ប្រុងប្រយ័ត្នផ្ទុយនឹងមិនយកចិត្តទុកដាក់
កាលដែលឥទ្ធិពលនៃពិភពលោកកាន់តែឱបក្រសោបអំពើអាក្រក់ នោះយើងត្រូវតែខិតខំដោយឧស្សាហ៍ ដើម្បីរឹងមាំនៅលើផ្លូវដែលនាំយើងទៅកាន់ព្រះអង្គសង្គ្រោះដោយសុវត្ថិភាព ។
មានម្ដងនោះខ្ញុំឃើញផ្លាកមួយបិទនៅបង្អួចហាងសរសេរថា « សុភមង្គលតម្លៃ ១៥ ដុល្លារ » ។ ខ្ញុំចង់ដឹងថា តើខ្ញុំអាចទិញបានសុភមង្គលច្រើនប៉ុណ្ណា នឹងប្រាក់ ១៥ ដុល្លារ ខ្ញុំក៏ បានចូលមើលហាងនោះ ។ ទំនិញដែលខ្ញុំបានឃើញគឺជាគ្រឿងអលង្ការ និងវត្ថុអនុស្សាវរីយ៍ថោកៗ—គ្មានរបស់ណាមួយដែលខ្ញុំបានឃើញអាចនាំឲ្យខ្ញុំមានសុភមង្គលដូចដែលផ្លាកនោះបានបង្ហាញប្រាប់នោះទេ ! ប៉ុន្មានឆ្នាំមកនេះខ្ញុំបានគិតច្រើនដងពីផ្លាកនោះ តើវាងាយស្រួលយ៉ាងណា ដើម្បីស្វែងរកសុភមង្គលនៅក្នុងទំនិញដែលថោក ឬបណ្តោះអាសន្ននោះ ។ ក្នុងនាមជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងបានទទួលពរដោយដឹងពីរបៀប និងកន្លែងដែលមានសុភមង្គលពិត ។ វាមាននៅក្នុងការរស់នៅដោយប្រុងប្រយ័ត្នតាមដំណឹងល្អដែលបានស្ថាបនាដោយព្រះអម្ចាស់ និងព្រះអង្គសង្រ្គោះរបស់យើងគឺព្រះយេស៊ូវគ្រីស្ទ និងក្នុងការខិតខំ ដើម្បីក្លាយកាន់តែដូចជាទ្រង់ ។
យើងមានមិត្តសំណព្វម្នាក់ជាវិស្វកររថភ្លើង ។ ថ្ងៃមួយពេលគាត់កំពុងបើករថភ្លើងលើផ្លូវ ស្រាប់តែគាត់ប្រទះឃើញឡានមួយឈប់នៅលើផ្លូវដែកនោះពីមុខគាត់ ។ គាត់ដឹងភ្លាមៗថា រថយន្តនេះបានជាប់គាំង មិនអាចឆ្លងផ្លូវបាន ។ ភ្លាមៗនោះគាត់បានដាក់សញ្ញារថភ្លើងប្រកាសអាសន្ន បានភ្ជាប់ហ្វ្រាំងទៅនឹងទូនីមួយៗ ដែលមានប្រវែង( ១.២ គ.ម ) នៅពីក្រោយក្បាលម៉ាស៊ីនដែលផ្ទុកទម្ងន់ ៦៥០០ តោន (៥៨៩៧ មេត្រិចតោន ) ។ វាពិតមែន គ្មានអ្វីអាចបញ្ឈប់រថភ្លើងមិនឲ្យវាបុករថយន្តនោះបានទេ ។ សំណាងល្អមនុស្សនៅក្នុងឡានបានឮសំឡេងរថភ្លើងព្រមាន ក៏បានរត់ចេញពីឡានមុនពេលរថភ្លើងបុក ។ នៅពេលវិស្វករនិយាយជាមួយប៉ូលីសស៊ើបអង្កេត ស្ត្រីខឹងម្នាក់បានទៅជួបពួកគេ ។ នាងបានស្រែកថា នាងឃើញឧប្បទ្ទវហេតុទាំងអស់ រួចធ្វើសាក្សីថា វិស្វកររូបនោះមិនបានព្យាយាមកាច់ចេញពីផ្លូវកុំឲ្យបុកឡាននោះ សូម្បីតែបន្ដិចឡើយ !
ជាក់ស្តែងណាស់បើវិស្វករនោះអាចកាច់ចេញពីផ្លូវ ដើម្បីចៀសវាងគ្រោះថ្នាក់ចរាចរណ៍ នោះគាត់នឹងរថភ្លើងទាំងមូលនឹងត្រូវធ្លាក់ចេញពីផ្លូវ ហើយល្បឿនសន្ទុះរថភ្លើងត្រូវបញ្ឈប់យ៉ាងគំហុក ។ សំណាងល្អ ផ្លូវដែកដែលរថភ្លើងគាត់រត់នោះ បានទប់កង់រថភ្លើងយ៉ាងជាប់ឆ្ពោះទៅរកទិសដៅរបស់ខ្លួនដោយមិនគិតពីឧបសគ្គតាមផ្លូវនោះទេ ។ ឯយើងវិញក៏មានសំណាងល្អស្ថិតនៅលើផ្លូវមួយ ជាផ្លូវនៃសេចក្ដីសញ្ញាដែលយើងបានប្តេជ្ញាចិត្តដើរតាម នៅពេលយើងទទួលបុណ្យជ្រមុជទឹកជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ថ្វីបើយើងអាចជួបឧបសគ្គម្ដងម្កាលនៅតាមផ្លូវក៏ដោយ ក៏ផ្លូវនេះនឹងជួយយើងឆ្ពោះទៅរកទិសដៅដ៏អស់កល្បដ៏មានតម្លៃរបស់យើងដែរ បើយើងស្ថិតនៅដោយមុតមាំនោះ ។
ការនិមិត្តពីដើមជីវិតបង្ហាញដល់យើងពីផលប៉ះពាល់នៃការមិនយកចិត្តទុកដាក់អាចនាំយើងចេញពីផ្លូវនៃសេចក្ដីសញ្ញា ។ សូមពិចារណាថា ដំបងដែក និងផ្លូវត្រង់ចង្អៀត ឬផ្លូវសេចក្ដីសញ្ញាដឹកនាំដោយផ្ទាល់ ទៅដើមជីវិត និងទីដែលពរជ័យទាំងឡាយដែលព្រះអង្គសង្គ្រោះ និងដង្វាយធួនរបស់ទ្រង់គឺប្រទានឲ្យដល់ពួកអ្នកស្មោះត្រង់ ។ ដូចឃើញនៅក្នុងការនិមិត្តផងដែរថា មានទន្លេទឹក ជាតំណាងឲ្យភាពកខ្វក់នៃពិភពលោក ។ ព្រះគម្ពីរពិពណ៌នាថា ទន្លេនេះ « ហូរតាមបណ្តោយ » ផ្លូវ « ជិតនឹង » ដើមជីវិត ប៉ុន្ដែវាមិននាំទៅកាន់ដើមជីវិតឡើយ ។ ពិភពលោកត្រូវបានផ្ទុកដោយការរំខានដែលអាចបញ្ឆោតដល់ពួកអ្នករើសតាំង បណ្តាលឲ្យពួកគេមិនយកចិត្តទុកដាក់ក្នុងការរស់នៅតាមសេចក្ដីសញ្ញារបស់ពួកគេ—ដូច្នេះវានាំពួកគេទៅជិតដើមឈើ ប៉ុន្តែមិនទៅកាន់វាឡើយ ។ បើយើងមិនប្រុងប្រយ័ត្នក្នុងការរស់នៅតាមសេចក្ដីសញ្ញារបស់យើងដោយត្រឹមត្រូវទេ នោះកិច្ចប្រឹងប្រែងធម្មតារបស់យើងអាចនាំយើងធ្លាក់ទៅក្នុងផ្លូវហាមឃាត់ ឬចូលរួមជាមួយនឹងអ្នកដែលបានចូលអាគារដ៏ធំហើយទូលាយ ។ បើមិនប្រុងប្រយ័ត្នទេ យើងអាចលង់ទឹកក្នុងជម្រៅនៃទន្លេដែលកខ្វក់នោះ ។១
មានរបៀបប្រុងប្រយ័ត្ន និងរបៀបមិនយកចិត្តទុកដាក់ក្នុងការធ្វើអ្វីគ្រប់យ៉ាង រួមទាំងការរស់នៅតាមដំណឹងល្អផងដែរ ។ នៅពេលយើងគិតពីការប្តេជ្ញាចិត្តរបស់យើងចំពោះព្រះអង្គសង្គ្រោះ តើយើងប្រុងប្រយ័ត្ន ឬមិនយកចិត្តទុកដាក់ឬទេ ? ដោយសារនិស្ស័យជីវិតរមែងស្លាប់របស់យើងតើយើងមិនដោះសារឥរិយាបថរបស់យើង ហើយជួនកាលសំដៅទៅសកម្មភាពរបស់យើងដូចជាការចូលក្នុង ភាពស្មុគស្មាញ ឬលាយអ្វីដែលល្អជាមួយនឹងអ្វីដែលមិនល្អដែរឬទេ ? គ្រប់ពេលដែលយើងនិយាយថា « លើកលែងតែ » ឬ « ប៉ុន្តែ » នៅពេលវាតម្រូវឲ្យធ្វើតាមដំបូន្មានរបស់ព្យាការីរបស់យើង ឬរស់នៅតាមដំណឹងល្អដោយប្រុងប្រយ័ត្ន នោះយើងពិតជានិយាយថា « ដំបូន្មាននោះមិនអនុវត្តចំពោះខ្ញុំទេ » ។ យើងអាចដោះសារចំពោះអ្វីដែលយើងចង់បាន ប៉ុន្តែការពិតគឺថា គ្មាន វិធីត្រឹមត្រូវណាទៅធ្វើអ្វីដែលខុសនោះឡើយ !
ប្រធានបទយុវវ័យសម្រាប់ឆ្នាំ ២០១៩ ត្រូវបានដកចេញពី យ៉ូហាន ១៤:១៥ ដែលព្រះអម្ចាស់ណែនាំថា ៖ « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ។ បើយើងស្រឡាញ់ទ្រង់ដូចដែលយើងអះអាង តើយើងមិនអាចបង្ហាញសេចក្ដីស្រឡាញ់ដោយចេះប្រុងប្រយ័ត្នបន្ថែមទៀតក្នុងការរស់នៅតាមព្រះបញ្ញត្តិរបស់ទ្រង់ទេឬ អី ?
ការប្រុងប្រយ័ត្នក្នុងការរស់នៅតាមដំណឹងល្អមិនចាំបាច់មានន័យថាជារឿងផ្លូវការ ឬតឹងរឹងទេ ។ វាមានន័យថា វាសមស្របនៅក្នុងគំនិត និងអាកប្បកិរិយារបស់យើងក្នុងនាមជាសិស្សរបស់ព្រះយេស៊ូវគ្រីស្ទ ។ នៅពេលយើងពិចារណាពីភាពខុសគ្នារវាងការប្រុងប្រយ័ត្ន និងការមិនយកចិត្តទុកដាក់នៅក្នុងការរស់នៅតាមដំណឹងល្អរបស់យើង នេះជាគំនិតមួយចំនួនដែលត្រូវពិចារណា ៖
តើយើងប្រុងប្រយ័ត្នក្នុងការថ្វាយបង្គំនៅថ្ងៃឈប់សម្រាករបស់យើង និងក្នុងការរៀបចំខ្លួនយើងដើម្បីទទួលទានសាក្រាម៉ង់រាល់សប្ដាហ៍ដែរឬទេ ?
តើយើងអាចប្រុងប្រយ័ត្នជាងមុនក្នុងការអធិស្ឋាន និងការសិក្សាព្រះគម្ពីររបស់យើង ឬចូលរួមកាន់តែសកម្មក្នុងការសិក្សាសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ដែរឬទេ ?
តើយើងប្រុងប្រយ័ត្នក្នុងការថ្វាយបង្គំក្នុងព្រះវិហារបរិសុទ្ធរបស់យើង ហើយខិតខំរស់នៅដោយប្រុងប្រយ័ត្ន និងដោយចេតនាតាមសេចក្ដីសញ្ញាដែលយើងបានធ្វើនៅពិធីបុណ្យជ្រមុជទឹកផង និងក្នុងព្រះវិហារបរិសុទ្ធផងឬទេ ? តើយើងប្រុងប្រយ័ត្នក្នុងការតុបតែងខ្លួន និងការស្លៀកពាក់របស់យើង ជាពិសេសនៅក្នុងកន្លែង និងស្ថានភាពពិសិដ្ឋដែរឬទេ ? តើយើងប្រុងប្រយ័ត្នក្នុងរបៀបដែលយើងស្លៀកសម្លៀកបំពាក់ព្រះវិហារបរិសុទ្ធដ៏ពិសិដ្ឋដែរឬទេ ? ឬក៏ម៉ូដសម្លៀកបំពាក់របស់ពិភពលោកបានកំណត់អាកប្បកិរិយា មិនយកចិត្តទុកដាក់ច្រើនជាងមុនហើយ ?
តើយើងប្រុងប្រយ័ត្នក្នុងរបៀបដែលយើងបម្រើដល់អ្នកដទៃ និងរបៀបដែលយើងបំពេញការហៅរបស់យើងនៅក្នុងសាសនាចក្រទេ ឬតើយើងព្រងើយកន្ដើយ ឬមិនយកចិត្តទុកដាក់ក្នុងការហៅបម្រើយើងដែរឬទេ ?
តើយើងប្រុងប្រយ័ត្ន ឬមិនយកចិត្តទុកដាក់នឹងអ្វីដែលយើងបានអាន និងមើលនៅលើទូរទស្សន៍ និងឧបករណ៍ចល័តរបស់យើងដែរឬទេ ? តើយើងប្រុងប្រយ័ត្នក្នុងពាក្យសំដីរបស់យើងដែរឬទេ ? ឬតើយើងឱបក្រសោបពាក្យគ្រោតគ្រាត ជេរប្រមាថដែរឬទេ ?
សៀវភៅ ដើម្បីកម្លាំងនៃយុវវ័យ មាននូវបទដ្ឋាននៅពេលអនុវត្តតាមដោយប្រុងប្រយ័ត្ន វានឹងនាំពរជ័យយ៉ាងបរិបូរណ៍ ហើយជួយយើងឲ្យស្ថិតនៅលើផ្លូវនៃសេចក្ដីសញ្ញា ។ ថ្វីបើវាត្រូវបានសរសេរសម្រាប់ជាប្រយោជន៍ដល់យុវវ័យក៏ដោយក៏បទដ្ឋានរបស់វាមិនអស់សុពលភាពដែរ នៅពេលយើងចាកចេញពីថ្នាក់យុវជន និងយុវនារីនោះ ។ វាអនុវត្តចំពោះយើងម្នាក់ៗគ្រប់ពេលវេលា ។ ការពិនិត្យមើលបទដ្ឋានទាំងនេះអាចនាំឲ្យយើងយកចិត្តទុកដាក់បន្ថែមទៀត ក្នុងការរស់នៅតាមដំណឹងល្អរបស់យើង ។
យើងមិនបន្ទាបបទដ្ឋានរបស់យើងឲ្យត្រូវតាម ឬធ្វើឲ្យអ្នកដទៃមានអារម្មណ៍កក់ក្តៅនោះទេ ។ យើងគឺជាសិស្សនៃព្រះយេស៊ូវគ្រីស្ទដូច្នេះហើយយើងគិតតែពីការលើកកម្ពស់អ្នកដទៃ លើកពួកគេឡើងទៅទីខ្ពស់ជាង ជាកន្លែងកាន់តែបរិសុទ្ធដែលពួកគេអាចទទួលបាននូវពរជ័យធំធេងផងដែរ ។
ខ្ញុំសូមអញ្ជើញបងប្អូនយើងម្នាក់ៗឲ្យស្វែងរកការណែនាំពីព្រះវិញ្ញាណបរិសុទ្ធដើម្បីដឹងថាត្រូវកែសម្រួលអ្វីដែលយើងចាំបាច់ត្រូវធ្វើឲ្យជីវិតរបស់យើងកាន់តែសមស្របតាមសេចក្ដីសញ្ញារបស់យើង ។ ខ្ញុំក៏សូមអង្វរបងប្អូនផងដែរកុំឲ្យរិះគន់អ្នកដទៃដែលធ្វើដំណើរដូចគ្នានេះ ។ « ព្រះអម្ចាស់មានព្រះបន្ទូលថាដូច្នោះ ការសងសឹកក៏ជារបស់ផងយើង » ។២ យើងម្នាក់ៗមានការលូតលាស់ និងផ្លាស់ប្តូរ ។
រឿងដែលបានប្រាប់នៅក្នុងព្រះគម្ពីរមរមនអំពីពួកអាំលីសៃ ដែលជាអ្នកក្បត់សាសនាធ្វើឲ្យខ្ញុំចាប់អារម្មណ៍ ។ ពួកគេប្រាប់អ្នកដទៃថាពួកគេលែងចូលរួមជាមួយព្រះយេស៊ូវគ្រីស្ទនិងសាសនាចក្ររបស់ទ្រង់ដោយការគូសសញ្ញាក្រហមនៅលើថ្ងាសរបស់ពួកគេ ដើម្បីឲ្យមនុស្សទាំងអស់មើលឃើញ ។៣ ផ្ទុយពីនេះ ក្នុងនាមជាសិស្សរបស់ព្រះយេស៊ូវគ្រីស្ទ តើយើងសម្គាល់ខ្លួនយើងដោយរបៀបណា ? តើអ្នកដទៃអាចងាយមើលឃើញរូបភាពរបស់ទ្រង់នៅលើផ្ទៃមុខរបស់យើង ហើយដឹងថាយើងតំណាងឲ្យនរណា តាមរបៀបដែលយើងដឹកនាំជីវិតរបស់យើងដោយប្រុងប្រយ័ត្ននេះឬទេ ?
ក្នុងនាមជាប្រជាជននៃសេចក្ដីសញ្ញា យើងមិនត្រូវលាយឡំនឹងមនុស្សដទៃឡើយ ។ យើងត្រូវបានហៅថាជាមនុស្សដែលមានលក្ខណៈពិសេស៤—នេះគឺជាការសរសើរដ៏ធំមួយ ! កាលដែលឥទ្ធិពលនៃពិភពលោកកាន់តែឱបក្រសោបអំពើអាក្រក់ នោះយើងត្រូវតែខិតខំដោយឧស្សាហ៍ ដើម្បីរឹងមាំនៅលើផ្លូវដែលនាំយើងទៅកាន់ព្រះអង្គសង្គ្រោះរបស់យើងដោយសុវត្ថិភាពដោយពង្រីកគម្លាតរវាងការរស់នៅជាមួយសេចក្ដីសញ្ញា និងឥទ្ធិពលនៃលោកិយ ។
នៅពេលខ្ញុំគិតពីការទទួលបានសុភមង្គលយូរអង្វែង ខ្ញុំដឹងថា ជួនកាលយើងរកឃើញខ្លួនយើងនៅក្នុងតំបន់ពណ៌ប្រផេះ ។ អ័ព្ទនៃសេចក្ដីងងឹតគឺមានជៀសមិនរួចទេ នៅពេលយើងធ្វើដំណើរតាមផ្លូវនៃសេចក្ដីសញ្ញា ។ ការល្បួង និងការមិនយកចិត្តទុកដាក់អាចបណ្ដាលឲ្យយើងបង្វែរទិសដៅយើងទៅក្នុងភាពងងឹតនៃពិភពលោក ហើយងាកចេញពីផ្លូវនៃសេចក្ដីសញ្ញា ។ សម្រាប់ពេលដែលការណ៍នេះអាចកើតឡើង នោះព្យាការីជាទីស្រឡាញ់របស់យើងគឺលោកប្រធានរ័សុល អិម ណិលសុន បានជំរុញយើងឲ្យត្រឡប់ទៅផ្លូវនៃសេចក្ដីសញ្ញាវិញឲ្យយ៉ាងឆាប់រហ័ស ។ ខ្ញុំមានអំណរគុណណាស់ចំពោះអំណោយនៃការប្រែចិត្ត និងអំណាចនៃដង្វាយធួនរបស់ព្រះអង្គសង្គ្រោះរបស់យើង ។
យើងមិនអាចមានជីវិតដ៏ល្អឥតខ្ចោះបានឡើយ ។ មានតែបុរសម្នាក់ប៉ុណ្ណោះដែលអាចរស់នៅយ៉ាងល្អឥតខ្ចោះ ខណៈពេលរស់នៅពិភពទេឡេស្ទាលនេះ ។ ទ្រង់គឺជាព្រះយេស៊ូវគ្រីស្ទ ។ ទោះជាយើងមិនល្អឥតខ្ចោះក្តី បងប្អូនប្រុសស្រីអើយ ក៏យើងអាចសក្ដិសមនឹងទទួលទានសាក្រាម៉ង់ សក្ដិសមនឹងពរជ័យនៃព្រះវិហារបរិសុទ្ធ ហើយសក្ដិសមដើម្បីទទួលបានវិវរណៈផ្ទាល់ខ្លួនបានដែរ ។
ស្ដេចបេនយ៉ាមីនបានថ្លែងទីបន្ទាល់អំពីពរជ័យ និងសុភមង្គលដែលកើតមានចំពោះអស់អ្នកដែលធ្វើតាមព្រះអង្គសង្គ្រោះដោយយកចិត្តទុកដាក់ ៖ « ហើយថែមទៀត ខ្ញុំចង់ឲ្យអ្នករាល់គ្នាគិតពិចារណាអំពីស្ថានភាពដ៏មានពរ និងរីករាយនៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ ។ ដ្បិតមើលចុះ ពួកគេបានពរគ្រប់យ៉ាង ទាំងខាងសាច់ឈាម និង ខាងវិញ្ញាណផង ហើយបើសិនជាពួកគេរក្សាការស្មោះត្រង់ដរាបដល់ចុងបំផុត នោះពួកគេនឹងត្រូវបានទទួលនៅស្ថានសួគ៌ ដើម្បីឲ្យពួកគេអាចរស់នៅជាមួយនឹងព្រះក្នុងស្ថានភាពសុភមង្គលដ៏មិនចេះចប់មិនចេះហើយ » ។៥
តើសុភមង្គលអាចទិញក្នុងតម្លៃ ១៥ ដុល្លារ ឬ ? ទេ មិនអាចទេ ។ សុភមង្គលដ៏ជ្រាលជ្រៅនិងយូរអង្វែងកើតមានតាមរយៈការរស់នៅដោយស្មោះត្រង់ និងការរស់នៅតាមដំណឹងល្អនៃព្រះយេស៊ូវគ្រីស្ទដោយប្រុងប្រយ័ត្ន ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។