Si Jesus nakig-istorya ni Pedro

Pakan-a ang Akong mga Karnero, ni Kamille Corry

Hunyo 24–30

Mateo 28; Marcos 16; Lucas 24; Juan 20–21

“Siya Nabanhaw”

Sugdi ang imong pagpangandam pinaagi sa pagbasa sa Mateo 28; Marcos 16; Lucas 24; ug Juan 20–21. Ang Dali, Sunod Kanako—Alang sa mga Indibidwal ug mga Pamilya ug kini nga outline makatabang kanimo sa pagpili og mga baruganan niini nga mga kapitulo nga makahuluganon sa mga bata sa imong klase.

Irekord ang Imong mga Impresyon

pagpaambit nga icon

Awhaga ang Pagpaambit

Ang pagkakita og hulagway makatabang sa mga bata sa paghinumdom sa mga butang nga ilang nakat-unan sa panimalay o sa ubang mga sitwasyon. Tingali mahimo nimong mapakita ang hulagway diha sa outline niini nga semanaha sa Dali, Sunod Kanako—Alang sa mga Indibidwal ug mga Pamilya ug hangyoa ang mga bata sa pagpaambit sa unsay ilang nahibaloan mahitungod sa istorya nga gipakita diha sa hulagway.

pagtudlo nga icon

Itudlo ang Doktrina

Mas Gagmay nga mga Bata

Mateo 28; Marcos 16; Lucas 24; Juan 20:1–23

Mabuhi ako pag-usab human mamatay, sama ni Jesus.

Ang Pag-ula ni Jesukristo, lakip sa Iyang Pagkabanhaw, mao ang labing importante nga panghitabo sa kasaysayan, ug mao kini ang pundasyon sa tinuohan nga Kristiyano. Samtang magbasa ka mahitungod sa Pagkabanhaw, pamalandungi kon unsaon nimo pagtabang ang mga bata sa paglig-on sa ilang pagtuo kang Jesukristo.

Posible nga mga Kalihokan

• Isaysay ang istorya sa Pagkabanhaw ni Jesus sa imong kaugalingong mga pulong. Hangyoa ang mga bata nga magpuli-puli sa pagsaysay og balik sa istorya nganha kanimo. Mahimo nimong gamiton ang “Kapitulo 54: [Si] Jesus Nabanhaw,” Mga Istorya sa Bag-ong Tugon, 139–44. Ipasabut nga sa dihang namatay si Jesus, ang Iyang espiritu mibiya sa Iyang lawas. Sa dihang nabanhaw Siya, ang Iyang espiritu ug ang Iyang lawas nahiusa pag-usab.

• Pagdapit og pipila ka mga miyembro sa ward nga molihok isip mga sundalo, mga anghel, si Maria Magdalena, si Pedro, si Juan, ang mga disipulo, ug si Tomas ug mosulti kon unsay ilang nasaksihan human sa Pagkabanhaw ni Jesus.

• Ipaambit ang imong pagpamatuod nga ang tanan mabanhaw sa umaabut. Dapita ang mga bata sa pagpaambit sa ilang mga pagpamatuod.

• Ikonsiderar ang pagkanta og dungan sa “Nabuhi ba Gayud Pag-usab si Jesus?” ug “Kon Siya Moanhi Pag-usab,” Songbook sa mga Bata, 45, 46. Hangyoa ang mga bata sa paghunahuna kon sama sa unsa kaha ang bation nga makakita sa nabanhaw nga si Jesus. Ipaambit nila ang ilang mga hunahuna diha sa klase.

Juan 20:24–29

Makabaton ako og pagtuo kang Jesukristo bisan og dili ako makakita Kaniya.

Ikonsiderar kon sa unsang paagi nimo matabangan ang mga bata nga makasabut kon unsa ang pagtuo ug unsaon nila sa pagpakita og pagtuo sa Manluluwas.

Posible nga mga Kalihokan

• I-summarize ang istorya sa kasinatian ni Tomas diha sa Juan 20:24–29. Balika unya ang istorya diha sa leksyon, apan niining higayuna hangyoa ang mga bata sa paghatag sa pipila sa mga detalye.

• Ipakita ang usa ka kahon nga adunay butang sa sulod nga dili makita sa mga bata, ug ihulagway ang butang ngadto sa mga bata. Pangutan-a sila kon motuo ba sila nga ang butang anaa gayud sa sulod sa kahon ug ngano. Dayon ipakita kanila ang butang, ug ipasabut nga ang hugot nga pagtuo mao ang pagtuo sa mga butang nga dili nato makita. Ang labing importanting pagtuo nga atong mabatunan mao ang pagtuo diha ni Jesukristo.

Si Jesus nagpakita sa mga kamot ngadto sa mga Apostoles

Tan-awa ang Akong mga Kamot, ni Jeff Ward

Juan 21:15–17

Makapakita ako sa akong gugma kang Jesus pinaagi sa pagserbisyo sa uban.

Unsaon nimo pagdasig ang mga bata nga mohigugma ug motabang niadtong naglibut kanila?

Posible nga mga Kalihokan

• Basaha ang Juan 21:15–17. Dili gusto ni Jesus nga igahin ni Pedro ang tanan niyang panahon sa pagpangisda. Hinoon, gusto Niya nga ipaambit ni Pedro ang ebanghelyo ug modapit sa tanang tawo sa pagduol ngadto Kaniya. Hatagi ang matag bata og papel nga karnero, ug hangyoa sila sa pagsulat diha niini og usa ka butang nga ilang mabuhat aron makatabang sa pagpakaon sa mga karnero ni Jesus.

• Hangyoa daan ang pipila ka mga bata sa pagpaambit sa mga butang nga ilang ginabuhat sa paghigugma ug pagserbisyo sa uban, o sa mga pamaagi nga ang uban miserbisyo kanila.

• Isulat ang ngalan sa matag bata sa imong klase diha sa mga piraso sa papel nga gigunting og porma nga karnero, ug ikatag kini nga mga karnero libut sa kwarto. (Ilakip ang mga ngalan sa mga bata kinsa dili motambong kanunay.) Dapita ang mga bata sa pagpundok sa mga karnero pinaagi sa pagpangita sa usa nga nakasulat ang ilang ngalan. Unsa ang atong mahimo aron sa pagserbisyo ni bisan kinsa nga nawala nga karnero nga atong kaila?

pagtudlo nga icon

Itudlo ang Doktrina

Mas Dagko nga mga Bata

Mateo 28; Marcos 16; Lucas 24; Juan 20:1–23

Tungod kay nabanhaw si Jesus, ang tanan mabanhaw.

Natural lamang sa mga bata nga maghunahuna kon unsay mahitabo human kita mamatay. Ikonsiderar kon unsaon nimo sa pagtudlo mahitungod sa Pagkabanhaw sa paagi nga makapalig-on sa ilang pagtuo.

Posible nga mga Kalihokan

• Dapita ang mga bata sa pagpiyong sa ilang mga mata ug sa paghanduraw nga naglingkod sila duol sa lubnganan ni Jesus samtang imong basahon ang Juan 20:1–17 o i-summarize ang istorya sa Iyang Pagkabanhaw (tan-awa usab ang “Kapitulo 54: Jesus Nabanhaw,” Mga Istorya sa Bag-ong Tugon, 139–44. Sama sa unsa kaha nga makakita sa nabanhaw nga Manluluwas?

• Hangyoa ang matag bata sa pagtuon sa kasinatian sa usa ka tawo kinsa nakakita sa nabanhaw nga Manluluwas ug sa pagpaambit diha sa klase kon unsay iyang nakat-unan.

Juan 20:24–29

Makabaton ako og pagtuo kang Jesukristo bisan og dili ako makakita Kaniya.

Unsa ang gibuhat sa mga bata nga imong gitudloan aron sa paglig-on sa ilang pagtuo diha ni Jesukristo? Unsaon nimo pagtabang kanila?

Posible nga mga Kalihokan

• Dapita ang pipila ka estudyante nga magpuli-puli sa pagbasa sa mga bersikulo diha sa Juan 20:24–29.

• Isulat ang matag pulong sa “Dalaygon kadtong wala managpakakita, ngani nanagpanoo” sa managlahi nga mga piraso sa papel. Dapita ang mga bata sa pagbutang sa mga pulong diha sa tukma nga han-ay. Dapita sila sa pagsulti og mga kasinatian diin gibati nila ang gugma sa Manluluwas bisan kon wala sila makakita Kaniya.

• Dapita ang mga bata sa pagdrowing og mga hulagway sa mga butang nga ilang mahimo aron sa paglig-on sa ilang pagtuo. Samtang nagdrowing sila, ipaambit kon unsa ang imong nabuhat sa paglig-on sa imong pagtuo diha ni Jesukristo.

Juan 21:1–17

Akong mapakita ang akong gugma kang Jesus pinaagi sa pagpakaon sa Iyang mga karnero.

Ang mga bata makaimpluwensya kaayo niadtong naglibut kanila. Unsaon nimo sila sa pag-awhag nga lig-unon ang uban diha sa ebanghelyo?

Posible nga mga Kalihokan

• Sa dili pa mobasa og dungan sa Juan 21:1–17, pangutan-a ang mga bata kon nakasulay na ba sila sa pagpangisda kaniadto. Sama sa unsa kadto? Pangutana kon aduna bay nakakuha sukad og “kadaghan sa isda” (Juan 21:6).

• Basaha ang Juan 21:15–17, apan pulihi ang ngalan ni Simon sa mga ngalan sa mga bata. Kinsa ang mga karnero ni Jesus? Unsaon nato sa pagpakaon sa Iyang mga karnero?

• Pagpaambit og simple nga snack sa mga bata. Samtang nangaon sila, pangutan-a sila kon sa unsang paagi ang pagpaambit sa ebanghelyo sa usa ka tawo susama sa pagpakaon kanila.

pagkat-on nga icon

Awhaga ang Pagkat-on diha sa Panimalay

Dapita ang mga bata sa paggamit sa pahina sa kalihokan niini nga semana aron sa pagtudlo sa ilang mga pamilya mahitungod sa katapusang semana sa kinabuhi sa Manluluwas.

Pagpalambo sa Atong Pagtudlo

I-follow up ang mga pagdapit sa pagbuhat. Kon imong dapiton ang mga bata sa pagbuhat sa unsay ilang nakat-unan, i-follow up ang imong pagdapit panahon sa sunod nga klase. Nagpakita kini sa mga bata nga nagpakabana ka kon sa unsang paagi ang ebanghelyo nagpanalangin sa ilang mga kinabuhi. Samtang mopaambit sila sa ilang mga kasinatian, malig-on sila ug motabang sa usag usa sa pagsunod sa ebanghelyo.

pahina sa kalihokan: ang tanan mabanhaw