“Hunyo 10–16. Mateo 26; Marcos 14; Lucas 22; Juan 18: ‘Dili Sumala sa Akong Pagbuot Kondili sa Imo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hunyo 10–16. Mateo 26; Marcos 14; Lucas 22; Juan 18,” Dali, Sunod Kanako—Alang sa mga Indibidwal ug mga Pamilya: 2019
Ug Gabii Kadto, ni Benjamin McPherson
Hunyo 10–16
Mateo 26; Marcos 14; Lucas 22; Juan 18
“Dili Sumala sa Akong Pagbuot Kondili sa Imo”
Samtang magbasa ka mahitungod sa mga panghitabo nga gihulagway sa Mateo 26; Marcos 14; Lucas 22; ug Juan 18, bantayi ang bisan unsa nga mga impresyon nga imong madawat, ilabi na sa mga pag-aghat sa paghimo og mga kausaban sa imong kinabuhi.
Irekord ang Imong mga Impresyon
Dihay tulo lang ka mortal nga saksi sa pag-antus ni Jesukristo sa Tanaman sa Getsemani—ug nangatulog sila kasagaran niini. Niana nga tanaman ug dayon sa krus, gidala ni Jesus sa Iyang Kaugalingon ang mga sala, mga kasakit, ug mga pag-antus sa matag tawo nga sukad nagpakabuhi, bisan hapit walay usa nga buhi nianang higayuna ang nakahibalo unsay nahitabo. Apan dayon, ang labing importanting panghitabo sa kahangturan sa kasagaran molabay nga wala tagda sa kalibutan. Hinoon, nakahibalo ang Dios nga Amahan. Nakadungog siya sa pangamuyo sa Iyang matinud-anong Anak: “Amahan, kon buot ka, kuhaa kining kopa gikan kanako; hinoon dili ang akong pagbuot, maoy matuman, kondili ang imo. “Ug dihay manolunda nga mitungha kaniya gikan sa langit sa pagpalig-on kaniya” (Lucas 22:42–43). Samtang wala kita didto sa pagsaksi niining buhat sa pagsakripisyo ug pagkamanunuton, mahimong sabton nato, kitang tanan mahimong saksi sa Pag-ula ni Jesukristo. Matag higayon nga kita maghinulsol ug makadawat og kapasayloan sa atong mga sala ug matag higayon nga mobati kita sa gahum sa Manluluwas nga milig-on nato, makapamatuod kita sa unsay nahitabo sa Tanaman sa Getsemani.
Mga Ideya alang sa Personal nga Pagtuon sa Kasulatan
Mateo 26:17–30; Marcos 14:12–26; Lucas 22:7–39
Ang sakrament usa ka oportunidad sa paghinumdom sa Manluluwas.
Unsay imong buhaton sa paghinumdom sa mga tawo nga nahimong importante sa imong kinabuhi? Sa dihang gipasiugdahan sa Manluluwas ang sakramento ngadto sa Iyang mga tinun-an, miingon Siya, “Buhata ninyo kini sa paghandum kanako” (Lucas 22:19; tan-awa usab sa 3 Nephi 18:7). Sa unsa nga paagi nga ang pan ug tubig, ug ubang mga elemento niini nga ordinansa makatabang nimo sa paghinumdom Kaniya ug sa Iyang pag-antus? Palandunga kini nga pangutana samtang magbasa ka sa unang sakrament. Usab, tan-awa ang mga rebisyon nga makita sa Hubad ni Joseph Smith (tan-awa sa Giya ngadto sa mga Kasulatan).
Paggahin og panahon sa pagpamalandong sa kasinatian nga imong nasinati panahon sa sakrament matag semana. Unsay imong mabuhat sa paghimo niini nga mas makahuluganon? Tingali makasulat ka og pipila ka mga butang kon gibati ka nga nadasig sa paghinumdom mahitungod sa Manluluwas—sa Iyang mga pagtulun-an, sa Iyang mga buhat sa gugma, sa mga panahon nga gibati nimo nga nasuod nimo Siya, o sa mga sala ug mga kasakit nga Iyang gidala sa Iyang Kaugalingon alang kanimo.
Tan-awa usab sa 3 Nephi 18:1–13; Doktrina ug mga Pakigsaad 20:76–79.
Mateo 26:36–46; Marcos 14:32–42; Lucas 22:40–46
Ang Manluluwas nag-antus alang kanako didto sa Getsemani.
Si Presidente Russell M. Nelson midapit nato nga “mopundar og panahon sa pagkat-on mahitungod sa Manluluwas ug sa Iyang maulaong sakripisyo” (“Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 40).
Ikonsiderar unsay imong buhaton sa pagdawat sa pagdapit ni Presidente Nelson. Mahimong sugdan nimo pinaagi sa mainampoong pagpamalandong sa pag-antus sa Manluluwas didto sa Getsemani, sumala sa gihulagway niini nga mga bersikulo, ug isulat ang mga impresyon ug mga pangutana nga moabut sa hunahuna.
Alang sa mas lawom nga pagtuon bahin sa Manluluwas ug sa Iyang Pag-ula, sulayi ang pagsiksik sa ubang mga kasulatan alang sa mga tubag sa mga pangutana sama niini:
-
Nganong importante ang Pag-ula sa Manluluwas? (Tan-awa sa 2 Nephi 2:5–10, 17–26; 9:5–26; Alma 34:8–16; 42:9–26.)
-
Unsay nasinati sa Manluluwas samtang nag-antus Siya? (Tan-awa sa Isaias 53:3–5; Mosiah 3:7; Alma 7:11–13; D&P 19:16–19.)
-
Sa unsa nga paagi nga ang pag-antus ni Kristo makaapekto sa akong kinabuhi? (Tan-awa sa Juan 10:10–11; Mga Hebreohanon 4:14–16; 1 Juan 1:7; Alma 34:31; Moroni 10:32–33; Dallin H. Oaks, “Nalig- on pinaagi sa Pag- ula ni Jesukristo,” Liahona, Nob. 2015, 61–64.)
-
Akong ubang mga pangutana:
Samtang magkat-on ka mahitungod unsay nahitabo sa Getsemani, makapaikag tingali nga mahibaloan nga ang Getsemani usa ka tanaman sa mga kahoy nga olivo ug adunay pug-anan sa olivo, gamiton sa pagdugmok sa mga olivo ug pagkuha og lana nga gamiton para sa suga ug pagkaon ingon man usab para sa pang-ayo (tan-awa sa Lucas 10:34). Ang proseso sa paggamit og bug-at nga butang aron makakuha og lana sa olivo mahimong magsimbolo sa kabug-at sa sala ug kasakit nga giantus sa Manluluwas alang kanato (tan-awa sa D. Todd Christofferson, “Magpabilin Kamo sa Akong Gugma,” Liahona, Nob. 2016, 48–51).
Marcos 14:27–31, 66–72; Lucas 22:31–32
Ang pagkakabig [pagkahibalik] usa ka nagpadayon nga proseso.
Hunahunaa ang mga kasinatian ni Pedro uban sa Manluluwas—ang mga milagro nga iyang nasaksihan ug ang doktrina nga iyang nakat-unan. Nganong miingon man ang Manluluwas ngadto ni Pedro, “Ug sa mahibalik na ikaw, lig-ona ang imong mga igsoon”? (Lucas 22:32; italics gidugang). Unsa ang gitudlo ni Elder David A. Bednar ang kalainan tali sa pagbaton og pagpamatuod ug sa tinud-anay nga nahibalik? (tan-awa sa “Nakabig ngadto sa Ginoo,” Liahona, Nob. 2012, 106–9). Samtang magbasa ka mahitungod sa mga kasinatian ni Pedro sa Marcos 14:27–31, 66–72, hunahunaa ang imong kaugalingong pagkakabig. Unsa nga mga leksyon ang imong makat-unan gikan ni Pedro? Samtang magpadayon ka sa pagbasa sa Bag-ong Tugon, unsa nga ebidensya ang imong makita sa pagkakabig ni Pedro ug sa iyang mga paningkamot sa pagpalig-on sa uban? Unsa ang epekto sa iyang pagdawat sa gasa sa Espiritu Santo sa iyang pagkakabig? (tan-awa sa Juan 15:26–27; Mga Buhat 1:8; 2:1–4).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Unsa ang nasinati sa imong pamilya matag semana panahon sa sakrament? Ang pagbasa mahitungod sa unang sakrament makadasig og panaghisgot mahitungod sa kaimportante sa sakrament ug sa mga paagi nga ang mga sakop sa pamilya sa paghimo sa ilang pagsimba nga mas makahuluganon. Ikonsiderar ang pagpakita sa litrato sa Pagpaambit sa Sakramento (Libro sa mga Hulagway sa Ebanghelyo, nu. 108) ug sa pagpakigbahin sa mga ideya sa usag usa mahitungod unsay imong mahimo sa dili pa, panahon sa, ug human sa sakrament.
Kon ang imong pamilya mobasa niini nga mga bersikulo, mahimo nilang ipakigbahin unsay ilang nakat-unan samtang magtuon sila sa mga kasulatan nga gisugyot sa seksyon sa personal nga pagtuon sa kasulatan “Ang Manluluwas nag-antus alang nako didto sa Getsemani.”
Unsa ang atong makat-unan mahitungod ni Jesus gikan niini nga kasinatian?
Nag-antus Ka Hangtud Diha, ni Walter Rane
Unsay atong makat-unan gikan sa mga pulong sa Manluluwas niini nga mga bersikulo?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Tun-i ang mga pulong sa mga propeta ug apostoles sa ulahing mga adlaw. Basaha unsay gitudlo sa mga propeta ug mga apostoles sa ulahing mga adlaw mahitungod sa mga kamatuoran nga imong nakita sa mga kasulatan. Pananglit, sa labing bag-ong isyu sa kinatibuk-ang komperensya sa Liahona, mahimo kang mangita sa indeks sa hilisgutan alang sa “Pag-ula” (tan-awa sa Pagtudlo sumala sa Pamaagi sa Manluluwas, 24).
Dili Sumala sa Akong Pagbuot Kondili sa Imo, ni Walter Rane