Diumvuija ku Dipinguluja dia Buakuidi bua Melekisedeke, kudi Liz Lemon Swindle

Ngondu wa Muanda Muteketa 28–Ngondu wa Muanda Mukulu 3: Bukola bua buena Nzambi

Dilongesha ne Bipungidi 84

Katshia buakuidi buapingulujibua pa buloba mu tshidimu 1829, Bansantu ba bangabanga bavua babeneshibua ku bukola bua tshijila bua Mukalenga. Bavua batambuishibua, bajadikibua, ne babikidibua bua kusadila ku bukokeshi bua buakuidi, ba bungi amu bu mutudi lelu. Kadi kuikala ne bukola bua buakuidi katshiena tshia momumua ne ku bumvua mu kabujima, ne Nzambi udi ne bia bungi bidiye ukeba ne Bansantu Benda bumvua—nangananga ne dipinguluja dia milulu ya ku ntempelo. Dibuluila dia mu 1832 pa buakuidi, mpindiewu Dilongesha ne Bipungidi 84, dia kadiundisha lumonu lua Bansantu pa tshidi tshiumvuija buakuidi menemena. Ne bidi mua kuenza bia momumua buetu tuetu lelu. Panyima pa bionsu, kudi bintu bia bungi bia kulonga pa tshidi tshitangila bukola bua bunzambi “lusapi lua dimanya dia Nzambi,” bidi bipatula patoka “bukola bua buena Nzambi,” ne tshidi tshitulongolola bua “kumona mpala wa Nzambi, anyi Tatu, ne kushala ne moyo” (kanungu 19–22).

Ngenyi bua Kulonga mu Dîku ne mu Ekelezia

Dilongesha ne Bipungidi 84:17–32

Ndi mua kuenzela bukola bua buakuidi ne mabenesha bia Nzambi.

Pawudi wela meji pa muaku buakuidi, tshinyi tshidi tshikuluila mu meji? Mushindu kayi udi bukola bua buakuidi bua Nzambi bushintulula moyo weba?

Panyima pa dinana meji pa nkonku eyi, udi mua kulonga Dilongesha ne Bipungidi 84:17–32, ukeba tshidi Nzambi musua bua umanya pa tshidi tshitangila bukola bua buakuidi buenda. Ela meji pa mushindu uwudi mua kuenzela tunungu etu bua kumvuija buakuidi ne kipatshila kabu kudi muntu.

Tshintu tshimua tshiwudi mua kupeta tshidi ne kupitshila ku milulu ya buakuidi “bukola bua buena Nzambi budi bumueneshibua” (tangila kanungu 19–21). Ku misangu udi mua kufunda milulu ya buakuidi yiwukatu muenza (mitela mu Mukanda Munena wa Maludiki, 18.1, 18.2, udi mua kuambuluisha). Mushindu kayi udi milulu eyi—ne bipungidi bidi biyishindikija—bituala bukola bua Nzambi mu moyo weba? Ntshinyi tshivua mua kuikala moyo weba bu biobi kabiyi koku?

Mulombodi Mukulu Russell M. Nelson wakalongesha ne: “Muluma yonsu ne mukaji yonsu udi muenza bipungidi ne Nzambi ne ulama bipungidi ebi, udi ubuela ne dikumbana mu milulu ya buakuidi, udi kabidi upeta bukola bua Nzambi” (“Spiritual Treasures,” Liahona, Ngondu Dikumi ne Umua 2019, 77). Ela meji bua kulonga mukenji wa Mulombodi Mukulu Nelson, ukeba mishindu iwudi mua “kukoka bukola bua Mupandishi mu moyo weba.”

Tangila kabidi Dilongesha ne Bipungidi 25:10, 13, 15; 121:34–37, 41–46; Biena bualu ne Nkoku, “Priesthood,” “Joseph Smith’s Teachings about Priesthood, Temples, and Women,” Tshisangi tshia Lumu Luimpa; Mukanda Munena wa Maludiki, 3.6, Tshisangi tshia Lumu Luimpa.

Dilongesha ne Bipungidi 84:31–44

Buakuidi budi bupetshibua ne mutshipu ne tshipungidi.

Mutshipu ne tshipungidi bia buakuidi (tangila Dilongesha ne Bipungidi 84:31–44) bitu ne wabi ngenzedi wa pabuenda bua bana ba Tatu wa mu Diûlu badi batekibua mu mulongu wa buakuidi, kadi mabenesha a bungi a tunungu etu adi bua bana ba Nzambi bonsu. Milayi kayi, ne tshinyi tshidi Nzambi utulomba bua kuenza bua kuyipeta?

Mukulu Paul B. Pieper wakalongesha ne: “bidi bia mushinga ne mu mutshipu ne tshipungidi tshia buakuidi [tangila Dilongesha ne Bipungidi 84:31–44], Mukalenga utela miaku kupeta ne kuangata. Kena mutela muaku kujidila. Mu ntempelo ke mudi baluma ne bakaji—pamua—bapeta ne bangata mabenesha ne bukola bua buakuidi bua Alona ne bua Melekisedeke” (“Revealed Realities of Mortality,” Ensign, Ngondu wa Kumpala 2016, 21).

Pawudi ulonga Dilongesha ne Bipungidi 84:31–44, nana meji pa tshidi mua kumvuija “kupeta” ne “kuangata” buakuidi. Mushindu kayi udi dishilangana pa dijidibua mu mudimu wa buakuidi? Tshinyi tshikuabu tshidi Mukalenga ukubikila bua kuangata mu tunungu etu? Mushindu kayi uwudi utshienza?

Tshinyi tshiwudi mupeta tshidi tshikupesha meji bua kuikala mulamata bikola ku diakidila Mupandishi, Tatu wenda, bena mudimu benda, ne bukola bua buakuidi buenda?

Tangila kabidi Dilongesha ne Bipungidi 121:36–46.

Dilongesha ne Bipungidi 84:43–61

Kusomba ku dîyi dia Nzambi kudi kutuala bukenka ne bulelela mu moyo wanyi.

Malelela kayi awudi mupeta mu Dilongesha ne Bipungidi 84:43–61 adi makuambuluisha bua kumvua buatshinyi udi ujinga bua kulonga dîyi dia Nzambi misangu yonsu? Kuata dikokangana didi pankatshi pa bukenka ne mîdima mu tunungu etu; Mushindu kayi uvua “ntema yeba mikola ku mêyi a moyo wa tshiendelela” mituala bukenka, bulelela, ne “nyuma wa Yezu Kilisto” mu moyo weba? (kanungu 43, 45).

Tangila kabidi 2 Nefi 32:3.

Fuanyikija malongesha a lumu luimpa ne bintu biwudi nabi tshibidilu. Udi mua kuela meji pa tshifuanyikijidi tshidi mua kumvuija malelela mu kanungu 43–44? Tshilejilu, mushindu kayi udi kulonda bitupa bionsu bia mikenji bu mudi kusomba “mu mêyi onsu … a Nzambi”?

Fila ntema ku mêyi a moyo wa tshiendelela.

Dilongesha ne Bipungidi 84:62–91

Mukalenga neikala nanyi pandi mu mudimu wenda.

Pawudi ubala tunungu, udi mua kujandula mishindu idi Mukalenga muamba ne neakuatshisha bena mudimu benda. Mushindu kayi udi milayi eyi mua kutekibua mu tshienzedi mu mudimu Udiye mukulomba bua kuenza? Tshilejilu, mushindu kayi udi milayi mu kanungu 88 mikumbana mu moyo weba?

Dilongesha ne Bipungidi 84:106–110

Muntu yonsu udi mua kutua mpanda ku mudimu wa Nzambi.

Tshinyi tshiwudi mulonga mu tunungu etu pa tshidi tshitangila mushindu udi Mukalenga ukuata mudimu Wenda? Mubelu kayi ne mabenesha biwudi mupeta? Udi mua kuela meji pa mushindu uwuvua “mukoleshibua mu didipuekesha dionsu” bualu uvua musadila ne muntu uvua “mukolakana mu nyuma,” nansha muntu wa mu dîku dieba.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga .

Ngenyi bua Kulongesha bana

Dilongesha ne Bipungidi 84:4–5

Milulu ya ku Ntempelo idi indongolola bua kusomba kabidi ne Tatu wa mu Diûlu.

• Bua kuambuluisha bana beba bua kuya lukasa ku ntempelo, udi mua kuenza puzzle panyima pa tshimfuanyi tshia ntempelo. Muinshi mua tshipesa tshionsu udi mua kufunda tshimua tshia bintu bitudi tuenza mu ntempelo, bu mudi kuangata ditambula bua bankambua, kusuikibua pamua ne dîku dietu, ne kuenza bipungidi ne Nzambi. Bala Dilongesha ne Bipungidi 84:4–5 ne bana beba, ne balomba bua bateleja tshidi Mukalenga muambila Bansantu bua bibaka. Pawudi wewa ne bana beba nuteka puzzle pamua, abanyanganayi bintu bitudi mua kuenza bua kudilongolola bua kubuela mu ntempelo.

Dilongesha ne Bipungidi 84:19–22

Ndi mua kupeta bukola bua Tatu wa mu Dîulu kupitshila ku milulu ya buakuidi.

• Bua kuambuluisha bana beba bua bumvua ne mululu ntshinyi, ela meji bua kutangila nabu bimfuanyi bia milulu mishilangana, bu mudi Gospel Art Book, nos. 103–8, anyi dibeji dia tshibilutshia lumingu elu. Bakonka bua bamba tshinyi tshidi tshifika mu tshimfuanyi tshionsu. Nudi mua kubala pamua Dilongesha ne Bipungidi 84:19–22. Buatshinyi Tatu wa Diûlu udi usua bua tuetu tupeta milulu yenda? Londela bana beba mushindu uwuvua mumvua bukola bua Nzambi kupitshila ku milulu ne bipungidi biwudi muenza. (Tangila kabidi “Priesthood Power, Authority, and Keys” mu tshikumbajilu A anyi tshikumbajilu B.)

Dilongesha ne Bipungidi 84:77

Ndi mulunda wa Yezu pandi mmulonda.

• Panyima pa dibala Dilongesha ne Bipungidi 84:77 pamua, konka bana beba tshidi tshiumvuija kuikala mulunda. Udi mua kubalondela pa balunda bimpa bawuvua mupeta. Mushindu kayi udi Yezu utuleja ne mmunanga bua ne tuikala balunda benda? Mushindu kayi utudi mua kuleja ne tudi tutshijinga? Musambu bu “I’m Trying to Be like Jesus” (Mukanda wa Misambu ya Bana, 78–79) udi mua kuambuluisha ne muyuki ewu.

Dilongesha ne Bipungidi 84:88

Tatu wa mu Diulu udi wambuluisha bena mudimu benda.

• Bana beba badi mua kusanka bua kumvua mushindu uvua bena bukenji bakuambuluisha wewa, anyi bankambua beba bua kupeta lumu luimpa. Pashisha udi mua kubala bua milayi ya pabuayi ivua Mukalenga muenzela bena bukenji mu Dilongesha ne Bipungidi 84:88. Pamuapa bana beba badi mua kuela meji pa bienzedi bidi biumvuangana ne kanungu aka. Ela meji bua kuabanyangana pa tshikondu tshiwuvua usadila Mukalenga ne mu diumvua ne Uvua neba, bu mudibi bimvuija mu kanungu 88. Udi mua kuambuluisha kabidi bana beba bua bela meji pa mishindu idibu mua kulua bena bukenji mpindiewu. Jadika ne Tatu wa mu Diûlu udi utuambuluisha bua kumanya tshiakuamba patudi tuakula ne bantu bakuabu pa tshidi tshitangila Yezu Kilisto.

Bua ngenyi ya bungi, tangila malu a ngondu ewu bua makazina a Mulunda .

Ntempelo wa Rome Italy