Ngondu Muibidi 24–Ngondu Muisatu 2: Anyima Idi ne Mushinga Munena

Dilongesha ne Bipungidi 18

Kudi mishindu mishilangana bua kuidikija dipima dia mushinga wa muntu. Tshipedi, dilonga, bubanji, ne muenekelu wa mupimbu bidi mua kulenga mushindu utudi mua kupima yonsu wa kutudi —ne tuetu nkayetu. Kadi ku mesu kua Nzambi, mushinga wetu udi bualu bupepela, ne bidi bilejibua patoka mu Dilongesha ne Bipungidi 18: Vulukayi ne anyima idi ne mushinga munena kumpala kua Nzambi (kanungu 10). Bulelela bupepela ebu budi bumvuija bikola tshidi Nzambi wenza ne buatshinyi udi utshienza. Buatshinyi uvua muludika Joseph Smith ne Oliver Cowdery bua bashindamija Ekelezia wa Yezu Kilisto mu tshikondu tshietu? (tangila kanungu 1–5). Bualu anyima idi ne mushinga munena. Buatshinyi udi mupesha bantu bonsu mukenji konsu kudibu bua kudimuna mutshima ne utuma Bapostolo bua bayisha dikudimuna mutshima? (kanungu 9). Bualu anyima idi ne mushinga munena. Ne buatshinyi Yezu Kilisto wakakenga lufu mu musunyi ne kusâma kua bantu bonsu? (kanungu 11). Bualu anyima idi ne mushinga munena. Nansha pikala umua wa ku misuka eyi usungula bua kuitaba dipa dia Mupandishi, udi usanka, bualu disanka dienda didi dinena bua anyima udi ukudimuna mutshima (kanungu 13).

Ngenyi bua Kulonga ku Nzubu ne ku Ekelezia

Dilongesha ne Bipungidi 18:1–5

Yibakayi ekelezia wanyi.

Mu tshitupa 18, Mukalenga udi upesha Oliver Cowdery maludiki bua kuambuluisha mu diteka tshishimikidi tshia Ekelezia wa Yezu Kilisto. Tshinyi tshiudi ufunda pa mubelu udiye mufila—sungasunga mu kanungu 1–5? Udi mua kuela meji pa mushindu wa momumua udi mubelu wenzeka kuwudi pawudi wibaka ditabuija dieba mu Kilisto. Tshilejilu:

• Tshinyi tshiudi mujinga kumanya kudi Mukalenga? (kanungu 1).

• Tshinyi tshidi tshiumvuija kueyemena pa bintu bidi bifunda? (kanungu 3). Mushindu kayi udi Nyuma mudimuenesha kûdi ne bintu ebi bidi bilelela? (kanungu 2; tangila kabidi Dilongesha ne Bipungidi 6:22–24).

• Mushindu kayi uwudi mua kuibaka moyo weba pa tshishimikidi tshia lumu luimpa lua Mupandishi ne pa dibua dienda? (kanungu 5).

Ela nkonku. Dilongesha ne Bipungidi didi tshipeta tshia ne nkonku idi ilombola ku dibuluila. Pawudi ulonga mifundu, andika nkonku iwudi nayi. Pashisha nana meji ne sambila bua kukeba mandamuna.

Dilongesha ne Bipungidi 18:10–13

Anyima idi ne mushinga munena kumpala kua Nzambi.

Mushindu kayi utudi tumanya mushinga wa tshintu kampanda? Tshilejilu, buatshinyi tshintu tshimua tshidi ne mushinga mukola mutamba wa tshikuabu mu tshisalu? Pa udi ubala tshitupa 18 lumingu elu, nangananga tunungu 10–13, udi mua kufuanyikija mushindu udi bantu bamona mushinga ne mudi anyima ne mushinga ku mesu kua Nzambi. Elayi meji bua kupingaja dina dieba pa muaba wa miaku anyima, anyima, ne bantu bonsu. Mushindu kayi udi tunungu etu tuambuluisha muntu kampanda udi udikonka pa mushinga wenda?

Eyi idi mifundu mikuabu idi ilongesha pa mushinga wa anyima: Luka 15:1–10; Yone 3:16–17; 2 Nefi 26:24–28; Mose 1:39. Mushindamena pa mifundu eyi, mushindu kayi uwudi mua kufila tshikosu pa mushindu udi Nzambi umvua pa wewa? Udi mua kukeba kabidi mu mukenji wa Mulombodi Mukulu Dieter F. Uchtdorf “You Matter to Him” (Liahona, Ngondu wa Dikumi ne Umua 2011, 19–22) bua kupeta miaku ne biambilu biwudi mua kumanya pa mushinga kudi Nzambi.

Mushindu kayi udi Nzambi mukuleja ne udi ne mushinga munena kudiye? Mushindu kayi uditshi tshilenga mushindu uwudi umvua pa wewa ne pa bakuabu?

Tangila kabidi Joy D. Jones, “Value beyond Measure,” Liahona, Nov. 2017, 13–15; Topics and Questions, “Children of God,” Tshisangi tshia Mikanda ya Lumu Luimpa.

Dilongesha ne Bipungidi 18:11–16

Mukalenga udi usanka pandi nkudimuna mutshima.

Funda misangu yonsu miaku bu kukudimuna mutshima ne dikudimuna mutshima bidi bienzela kupitshila ku Dilongesha ne Bipungidi 18. Nana meji pa tshiudi mulonga ku miaku eyi diba dionsu diudi uyenzela. Ela meji nangananga pa tunungu 11–16. Mushindu kayi udi tunungu etu tulenga ngumvuilu weba pa dikudimuna mutshima—dikudimuna mutshima dieba ne mudimu wa kubikila bantu bakuabu bua kukudimuna mutshima ne kudilengeja? Etshi tshidi mushindu umua bua kuandika tshiudi mulonga: tela mu mulongu mishindu iwudi mua kukumbaja tshiambilu “Dikudimuna mutshima didi .”

Tangila kabidi Alama 36:18–21; Buludiki mu Mifundu, “Dikudimuna Mutshima,” Tshisangi tshia Mikanda ya Lumu Luimpa; Dale G. Renlund, “Repentance: A Joyful Choice,” Liahona, Nov. 2016, 121–24.

Diumvuija ku The Prodigal Son [ Muana Mujimina], kudi Clark Kelley Price

Dilongesha ne Bipungidi 18:14–16

Disanka didi dilua kudiambuluisha bakuabu bua balua kudi Kilisto.

Pawudi ubala kanungu 14–16, nana meji pa tshidi tshiumvuija “kubila bua dikudimuna mutshima” —ne buatshinyi tshidi tshituala disanka dia nunku. Mishindu kayi mikuabu itudi mua kupeta bua kuambuluisha bakuabu bua balua kudi Mupandishi ne bapeta difuidibua lusa? Mushindu kayi uvua bantu bakuabu batshienza bueba?

Tangila kabidi Craig C. Christensen, “There Can Be Nothing So Exquisite and Sweet as Was My Joy,” Liahona, Ngondu Muitanu 2023, 45–47.

Dilongesha ne Bipungidi 18:34–36

Ndi mua kuteleja dîyi dia Mukalenga mu mifundu.

Pikala muntu mukuabu mua kukukonka ne dîyi dia Mukalenga ndifuanangana ne tshinyi, udi mua kumuambila tshinyi? Ela meji pa lukonku elu pawudi ubala Dilongesha ne Bipungidi 18:34–36. Tshinyi tshiudi mulonga pa dîyi dia Mukalenga ku dibala dia Dilongesha ne Bipungidi? Tshinyi tshindi mua kuenza bua kuteleja dîyi dienda bimpa menamena?

Tangila kabidi “As I Search the Holy Scriptures,” Hymns, no. 277.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga.

Ngenyi bua Kulongesha Bana

Dilongesha ne Bipungidi 18:10–13

Yonsu wa kutudi udi ne mushinga kumpala kua Nzambi.

• Pawudi wewa ne bana beba nubala Dilongesha ne Bipungidi 18:10–13, elayi meji bua kupingaja mena a yonsu wa kunudi pa muaba wa anyima, anyima, ne bantu bonsu. Pashisha nudi mua kuakula pa mishindu idi tunungu etu tutuambuluisha bua kumvua mushindu udi Tatu wa mu Diûlu umvua bua yonsu wa kutudi.

• Udi kabidi mua kukonka bana beba pa bintu bidi bantu bela meji ne bidi ne mushinga. Anyi udi mua kubaleja tshintu kampanda tshidi ne mushinga kuwudi. Mushindu kayi utudi tuangata bintu bidi ne mushinga kutudi? Pashisha balekela muntu ku muntu batangila mu lumuenu. Pa tshidibu batshienza, ambila muana yonsu ne udi muana wa Nzambi ne udi ne mushinga munena. Mushindu kayi utudi mua kuleja bakuabu ne anyima yabu idi ne mushinga munena kumpala kuetu?

• Bua kushindamena pa ne bantu bonsu badi ne mushinga kudi Tatu wa mu Diûlu, bana beba badi mua kutangila tshimfuanyi tshidi ku ndekelu kua tshifundu etshi padibu babala Dilongesha ne Bipungidi 18:10–13. Kuimba pamua musambu bu mudi “Every Star Is Different” (Children’s Songbook, 142–43) udi mua kuambuluisha bua kukoleshila pa bualu ebu.

Diumvuija ku Worth of a Soul [Mushinga wa Anyima], kudi Liz Lemon Swindle

Dilongesha ne Bipungidi 18:13–16

Kutangalaja lumu luimpa kudi kutuala disanka dinena.

• Bua kusaka bana beba bua kutangalaja lumu luimpa lua Yezu Kilisto, udi mua kuyukilangana nabu pa dimanya mu tshikondu tshiwakapeta tshintu kampanda tshiwuvua musua kuabanyangana ne balunda benda anyi dîku dieba. Buatshinyi uvua musua kutshitangalaja, ne mushindu kayi uvua ditangalaja edi dikumvuija? Pashisha nudi mua kubala Dilongesha ne Bipungidi 18:13, 16. Tshinyi tshidi tshituadila Mukalenga disanka? Tshinyi tshidiye muamba tshiatutuadila disanka? Wewa ne bana beba nudi mua kuakula pa mamanya onsu anudi bamanya pa disanka dia ditangalaja dia lumu luimpa lua Mupandishi.

• Musambu pa ditangalaja dia lumu luimpa, bu mudi “I Want to Be a Missionary Now” (Children’s Songbook, 168), udi mua kuambuluisha bana beba bua kuela meji pa mishindu idibu mua kutangalaja lumu luimpa.

Dilongesha ne Bipungidi 18:34–36

Ndi mua kuteleja dîyi dia Mukalenga mu mifundu?

• Bana beba badi mua kusanka ne dinaya mudibu bateta bua kumanya mêyi a bantu bashilangana, bu mudi bidimba bia dîku, balunda, anyi balombodi ba Ekelezia. Mushindu kayi utudi tumanya mêyi a yonsu wa kudibu? Mushindu kayi utudi tumanya dîyi dia Mukalenga? Nudi mua kubala pamua Dilongesha ne Bipungidi 18:34–36 bua kuyukilangana pa lukonku elu. Nudi kabidi mua kuabanyangana mushindu unudi nuteleja dîyi dia Mukalenga mu mifundu.

Bua ngenyi ya bungi, tangila bualu bua ngondu ewu bua makazina a Mulunda.

Anyima yonsu udi mushema kudi Nzambi.