Tshilongelu tshia Bambi tshivua tshienzekela mu tshibambalu etshi.

Ngondu wa Muanda Mukulu 11–17: Shikikayi Nzubu wa Nzambi

Dilongesha ne Bipungidi 88

Misangu yonsu Mukalenga udi utupesha muenenu Wenda udi kayi mikalu ya “bunema ne bukola” (Dilongesha ne Bipungidi 88:47) kupitshila ku mabuluila adikatshila. Dilongesha ne Bipungidi 88 tshidi mushindu wa dibuluila—edi pa bukenka ne butumbi ne makalenga didi mua kuenza ne nsumpakenu yetu ya pa buloba imueneka mikesa ku difuanyikija. Nansha tuetu katuyi babiumvua bionsu, kadi tudi mua kulama ku meji ne kudi bia bungi mu tshiendelela bipita bitudi katuyi banji kufuanyikija. Bushuwa, Mukalenga kena mua kuyisha malelela manena bua kutukankisha anyi kuenza bua tudiumvua bakesa. Mu bulelela, wakalaya ne, “Dituku nedilua dinuikala mua kumvua nansha Nzambi” (verse 49; mfundilu musendeka mukumbaja). Pamuapa tshivua bua tshipatshila etshi tshia butumbi tshivua Mukalenga muelela Bansantu benda mu Kirtland mukenji bua kuenza Tshilongelu tshia Bambi. Wakabambila ne “Dilongololayi nkayenu”. “Longololayi bionsu bidi bikengedibua, ne shikikayi nzubu wa Nzambi” (kanungu 119). Kakuena muaba mukuabu, amu mu nzubu wa Nzambi wa tshijila—ne mu nzubu yetu—ki mudiyi mua kujula tshimônyi tshietu tshisambuka buloba bua tshifuaka kupita miaba mikuabu yonsu, “utujanduila mpala wenda,” ne utulongolola bua “kusomba mu butumbi bua selestiya” (kanungu 68, 22).

Tangila Saints, 1:164–66.

Ngenyi bua Kulonga mu Dîku ne mu Ekelezia

Dilongesha ne Bipungidi 88

Yezu Kilisto udi umpesha ditalala.

Matuku makesa panyima pa didimuisha dia ne mvita neyikala mua “kupumuka pa bisamba bionsu” (Dilongesha ne Bipungidi 87:2), Mukalenga wakafila dibuluila divua Joseph Smith ubikila ne “dibeji dia olive,” divua dikala tshimanyishilu tshia kala tshia ditalala (Dilongesha ne Bipungidi 88, mutu wa tshitupa; tangila kabidi Genese 8:11). Mu dilonga dieba dia tshitupa 88 lumingu elu, keba mukenji wa Mukalenga wa ditalala kuwudi.

Dilongesha ne Bipungidi 88:6–67

Bukenka ne mikenji bidi bifuma kudi Yezu Kilisto.

Miaku bukenka ne mikenji mbiambulula misangu ya bungi mu tshitupa 88. Leja anyi funda tunungu muwudi usangana miaku eyi mu kanungu 6–67, ne funda tshiwudi mulonga pa bukenka ne mikenji—ne pa Yezu Kilisto. Tshinyi tshiwudi umvua tshisakibua bua kuenza bua kupeta bukenka ne kuteka mu tshienzedi “mikenji ya Kilisto”? (kanungu 21).

Tangila kabidi Yeshaya 60:19; Yone 1:1–9; 3 Nefi 15:9; Timothy J. Dyches, “Light Cleaveth unto Light,” Liahona, Ngondu Muitanu 2021, 112–15; Sharon Eubank, “Christ: The Light That Shines in Darkness,” Liahona, Ngondu Muitanu 2019, 73–76.

Mifundu idi ne mikenji ya Yezu Kilisto.

Dilongesha ne Bipungidi 88:62–64

“Semena kundi.”

Mamanya kayi adi makuleja ne milayi idi mu tunungu eyi idi milelela? Tshinyi tshiwenza musangu kumpala bua “kusemena kudi” Kilisto? Ela meji bua kuenza musambu “Nearer, My God, to Thee” (Hymns, no. 100) tshitupa tshia dilonga dieba ne tshia dikukuila.

Dilongesha ne Bipungidi 88:67–76

Ndi mua kulua mukezuka kupitshila ku Bupikudi bua Yezu Kilisto.

Mukenji wa Mukalenga bua “didijidila” udi umueneka misangu ibidi mu tshitupa 88 (kanungu 68, 74). Bueba wewa, tshiambilu etshi tshidi tshiumvuija tshinyi? Udi mua kumonanuna bitupa bia mifundu bikuabu bia “Sanctification” mu Buludiki bua mu Mifundu (Tshisangi tshia Lumu Luimpa). Mushindu kayi utudi tulua bajidibua? Lekela lukonku elu luludika dilonga dieba dia Dilongesha ne Bipungidi 88:67–76, ne funda ngenyi ya Nyuma yonsu iudi upeta.

Dilongesha ne Bipungidi 88:77–80, 118–26

Keba dimanya, nansha ku dilonga ne ku ditabuija kabidi.

Mukalenga wakambila Bansantu bua kushikika “tshilongelu tshia bambi” mu Kirtland (Dilongesha ne Bipungidi 88:137). Tshitupa tshinena tshia buludiki mu tshitupa 88 tshivua tshibalongesha mushindu wa kutshienza. Buludiki ebu budi kabidi mua kunuambuluisha bua “nushindika nzubu wa dilonga” (kanungu 119) mu moyo wenu. Mu bulelela, udi mua kutangila kanungu 77–80 ne 118–26 bu bualu bupangadika bua “kukudimuna nzubu weba [anyi moyo weba] mu nsangilu wa dilongela lumu luimpa” ne “tshisokomenu tshia ditabuija” (Russell M. Nelson, “Becoming Exemplary Latter-day Saints,” Liahona, Ngondu wa Dikumi ne Umua 2018, 113). Bidi mua kusankisha bua kuidikija tshidi “dibaka” dia bumuntu bueba bufuanangana, biangata biambilu bia ku tunungu etu biudi mumvua ne udi nabi dijinga bua kuenza.

Bivua biambuluisha kabidi bua kujandula nkonku eyi: Buatshinyi dilonga ne ndongelu bidi ne mushinga kudi Mukalenga? Tshinyi tshidiye musua bua ndonga? Mushindu kayi udiye musua bua ndonga? Keba mandamuna ku nkunko eyi mu kanungu 77–80 kabidi mu “Truth will make you free” (For the Strength of Youth: A Guide for Making Choices, 30–33).

Bueba wewa, tshinyi tshidi tshiumvuija bua kuyila “ku dilonga ne ku ditabuija kabidi”? (kanungu 118). Ngenyi kayi iudi upeta ku mukenji wa Mukulu Mathias Held “Seeking Knowledge by the Spirit”? (Liahona, Ngondu Muitanu 2019, 31–33).

Tangila kabidi Biena Bualu ne Nkonku, “Seeking Truth and Avoiding Deception [Keba Bulelela ne Epuka Didinga],” Tshisangi tshia Lumu Luimpa; “A School and an Endowment,” mu Revelations in Context, 174–82.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga .

Ngenyi bua Kulongesha Bana

Dilongesha ne Bipungidi 88:33

Tatu wa mu Diûlu mmumpesha mapa mimpa.

• Nudi mua kubanga diyukilangana pa Dilongesha ne Bipungidi 88:33 ku dilomba bana beba bua bakula pa mapa adibu bapeshibua—adibu bapeta ne disanka ne makuabu adibu kabayi bapeta. Pamuapa badi mua kunaya ne disanka mu dipeta dia dipa. Pashisha nudi mua kuakula pa mapa adi Tatu wa mu Diûlu mutupesha (bu mudi dia Nyuma wa Tshijila). Mushindu kayi utudi tupeta mapa â ne disanka?

Dilongesha ne Bipungidi 88:63

Mema mukeba Mupandishi, ndi mmupeta.

• Dilongesha ne Bipungidi 88:63 udi ne miaku ya bienzedi idi mua kunusaka bua manaya a bibilu kampanda bidi bua kukimisha bana beba bua kukeba mpala wa Mukalenga mu mioyo yabu. Tshilejilu, wewa ne bana beba nudi mua kuela meji pa dinaya bua kuyukilangana pa tshiambilu “keba ne dinanukila ne neumpeta ” (mfundilu musendeka mukumbaja) anyi “nukokola, ne nebanunzuluila”?

Bana mbasua bishilangana. “Bana ba bungi badi balonga bimpa padi biumvuilu bionsu bilombibua. Peta mishindu ya diambuluisha bana bua kuenzela ngumvuilu wa lumonu, lumvu, ne dilenga padibu balonga. Mu malu makuabu, udi mua kupeta nansha mishindu idi yangata ngumvuilu yabu ya lununku ne ya dilabula!” (Teaching in the Savior’s Way, 32).

• Bua kuela kashonyi pa dibikila dia Mukalenga bua “kusemena kundi,” udi mua kulomba muana umua bua akuata tshimfuanyi tshia Yezu (bu mudi tshimfuanyi tshidi ku ndekelu kua tshifundu etshi) ku luseka lua tshibambalu padi bana bakuabu bikala ku luseka lukuabu. Padi bana beba bela meji bua bintu bidibu mua kumvua bua kusemena pabuipi ne Mupandishi, badi mua kuela tshidia batangila kudi tshimfuanyi ne muana udi mukuata tshimfuanyi udi mua kuela tshidia mutangila kudi bana bakuabu. Akula ne bana beba pa mushindu unudi nusemena pabuipi ne Mupandishi ne mushindu udiye usemena pabuipi nenu. Udi mua kuimba nabu musambu pa tshiena bualu etshi, bu “I Feel My Savior’s Love” (Mukanda wa Misambu ya Bana, 74–75).

Dilongesha ne Bipungidi 88:77–80, 118

Tatu wa mu Diûlu mmusua bua ndonga.

• Lomba bana beba bua bakulondela pa tshidibu balonga mu tshilongelu tshia Mbedi. Udi bua kuyisha kabidi bimua bia ku bintu biudi mulonga. Pashisha udi mua kuleja bana beba miaku tshinyi, buatshinyi, ne mushindu kayi. Bambuluisha bua bakeba Dilongesha ne Bipungidi 88:77–79 bua kujandula tshinyi tshidi Mukalenga musua bua tulongapu. Pashisha tangilayi pamua mu kanungu 80 bua kujandula buatshinyi mmusua bua tulonga ne mu kanungu 118 bua kujandula mushindu kayi utudi mua kulonga.

“Keba diyila … ku dilonga ne kabidi ku ditabuija.”

Dilongesha ne Bipungidi 88:119

Nzubu yetu idi mua kuikala ya tshijila bu ntempelo.

• Pawudi ubala Dilongesha ne Bipungidi 88:119 kudi bana beba, badi mua kuenza muketa ne maboku abu misangu yonsu idibu bumvua muaku “nzubu.” Umvuija ne Tatu wa mu Diûlu wakasua ne Joseph Smith ne Bansantu bibaka ntempelo, anyi “nzubu wa Nzambi.”

• Udi mua kulomba bana beba bua basungula miaku muanda muteketa idi yumvuija nzubu wabu. Pashisha bambuluisha bua kupeta, mu Dilongesha ne Bipungidi 88:119, miaku muanda muteketa idi Mukalenga wenzela bua kumvuija nzubu wenda. Mushindu kayi utudi mua kuenza nzubu wetu “nzubu wa Nzambi”?

Bua ngenyi ya bungi, tangila malu a ngondu ewu bua makazina a Mulunda .

Kanutshinyi To, kudi Michael Malm