Mêyi a Dipinguluja

Emma Hale Smith

Mêyi a Mukalenga kudi Emma Smith adi mandikibua mu Dilongesha ne Bipungidi 25 adi abuluila tshivuaye umvua buenda ne dikuatshisha dienda divuaye mua kuenza ku mudimu wenda. Kadi Emma uvua bu nganyi? Tshinyi tshitudi bamanya pa bumuntu buenda, malanda enda, makankamana enda? Mushindu umua utudi bamanya “mukaji musungula” ewu (Dilongesha ne Bipungidi 25:3) udi dibala dia mêyi a bantu bavua bamanya bumuntu buenda.

Joseph Smith Muana, bayenda

“Ne disanka kadiyi kuamba, ne luendu lua disanka diuwuja munda muanyi diba dinguvua mukuata ku tshianza, butuku abu, munanga wanyi Emma—yeya uvua mukaji wanyi, mena mukaji wanyi wa ku bunsonga; ne disungula dia mutshima wanyi. Bia bungi bivua mizakalu ya meji anyi pamvua mbandila mutantshi manaya atuvua babikidibua bua kupitshisha. Mutshioku, ne midimu mikola, tunyinganyinga ne makenga, ne masanka ne masambi bia ku diba ne ku diba bivua mu njila yetu ne bibuikila bunena buetu. O! disambakana kayi dia ngenyi divua diuja meji anyi bua mutantshi awu. Kabidi udi apa, nansha mu masumpakana a muanda muteketa, kayi utshina, mukamakana, ne kayi unyungana, kayi ushintuluka, ne wa dinanga Emma.”

Lucy Mack Smith, mamuenenda

“Pashisha uvua nsonga, ne muikala ne dijinga dinena, mutshima wenda onsu uvua mu mudimu wa Mukalenga, ne uva udisemeja bikola ku bualu bua Ekelezia ne bua bulelela. Tshionsu tshivua bianza bienda bipeta bua kuenza, uvua utshienza ne makanda enda ne kayi muela lukonku lua mutshima ne ‘Nempeta bipita bia mukuabu anyi?’ Pavua bakulu batumibua bua kuyisha, uvua wa kumpala bua kudisuila ne midimu yenda bua kubakuatshisha mu divuala bua luendu luabu, ulekela yenda midimu nansha yoyi ya mushindu kayi.”

Joseph Smith Mukulumpa, tatuenda muenu

Dibenesha dia nkambua mukulu, diamba kudi Joseph Smith Mukulumpa uvua usadila bu Nkambua Mukulu wa Ekelezia:

“Emma, mukaji wa muananyi, uvua mubeneshibua kudi Mukalenga, bua lulamatu lueba ne bulelela: neubeneshibua ne bayeba, ne usanka mu butumbi bualua kudiye: anyima weba wakatatshishibua bualu bua bubi bua bantu badi mu dikeba bua kubutula muineba, ne anyima weba mujima uvua muela mu disambila bua disungila dienda: sanka, bualu Mukalenga Nzambi weba wakumvua disengelela dieba.

“Udi mukenga bua dipapisha dia mutshima dia nzubu wa tatueba ne uvua musua lupandu luabu. Mukalenga neanemeka mbila yeba, ne ku malumbuluisha enda neenza bua bamua ba kubobu bamona matomboka abu ne bakudimuna mutshima bua bubi buabu; ne nebikala ku lutatu ke kua pandishibuabu. Neumona matuku a bungi; eyowa, Mukalenga neakuepula too pawikala musankishibua, bua umona Musungidi weba. Moyo weba neusanka mu mudimu munena wa Mukalenga, ne nansha muntu umua kakukumbusha disanka dieba dia kudiye.

“Neuvuluka bupuekela bunena bua Nzambi weba mu dikuanyishila bua kushindikija muananyi pavua muanjelu mu mupatuila miandiku ya Bena Nefite bua ayilama. Uvua mumona kanyinganyinga ka bungi bualu Mukalenga uvua muangata basatu ba ku bana beba: mu tshiotshi kuena mupishibua to, bualu mumanya dijinga dieba dia bushuwa, bua kuenza dîku bua ne dîna dia muananyi dibeneshibua. Ne mpindiewu, mona, ndi nkuambila, ne mudi Mukalenga wamba, pawudi witabuija neubeneshibua mu tshintu etshi ne neulela bana bakuabu, ku disanka ne disankishibua dia anyima weba, ne ku disanka dia balunda beba.

“Neubeneshibua ne lumvu, ne bukola bua kulongesha ba mamu. Longesha kudi dîku dieba mu bululama, ne kudi bana beba njila wa moyo, ne banjelu ba tshijila nebakukuba: ne neupandishibua mu bukalenga bua Nzambi; koku. Amena.”

Emma Smith ne bana benda. Diba dia Kuseka, kudi Liz Lemon Swindle

Biakumanya

1. Tshibejibeji, Ngondu wa Dikumi ne Muibidi 1841–Ngondu wa Dikumi ne Muibidi 1842, 164, josephsmithpapers.org; bitudilu biakaja.

2. Lucy Mack Smith, History, 1844–1845, book 13, 7–8, josephsmithpapers.org; muakulu muakaja.

3. Dibenesha dia kudi Joseph Smith Mukulumpa, 9 Ngondu wa Dikumi ne Muibidi 1834, Patriarchal Blessing Book 1, 4–5, josephsmithpapers.org; bisumbu bia milongu bishintulula ne mfundilu muakaja.