“Mayo 27–Hunyo 2. Joseph Smith—Mateo 1; Mateo 25; Marcos 12–13; Lucas 21: ‘[Moabut ang] Anak sa Tawo’” Dali, Sunod Kanako—Alang sa Primary: Bag-ong Tugon 2019 (2019)
“Mayo 27–Hunyo 2. Joseph Smith—Mateo 1; Mateo 25; Marcos 12–13; Lucas 21,” Dali, Sunod Kanako—Alang sa Primary: 2019
Ang Ikaduhang Pag-anhi, ni Harry Anderson
Mayo 27–Hunyo 2
Joseph Smith—Mateo 1; Mateo 25; Marcos 12–13; Lucas 21
“[Moabut ang] Anak sa Tawo”
Pamalandungi kon unsay kinahanglang makat-on sa mga bata nga imong gitudloan mahitungod sa Joseph Smith—Mateo 1; Mateo 25; Marcos 12–13; ug Lucas 21. Mahimo nimong mapahiangay ang mga ideya alang sa dagkong mga bata niini nga outline ngadto sa mas gagmay nga mga bata ug vice versa.
Irekord ang Imong mga Impresyon
Awhaga ang Pagpaambit
Pagpakita og hulagway nga may kalabutan sa usa sa mga istorya sa basahunon niining semanaha (sama sa hulagway sa napulo ka mga birhen gikan sa outline niini nga semana sa Dali, Sunod Kanako—Alang sa mga Indibidwal ug mga Pamilya). Hangyoa ang mga bata sa pagpaambit sa unsay ilang nahibaloan mahitungod sa istorya.
Itudlo ang Doktrina
Mas Gagmay nga mga Bata
Sa dili pa moanhi pag-usab si Jesus, ang ebanghelyo isangyaw sa tibuok kalibutan.
Miingon si Jesus nga sa dili pa Siya moanhi, ang ebanghelyo isangyaw sa tibuok kalibutan. Ang mga bata makatabang sa pagtuman niini nga panagna pinaagi sa pagpaambit sa ebanghelyo.
Posible nga mga Kalihokan
-
Pagpakita og usa ka mapa, globe, o litrato sa kalibutan (tan-awa sa Libro sa mga Hulagway sa Ebanghelyo, nu. 3) ug tabangi ang mga bata nga moingon, “Kini nga Ebanghelyo … isangyaw diha sa tibuok nga kalibutan” (Joseph Smith—Mateo 1:31). Nganong gusto man sa Dios nga ang tanan Niyang mga anak makadungog sa Iyang ebanghelyo?
-
Dapita ang mga bata sa pagmartsa nga magpundo samtang inyong kantahon og dungan ang “Gusto Ko Karon nga Mamisyonaryo” ug “Gitawag sa Pagserbisyo,” Songbook sa mga Bata, 90, 94. Dapita ang full-time o bag-ong returned missionary nga mopaambit sa ilang mga kasinatian kabahin sa pagpaambit sa ebanghelyo ug tabangi ang mga bata sa paghunahuna og mga paagi nga makapaambit sila sa ebanghelyo.
Litrato sa Maayong Kabubut-on sa NASA Johnson Space Center
Akong magamit ang mga gasa nga gihatag sa Dios kanako.
Ang gagmay nga mga bata nagdiskubre sa ilang mga gasa ug mga abilidad. Tabangi sila nga makasabut nga kini nga mga gasa ug mga abilidad nagagikan sa Langitnong Amahan.
Posible nga mga Kalihokan
-
Pagdala og pipila ka mga sinsilyo nga magamit samtang imong isaysay ang sambingay sa mga talanton [talento], nga makita sa Mateo 25:14–30. Mahimo nimong hangyoon ang tulo ka mga bata sa pagrepresentar sa tulo ka mga ulipon. Ipasabut nga sa panahon ni Jesus, ang mga talanton nagpasabut sa kwarta, apan karon ang mga talanton [talento] mahimong magpasabut sa atong mga gasa ug mga abilidad.
-
Hangyoa ang mga bata sa paghingalan sa mga paagi nga ang ilang mga ginikanan, mga igsoon, mga magtutudlo, o mga higala nakatabang kanila. Unsa nga mga abilidad ang anaa niining mga tawhana nga nakatabang kanila sa pagserbisyo sa uban?
-
Paghimo og mubo nga sulat ngadto sa mga bata nga magsulti sa matag usa kanila mahitungod sa mga gasa o mga abilidad nga imong namatikdan diha kanila. Pusta ang matag sulat nga sama sa usa ka gasa ug dapita ang mga bata sa pag-abli sa ilang “mga gasa.” Awhaga sila sa pagpalambo sa ilang mga gasa ug sa paggamit niini sa pagserbisyo sa uban.
Gusto ni Jesus nga moserbisyo ko sa uban.
Maserbisyuhan nato ang Langitnong Amahan ug si Jesukristo pinaagi sa pagserbisyo sa mga tawo libut kanato. Bisan ang gagmayng mga bata makaserbisyo sa uban.
Posible nga mga Kalihokan
-
I-summarize ang sambingay diha sa Mateo 25:34–46. Tabangi ang mga bata nga makasabut nga kon nagserbisyo kita sa uban, nagserbisyo kita ni Jesus.
-
Ipataas ang litrato sa usa ka bata sa imong klase nga dunay litrato ni Jesus nga nakatago sa luyo niini. Unsa ang atong mahimo aron sa pagserbisyo niining bataa? Tangtanga ang litrato sa bata ug ipasabut nga kon kita nagserbisyo sa usag usa, kita nagserbisyo ni Jesus.
-
Dapita ang mga bata sa pagdrowing og mga hulagway sa ilang kaugalingon nga nagserbisyo sa uban sa mga paagi nga gihulagway sa Manluluwas diha sa Mateo 25:35–36. Dapita ang ubang mga bata sa pagtag-an kon unsa ang ilang gidrowing.
-
Dapita ang mga bata sa pagpaambit og mga kasinatian sa dihang ang usa ka tawo mipakita og Kristohanong pagserbisyo ngadto kanila o sa ilang mga pamilya.
Itudlo ang Doktrina
Mas Dagko nga mga Bata
Sa dili pa moanhi pag-usab si Jesus, ang ebanghelyo isangyaw sa tibuok kalibutan.
Ang mga bata nga imong gitudloan makatabang sa pagsangyaw sa ebanghelyo sa tibuok kalibutan sa wala pa ang Ikaduhang Pag-anhi sa Manluluwas.
Posible nga mga Kalihokan
-
Dapita ang mga bata sa pagpaambit og mga panalangin nga ilang nadawat o madawat tungod kay sila mga miyembro sa Simbahan ni Kristo. Basaha og dungan ang Joseph Smith—Mateo 1:31, ug pangutan-a ang mga bata kon sa unsang paagi ang ebanghelyo makapanalangin sa mga anak sa Dios sa tibuok kalibutan.
-
Pakit-a ang mga bata og mapa sa kalibutan o sa inyong nasud, ug tabangi sila sa pag-ila sa pipila ka mga dapit diin ang usa ka sakop sa pamilya o higala misangyaw sa ebanghelyo sa pagmisyon.
-
Dapita ang pipila ka mga bata nga motungha nga andam nga magpaambit kon sa unsang paagi ang mga sakop sa ilang pamilya o ang ilang mga katigulangan gipaila sa ebanghelyo. Kon mahimo, hangyoa ang usa ka tawo sa ward nga nakaserbisyo og full-time nga misyon sa pagpaambit og kasinatian sa pagpaambit sa ebanghelyo.
-
Hangyoa ang matag bata sa pagsulat sa ngalan sa usa ka tawo nga mahimo niyang istoryahan mahitungod sa ebanghelyo o dapiton sa simbahan. Hangyoa usab ang mga bata sa paglista sa mga butang nga ilang mabuhat aron mahimong mga misyonaryo karon.
Responsable ko sa kaugalingon nakong pagkakabig sa ebanghelyo.
Ang sambingay sa napulo ka dalagang birhen nagtudlo nga dili nato mahulaman ang atong pagkakabig sa ebanghelyo gikan sa uban. Unsaon nimo pagtabang ang mga bata nga angkunon ang responsibilidad sa ilang kaugalingong pagkakabig?
Posible nga mga Kalihokan
-
Hangyoa ang usa ka bata ug usa sa iyang mga ginikanan nga motungha nga andam nga mopaambit kon sa unsang paagi sila nakat-on mahitungod sa sambingay sa napulo ka dalagang birhen diha sa panimalay niining semanaha.
-
Pagdrowing og lamparilya diha sa pisara, ug sulati kini og pagpamatuod. Hatagi ang matag bata og piraso sa papel nga giporma og tinulo sa lana, ug hangyoa ang matag bata sa pagsulat niini og usa ka butang nga iyang buhaton aron mahimong mas nakabig sa ebanghelyo. Ipapilit ang ilang mga tulo diha sa pisara libut sa lampara.
-
Dapita ang mga bata sa pagtabang kanimo sa paghimo og lista sa mga butang nga buhaton aron mangandam alang sa usa ka espesyal nga bisita. Sa unsang paagi kini nga mga butang susama o lahi sa mga paagi nga mahimo kitang mangandam sa espiritwal nga paagi alang sa Ikaduhang Pag-anhi sa Manluluwas?
-
Sa lima ka mga ginunting nga papel, pagsulat og mga butang nga dili mahimong hulaman. Sa laing lima ka mga ginunting nga papel, pagsulat og mga butang nga mahimong mahulaman. Saksaka ang mga gilis, ug hangyoa ang mga bata sa paghan-ay niini ngadto sa duha ka grupo. Basaha og dungan ang Mateo 25:1–13. Nganong importante man nga dili magsalig sa uban alang sa atong pagkakabig sa ebanghelyo?
Sa Katapusang Paghukom, atong subayon ang atong kinabuhi ngadto sa Ginoo.
Human sa Pagkabanhaw, ang Dios mohukom kanato base sa atong pagkamasulundon sa Iyang mga sugo ug pagdawat sa maulaong sakripisyo sa Manluluwas. Ang sambingay sa mga talanton ug ang sambingay sa mga karnero ug mga kanding nagtudlo kanato mahitungod niining Katapusan nga Paghukom.
Posible nga mga Kalihokan
-
Dapita ang katunga sa klase sa pagbasa sa Mateo 25:14–30 ug ang laing katunga sa pagbasa sa Mateo 25:31–46. Hangyoa ang mga grupo nga i-aksyon ang mga sambingay diha sa klase.
-
Dapita ang mga bata sa pagbasa sa Mateo 25:35–36 nga magpares ug sa paghimo og lista sa mga butang nga ilang mahimo aron sa pagpakita sa ilang gugma alang ni Jesukristo.
Awhaga ang Pagkat-on diha sa Panimalay
Hangyoa ang mga bata sa pagpaambit ngadto sa ilang mga pamilya sa mga paagi nga mahimo silang mas maayo nga mga misyonaryo ug sa pakig-istorya sa ilang mga pamilya mahitungod sa mga tawo nga mahimo nilang paambitan sa ebanghelyo.
Pagpalambo sa Atong Pagtudlo
Paminawon o i-aksyon ang usa ka istorya. Tungod kay ang mga bata ganahan og mga istorya, pangita og mga paagi nga maapil sila diha sa mga istorya sa kasulatan nga imong ipaambit. Mahimo silang maghupot og mga litrato o mga butang, modrowing og mga hulagway sa istorya, i-aksyon ang istorya, o motabang sa pagsaysay sa istorya. Balika ang mga istorya aron sa pagtabang kanila sa pag-ila sa importanting mga detalye ug mga pagtulun-an sa ebanghelyo.