“Hulio 20–26. Alma 36–38: ‘Kumitaka iti Dios ken Agbiag,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Hulio 20–26. Alma 36–38,” Umaykayo, Sumurot Kaniak—Para kadagiti Indibidual ken Pamilia: 2020
Panangiladawan ni Joshua Dennis
Hulio 20–26
Alma 36–38
“Kumitaka iti Dios ken Agbiag”
Bayat ti pannakariknam iti rag-o a sumangbay manipud iti pannakaawat iti ebanghelio, kayatmonto a yaplikar no ania ti nasursurom” (Preach My Gospel [2004], 19). Isuratmo dagiti kapanunotam ken impresionmo maipanggep iti no kasano ti mangyaplikar kadagiti kinapudno a masursurom.
Isuratmo dagiti Impresionmo
Idi nakita ni Alma ti kinadangkes iti aglawlawna, nakarikna iti napalalo a “leddaang,” “panagtutuok” ken “sanaang ti kararua” (Alma 8:14). “Iti kasta a kinadangkes dagitoy a tao,” kinunana kadagiti Zoramite, “ket masaktan ti kararuak” (Alma 31:30). Nariknana ti isu met la a banag kalpasan a nakasubli manipud iti misionna kadagiti Zoramite—ken iti pannakakitana a “nangrugi a mapatangken ti puspuso dagiti tao, ken nangrugi a nasaktan gapu iti kinaiget ti balikas,” ket daytoy ti namagbalin a “naglapusanan ti pusona iti leddaang” (Alma 35:15). Ania ti inaramid ni Alma maipapan iti no ania ti nakita ken nariknana? Saan a nalaka a naupay wenno saan a nakapanunot iti negatibo maipanggep iti kasasaad ti lubong. Ketdi, “imbilinna a maurnong dagiti annnakna a lallaki” ket isurona kadakuada “dagiti banag a maipapan iti kinalinteg” (Alma 35:16). Insurona kadakuada nga “awan ti sabali a pamuspusan wenno wagas a pakaisalakanan ti tao, babaen laeng ken ni Cristo. … Adtoy, isu ti balikas ti kinapudno ken kinalinteg” (Alma 38:9).
Dagiti Kapanunotan para iti Bukod a Panagadal iti Nasantuan a Kasuratan
Mayanakak iti Dios no agpakumbaba ken agbabawiak.
Manmano ti maaddaanto kadagiti padas a makatignay rikna a kas iti pannakapasurot wenno kumbersion ni Alma. Ngem adda dagiti pagbatayan iti padasna a masursuro ken mayaplikartayo amin, gapu ta nasken ti tunggal maysa tunggal maysa a “[mayanak] iti Dios” (Alma 36:23). Bayat ti panangbasam iti Alma 36, sarakem dagiti pagbatayan a mabalinmo a yaplikar. Kas pagarigan, kasano a marikna ti maysa a tao a nayanak iti Dios maipapan iti basol? maipapan ken ni Jesucristo? Mabalinmo met a kitaen dagiti panagbalbaliw a mabalin a namnamaem a makita kadagiti patien ken tignay ti maysa a tao a mayanak iti Dios.
Kitaen met iti Mosiah 5:7; 27:25–26; Alma 5:14; 22:15; Helaman 3:35; “Conversion,” Gospel Topics, topics.ChurchofJesusChrist.org.
Sinubbot ni Jesucristo dagiti basol ti lubong.
Mabalin a madlawmo ti sumagmamano a naulit a pakaammuan ni Alma maipapan iti pannakapasurotna iti daytoy a kapitulo. Gapu ta ti Alma 36 ket maysa a dakkel a pagwadan ti porma ti dandaniw a Hebreo a maaw-awagan iti chiasmus, a nakailanadan dagiti balikas wenno kapanunotan iti umisu nga urnos, nga agbanag iti kangrunaan a kapanunotan, kalpasanna naulit iti kasupadi nga urnos. Iti Alma 36, ti kapanunotan iti bersikulo 3 ket naulit iti bersikulo 27, ti kapanunotan iti bersikulo 5 ket naulit iti bersikulo 26, ken dadduma pay. Ti kangrunaan a kapanunotan ti kapatgan a mensahe ti chiasmus. Kitaem no masarakam ti kangrunaan a kapanunotan kadagiti bersikulo 17–18. Kitaen no kasano a ti pannakatiliw ti isip itoy a panunot” ti nangaring ken ni Alma ket nagbalbaliw ti biagna. Kasano nga inaringannaka daytoy a kinapudno? Ania dagiti dadduma pay a naulit a kapanunotan a makitam iti daytoy a binatog?
Kasano daytoy a salaysay ti panagbabawi ken pammakawan ket mangparegta kenka a mangsurot iti pagwadan ni Alma ket umasideg iti Mangisalakan?
Para iti ad-adu pay nga impormasion maipapan iti chiasmus, kitaen iti Book of Mormon Student Manual (Church Educational System manual [2009], 232–33).
Nataginayon dagiti nasantuan a kasuratan “para iti nainsiriban a gagem.”
Napanunotmo kadin ti maipapan iti kaadda dagiti nasantuan a kasuratan ita ket maysa a milagro ken bendision? “Intalek ti Dios [kadatayo] dagitoy a banag, a sagrado” (Alma 37:14). Bayat ti panangbasam iti Alma 37, sapulem dagiti bendision a sumangbay manipud iti kaadda dagiti nasantuan a kasuratan. Kasano a napadasamon dagitoy a bendision? Kasano a maaramattayo dagiti nasantuan a kasuratan a mangtulong “tapno maipakitanto ti bileg [ti Dios] kadagiti sumaruno a kaputotan”? (AAlma 37:18).
Iti Alma 37:38–47, idasig ni Alma “ti balikas ni Cristo” iti Liahona. Bayat ti panangutobmo iti daytoy a panangidasig, panunotem maipapan kadagiti wagas a nakapadasam iti milagro ken bileg dagiti pannursuro ni Cristo iti “inaldaw” (Alma 37:40).
Kitaen met iti D. Todd Christofferson, “The Blessing of Scripture,” Ensign wenno Liahona, Mayo 2010, 32–35.
Isurodatayo dagiti nasantuan a kasuratan no kasano ti mangsurot iti Dios.
“Babaen dagiti babassit ken gagangay a banag agbalindanto a naindaklan a banag.”
No maminsan mariknatayo a dadakkel ken komplikado unay dagiti problematayo isu a nasken met a dadakkel ken komplikado dagiti pangrisut.. Ngem dumani kanayon, pilien ti Apo nga aramaten “dagiti babassit ken gagangay a banag” (Alma 37:6) a mangipatungpal iti aramidna ken mangbendision iti biag dagiti annakna. Bayat ti panangbasam iti Alma 37: 6–7, utoben ken isurat dagiti wagas a nakitam itoy a pagbatayan a maus-usar iti biagmo. Ania dagiti babassit ken gagangay a banag nga aramaten ti Apo a mangbendision kenka ken mangipatungpal iti aramidna?
Kitaen met iti Alma 37:41–46; Dallin H. Oaks, “Small and Simple Things,” Ensign wenno Liahona, Mayo 2018, 89–92.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 36:5–26
Nupay naisangsangayan ti padas ni Alma, ipakita ti pannakapasurotna dagiti sumagmamano a pagbatayan a mayaplikar kadatayo amin. Awisen ti tunggal miembro ti pamilia nga agpili ti maysa a bersikulo manipud iti Alma 36:5–26 a mangisuro maipapan iti panagbalin a “mayanak iti Dios.” Ania ti masursurotayo manipud kadagitoy a bersikulo? Mabalin nga ibinglay dagiti miembro ti pamilia ino kasano a nayaplikarda dagiti pagbatayan nga inladawan ni Alma.
Alma 36:18–21, 24
Kasano a maaramattayo dagitoy a bersikulo a mangtulong iti maysa a tao a makitana a ti panagbabawi ket maysa a narag-o a padas, a saan a pagbutngan? Kasano a maparegtanatayo ti panagbabawi a mangibinglay ti ebanghelio kadagiti dadduma?
Alma 37:6–7, 38–46
Ania ti sumagmamano a “babassit ken gagangay a banag” (Alma 37:6) a mangisangbay kadagiti naindaklan a banag iti biagtayo? Iti ania a wagwagas a maipada ti balikas ni Cristo iti Liahona? Kasano a matulongantayo ti maysa ken maysa a napaspasnek nga agadal kadagiti nasantuan a kasuratan?
Alma 37:35
Apay a nainsiriban nga agsursuro nga agtungpal kadagiti bilin kabayatan “iti kinagtutubo[tayo]”?
Alma 38:12
Ammo kadi ti pamiliam ti no ania ti singkaw? Nalabit a mabalinmo nga ipakita kadakuada ti maysa a ladawan daytoy ken pagsasaritaan no kasano a mapengdanna ti maysa nga ayup. Ania ti kaipapanan ti “pengdan dagiti nauneg a rikna[tayo]”? Kasano a ti panangpengdan kadagiti nauneg a riknatayo ket tulongannatayo a “mapno iti ayat”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Isuratmo dagiti impresion. No agisuratka kadagiti naespirituan a parikna, ipakitam iti Apo nga ik-ikkam pateg ti pannarabayna, ket ad-adda a masansan a paraburannakanto iti paltiing. Kabayatan ti panagadalmo, isuratmo dagiti kapanunotam. (Kitaen iti Panangisuro iti Wagas ti Mangisalakan, 12, 30.)
Agparang ti Anghel nga ken ni Alma ken dagiti Annak a Lallaki ni Mosiah, ni Clark Kelley Price