarigan, insuro ni Sister Julie B. Beck, sigud a Sapasap a Presidente ti Relief Society, “Anticristo pay ti ania man a doktrina wenno pagbatayan a mangngegan[tayo] iti lubong a sumupsupiat iti pamilia ” (“Teaching the Doctrine of the Family,” Ensign, Mar. 2011, 15).
Sanguen ni Korihor ni Alma, ni Robert T. Barret
Makatulong kaniak ti Libro ni Mormon a mangsupring iti impluensia dagiti mangpadas a mangallilaw kaniak.
Bayat ti panangbasam iti Alma 30:6–31, mabalin a kasla pamiliar dagiti pannursuro ni Korihor. Dayta ket gapu ta, kas insuro ni Presidente Ezra Taft Benson, ipalgak ken mapatibkernatayo ti Libro ni Mormon a maibusor “kadagiti plano, istratehia, ken doktrina ti sairo iti panawentayo. Ti klase dagiti tao a kimmalilis iti Libro ni Mormon ket kapada ti klase nga adda kadatayo iti agdama. Ti Dios, iti awan patinggana a naipasakbay a pannakaammona, sinukognati Libro ni Mormon tapno makitatayo dagiti biddut ket maammuantayo no kasano ti mangparmek kadagiti palso a konsepto a mainaig iti edukasion, politika,relihion, ken pilosopia iti panawentayo” (Teachings of Presidents of the Church: Ezra Taft Benson, [2014], 132).
Ibilangmo ti panagaramid iti maysa a listaan dagiti palso a doktrina nga insuro ni Korihor iti Alma 30:6–31. Ania dagiti sumagmamano a bunga ti panamati kadagitoy a pannursuro? Kas pagarigan, ania ti bunga ti panamati a “no natayen [ti] tao, daytan [ti] pagpatinggaanna”? (Alma 30:18). Ania dagiti palso a doktrina nga insuro ni Korihor a maipada kadagiti palso a doktrina a nadlawmo iti lubong iti agdama?
Ti panangbasa maipapan iti panaglangen da Korihor ken Alma ket makatulong kenka a mangisagana kadagiti kasasaad no adda mangpadas a mangallilaw kenka. Mabalin a makatulong nga adalen ti Alma 30:29–60 tapno maawatan no kasano a naallilaw ni Korihor (kitaen nangnangruna kadagiti bersikulo 52–53). Ania ti masursurom manipud iti panagresponde ni Alma kadagiti pannursuro ni Korihor? (kitaen iti Alma 30:31–35).
Adda bileg ti balikas ti Dios a mangidalan kadagiti tao iti kinalinteg.
Ti parikut dagiti Zoramite a maisina manipud kadagiti Nephite ket iti dadduma kasla agkasapulan daytoy iti maysa a pangrisut iti politika wenno militar (kitaen iti Alma 31:1–4). Ngem nasursuro ni Alma ti agtalek “iti saguday ti balikas ti Dios” (Alma 31:5). Ania ti masursurom manipud iti Alma 31:5 maipapan iti bileg ti balikas ti Dios? Kasano a nakitam nga iturong ti balikas ti Dios “dagiti tao nga agaramid [iti] nalinteg”? (Alma 31:5). Utobem no kasano a mabalinmo a “padasen” (usaren wenno suboken) ti balikas ti Dios a mangtulong ti maysa a tao nga ay-ayatem.
Tapno ad-adda a maawatan ti wagas ni Alma a mangisalsalakan kadagiti dadduma, mabalinmo nga idasig dagiti galad, rikna, ken tignayna kadagiti galad, rikna, ken tignay dagiti Zoramite, kas nailadawan iti Alma 31. Makatulong ti maysa a tsart kas iti sumaganad. Ania dagiti pagdudumaan a madlawmo? Ania ti riknam a makapagbalinka nga ad-adda kas ken ni Alma?
|
Dagiti Zoramite |
Alma |
|---|---|
Dagiti Zoramite Namati a naigarangugong iti impierno dagiti adda iti ruar ti grupoda (Alma 31:17). | Alma Namati at “kakabsatna” dagiti Zoramite ket “napateg” dagiti kararuada (Alma 31:35). |
Dagiti Zoramite Naiturong dagiti pusoda iti kinabaknang (Alma 31:24, 28). | Alma Nagkalikagum a mangyeg kadagiti kararua ken ni Jesucristo (Alma 31:34). |
Dagiti Zoramite | Alma |
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 30:44
Ibilang ti panangbasa ken panaglilinnawag ti Alma 30:44 a sangkamaysa kabayatan ti papanyo pannagna iti ruar wenno panangkita kadagiti ladawan dagiti pinarsua ti Dios. Mabalin nga ibinglay dagiti miembro ti pamilia no ania ti nakitada a mangipaneknek iti Dios. Kasano a dagitoy a bambanag—wenno dadduma pay a padas nga adda kadatayo—mangtulong kadatayo a mangammo a pudno ti Dios?
Alma 30:56–60
Ania ti masursurotayo manipud iti Alma 30:56–60 maipapan iti no kasano a tratuen ti sairo dagiti pasurotna? Ania ti maaramidtayo a mangsaluad iti pagtaengantayo a maibusor iti impluensiana?
Alma 31:20–38
Kalpasan ti panangbasa iti Alma 31:20–38 a kaduam ti pamiliam, mabalinyo a pagsasaritaan dagiti sumaganad a saludsod: Kasano a maigiddiat ti kararag ni Alma iti kararag dagiti Zoramite? Kasano a masurottayo ti pagwadan ni Alma iti bukod ken sangapamiliaan a panagkararagtayo?
Mabalin a mangipan dagiti inaudi nga ubbing iti bato iti pandag dagiti punganda tapno makatulong kadakuada a manglagip nga agkararag iti tunggal bigat ken rabii. Mabalin a magustuan pay nga arkosan ti batoda.
Alma 31:23
Ania ti ar-aramidentayo iti tunggal aldaw iti pagtaengantayo tapno agsursuro maipapan ken makisarita iti Dios?
Para iti ad-adu pay a kapanunotan para iti panagisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Isaganam dagiti aglawlawmo. “Nalaus a makaapekto dagiti aglawlawtayo iti kabaelantayo nga agsursuro ken mangrikna iti kinapudno” (Panangisuro iti Wagas ti Mangisalakan,15). Padasem ti mangsapul iti maysa a lugar a pagadalan kadagiti nasantuan a kasuratan a mangawisto iti impluensia ti Espiritu Santo. Mabalin pay a mangawis iti Espiritu ti makaparegta a musika ken dagiti ladawan.
Ti Rameumpton, ni Del Parson