“Hunyo 10–16. Mateo 26; Marcos 14; Lucas 22; Juan 18: ‘Dili sumala sa Akong Pagbuot, kondili sa Imo’” Dali, Sunod Kanako—Alang sa Primary: Bag-ong Tugon 2019 (2019)
“Hunyo 10–16. Mateo 26; Marcos 14; Lucas 22; Juan 18,” Dali, Sunod Kanako—Alang sa Primary: 2019
Ug Gabii Kadto, ni Benjamin McPherson
Hunyo 10–16
Mateo 26; Marcos 14; Lucas 22; Juan 18
“Dili sumala sa Akong Pagbuot kondili sa Imo”
Samtang imong basahon ang Mateo 26; Marcos 14; Lucas 22; ug Juan 18, pangita og mga baruganan nga gibati nimo nga kinahanglang masabtan sa mga bata.
Irekord ang Imong mga Impresyon
Awhaga ang Pagpaambit
Pagpakita og mga hulagway sa mga panghitabo niini nga mga kapitulo, sama sa Libro sa mga Hulagway sa Ebanghelyo, nu. 54, 55, ug 56, ug dapita ang mga bata sa pagsulti kon unsa ang nahitabo diha sa mga hulagway.
Itudlo ang Doktrina
Mas Gagmay nga mga Bata
Marcos 14:22–25; Lucas 22:19–20
Ang sakrament makatabang kanako sa paghunahuna mahitungod ni Jesus .
Tabangi ang mga bata nga makasabut nga ang pag-ambit sa sakrament usa ka kahigayunan sa paghunahuna mahitungod ni Jesus.
Posible nga mga Kalihokan
-
I-summarize ang istorya mahitungod ni Jesus nga mipasiugda sa sakrament. Mahimo nimong gamiton ang “Kapitulo 49: Ang Unang Sakrament,” Mga Istorya sa Bag-ong Tugon, 124–26. Tabangi ang mga bata nga makasabut nga atong hinumduman si Jesus panahon sa sakrament.
-
Pangutan-a ang mga bata kon nakahibalo ba sila kon unsay girepresentar sa pan ug tubig. Ipasabut nga kini nga mga simbolo nagtabang kanato sa paghinumdom nga si Jesus namatay alang kanato ug mibangon gikan sa mga patay. Pag-display og usa ka piraso sa pan ug kopa sa tubig samtang tabangan nimo ang mga bata sa pagsag-ulo sa mga pulong nga “Sa paghandum [Kaniya]” (Lucas 22:19).
-
Hangyoa ang mga bata sa pagpiyong ug sa paghunahuna og tawo nga ilang gimahal, ug dayon dapita sila sa pagsulti kanimo mahitungod nianang tawhana. Hangyoa sila sa pagpiyong pag-usab, sa paghunahuna sa Manluluwas, ug dayon sa pagpaambit og mga butang nga ilang nahibaloan mahitungod Kaniya. Awhaga sila sa paghunahuna mahitungod ni Jesus panahon sa sakrament matag semana.
-
Dapita ang mga bata sa pagpakita kon unsa ang ilang mahimo sa paghinumdom kang Jesus ug mahimong matinahuron panahon sa sakrament.
-
Tabangi ang mga bata sa paghimo sa booklet nga gihulagway diha sa pahina sa kalihokan karong semanaha. Isugyot nga gamiton nila kini sa pagtabang kanila nga maghunahuna mahitungod ni Jesus panahon sa sakrament.
-
Tabangi ang mga bata sa pagpangita og mga magasin sa Simbahan alang sa mga hulagway ni Jesus ug sa paghimo og collage [koleksyon sa mga hulagway] nga mahimo nilang tan-awon panahon sa sakrament miting.
Nag-antus si Jesus alang kanako tungod kay Iya akong gimahal.
Ikonsiderar kon sa unsang paagi ka makatabang sa mga bata nga mobati sa gugma ni Jesus kanila samtang maghisgot ka sa istorya sa Iyang pag-antus sa Getsemani.
Posible nga mga Kalihokan
-
Dapita ang mga bata sa paghunahuna og higayon nga mibati sila og kaguol o nasakitan. Kon angay, pagdapit og pipila ka mga bata sa pagpaambit. Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Ipasabut nga si Jesus, sa paagi nga wala kaayo nato masabti, mibati sa tanang kasakit ug kasub-anan nga sukad gibati sa tanan. Nagpasabut kini nga makatabang Siya kanato nga maarang-arang ang atong bation kon kita nasubo, nasakitan, o naglagot.
-
Kantaha uban sa mga bata ang “Gibati Ko ang Gugma sa Akong Manluluwas,” Songbook sa mga Bata, 42–43. Dapita sila sa pagpaambit og mga paagi diin gibati nila ang gugma ni Jesus.
Si Kristo Nag-ampo diha sa Tanaman sa Getsemani, ni Hermann Clementz
Itudlo ang Doktrina
Mas Dagko nga mga Bata
Ang sakrament makatabang kanako sa paghinumdom ni Jesukristo ug sa Iyang sakripisyo alang nako.
Unsaon ninyo pagtabang ang mga bata nga makabaton og makahuluganon nga kasinatian sa sakrament?
Posible nga mga Kalihokan
-
Dapita ang mga bata nga magpuli-puli sa pagbasa sa mga bersikulo sa Marcos 14:22–24 (tan-awa usab sa Hubad ni Joseph Smith, Marcos 14:20–24 [sa Giya ngadto sa mga Kasulatan]) ug sa Doktrina ug mga Pakigsaad 20:75–79. Unsa nga mga pulong ug mga ideya ang magkasusama sa duha ka mga tudling?
-
Pangutan-a ang mga bata kon unsa ang ilang gibuhat nga makatabang kanila sa paghunahuna mahitungod ni Jesus panahon sa sakrament. Tabangi sila sa pagpangita og mga kasulatan o mga pulong gikan sa mga himno sa sakrament nga mahimo nilang basahon panahon sa sakrament, ug dayon ilista kini sa usa ka kard nga mahimong tan-awon sa mga bata sa sunod higayon nga moambit sila sa sakrament. Kantaha ang pipila niini nga mga awit uban sa mga bata.
-
Pagsulat og mahinungdanong mga pulong gikan sa mga pag-ampo sa sakrament diha sa pisara, ug tabangi ang mga bata sa pagsag-ulo niini. Unsa man ang gipasabut niini nga mga pulong? Nganong mapasalamaton man kita nga makahimo kita sa pagbag-o sa atong mga pakigsaad sa bunyag matag semana?
-
Pagdapit og usa ka naghupot sa Aaronic Priesthood aron mosulti sa mga bata mahitungod sa iyang kasinatian sa pag-andam, pagpanalangin, o pagpaambit sa sakrament. Unsa ang nakatabang kaniya sa pag-andam sa pagbuhat niini? Unsa ang iyang gibati samtang nagbuhat siya niini? Sa unsang paagi ang pan ug tubig nagpahinumdom kaniya sa Manluluwas?
-
Hangyoa ang mga bata nga nabunyagan na sa pagpaambit kon unsay ilang nahinumduman mahitungod sa ilang bunyag. Unsa ang ilang gibati? Unsa nga mga pakigsaad ang ilang gihimo? (tan-awa sa Mosiah 18:8–10). Sultihi sila nga matag semana sa atong pag-ambit sa sakrament, sama ra kini nga nabunyagan pag-usab—mapasaylo kita sa atong mga sala, ug gibag-o nato ang atong mga pakigsaad.
Sa Getsemani, gikuha ni Jesukristo nganha Kaniya ang akong mga sala ug kasakit.
Ang pagkasayud mahitungod sa gibuhat ni Jesus alang kanato didto sa Getsemani makatabang sa mga bata sa paghinulsol sa ilang mga sala ug sa pagdangup ngadto sa Manluluwas kon makasinati sila og malisud nga mga pagsulay.
Posible nga mga Kalihokan
-
Dapita ang mga bata sa pagbasa sa Mateo 26:36–42, nga mangita sa mga pulong nga naghulagway sa unsay gibati ni Jesus sa Getsemani. Unsa ang gisinati ni Jesus nga nakapahimo Kaniya nga mobati niini? Hatagi ang mga bata og oportunidad sa pagpaambit sa ilang mga pagbati mahitungod ni Jesus ug sa Iyang sakripisyo alang kanato.
-
Dapita ang mga bata sa pagpaambit og panahon nga naguol sila o anaa sa kasakit. Pangutan-a sila kon nakaila ba sila og tawo kinsa mibati sa samang butang. Ipasabut nga sa Getsemani, gibati ni Jesus ang tanang kasakit ug kagul-anan nga sukad nabati sa tanang tawo. Gibuhat Niya kini aron makahupay Siya kanato kon magkinahanglan kita niini (tan-awa sa Alma 7:11–12).
-
Hatagi ang usa ka bata og lipak nga mas taas kay sa gilapdon sa pultahan sa classroom, ug hangyoa siya sa paggunit niini nga pinababag ug mosulay sa paglakaw agi sa pultahan. Ipasabut nga ang lipak nagrepresentar sa atong mga sala, nga makapugong kanato sa pagsulod sa gingharian sa Dios. Kuhaa ang lipak aron sa pagpakita nga gikuha ni Jesus diha Kaniya ang atong mga sala aron mapasaylo kita kon maghinulsol kita.
Makasunod ako sa ehemplo ni Jesus pinaagi sa pagkahimong masulundon sa Langitnong Amahan.
Mipakita si Jesus og pagkamasulundon sa Amahan sa dihang miingon Siya, “Dili ang akong pagbuot maoy matuman kondili ang imo” (Lucas 22:42). Unsaon nimo pagtabang ang mga bata nga makat-on sa ehemplo ni Jesus?
Posible nga mga Kalihokan
-
Sag-uloha uban sa mga bata ang mga pulong nga “Dili ang akong pagbuot maoy matuman kondili ang imo” (Lucas 22:42) ug hisguti kon unsay gipasabut niini. Unsa ang atong mabuhat aron masunod ang kabubut-on sa Langitnong Amahan?
-
Tabangi ang mga bata sa pag-ila sa pipila ka mga sugo nga ila nang gisunod. Pangutana: Unsa nga mga panalangin ang imong nadawat pinaagi sa pagkamasulundon ngadto sa Langitnong Amahan, bisan kon lisud kini? Dayon dapita sila sa pagpaambit sa ilang mga kasinatian ug mga pagpamatuod.
Makadawat ako og tabang kon mag-ampo ko.
Sa dihang si Jesus nag-ampo sa Getsemani, usa ka anghel mipakita aron sa paglig-on Kaniya. Nakasabut ba ang mga bata nga imong gitudloan nga sila usab mahimong mag-ampo sa Langitnong Amahan alang sa kalig-on?
Posible nga mga Kalihokan
-
Isaysay ang istorya diha sa Lucas 22:41–43 ngadto sa mga bata (tingali pinaagi sa paggamit sa “Kapitulo 51: Jesus Nag-antus sa Tanaman sa Getsemani,” Mga Istorya sa Bag-ong Tugon, 129–32). Ipasabut nga sa dihang nag-ampo si Jesus, ang Langitnong Amahan mipadala og anghel sa paglig-on Kaniya. Kinsa ang ipadala sa Langitnong Amahan aron sa paglig-on kanato?
-
I-display ang hulagway sa anghel nga naghupay ni Kristo diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug pagpaambit og kasinatian diin imong gibati nga nalig-on sa Langitnong Amahan.
Awhaga ang Pagkat-on diha sa Panimalay
Dapita ang mga bata sa pagpaambit ngadto sa ilang mga pamilya sa unsay ilang buhaton panahon sa sakrament aron sa paghinumdom kang Jesus.
Pagpalambo sa Atong Pagtudlo
Pagpamatuod diha sa imong klase. Ang usa ka pagpamatuod mahimong sama ka yano sa “Nasayud ko nga ang Langitnong Amahan nahigugma sa matag usa kaninyo” o “Maayo ang akong bation samtang magkat-on ko mahitungod ni Jesukristo.”