« ថ្ងៃទី ២០–២៦ ខែ កញ្ញា ។ គោលលទ្ធិ និង សេចក្តីសញ្ញា ១០៦–១០៨ ៖ ‹ ដើម្បីស្ថានសួគ៌បានបើកចំហ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ២០–២៦ ខែ កញ្ញា ។ គោលលទ្ធិ និង សេចក្ដីសញ្ញា ១០៦–១០៨ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១

រូបភាព

ព្រះអាទិត្យរះតាមពពក

ថ្ងៃទី ២០–២៦ ខែ កញ្ញា

គោលលទ្ធិ និង សេចក្តីសញ្ញា ១០៦–១០៨

« ដើម្បីស្ថានសួគ៌បានបើកចំហ »

អែលឌើរ អូលីសេស សូរ៉េស បានបង្រៀនថា « យើងត្រូវរស់នៅជាប់នឹង [ ព្រះអង្គសង្គ្រោះ ] យើងត្រូវស្រាវជ្រាវក្នុងព្រះគម្ពីរ រីករាយនឹងបទគម្ពីរ រៀនគោលលទ្ធិទ្រង់ ហើយព្យាយាមរស់នៅតាមរបៀបដែលទ្រង់បានរស់នៅ » ( « តើខ្ញុំអាចយល់យ៉ាងដូចម្តេច? » Ensign ឬ Liahona ខែ ឧសភា ឆ្នាំ ២០១៩ ទំព័រ ៧ ) ។ នៅពេលបងប្អូនស្រាវជ្រាវនៅក្នុង គោលលទ្ធិ និង សេចក្ដីសញ្ញា ១០៦–១០៨ សូមកត់ត្រាអំពីរបៀបដែលបងប្អូនព្យាយាមរស់នៅតាមសេចក្តីពិតដែលបងប្អូនរកឃើញ ។

កត់ត្រាចំណាប់អារម្មណ៍របស់បងប្អូន

បើមើលមួយភ្លែត គោលលទ្ធិ និង សេចក្តីសញ្ញា ១០៧ ហាក់បីដូចជានិយាយតែអំពីការរៀបចំតំណែងបព្វជិតភាព ទៅជារចនាសម្ព័នភាពជាអ្នកនាំ សម្រាប់សាសនាចក្ររបស់ព្រះអម្ចាស់ប៉ុណ្ណោះ ។ ប្រាកដណាស់ដល់ពេលដែលវិវរណៈត្រូវបានបោះពុម្ព សមាជិកភាពសាសនាចក្រមានចំនួនលើសពីសមត្ថភាពថ្នាក់ដឹកនាំ ដែលមានតែពីរបីនាក់ ។ ដូច្នេះការបែងចែកតួនាទី និងការទទួលខុសត្រូវនានានៃគណៈប្រធានទីមួយ កូរ៉ុមនៃពួកដប់ពីរនាក់ ពួកចិតសិបនាក់ ប៊ីស្សព និងគណៈប្រធានកូរ៉ុមគឺពិតជាសំខាន់ និងចាំបាច់ណាស់ ។ ប៉ុន្តែមានការណែនាំពីព្រះបន្ថែមទៀតកាន់តែច្រើននៅក្នុង កណ្ឌទី ១០៧ ជាជាងគ្រាន់តែការរៀបចំតំណែងបព្វជិតភាព និងកូរ៉ុម ។ ទីនោះព្រះអម្ចាស់បានបង្រៀនយើងអំពីរបៀបរៀបរយនៃបព្វជិតភាពពីបុរាណនៅក្នង « សម័យលោកអ័ដាម » ( ខទី ៤១ ) ។ គោលបំណងរបស់វាចាប់តាំងពីដើមដំបូងមក គឺដើម្បីធ្វើឲ្យបុត្រាបុត្រីរបស់ព្រះមានលទ្ធភាព—រួមទាំងបងប្អូនផងដែរ—អាចទទួលពិធីបរិសុទ្ធនៃសេចក្តីសង្គ្រោះនៃដំណឹងល្អ ហើយមានអំណរចំពោះ « អស់ទាំងព្រះពរខាងវិញ្ញាណនៅក្នុងសាសនាចក្រ—ដើម្បីមានឯកសិទ្ធិក្នុងការទទួលសេចក្តីអាថ៌កំបាំងទាំងឡាយនៃស្ថានសួគ៌ [ និង ] ដើម្បីឲ្យស្ថានសួគ៌បានបើកចំហចំពោះពួកគេ » ( ខទី ១៨–១៩ ) ។

សូមមើល « Restoring the Ancient Order » Revelations in Context ទំព័រ ២០៨–១២ ។

រូបភាព

រូបសញ្ញាការសិក្សាផ្ទាល់ខ្លួន

យោបល់សម្រាប់ការសិក្សាព្រះគម្ពីរផ្ទាល់ខ្លួន

គោលលទ្ធិ និង សេចក្តីសញ្ញា ១០៦; ១០៨

ព្រះអម្ចាស់ណែនាំលើកទឹកចិត្តគាំទ្រអ្នកទាំងឡាយ ដែលទ្រង់បានហៅឲ្យបម្រើ ។

នៅក្នុង គោលលទ្ធិ និង សេចក្ដីសញ្ញា ១០៦ និង ១០៨ ព្រះអម្ចាស់បានផ្តល់ដំបូន្មាន និងសេចក្តីសន្យាដល់សមាជិកពីរនាក់ ដែលបានហៅបម្រើនៅក្នុងសាសនាចក្រ ។ តើឃ្លាអ្វីនៅក្នុងវិវរណៈទាំងនេះដែលផ្តល់ជាការលើកទឹកចិត្ត និងការយល់ដឹងអំពីការបម្រើរបស់បងប្អូនផ្ទាល់នៅក្នុងនគររបស់ព្រះ ? នេះគឺជាឃ្លាពីរដែលអាចពិចារណា ៖

តើបងប្អូនធ្លាប់ទទួល « ព្រះគុណ និងការបញ្ជាក់ » ដើម្បីអាច « ឈរមាំមួន » ឬទេ ? ( គោលលទ្ធិ និង សេចក្តីសញ្ញា ១០៦:៨ ) ។
តើបងប្អូនអាច « ប្រយ័ត្នពីពេលនេះតទៅក្នុងការគោរពតាមសម្បថទាំងឡាយ » ឬសេចក្តីសញ្ញាតាមរបៀបណា ? ( គោលលទ្ធិ និង សេចក្ដីសញ្ញា ១០៨:៣ ) ។

តើឃ្លាដទៃទៀតដកស្រង់ចេញពី កណ្ឌ ទី១០៦ និង ១០៨ មានអត្ថន័យយ៉ាងណាខ្លះចំពោះបងប្អូន ?

សូមមើលផងដែរ រ័សុល អិម ណិលសុន « ការងារបម្រើដោយព្រះចេស្ដា និងសិទ្ធិអំណាចពីព្រះ » Ensign ឬ Liahona ខែ ឧសភា ឆ្នាំ ២០១៨ ទំព័រ ៦៨–៧៥; Warren Cowdery » Revelations in Context ទំព័រ ២១៩–២៣; « ‘Wrought Upon’ to Seek a Revelation » Revelations in Context ទំព័រ ២៤៤–២៨ ។

គោលលទ្ធិ និង សេចក្តីសញ្ញា ១០៧

ព្រះអម្ចាស់ដឹកនាំសាសនាចក្ររបស់ទ្រង់តាមរយៈសិទ្ធិអំណាចបព្វជិតភាព ។

ដូចដែលបងប្អូនបានសិក្សារួចមកហើយអំពីការស្តារឡើងវិញនៃដំណឹងល្អ បងប្អូនប្រហែលជាកត់សម្គាល់ឃើញថា តាមធម្មតាព្រះអម្ចាស់មិនពន្យល់គោលលទ្ធិពេញលេញនៅក្នុងវិវរណៈតែមួយនោះទេ ។ ផ្ទុយទៅវិញទ្រង់បើកសម្តែងការណ៍ទាំងឡាយ « មួយបន្ទាត់ម្តងៗ » ( គោលលទ្ធិ និងសេចក្ដីសញ្ញា ៩៨:១២ ) តម្រូវទៅតាមកាលៈទេសៈ ។ ទោះជាព្រះអម្ចាស់បានប្រទានការណែនាំអំពីបព្វជិតភាពនៅដើមឆ្នាំ ១៨២៩ ( សូមមើល ឧទាហរណ៍ កណ្ឌទី២០ និង ៨៤ ) ទ្រង់បានប្រទានការណែនាំបន្ថែមទៀតទៅកាន់ពួកបរិសុទ្ធនៅក្នុងឆ្នាំ ១៨៣៥ អំពីតំណែងជាក់លាក់នៃបព្វជិតភាពដែលចាំបាច់ដើម្បីគ្រប់គ្រង និងដឹកនាំចំនួនសមាជិកដែលកំពុងរីកចម្រើនរបស់ទ្រង់ ។

នៅពេលបងប្អូនអានអំពីតំណែងទាំងឡាយនៃបព្វជិតភាពខាងក្រោមសូមពិចារណាអំពីរបៀបដែលបងប្អូនអាចលើកស្ទួយអស់បងប្អូនដែលកំពុងបម្រើនៅក្នុងការហៅទាំងនេះតាមរយៈ « សេចក្តីទុកចិត្តសេចក្តីជំនឿ និងសេចក្តី អធិស្ឋាន [ ទាំងឡាយ ] » របស់បងប្អូន ( គោលលទ្ធិ និង សេចក្តីសញ្ញា ១០៧:២២ ) ។

គណៈប្រធានទីមួយ និង ប្រធានសាសនាចក្រ ( ខទី ៩, ២១–២២, ៦៥–៦៦, ៩១–៩២ )
ពួកសាវកដប់ពីរនាក់ ( ខទី ២៣–២៤, ៣៣–៣៥, ៣៨, ៥៨ )
ពួកចិតសិបនាក់ ( ខទី ២៥–២៦, ៣៤, ៩៣–៩៧ )
ប៊ីស្សព ( ខទី ១៣–១៧, ៦៨–៧៦, ៨៧–៨៨ )

គោលលទ្ធិ និង សេចក្តីសញ្ញា ១០៧:១–២០

ពិធីបរិសុទ្ធបព្វជិតភាពប្រទានពរជ័យខាងវិញ្ញាណ និងខាងសាច់ឈាមដល់បុត្រាបុត្រីទាំងអស់របស់ព្រះវរបិតាសួគ៌ ។

អែលឌើរ នែល អិល អាន់ឌើរសិន បានបង្រៀនថា « បព្វជិតភាពគឺជាអំណាច និងសិទ្ធិអំណាចដែលព្រះប្រទានសម្រាប់សេចក្ដីសង្គ្រោះ និងពរជ័យដល់មនុស្សទាំងពួង—ទាំងបុរស ស្ត្រី និងកុមារ ។ … ដរាបណាយើងមានភាពស័ក្តិសម នោះពិធីបរិសុទ្ធនៃបព្វជិតភាពនឹងពង្រីកចម្រើនជីវិតរស់នៅលើផែនដីរបស់យើង និងរៀបចំយើងសម្រាប់ការសន្យាដ៏ប្រសើរលើសលុបនាពិភពខាងមុខ » ( « Power in the Priesthood » Ensign ឬ Liahona ខែ វិច្ឆិកា ឆ្នាំ ២០១៣ ទំព័រ ៩២ ) ។ នៅពេលបងប្អូនអាន គោលលទ្ធិ និង សេចក្តីសញ្ញា ១០៧:១–២០ ( សូមមើល ជាពិសេសក្នុង ខទី ១៨–២០ ) និងសារលិខិតមកពីអែលឌើរ អាន់ឌើរសិនទាំងស្រុងសូមពិរចារណាកត់ត្រាចំណាប់អារម្មណ៍ដែលបងប្អូនបានទទួល អំពីរបៀបដែលព្រះចេស្តានៃព្រះពង្រីកជីវិតរបស់បងប្អូននៅលើផែនដី និងការរៀបចំខ្លួនបងប្អូនដើម្បីទទួលភាពអស់កល្បជានិច្ច ។ តើបងប្អូននឹងធ្វើអ្វីខ្លះដើម្បីកាន់តែទទួលបានពរជ័យពេញលេញ—និងជួយអ្នកដទៃឲ្យទទួលបានពរជ័យទាំងនេះដែរ ?

សូមមើលផងដែរ គោលលទ្ធិ និង សេចក្តីសញ្ញា ៨៤:១៩–២៧ ដាល្លិន អេក អូក « កូនសោ និង សិទ្ធិអំណាចនៃបព្វជិតភាព » Ensignឬ Liahonaខែ ឧសភា ឆ្នាំ ២០២០ ទំព័រ ៦៩–៧២ ) ។

គោលលទ្ធិ និង សេចក្ដីសញ្ញា ១០៧:៤១–៥៧

បព្វជិតភាពផ្តល់ពរជ័យដល់ក្រុមគ្រួសារ ។

អ័ដាមចង់ឲ្យកូនចៅជំនាន់ក្រោយរបស់លោក មានពរតាមរយៈបព្វជិតភាព ។ តើលោកបានទទួលការសន្យាអ្វីខ្លះ ? ( សូមមើល ខទី ៤២, ៥៥ ) ។ នៅពេលបងប្អូនអានអំពីអ្វីដែលអ័ដាមបានធ្វើ សូមពិចារណាអំពីបំណងប្រាថ្នាផ្ទាល់ខ្លួនរបស់បងប្អូន ដែលចង់ឲ្យក្រុមគ្រួសាររបស់បងប្អូនរីករាយនឹងពរជ័យនៃបព្វជិតភាព ។ តើបងប្អូនត្រូវបានបំផុសគំនិតឲ្យធ្វើអ្វីខ្លះដើម្បីជួយក្រុមគ្រួសាររបស់បងប្អូនឲ្យទទួលពរជ័យទាំងនេះ ?

អ័ដាមប្រទានពរដល់កូនចៅជំនាន់ក្រោយរបស់លោក ដោយ ក្លាកខេលី ប្រាយ

រូបភាព

រូបសញ្ញាការសិក្សាជាគ្រួសារ

យោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

គោលលទ្ធិ និង សេចក្ដីសញ្ញា ១០៦:៦ ។តើគ្រួសារយើងអាចធ្វើអ្វីខ្លះដើម្បីនាំឲ្យមាន « សេចក្តីអំណរនៅស្ថានសួគ៌ » ?

គោលលទ្ធិ និង សេចក្ដីសញ្ញា ១០៧:២២ ។តើយើងត្រូវធ្វើអ្វីខ្លះដើម្បីលើកស្ទួយថ្នាក់ដឹកនាំរបស់យើង « ដោយ…សេចក្តីទុកចិត្តសេចក្តីជំនឿ និងសេចក្តីអធិស្ឋាន » ?

គោលលទ្ធិ និង សេចក្ដីសញ្ញា ១០៧:២៧–៣១, ៨៥ ។គោលការណ៍ដែលណែនាំក្រុមប្រឹក្សាសាសនាចក្រក៏អាចជួយយើងឲ្យប្រឹក្សាជាមួយគ្នាជាលក្ខណៈគ្រួសារផងដែរ ។ តើគោលការណ៍អ្វីខ្លះ ក្នុងខគម្ពីរទាំងនេះដែលយើងអាចអនុវត្តចំពោះក្រុមប្រឹក្សាគ្រួសាររបស់យើង ? ( សូមមើល អិម រ័សុល បាឡឺដ « Family Councils » Ensign ឬ Liahona ខែ ឧសភា ឆ្នាំ ២០១៦ ទំព័រ ៦៣–៦៥ ) ។

គោលលទ្ធិ និង សេចក្ដីសញ្ញា ១០៧:៩៩–១០០ ។សូមឲ្យសមាជិកគ្រួសារម្នាក់សរសេរការណែនាំ សម្រាប់កិច្ចការផ្ទះទាំងមូល ហើយអញ្ជើញគាត់ឲ្យជ្រើសរើសពីរបៀបដែលយើងធ្វើកិច្ចការនោះ ៖ ដោយឧស្សាហ៍ព្យាយាម ដោយខ្ជិលច្រអូស ឬដោយមិនបាច់អានការណែនាំ ។ សូមឲ្យសមាជិកគ្រួសារទាំងមូលមើលគាត់ធ្វើកិច្ចការនោះ ហើយទស្សន៍ទាយថាតើគំរូណាដែលសមាជិកគ្រួសារជ្រើសរើស ។ បន្ទាប់មកឲ្យសមាជិកគ្រួសារដទៃទៀតសម្តែងម្តង ។ ហេតុអ្វីព្រះអម្ចាស់សព្វព្រះទ័យឲ្យយើងរៀនទាំងកាតព្វកិច្ចរបស់យើង និងទាំងធ្វើវាដោយឧស្សាហ៍អស់ពីចិត្ត ? ( សូមមើល ប៊េគី ក្រេវិន « Careful versus Casual » Ensign ឬ Liahona ខែ ឧសភា ឆ្នាំ ២០១៩ ទំព័រ ៩–១១ ) ។

គោលលទ្ធិ និង សេចក្តីសញ្ញា ១០៨:៧ ។តើយើងអាចពង្រឹងគ្នាទៅវិញទៅមកនៅក្នុងការសន្ទនារបស់យើងដោយរបៀបណា ? ក្នងការអធិស្ឋានរបស់យើង ? ក្នុងការលើកតម្កើងឬការលើកទឹកចិត្ត ? និងក្នុងអ្វីគ្រប់យ៉ាងរបស់យើងតាមរបៀបណា ? បងប្អូនអាចជ្រើសរើសកិច្ចការមួយក្នុងចំណោមនោះដើម្បីធ្វើការជាលក្ខណៈគ្រួសារ ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនប្រចាំសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលបានផ្តល់យោបល់ ៖ « ចូរមកស្តាប់សំឡេងព្យាការី » ទំនុកតម្កើង ល.រ. ១២ ។

ការកែលម្អការសិក្សាផ្ទាល់ខ្លួន

សូមកត់ត្រាចំណាប់អារម្មណ៍នានា ។ នៅពេលចំណាប់អារម្មណ៍ខាងវិញ្ញាណឬការយល់ដឹងកើតមានឡើង សូមកត់ត្រាវាទុក ។ នៅពេលបងប្អូនធ្វើដូច្នេះ បងប្អូនបង្ហាញព្រះអម្ចាស់ថា បងប្អូនឲ្យតម្លៃលើការណែនាំរបស់ទ្រង់ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១២, ៣០ ) ។