Ngondu Muisatu 10–16: Dijuka dia Ekelezia wa Kilisto

Dilongesha ne Bipungidi 20–22

Mudimu wa Mupandishi wa dituala Mukanda wa Molomo uvua mukumbana mpindiewu. Kadi mudimu wenda wa Dipinguluja uvua ufuma ku dibanga. Mu dikumbaja ku dipingajilula dilongesha ne bukôkeshi bua buakuidi, Mukalenga udi uleja patoka ku mabuluila a bangabanga ne uvua musua kabidi kupingajilula ndongoluelu mumanyika wa—Ekelezia wenda (tangila Dilongesha ne Bipungidi 10:53; 18:5). Mu Ngondu Muinayi 6, 1830, bitabuiji bapita pa 40 bakasangila mu tshibambalu tshia nzubu wa dîku dia Whitmer mu Fayette, New York, bua kujadika ndongoluelu wa Ekelezia wa Yezu Kilisto.

Bamua bantu bavua badiebeja buatshinyi ndongoluelu wa Ekelezia udi ne mushinga. Diandamuna didi mua kupetshibua, nansha tshitupa, mu mabuluila adi malamatangana ne tshisangilu tshia kumpala atshi mu 1830. Bakumvuija mabenesha avua ka’ayi mua kuikalaku bu Ekelezia mulelela wa Yezu Kilisto kavua muikala mulongolodibua ne mushindamijibua mu matuku a ndekelu to (Dilongesha ne Bipungidi 20:1).

Tangila kabidi Saints, 1:84–86; “Build Up My Church,” in Revelations in Context, 29–32.

Ngenyi bua Kulonga ku Nzubu ne ku Ekelezia

Dilongesha ne Bipungidi 20–21

Yezu Kilisto wakapingajilula Ekelezia wenda.

Buatshinyi tudi ne Ekelezia mulongolodibua? Pamuapa diandamuna dimpa didi “Bualu Yezu Kilisto wakalongolola umua.” Pawudi ulonga Dilongesha ne Bipungidi 20–22, udi mua kufunda difuanangana pankatshi pa Ekelezia uvuaye mushindamija mu tshikondu tshia kala ne udiye mupingajilula lelu. Enzela tunungu tudi tulonda bua kulonga pa Ekelezia wa Mupandishi mu tshikondu tshia kala: Matayo 16:15–19; Yone 7:16–17; Efeso 2:19–22; 3 Nefi 11:23–26; Moloni 4–5. Enzela tunungu etu bua kulonga pa Ekelezia mupingajibua: Dilongesha ne Bipungidi 20:17–25, 60, 72–79; 21:1–2. Udi mua kuandika tshiudi upeta pa dibaya dia kufunda bu mudi esthi:

	Dilongesha	Milulu	Bukôkeshi bua Buakuidi	Bambi
Ekelezia wa kala wa Kilisto	Dilongesha	Milulu	Bukôkeshi bua Buakuidi	Bambi
Ekelezia mupingajibua wa Kilisto	Dilongesha	Milulu	Bukôkeshi bua Buakuidi	Bambi

Tshinyi tshiudi ulonga ku tshibilu etshi pa tubingila tudi Yezu Kilisto mushindamija—ne mupingaja—Ekelezia wenda?

Tangila kabidi Dallin H. Oaks, “The Need for a Church,” Liahona, Nov. 2021, 24–26.

Bikila bua diabanyangana. Pawudi ubikila bantu bua kuabanyangana tshidibu balonga bobu nkayabu, nebadiumvua bakoleshibua bua kutunguluka ne dilonga dia nkaya. Tshinyi tshiudi mua kubikila bakuabu bua kuabanyangana?

Dilongesha ne Bipungidi 20:37, 75–79; 22

Milulu ya tshijila idi ingambuluisha bua kulua bu Mupandishi.

Pavua Ekelezia mulongolodibua, Mukalenga wakalongesha Bansantu benda pa milulu ya tshijila, biangata ditambula ne biakudia bia tshijila. Pawudi ubala pa milulu eyi, nana meji pa mushindu udiye ikuambuluisha bua kumvua dikulama dieba kudi Mupandishi. Tshilejilu, mushindu kayi udi milulu eyi ikuambuluisha bua kulama dipangadika dieba bua kusadila Yezu Kilisto too ne ku ndekelu? (kanungu 37). Udi mua kubala kabidi disambila dia biakudia bia tshijila (kanungu 77, 79) ne fuanyikija ne udi mubiumvua bua musangu wa kumpala. Muenenu kayi iwudi upeta?

Tangila kabidi D. Todd Christofferson, “Why the Covenant Path,” Liahona, May 2021, 116–19.

Dilongesha ne Bipungidi 20:38–60

Disadila dia Buakuidi didi dibenesha bidimba bia Ekelezia ne mêku abu.

Ukadi muela meji ne buatshinyi bivua ne mushinga kudi Mupandishi bua kupingaja buakuidi mu Ekelezia wenda? Dibala dia tshidiyi ulomba bena buakuidi bua kuenza mu Dilongesha ne Bipungidi 20:38–60 didi mua kukupesha ngenyi mikuabu. Mushindu kayi udi Mupandishi munubenesha wewa ne dîku dieba kupitshila ku mudimu udi mumvuija mu tunungu etu?

Mu dikumbaja ku aba badi bajidibua ku buakuidi, bakaji badi batekibua pa bula bua kuambuluisha mu Ekelezia badi kabidi benza ku bukôkeshi bua Nzambi padibu babuela mu mudimu wenda. Tangila mukenji wa Mulombodi Mukulu Dallin H. Oaks bua kulonga mushindu wa kubanga “The Keys and Authority of the Priesthood” (Liahona, Ngondu Muitanu 2014, 49–52).

Tangila kabidi Biena Bualu ne Nkonku, “Joseph Smith’s Teachings about Priesthood, Temple, and Women,” Tshisangi tshia Lumu Luimpa.

Dilongesha ne Bipungidi 21

Ditumikila dîyi dia Nzambi kupitshila ku bambi benda nedimpesha bukubi bua bunzambi.

Dilongesha ne Bipungidi 21:4–9 didi ne mabikila bua kulonda muambi wa Mukalenga ne malaya makola bua badi batshienza. Ngenyi idi ilonda eyi idi mua kukuambuluisha bua unana meji pa tunungu etu:

• Miaku kayi idi mu tunungu 4–5 idi yumvuija tshidi Mupandishi musua bua wenza ne miaku ya muambi wenda udi ne moyo? Buatshinyi udi umvua ne ditukija ne ditabuija bidi bikengedibua bua kutshienza?

• Nana meji pa tshimfuanyi tshidi Mupandishi muenzela mu kanungu 6 bua kumvuija mabenesha a dilonda dia muambi wenda. Tshinyi tshiudi wela meji tshidi tshiumvuija ku bibuelelu bia ku ngena? Mushindu kayi udi Mukalenga wipata makola a mîdima bueba wewa? Tshinyi tshidi tshiumvuija: diûlu didi dinyunga bua bimpa bieba?

• Tshinyi tshidi Mukalenga ukulomba bua kuenza kupitshila ku Mulombodi Mukulu wa Ekelezia udiku lelu? Mushindu kayi udi Mukalenga muwuja milayi yenda pawudi mulonda mibelu yenda?

Enza mulongu wa ngenyi iudi upeta mu tshitupa tshia mukenji wa Mukulu Elder Neil L. Andersen “The Prophet of God” (Liahona, Ngondu Muitanu 2018, 24–27):

• Buatshinyi Tudi Tulonda Muambi:

• Nsentedi pa Tshibumba:

• Kuikadi Mupapuka to:

Tangila kabidi video wa “Watchman on the Tower”, ChurchofJesusChrist.org; Topics and Questions [Biena Bualu ne Nkonku], “Prophets [Bambi],” Gospel Library [Tshisangi tshia Lumu Luimpa]; “We Listen to a Prophet’s Voice,” Hymns, no. 22.

Watchman on the Tower

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga.

Ngenyi bua Kulongesha Bana

Dilongesha ne Bipungidi 20–21

Ekelezia wa Yezu Kilisto mmupingajibua.

• Ela meji bua kuenzela mutu wa tshitupa bua Dilongesha ne Bipungidi 21, shapita 9 wa Miyuki ya mu Dilongesha ne Bipungidi, anyi video wa “Organization of the Church” (ChurchofJesusChrist.org) bua kuambuluisha bana beba bua kumvua tshidi tshifika mu dituku divua Ekelezia mulongolodibua.

  The Church of Jesus Christ Is Organized: A joyful Church meeting

• Pamuapa bana beba badi mua kutuangaja bimfuanyi bia Yezu Kilisto, tshia wenza mudimu, ditambula, ne biakudia bia tshijila ne tunungu mu tshitupa 20 (tangila tunungu 21–23, 47, 72–74, 75–79). Enzela bimfuanyi ebi ne tunungu etu bua kuyukilangana pa mabenesha atudi tupeta bualu Yezu Kilisto mupingaja Ekelezia wenda.

Dilongesha ne Bipungidi 20:37, 41, 71–74

Pandi ntambushibua ne njadikibua, ndi ndaya bua kulonda Yezu Kilisto.

• Bana beba badi mua kusanka bua kumona tshimfuanyi tshia muana utambushibua ne ujadikibua. Badi mua kuleja mushindu uditshi tshifuanangana ne maludiki adi mu Dilongesha ne Bipungidi 20:41, 71–74. Tshinyi tshitudi tulonga mu Dilongesha ne Bipungidi 20:37 pa bantu badi basua kutambushibua? Nudi mua kuimba kabidi “When I Am Baptized” pamua (Children’s Songbook, 103) anyi nudi mua kutangila video wa “The Baptism of Jesus” (Tshisangi Tshia Lumu Luimpa).

  The Baptism of Jesus

  

• Pikala bana beba bakadi batambushibua ne bajadikibua, ubakonka pa dimanya diabu. Badi ne bimfuanyi bidibu mua kuabanyangana? Akulangana nabu pa tshidibu benza bua kulonda Yezu Kilisto ne mushindu kayi udiye mubabenesha.

Dilongesha ne Bipungidi 20:75–79

Ndi mua kuangata dîna dia Yezu pa mutu panyi ne kumuvuluka misangu yonsu.

• Bana beba badi mua kukeba muaku “didisuila” mu Dilongesha ne Bipungidi 20:37 (pa ditambula) ne kanungu 77 (pa disambila dia biakudia bia tshijila). Tshinyi tshidi Yezu Kilisto musua bua tudisuila bua kuenza? Pamuapa bana beba badi mua kutangila tshintu kampanda tshidi ne dîna pa tshiotshi (bu mudi dîna dia tshiapu anyi dîna dia muntu). Tshinyi tshidi dîna edi dingambila pa tshintu etshi? Tshinyi tshidi tshiumvuija kuangata dîna dia Yezu Kilisto pa mitu petu?

• Ela meji bua dibala pamua Dilongesha ne Bipungidi 20:77 ne kukonka bana beba bua baleja malaya atudi tuenza mu tshitupa tshia biakudia bia tshijila. Pamuapa badi mua kuenza muntu ku muntu tshintu kampanda tshidibu mua kuenza bua kuvuluka misangu yonsu Mupandishi ne kubuka bienzedi bia muntu yonsu. Bilondeshila ku kanungu 77, mushindu kayi utudi babeneshibua patudi tuvuluka Mupandishi misangu yonsu?

Dilongesha ne Bipungidi 21:4–6

Yezu udi umbenesha pandi ndonda muambi wenda.

• Panyima pa dijandula mabikila ne milayi bidi mu Dilongesha ne Bipungidi 21:4–6, bana beba badi mua kutangila tshimfuanyi tshia muambi udiku lelu ne kuabanyangana tshidibu balonga anyi bumvua pa yeya. Abanyanganayi mishindu idi Yezu Kilisto munubenesha bua dilonda dia muambi wenda.

Bua ngenyi ya bungi, tangila bualu bua ngondu ewu bua makazina a Mulunda.

Oliver Cowdery Ujidila Joseph Smith, kudi Walter Rane