Ngondu Muinayi 14–20: Ndi Ewu Udi ne Moyo, Ndi Ewu Wakashipibua

Pasaka

Mu 3 a Ngondu Muinayi 1836, divua Dialumingu dia Pasaka. Kunyima kua diambuluisha bua kufila biakudia bia tshijila kudi Bansantu mu Ntempelo wa Kirtland uvua mupia-mupia ku dijidibua, Joseph Smith ne Oliver Cowdery bakapeta muaba mupola panyima pa tshilamba ne kuinamabu mu disambila dipola. Pashisha, mu dituku edi dia tshijila didi Bena Kilisto ba miaba yonsu basekelela Dibika ku Lufu dia Kilisto, Mupandishi mubika nkayenda wakamueneka mu ntempelo wenda, kuambaye ne, Ndi Ewu Udi ne Moyo, Ndi Ewu Wakashipibua (Dilongesha ne Bipungidi 110:4).

Kuamba ne Yezu Kilisto udi “ewu udi ne moyo” tshidi tshiumvuija tshinyi? Katshiena amu tshiumvuija ne mmujuka mu lukita ne mumueneka kudi bayidi benda mu Galela. Tshidi tshiumvuija ne udi ne moyo lelu. Udi wakula kupitshila kudi bambi lelu. Udi ulombola Ekelezia wenda lelu. Udi ondopa anyima idi mitapika ne mioyo idi mitshibuluka lelu. Nanku tudi mua kuamba bifuanangana ne miaku ya bujadiki bukola bua Joseph Smith: Kunyima kua majadiki a bungi adi mafidibua buenda, etshi tshidi bujadiki butudi tufila buenda: Ne udi ne moyo! (Dilongesha ne Bipungidi 76:22). Tudi mua kuteleja dîyi dienda mu mabuluila â, mujadiki wa ku tshianza tshienda mu mioyo yetu, ne kumvua “disanka didi tshiambilu etshi tshifila: ‘ndi mumanya ne Musungidi wanyi udi ne moyo!’” (Hymns, no. 136).

Ngenyi bua Dilonga ku Nzubu ne ku Ekelezia

Yezu Kilisto udi ne Moyo.

Ba bungi ba ku tuetu kimbamona Yezu Kilisto bu muvua muambi Joseph Smith mumona. Kadi tudi mua kumanya, bu yeya, ne Mupandishi udi ne moyo, ne mumanya masanka ne makenga bietu, ne neyikala mua kutuambuluisha diba dia dijinga. Ela meji ku bujadiki bueba bua Kilisto udi ne moyo mu dinana meji ku nkonku idi kuinshi eku ne kulonga pa biambuluishi bidi biyishindikija.

• Yezu Kilisto nganyi? Buatshinyi tudi tumukukuila? (tangila “The Living Christ: The Testimony of the Apostles”).

• Tshinyi tshidi Nyuma undongesha pa dimanya dia Joseph Smith ne bakuabu bakamona Mupandishi? Mushindu kayi udi bujadiki buabu bukankamika buanyi? (tangila Dilongesha ne Bipungidi 76:11–14, 20–24; 110:1–10; Joseph Smith—Mulubu:17).

• Tshinyi tshindi ndonga pa bukenji ne bunzambi bua Mupandishi ku miaku yenda nkayenda? (tangila Dilongesha ne Bipungidi 29:5; 38:7).

• Mushindu kayi udi Mupandishi mua kungambuluisha lelu? (tangila Yeshaya 53:3–5; Ebelu 2:17–18; Mosiya 3:7; Alama 7:11–13; 36:3; Etele 12:27; Mose 5:10–12).

Bukola budi bufuma ku dikuata ku moyo. Mukulu Richard G. Scott wakumvuija ne: “Bukola bunena budi mua kufuma ku dikuata mifundu ku moyo. Kukuata mufundu ku moyo tshidi tshienza bulunda bupia-bupia. Tshidi bu dijandula muntu mupia-mupia udi mua kukuambuluisha diba dia dijinga, kukupesha meji ne busambi, ne kuikala mpokolo wa bukola bua dijinga dia nshitulukilu” (“The Power of Scripture,” Ensign, Ngondu wa Dikumi ne Umua 2011, 6). Pawudi upeta mufundu pa Mupandishi udi muikala ne mushinga musunguluka kuwudi—pamuapa udi mua kukupesha busambi mu diba dia dijinga—ela meji bua kuwukuata ku moyo.

Mu video wa “My Spiritual Goal [Tshipatshila tshia Nyuma Wanyi],” nsongakaji udi upangadika bua kukuata ku moyo “The Living Christ” (Tshisangi tshia Lumu Luimpa). Tshinyi tshidi tshikukemesha pa dimanya dienda? Tshinyi tshiudi umvua tshikusaka bua kuenza bua kupeta malelela mu “Kilisto udi ne Moyo” mu moyo ne mu meji bieba?

Let Your Goals Be Guided by the Spirit

Bua kulonga bia bungi pa mushindu udi Mupandishi utubenesha lelu, udi mua kulonga, kuteleja, anyi kuimba “I Know That My Redeemer Lives” (Hymns, no. 136). Udi mua kukusaka bua kukeba malelela mu musambu ewu avua malongesha kabidi mu Dilongesha ne Bipungidi 6:34; 84:77; 98:18; 138:23.

Tangila kabidi Biena Bualu ne Nkonku, “Yezu Kilisto,” Tshisangi tshia Lumu Luimpa.

Bualu bua Yezu Kilisto, nembikibua ku lufu

Joseph Smith uvua mumanya tshidibu bumvua padibu badila muntu munanga mufua, biangata ne tatuenda ne babidi ba ku bana babu baluma. Joseph ne Emma bakajika basambombu ba ku bana babu, yonsu muikala ne bidimu bishadila ku bibidi. Ku mabuluila avua Nzambi mufila, Joseph ne Emma bakapeta muenenu wa tshiendelela.

Keba malelela pa lufu ne dilongolola dia tshiendelela dia Nzambi mu Dilongesha ne Bipungidi 29:26–27; 42:45–46; 63:49; 88:14–17, 27–31; 93:33–34. Mushindu kayi udi malelela â alenga mushindu weba wa muenenu wa lufu? Mushindu kayi udiwu alenga mushindu weba wa nsombelu?

Tangila kabidi 1 Kolinto 15; Teachings of Presidents of the Church: Joseph Smith (2007), 174–76; Easter.ChurchofJesusChrist.org.

Yezu Kilisto mmukumbaja “bupikudi bujima” buanyi.

Mushindu umua wa kutangila kudi Mupandishi mu diba dia Pasaka udi kulonga mabuluila mu Dilongesha ne Bipungidi adi alongesha pa mulambu wa bupikudi buenda. Imua idi mua kupetshibua mu Dilongesha ne Bipungidi 18:10–13; 19:16–19; 45:3–5; 76:69–70. Ela meji bua kuenza mulongu wa malelela awudi upeta mu tunungu etu. Bua kulepesha dilonga dieba, udi mua kukumbaja ku mulongu ku dikeba mu Luka 22:39–44; 1 Yone 1:7; 2 Nefi 2:6–9; Mosiya 3:5–13, 17–18; Moloni 10:32–33.

Eyi idi nkonku mikuabu idi mua kuludika dilonga dieba:

• Bupikudi bua Yezu Kilisto ntshinyi?

• Buatshinyi Yezu Kilisto wakasungula bua kukenga ne bua kufua buetu?

• Tshinyi tshindi bua kuenza bua kupeta mabenesha a mulambu wenda?

• Tshinyi tshindi ngumvua pa Yezu Kilisto panyima pa dibala dia tunungu etu?

Tangila kabidi Guide to the Scriptures, “Atonement,” Gospel Library; “The Savior Suffers in Gethsemane” (video), Gospel Library.

The Savior Suffers in Gethsemane

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga.

Ngenyi bua Kulongesha Bana

Bualu bua Yezu Kilisto, nembikibua ku lufu

• Bua kulongesha bana beba pa dibika ku lufu, udi mua kubanga ne dibaleja bimfuanyi bia lufu ne bia Dibika ku Lufu bia Mupandishi. Lekela bana beba babanya tshidibu bamanya pa bikuma ebi. Nudi mua kuimba kabidi musambu “Did Jesus Really Live Again?” (Children’s Songbook, 64).

• Ela meji pa dilongesha dia bintu didi mua kuambuluisha bana beba bua kumvua tshidi tshifika patudi tufua (nyuma yetu ne mibidi bidi bitapuluka) ne patudi tubika ku lufu (nyuma yetu ne mibidi bidi bialukila pamua ne mibidi yetu idi mijima ne kayena ifua). Tshilejilu, tshinyi tshidi tshifika patudi tumbusha dibua mu muendu anyi kajilu ka mu bika? Tshidi tshifika ntshinyi padibi bituangajibua kabidi? (Tangila Alama 11:44–45.)

• Bana beba mbamanya muntu kampanda udi mufua? Balekela bakula ndambu pa bantu aba, ne pashisha balayi pamua Dilongesha ne Bipungidi 138:17. Akulanganayi pa mushindu unudi numvua panudi numanya ne betu bananga nebabika ku lufu ne nebikala ne mibidi kabidi.

• Nuenu bikala ne bana bakola, nudi mua kubabikila bua bakeba biambilu bidi bileja mukenji wa Pasaka mu mifundu idi ilonda: Dilongesha ne Bipungidi 63:49; 88:14–17, 27; 138:11, 14–17. Badi bua kuenza bia momumua ne video wa “Because He Lives [Bualu Udi ne Moyo]” (Gospel Library). Mushindu kayi utudi mua kutangalaja mukenji ewu ne bakuabu?

Muambi Joseph Smith wakamona Yezu Kilisto.

• Wewa ne bana beba nudi mua kusankishibua bua kubala pa misangu isatu mishilangana padi Yezu umuenekela Joseph Smith ne bakuabu, bu miandiku mu Joseph Smith—Mulubu 1:14–17; Dilongesha ne Bipungidi 76:11–24; 110:1–10. Bana beba badi mua kumona kabidi bimfuanyi bia bikuma ebi mu dibeji dia tshibilutshia lumingu elu. Tshinyi tshitudi tulonga pa Yezu Kilisto ku bionsu bia ku mamanya â? Buatshinyi bidi dibenesha bua kumanya ne Joseph Smith ne bakuabu bakamona Mupandishi mubika?

Bualu bua Yezu Kilisto, ndi mua kubuikidibua ku mibi yanyi.

• Malelela avua Joseph Smith mulonga pa dibuikidila kupitshila ku Kilisto adi mua kupesha bana beba ditekemena ne badi mua kubuikidibua bua bilema ne mibi yabu. Ela meji bua kubikila bana beba bua benza tshimfuanyi ne mitu ya malu bu mudi: Tshinyi Tshidi Mupandishi muenza buanyi ne Tshinyi tshindi mua kuenza bua kupeta dibuikidila dienda. Ambuluisha bana beba bua bakeba mu mifundu idi ilonda bua kupeta bintu bidi bia mu mitu ya malu eyi: Dilongesha ne Bipungidi 18:10–13; 19:16–19; 45:3–5; 58:42–43. Abanyanganayi umua ne mukuabu disanka ne disakidila bua tshidi Mupandishi muenza buetu.

• Nudi mua kutangila kabidi video wa “The Shiny Bicycle [Dikalu Dikenka]” ne bana beba (Tshisangi tshia Lumu Luimpa) ne kuabanyangana mamanya pawudi mumvua dibuikidila dia Mupandishi pawudi mukudimuna mutshima.

The Shiny Bicycle

Bua ngenyi ya bungi, tangila bualu bua ngondu ewu bua makazina a Mulunda.

Yezu ne Maliya ku Lukita,, kudi Joseph Brickey