Diumvuija ku Ndi Ntangila Muana wa Muntu, kudi Walter Rane

Ngondu wa Muanda Mukulu 25–31: Kupeta kua Tshiwudi Tshienda

Dilongesha ne Bipungidi 93

“Pawudi ubanda ku tshibandilu,” Joseph Smith wakalongesha ne, “udi ne tshia kubangila kuinshi, ne kubanda tshitupa ku tshitupa, tô ne muwafika ku lusongu; ne bidi bia momumua ne nshindamenu ya lumu luimpa—udi ne tshia kubanga ne wakumpala, ne kuya kumpala tô ne muwalonga nshindamenu yonsu ya dizanjikibua” (Teachings of Presidents of the Church: Joseph Smith [2007], 268).

Misangu mikuabu tshibandilu tshia dizanjikibua tshidi tshimueneka tshila bikola, kadi tudi baledibua bua kubanda tô ne ku mutu kuatshi ne diambuluisha dia tshisumi dia Mupandishi. Nansha bua dishikila didi mua kumueneka mu tuetu, Tatu wa mu Diûlu ne Muanenda badi bamona tshintu kampanda tshia butumbi kutudi, tshintu kampanda tshia bunzambi. Bu muvua Yezu Kilisto uvua ne Tatuenda ku mbangilu, ne uvua peba nenda kabidi (Dilongesha ne Bipungidi 93:21, 23). Bu mudiye utungunuka ne ngâsa ku ngâsa, ne muapetayi tshiwudi ne kabidi wewa neupeta ngâsa bua ngâsa (kanungu 13, 20). Lumu luimpa lupinguluja ludi lulongesha pa bulelela bua ngikadilu wa Nzambi, ne bu muditshi tshilongesha kabidi pa ngikadilu weba ne dipungila dieba. Udi mu muaku, muana wa Nzambi, ne pakumbana diba bua kupeta tshiwudi tshienda (kanungu 19).

Ngenyi bua Kulonga mu Dîku ne mu Ekelezia

Dilongesha ne Bipungidi 93

Bu Yezu Kilisto, ndi mua kutumbishibua ne kupeta tshiwudi tshia Nzambi.

Muambi Joseph Smith wakalongesha ne, “Padi bantu kabayi bumvua ngikadilu wa Nzambi, kabena bumvua wabu nkayabu to” (Teachings: Joseph Smith, 40). Panudi nuyila pa Mupandishi ku dilonga Dilongesha ne Bipungidi 93, keba tshiudi ulonga pa wewa nkayeba. Tshilejilu, tshinyi tshiudi ulonga pa Yeya ku kanungu 3, 12–13, 21, ne 26? Malelela kayi a momumua awudi usangana pa wewa nkayeba mu kanungu 20, 23, ne 28–29? (tangila kabidi 1 Yone 3:2; 3 Nefi 27:27). Nkonku idi ilonda idi mua kukuambuluisha bua wewa kumvua ne kuteka mu tshienzedi malelela adi mu tshitupa etshi:

• Bueba wewa, tshinyi tshidi tshiumvuija kupeta “ngâsa bua ngâsa” ne kutungunuka “ngâsa ku ngâsa”? (kanungu 12–13). Biobi mua kuambuluisha, udi mua kubala “Grace” mu Guide to the Scriptures (Tshisangi tshia Lumu Luimpa).

• Tshinyi tshiwudi ujandula mu dibuluila edi pa mushindu udi Nzambi ukuambuluisha bua kukola ne kulonga? Mushindu kayi udi dimanya dia etshi ulenga mushindu wa kunemeka bakuabu—ne wewa muina?

• Tshinyi tshiwudi ulonga pa “mushindu wa kukukuila, ne … tshinyi tshia kukukuila”? (kanungu 19; tangila kabidi Buludiki bua ku Mifundu, “Worship,” Gospel Library).

Dilongesha ne Bipungidi 93:1–39

Butumbi bua Nzambi budi bukenka ne bulelela.

Udi mua kutentekela ne miaku bu mudi butumbi, bukenka, ne bulelela idi imueneka mu dibuluila edi misangu yonsu. Pawudi ulonga kanungu 20–39 mu disunguluka, enza lista wa malelela awudi ulonga pa miaku eyi. Kuenza tabulo bu mudi ewu udi mua kuambuluisha:

Kanungu	Tshinyi tshindi ndonga	Nkonku bua kunana meji
Kanungu 24	Tshinyi tshindi ndonga	Nkonku bua kunana meji Kudi didinga dia bungi pa buloba. Mushindu kayi undi mua kumanya bulelela? (tangila kabidi Yakoba 4:13).
Kanungu 28	Tshinyi tshindi ndonga	Nkonku bua kunana meji
Kanungu 36	Tshinyi tshindi ndonga Nzambi udi muikala wa bukenka ne wa bulelela.	Nkonku bua kunana meji
Kanungu 37	Tshinyi tshindi ndonga	Nkonku bua kunana meji Nganyi undi mumanya udi mua kukumbana bua kukandamena ku bukoki bua bubi? Buatshinyi badi bakumbana bua kuenza etshi?
Kanungu	Tshinyi tshindi ndonga	Nkonku bua kunana meji
Kanungu	Tshinyi tshindi ndonga	Nkonku bua kunana meji
Kanungu Tangila kabidi: Dilongesha ne Bipungidi 50:24	Tshinyi tshindi ndonga	Nkonku bua kunana meji

Tshinyi tshiwudi upeta mu tunungu etu tshidi tshikusaka bua kukeba bukenka bua bungi ne bulelela? Buatshinyi bukenka ne bulelela bidi bikala biena bualu bimpa bia Yezu Kilisto? (tangila Yone 8:12; 14:6). Mushindu kayi udi malelela â alenga moyo weba?

Udi mua kufunda milayi pa dipungila dia tshiendelela mu kanungu 20, 22, 28, 33–35. Malanda kayi adi pankatshi pa milayi eyi ne dipeta bukenka?

Ela meji mu dikeba mu “Walk in God’s light” (For the Strength of Youth: A Guide for Making Choices, 18–21) bua kupatula tshiwudi mua kuenza bua kupeta bukenka ne mushindu udi Mukalenga mulaya bua kukubenesha. Video “Light and Truth, Part 1” ne “Part 2” (Tshisangi tshia Lumu Luimpa) idi mua kufila ngenyi ya nsakidilu.

Tangila kabidi “Teach Me to Walk in the Light,” Hymns, no. 304; Topics and Questions, “Holy Ghost,” Tshisangi tshia Lumu Luimpa.

Light and Truth, Part 1

Light and Truth, Part 2

Butumbi bua Nzambi budi buikala bukenka ne bulelela.

Dilongesha ne Bipungidi 93:40–50

Longolola nzubu weba.

Mukenji wa kulongolola nzubu weba (kanungu 43) kawena pa dilongolola dia tubadi ne malongu to udi pa dilongesha—ne diyila—bukenka ne bulelela (kanungu 42). Ela meji pa mushindu uwudi uteta bua kulonda mubelu ewu. Lutatu kayi luwudi ututakena nalu? Malelela kayi adi mu Dilongesha ne Bipungidi 93 adi mua kuambuluisha?

Ngenyi kayi yiudi mupeta ku malongesha â a kudi Mukulu David A. Bednar?

“Mu bilo bianyi mudi dizola dimpa dia budimi bua ble. Dizola didi nsangilu munena wa nsalu ya nkaya—nansha umua kena pa nkayenda mua kuambuluisha anyi kukoka ntema. Mu bulelela, pawudi wimana pabuipi ne tshilamba, bionsu biudi mua kumona tshidi nsangilu wa nsalu ya kalosu idi kayiyi ipetangana ne kayiyi ikoka ntema ya kalabi ne ngolo ne mifikuluka. Nansha nanku, pawudi wenda usemena ntanta ne tshilamba tshia dizola, nsalu ya kalosu yonsu ya nkaya idi ibuelakana pamua ne ifuka muenekelu muimpa wa budimi bua ble. Nsalu ya bungi ya kalosu pa tshibidilu idi yenza mudimu pamua bua kufuka dikoka ne dizola dimpa.

“Disambila dionsu mu dîku, dilonga dionsu dia mifundu mu dîku, ne dilolu dionsu dia dîku ku nzubu tshidi nsalu wa kalosu mu dizola dia anyima. Tshikuma tshimua katshiena mua kumueneka bua ne tshidi ne mushinga anyi tshivulukilu tshipita. Kadi amu bumudi nsalu ya kalabi ne ya ngolo ne ya mifikuluka ikumbajangana ne ifuka tshintu tshia dikema, ne tuetu disuminyina dietu didi dimueneka mu bintu bikesa bidi mua kulombola ku bipeta bimpa bikumbana bia nyuma. Pananku, kanutshioki bua kuenza buimpa, bualu nudi nuenza tshishimikidi tshia mudimu munena. Ne bintu bikesa bidi bidianjidila tshidi tshinena [Dilongesha ne Bipungidi 64:33]. Disuminyina didi nsapi ya nshindamenu pawudi wenza tshishimikidi wa mudimu munena mu nsombelu wetu wa muntu nkaya ne patudi tunanukila bikola ne tusumpakana bua nzubu yetu (“More Diligent and Concerned at Home,” Liahona, Ngondu wa Dikumi ne Umua 2009, 19–20).

Tangila kabidi Henry B. Eyring, “A Home Where the Spirit of the Lord Dwells,” Liahona, Ngondu Muitanu 2019, 22–25.

Mukalenga wakelela baledi mukenji bua kukolesha bana babu mu bukenka ne mu bulelela.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga .

Ngenyi bua Kulongesha Bana

Dilongesha ne Bipungidi 93:2–21

Yezu Kilisto udi Bukenka ne Moyo wa ba pa Buloba.

• Ela meji bua kuleja tshimfuanyi tshia Mupandishi ne konka bana beba buatshinyi bidi ne mushinga bua kulonga ne kulonda Yezu Kilisto. Pashisha nudi mua kubala pamua Dilongesha ne Bipungidi 93:19 bua kujandula kabingila kamua ka mushinga.

• Pamuapa nudi mua kusungula malelela a bungi pa Kilisto mu tshitupa 93 adi mua kukupesha meji ne kuambuluisha bana beba bua kujandula ne kuumvua (tangila kabidi “Chapter 33: A Revelation about Jesus Christ,” mu Doctrine and Covenants Stories, 126–27, anyi video idi mikumbanangana mu Tshisangi tshia Lumu Luimpa). Bua bulelela bonsu buwudi usungula, udi mua kupesha bana beba muaku anyi tshiambilu bua kuteleja panudi nubala kanungu pamua. Tshilejilu, Yezu Kilisto:

  • Muenza mudimu wa Tatu (kanungu 5).

  • Udi Bukenka bua ba pa Buloba (kanungu 9).

  • Udi Mufuki wa buloba (kanungu 10).

  • Uvua mupeta bukola bonsu mu diûlu ne pa buloba (kanungu 17).

  • Uvua ne Nzambi ku mbangilu (kanungu 21).

  Chapter 33: A Revelation about Jesus Christ: May 1833

Diumvuija ku Bukenka bua ba pa Buloba, kudi Howard Lyon

Dilongesha ne Bipungidi 93:23, 29, 38

Ngakasomba ne Tatu wa mu Diûlu kumpala kua mema kulua pa buloba.

• Mukalenga mmuela kashonyi misangu isatu mu tshitupa 93 ne tuvua basomba ne Nzambi ku mbangilu (kanungu 23, 29, 38). Bua kuambuluisha bana beba bua kujandula etshi, udi mua kubabikila bua babala Dilongesha ne Bipungidi 93:23, 29, 38 ne bakeba bulelela budi bubatangila budi buambulula mu tunungu etu. Buatshinyi Tatu wa mu Diûlu mmusua bua tumanya bulelela ebu? Udi kabidi mua kukonka bana beba tshidibu bamanya pa nsombelu wetu ne Tatu wa mu Diûlu kumpala kua tuetu kuledibua. Bua kuambuluisha bana beba bua balonga bikola, bala nabu tshimua anyi bitupa bia mifundu bidi bilonda ebi: Yelemiya 1:5; Dilongesha ne Bipungidi 138:53–56; Mose 3:5; Abalahama 3:22–26.

• Nudi mua kuimba kabidi pamua “Ndi Muana wa Nzambi” anyi “I Lived in Heaven” (Mukanda wa Misambu ya Bana, 2–3, 4) Ne kuyukilangana malelela atudi balonga ku misambu eyi pa kipatshila ketu bua dilua pa buloba.

Dilongesha ne Bipungidi 93:24–39

Ndi mpeta bukenka ne bulelela pandi ntumikila Nzambi.

• Bua kuambuluisha bana beba bua kuenzela malelela pa ditumikila mu Dilongesha ne Bipungidi 93, ela meji bua kufunda mifundu mikesa miamba ya ku tshitupa etshi pa bitupa bia dibeji. Pa bitupa bishilangana bia dibeji, funda malelela adi konsu ka ku tununga etu kalongesha. Bana beba badi mua kubadila pamua tunungu ne kutuangaja malelela ku mifundu miamba. Bilejilu bidi mua kuangata:

  • Kanungu 24: Bulelela budi bintu bimanya bidi bia bushuwa ku kala, mpindiewu, ne matuku alua.

  • Kanungu 28: Ndi mua kupeta bukenka ne bulelela pandi ndama mikenji.

  • Kanungu 37: Pandi ne bukenka ne bulelela, ndi nkumbana bua kukandamena bubi.

  • Kanungu 39: Ndi njimija bukenka ne bulelela pandi mbenga kutumikila.

  Nudi mua kusua bua kuabanyangana bilejilu bua malelela anudi bafika ku dimanya panuvua balama mikenji ya Mukalenga.

Akaja ku bukola bua bana. Udi mumanya majinga a bana ne makumbana a bana beba; dilekelela bua kukumbaja ngenyi ya tshibilu bua ikumbanangana ne majinga abu. Tshilejilu, mu tshibilu etshi, pawudi ulongesha bana bansonga, bidi bikumbana bua kutuishila pa bulelela bumua bupepela ku tshitupa 93.

Bua ngenyi ya bungi, tangila malu a ngondu ewu bua makazina a Mulunda .

Bukenka ne Bulelela, kudi Simon Dewey