Ngondu Muinayi 7–13: Bandishayi Mêyi Enu bua Kumanyisha Lumu Luimpa Luanyi

Dilongesha ne Bipungidi 30–36

Parley P. Pratt uvua tshidimba tshia Ekelezia amu bua ngondu umua pavuaye mubikidibua mu tshipela bua kuyisha lumu luimpa (Dilongesha ne Bipungidi 32:2). Thomas B. Marsh uvua tshidimba tshia tshikondu tshikesa pavuabu bamuambila ne diba dia bukenji dieba diafiki (Dilongesha ne Bipungidi 31:3). Orson Pratt, Edward Partridge, ne bakuabu ba bungi bavua bafuma ku ditambushibua pavua mabikila abu a bukenji mafika. Mpukampuka tshidi dilonga kutudi lelu ku tshitembu etshi: wewa mumanya bia bungi bua kuitaba lumu luimpa lupingajilula ku ditambula, udi mumanya bia bungi bua kulutangalaja ne bakuabu. Mbiakana, tudi basua misangu mivula kuvudija dimanya dietu dia lumu luimpa, kadi Nzambi katu welakana bua kubikila bapangi bua kuyisha lumu luimpa luenda to (Dilongesha ne Bipungidi 35:13). Bushuwa, udi ubikila yonsu wa kutudi, bua tukangula mukana muetu bua kumanyisha lumu luimpa luenda (Dilongesha ne Bipungidi 30:5). Ne tudi tutshienza bilenga kabiyi kupitshila ku lungenyi ne dimanya bietu kadi ku bukola bua Nyuma (Dilongesha ne Bipungidi 35:13).

Tangila kabidi “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” mu Revelations in Context, 54–69.

Ngenyi bua Dilonga ku Nzubu ne ku Ekelezia

Dilongesha ne Bipungidi 30–36

Ndi mubikidibua bua kuikala mujadiki wa Yezu Kilisto.

Wikala anyi kuikadi ne dibikila dimanyika dia bu muena bukenji, udi mua kuikala mujadiki wa Yezu Kilisto “ku diba dionsu ne mu bintu bionsu, ne mu miaba yonsu” (Mosiya 18:9). Pawudi ubala Dilongesha ne Bipungidi 30–36, andika tshiudi ulonga pa mishindu yeba ya kutangalaja lumu luimpa. Udi mua kuenza mulongu wa bintu bidi Mukalenga ukulomba ne mukuabu mulongu wa malaya adi Mukalenga wenza pawudi utangalaja lumu luimpa (tshilejilu, tangila Dilongesha ne Bipungidi 30:8; 31:3–5; 32:1, 5; 35:13–15, 24). Udi mua kukeba kabidi nshindamenu idi mua kukuambuluisha bua utangalaja lumu luimpa. Tshiudi upeta ntshinyi tshidi tshikupesha lungenyi bua kumanyisha lumu lulenga ne disanka dinena? (Dilongesha ne Bipungidi 31:3).

Mukulu Gary E. Stevenson mmulongesha ne dimanyisha dia lumu luimpa “didi mua kukumbana kupitshila ku nshimimenu mipepela ne mimvuika milongesha kudi muntu yonsu wa kutudi katshia ku buana: kunanga, kuabanya, ne kubikila” (“Love, Share, Invite,” Liahona, Ngondu Muitanu 2022, 85). Tangila dilonga dia mukenji wenda mu diela meji kudi bamanya beba, balunda beba, ne dîku dieba. Ngenyi kayi idi ikuluila pa mushindu uwudi mua kuabanyangana nabu “tshi[udi] munanga pa lumu luimpa lua Yezu Kilisto”? Mu mishindu kayi iudi mua kubabikila bua “kulua ne kumona,” “kulua ne kusadila,” ne “kulua ne kushadilamu”? Pa udi wimba anyi uteleja “I’ll Go Where You Want Me to Go” (Misambu, no. 270) anyi musambu mukuabu, udi mua kudikonka, “Tshinyi tshidi Mukalenga musua bua ngamba ne ngikala bua ngabanya lumu luimpa luenda?”

Tangila kabidi Marcos A. Aidukaitis, “Lift Up Your Heart and Rejoice,” Liahona, Ngondu Muitanu 2022, 40–43; Biena Bualu ne Nkonku, “Inviting All to Receive the Gospel of Jesus Christ [Bikila Bonsu bua Bapeta Lumu Luimpa lua Yezu Kilisto],” “Ministering as the Savior Does [Sadila bu muvua Mupandishi bua Kuenza],” Tshisangi tshia Lumu Luimpa; “Inviting All to Come unto Christ: Sharing the Gospel” (video), Tshisangi tshia Lumu Luimpa.

Inviting All to Come unto Christ: Sharing the Gospel

Dilongesha ne Bipungidi 31:1–2, 5–6, 9, 13

Mukalenga udi mua kungambuluisha mu malanda anyi a mu dîku.

Mêku a mu 1830 avua aluangana ne makenga a momumua ne adi mêku a lelu aluangana nawu. Buludiki kayi ne malaya kayi bidi Mukalenga upesha Thomas B. Marsh pa dîku dienda mu Dilongesha ne Bipungidi 31? (tangila nangananga kanungu 1–2, 5–6, 9, 13). Mushindu kayi udi miaku yenda mua kukuambuluisha mu malanda a dîku dieba?

Bua mamanyisha a bungi pa Thomas B. Marsh, tangila Saints, 1:79–80, 119–20.

Dilongesha ne Bipungidi 32–33; 35

Mukalenga udi undongolola ku mudimu udiye musua bua ngenza.

Dilonga dia nsombelu wa bantu badi baleja mu Dilongesha ne Bipungidi 32–33; 35 didi mua kunuambuluisha bua kumanya mushindu kayi udi Mukalenga unulongolola bua mudimu wenda. Tshilejilu, udi mua kubala pa malanda pankatshi pa Parley P. Pratt ne Sidney Rigdon mu “Mêyi a Dipinguluja: Bakudimuna moyo ba Bangabanga.” Mushindu kayi uvua malanda â mua kubenesha bana ba Nzambi? (tangila Dilongesha ne Bipungidi 35).

Monayi tshilejilu tshikuabu: Ezra Thayer mmufunda ne misangu mikuabu kumpala kua kutambulaye, uvua mupeta tshimônyi mu tshiotshi “muntu mulua ne muntuadila muvungu wa mabeji ne uwundeja, ne mpandalala kabidi, ne ungambila bua [kumunaya]. Ngakamuambila ne ntshitu muanji kumunaya mu nsombelu wanyi. Wakangambila ne udi mua [kumunaya], muteta. … Wakenza lunzenza lupita buimpa luntu ntshiyi muanji kumvua to” (“Revelation, October 1830–B, Revelation Book 1,” historical introduction, josephsmithpapers.org). Pakapeta Joseph Smith pashisha dibuluila bua Ezra Thayer ne Northrop Sweet, mpindiewu biandika bu Dilongesha ne Bipungidi 33, Ezra wakakudimuna dibuluila bu muvungu wa mabeji mu tshimônyi tshienda. Mushindu kayi uvua Mukalenga ulongolola Ezra bua bukenji buvuaye mumupesha mu Dilongesha ne Bipungidi 33:1–13?

Tshijadikilu kayi tshiudi mumona tshianza tshia Mukalenga ne tshivua mu mioyo ya bidimba bia bangabanga bia Ekelezia? Nganyi udi Mukalenga muteka mu moyo weba bua kukuambuluisha bua kulua kudi Kilisto? Mushindu kayi udiye ukulongolola bua ubenesha bakuabu kupitshila ku lulamatu lueba, ku dinanga dieba, anyi ku dibikila dieba?

Tangila kabidi “A Mission to the Lamanites,” mu Revelations in Context, 45–49.

Dilongesha ne Bipungidi 33:12–18

Pandi ngibaka moyo wanyi pa lumu luimpa lua Mupandishi, ntshiena mpona to.

Dilongesha ne Bipungidi 33 uvua mupesha Northrop Sweet ne Ezra Thayer, bidimba bibidi bipiabipia bia Ekelezia. Northrop wakalekela Ekelezia tshitupa tshikesa panyima pa dibuluila difidibua. Ezra wakasadila ne lulamatu bua tshitupa tshikesa, kadi wakapona amu penda kabidi. Dibala dia tshitupa etshi didi mua kunusaka bua kutangila mushindu kayi uwudi muibakibua “pa lubuebua” (kanungu 13) lua lumu luimpa. Malelela kayi a mu tunungu etu adi mua kukuambuluisha bua kushala ne lulamatu kudi Mupandishi?

Tangila kabidi Helamana 5:12.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga.

Ngenyi bua Kulongesha Bana

Dilongesha ne Bipungidi 30:1–2

Ndi mua kudifila bikola ku bintu bia Nzambi kupita bintu bia pa buloba.

• Bidi mua kusekesha bana beba bua kuidikija bua kukumbaja midimu ibidi musangu umua, bu mudi kutela ku moyo miaku ya musambu munanga padibu bafunda mena a bidimba bionsu bia dîku diabu. Buatshinyi bidi bikola bua kuenza bintu bibidi musangu umua? Nudi mua kubala pashisha Dilongesha ne Bipungidi 30:1–2 pamua. “Bintu bia pa buloba” kayi bidi mua kutupesha ditanaja ku divuluka dia Yezu Kilisto ne lumu luimpa luenda? Mushindu kayi utudi mua kulama didifila dietu kudiye?

Dilongesha ne Bipungidi 33:2–3, 6–10

Ndi mua kutangalaja Lumu Luimpa lua Yezu Kilisto.

• Bua kuambuluisha bana beba bua kumvua Dilongesha ne Bipungidi 33:8–10, udi mua kubabikila bua bateta bua kuamba tshiambilu mukana mukanga pawudi wewa anyi bana beba bakuabu nubuka tshidibu bamba. Bala kanungu 8–10 ne balomba bua bakangula mukana muabu musangu onsu udi tshiambilu “kangulayi mukana muenu” tshiambuludibua. Buatshinyi Tatu wa mu Diûlu mmusua bua tukangula mukana muetu ne tutangalaja lumu luimpa kudi bakuabu? Tshinyi tshitudi mua kuambila dîku dietu ne balunda betu pa Mupandishi anyi pa lumu luimpa luenda? Udi mua kuimba musambu pa ditangalaja lumu luimpa, bu mudi “We’ll Bring the World His Truth” (Children’s Songbook, 172–73).

• Ela meji bua kutangalaja dimanya diudi nadi pa nshindamenu anyi malaya mu Dilongesha ne Bipungidi 30–34. Tshinyi tshiudi mulonga anyi mumvua pa Mupandishi ne pa mudimu wenda pawudi umusadila?

Kudi mishindu ya bungi ya kutangalaja lumu luimpa.

Jadika bua mabenesha malaya. Pawudi ubikila bana bua kuteka nshindamenu wa lumu luimpa mu tshienzedi, udi mua kutangalaja malaya adi Nzambi muenza bua bantu badi bateka nshindamenu awu mu tshienzedi. Tshilejilu, udi mua kufila bujadiki bua mabenesha adiye mutupesha patudi tukangula mukana muetu ne tutangalaja lumu luimpa.

Dilongesha ne Bipungidi 33:12–13

Ndi mua kuibaka moyo wanyi pa lumu luimpa lua Yezu Kilisto.

• Udi mua kupatula bana beba pambelu bua kutangila tshishimikidi tshia nzubu wabu anyi nzubu wa Ekelezia ne bakonka bua batshiumvuija. Buatshinyi nzubu udi dijinga ne tshishimikidi tshikola, tshishila? Bala nabu Dilongesha ne Bipungidi 33:12–13, ne abanyanganayi ngumvuilu pa mushindu udi Mukalenga musua bua tuibaka nsombelu yetu pa lumu luimpa luenda. Buatshinyi “lubuebua” ludi muaku mulenga bua kumvuija lumu luimpa? Mushindu kayi utudi mua kuibaka mioyo yetu pa lubuebua lua lumu luimpa? (tangila kabidi Matayo 7:24–29).

Bua ngenyi ya bungi, tangila bualu bua ngondu ewu bua makazina a Mulunda.

Ndayi mu Tshipela, kudi Robert T. Barrett