“Mêyi a Dipinguluja: Bakakudimuna moyo ba Bangabanga,” Luaku, Undonde—Bua mu Dîku ne mu Ekelezia: Dilongesha ne Bipungidi 2025 (2025)
“Bakakudimuna moyo ba Bangabanga,” Luaku, Undonde—Bua mu Dîku ne mu Ekelezia: Dilongesha ne Bipungidi 2025
Mêyi a Dipinguluja
Bakakudimuna moyo ba Bangabanga
Nansha kumpala kua ndongoluelu wa Ekelezia mu 1830, Mukalenga wakamba ne, budimi bukadi butoka bua kunowa (Dilongesha ne Bipungidi 4:4). Dimanyisha edi diakamueneka dilelela mu ngondu ya kalonda, pavua bakebi ba bulelela balombodibua ku Nyuma wa Nzambi bua kupeta Ekelezia mupingaja wa Yezu Kilisto.
Ba bungi ba ku bakakudimuna moyo ba bangabanga bavua ne mushinga mu dienza dia tshishimikidi tshia Dipinguluja, ne miyuki ya dikudimuna diabu dia moyo idi mimpa buetu lelu. Ditabuija divuabu baleja didi ditabuija dia momumua ditudi nadi dijinga bua kukudimuna moyo ku lumu luimpa lua Yezu Kilisto.
Abigail Calkins Leonard
Pavua Abigail Calkins Leonard muikala mu bidimu makumi asatu, wakajinga bua kubuikidibua bua mibi yenda. Uvua ubala Bibiliya ku mpukampuka, ne bantu ba mu ekelezia wa Bena Kilisto bavua bamukumbula ku nzubu kuenda, kadi uvua ne tshibuejakaji pa dishilangana dia ekelezia umua ne mukuabu. “Dinda dikuabu,” muakambaye, “ngakangata Bibiliya wanyi ne ngakaya mu mitshi, pa ngakatua binu.” Wakasambila ne kalolu kudi Mukalenga. “Katataka ngakamona tshimônyi tshipita ku mesu kuanyi,” ki muakambaye, “ne bitanda bishilangana bipita tshiumua ku tshiumua kundi, ne dîyi kumbikila dingambila ne: ‘Idi mibakibua bua kupeta biuma. Pashisha, pa mutu, ngakamona bukenka bukola, ne dîyi difuma mulu dimbikila: ‘Nenjula kasumbu ka bantu, bangasanka nabu ne nembabenesha.’” Mutantshi mukesa mupita, Abigail wakumvua bakula pa Mukanda wa Molomo. Nansha muvuayi kayi nansha ne mukanda, uvua ukeba bua “kumanya bulelela bua mukanda eu, ku dipa ne ku bukola bua Nyuma wa Tshijila,” ne “katataka kumvuaye buikadi buawu.” Ndekelu, pavuayi mukumbana bua kubala Mukanda wa Molomo, uvua “pabuipi bua kuwupeta.” Yeya ne bayenda, Lyman, bakatambuishibua mu 1831.
Thomas B. Marsh
Pavua Thomas B. Marsh muikala nsonga mukulumpa, wakalonga Bibiliya ne wakabuela mu ekelezia wa Bena Kilisto. Kadi kavua musankishibua, ndekelu wakalekela ekelezia yonsu. “Mvua ne katupa ka nyuma wa buambi,” muakambaye, “ngakambila [mulombodi wa ntendelelu] ne ndi muindila ne ekelezia mupia-mupia neajuka, muikala ne bulelela mu bukezuka buabu.” Kakuyi mutantshi mula ku tshiotshi etshi, Thomas wakumvua nyuma umusaka bua kumbuka ku nzubu wenda wa mu Boston, Massachusetts, ne kuenza luendu ku west. panyima pa mujimija ngondu isatu mu west wa New York kayi mupeta tshivuaye ukeba, wakabanga kupingana kuenda. Mu njila, muntu mukaji kukonka Thomas ne uvua mua kuikala mumvua bakula pa “Mukanda wa Ngolo uvua mupeta kudi nsonga uvua ne dîna dia Joseph Smith.” Mukokibua ntema ku lungenyi alu, Thomas wekenza luendu katataka ku Palmyra ne kusangana Martin Harris ku nzubu wa dipatuila, amu ne mabeji 16 a kumpala a Mukanda wa Mulomo avua afuma ku dipatuka mu tshiamu. Thomas uvua muanyishibua bua kuangata mukanda wa ku mabeji 16, waka’atuadila mukaji wenda Elizabeth, ku nzubu. “Uvua musanka bilenga” ne mukanda, mudiyi uvuluka, “witabuija ne tshivua mudimu wa Nzambi.” Pashisha Thomas ne Elizabeth bakaya ku New York ne bana babu ne bakatambushibua. (Bua ngumu ya bungu pa Thomas B. Marsh, tangila Dilongesha ne Bipungidi 31.)
Parley ne Thankful Pratt
Bu muvua Thomas Marsh, Parley ne Thankful Pratt bandamuna ku disaka dia nyuma bua kushiya tshipapu tshiabu tshinena tshia tshiamba mu Ohio ne dijinga dia kuyisha lumu luimpa muvuabu balumvua ku Bibiliya. Bu muvua Parley muambila muanabu muluma ne, Nyuma wa bintu ebi uvua ne buenzeji bua bungi mu meji anyi musangu eu ne ntshivua mua kuikisha to.” Pakafikabu ku esta wa New York, Parley uvua musakibua bua kushala mutantshi mu ntenji au. Thankful, bakapangadika bua kutungunuka nkayabu kabayi nenda. “Ndi ne mudimu wa kuenza mu tshitupa etshi tshia ditunga,” ke muvua Parley mumuambila, “ne mudimu kayi, anyi mutantshi bula kayi bua kuwukumbaja, ntshiena mumanya to, kadi ndi ndua padiwu ukumbana.” Koku eku ki kuvua Parley mumvua bua musangu wa kumpala bua Mukanda wa Molomo. “Ngakumvua bukoki bua pa buabu mu mukanda,” ke muakambaye. Wakalomba mukanda umua ne wakaubala butuku bujima. Mu dinda, wakamanya ne mukanda uvua mulelela, mu diunemesha ne “mupita mabanji onsu a pa buloba.” Matuku makesa apita Parley wakatambushibua. Pashisha wakapingana kudi Thankful, yeya wakatabushibua kabidi. (Bua ngumu ya bungi pa Parley P. Pratt, tangila Dilongesha ne Bipungidi 32.)
Parley P. Pratt Ubala Mukanda wa Molomo, kudi Jeffrey Hein
Sidney ne Phebe Rigdon
Mu njila wenda umbuka ku New York mu tangila ku bukenji mu Missouri, Parley Pratt ne bena dienda bakimana mu Mentor, Ohio, ku nzubu wa Sidney ne Phebe Rigdon—balunda ba kala ba Parley mubamanya pavuaye mu Ohio. Sidney uvua muena mudimu muena Kilisto, ne Parley uvua tshidimba tshia nsangilu wenda ne uvua mutekibua bu muludiki mu nyuma. Parley wakambila balunda benda ne disanka pa Mukanda wa Molomo ne pa Dipinguluja dia lumu luimpa lua Yezu Kilisto. Sidney nkayenda uvua ukeba dipunguluja dia Ekelezia mulelela uvuaye musangana mumvuija mu Dipungila Dipia-dipia, nansha muvuaye kayi witaba pa Mukanda wa Molomo kumpala. “Kadi nembala mukanda weba,” wambila mulunda wenda Parley, “ne nendienzeja bua kukenketa, netshidi mua kuikala dibuluila dia kudi Nzambi anyi to.” Panyima pa mbingu ibidi ya dilonga ne disambila, yeya ne mukaji wenda bakatuishibua ne mukanda uvua mulelela. Kadi Sidney uvua mumanya kabidi ne kubuela mu Ekelezia netshikala mulambu munena bua dîku dienda. Uvua bushuwa mua kujimija mudimu wenda wa busadidi, ne bunema buenda bua nsombelu wa mu musoku. Nanku yeya ne Phebe bakayukilangana pa bualu ebu, Phebe wakamba ne, “Ngakabala mushinga, ne … tshidi dijinga dianyi dia kuenza disua dia Nzambi, nansha moyo anyi lufu bilua.”