“24–30 ni June: ‘Curu ki na iVakavakacegu ni Turaga.’ Alama 13–16,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“24–30 ni June. Alama 13–16,” Lako Mai, Mo Muri Au—Me Baleta na iTikotiko kei na Lotu: 2024 (2024)
Droini kei Alama kei Amuleki ni rau sa sereki mai na valeniveivesu, mai vei Andrew Bosley
24–30 ni June: “Curu ki na iVakavakacegu ni Turaga”
Alama 13–16
Ena vuqa na sala, e sa vinaka sara na bula vei Amuleki kei Sisoromi mai Amonaia. E “tamata rogo levu vei ira era kilai koya,” o Amuleki ka “vuqa na wekana kei na itokani” ka “sa rawata vakalevu na iyau” (Alama 10:4). O Sisoromi e dua na loya kenadau ka dau taleitaka me “taurivaka sara vakalevu” (Alama 10:31). E yaco yani ki Amonaia o Alama kei na veisureti vakalou ni veivutuni ka “curu ki na ivakavakacegu ni Turaga” (Alama 13:16). Kivei Amuleki, Sisoromi, kei ira tale eso, na ciqomi ni veisureti oqo e gadrevi kina na solibula ka qai mani vakavuna na kena sotavi eso na dredre sara ka voleka ni sega ni taqei rawa.
Ia e dina ni sega ni yaco ga ekea na italanoa. Ena Alama 13–16, eda vulica kina na veika ena rawa ni qai yaco vei ira era vakabauta “li na kaukauwa i Karisito sa yaco kina na veivakabulai” (Alama 15:6). E na so na gauna ena yaco na veisereki, ka so na gauna ena yaco na veivakabulai—ka so na gauna e sega ni rawarawa na bula. Ia e veigauna kece, e “kauti ira cake na Turaga [na Nona tamata] vei koya, ena lagilagi” (Alama 14:11 E veigauna kece, e dau solia na Turaga na “kaukauwa, me vaka na [noda] vakabauti Karisito” (Alama 14:28 Ka veigauna kecega, na vakabauta oqori e solia vei keda na “nuitaka ni ko ni na rawata kina na bula tawamudu” (Alama 13:29 Ni o wilika na veiwase ni vola oqo, e rawa ni o vakacegui ena yalayala eso oqo, ka o na rawa ni qai kila vinaka na veika e vakaibalebaletaka o Alama ena nona tukuna na “ivakavakacegu ni Turaga.” (Alama 13:16).
Vakasama eso ni Vuli ena iTikotiko kei na Lotu
Ena vukei keda na cakacaka vakalotu ni matabete meda raici Jisu Karisito yani meda vueti.
Na vosa nei Alama ena Alama 13 e vakatakila na dina kaukauwa me baleta na kaukauwa ni matabete ni Kalou kei na kena inaki—me vakarautaki keda meda curu ki na “ivakavakacegu ni Turaga,” se na bula tawamudu (Alama 13:16). Ena rawa beka ni o vola e dua mada ga na dina ena tikina yadua ena Alama 13:1–9 Oqo eso na vakasama mo rawa ni tekivu kina:
-
Tikina 1:Na matabete e vakatokai talega me “vaka na ivakarau ni Luve ni Kalou” (raica talega na Vunau kei na Veiyalayalati 107:1-4).
-
Tikina 2:Na Kalou e vakatabui ira na bete me vukei ira na tamata me ra raica na Luvena me ra vueti.
Na cava tale o kunea? Na cava na nomu rai baleta na matabete ni o vakasamataka vakatitobu na dina eso oqo?
O sa bau vakasamataka mada na cakacaka vakalotu ni matabete me isolisoli mai vua na Kalou me vukei iko mo “rai ki vua na Luvena me baleta na veivueti”? (tikina e 2; raica talega na tikina e 16). E rawa beka ni o cakava e dua na lisi ni cakacaka vakalotu o sa ciqoma, me vaka na papitaiso, veivakadeitaki, na sakaramede, vakatikori me baleta na veikacivi, na veivakalougatataki ni veivakacegui se veivakabulai, na veivakalougatataki vakapeteriaki, kei na cakacaka vakalotu ni valetabu. Vakasamataka vakatitobu na veika o sotava ena cakacaka vakalotu vakaoqo. Vakasamataka mada na ivakatakarakara e oka kina kei na Yalo o vakila. E dusimaki iko vakacava na veicakacaka vakalotu yadua oqo kivei Jisu Karisito mo vueti kina?
Eso na tamata era nanuma ni cakacaka vakalotu—kei na lewa ni matabete me vakayacora—e sega ni gadrevi. O na sauma vakacava na vakasama o ya? Oqo e rua na itukutuku mai na koniferedi raraba e rawa ni tukuna vei iko, digitaka e dua, ka vola na isaunitaro e yaco maivei iko: Russell M. Nelson, “iYau Talei Vakayalo,” Liaona, Nove. 2019, 76–79; Dale G. Renlund, “Na Matabete kei na Kaukauwa ni Veisorovaki ni iVakabula,” Liaona, Nove. 2017, 64–67.
Raica talega na Vunau kei na Veiyalayalati 84:19–22; Ulutaga ni Kosipeli, “Covenant,” Gospel Library.
Ena vukei keda na cakacaka vakalotu ni matabete meda raici Jisu Karisito yani meda vueti.
Sa sureti au na Turaga meu curu ki na Nona ivakavakacegu.
Na veisureti mo “curu ki na ivakavakacegu ni Turaga” (Alama 13:16) e tokaruataki vakawasoma ena Alama 13. Sa rawa mo vakasaqara na veitikina yadua e basika mai kina na vosa “ivakavakacegu” ka vakasamataka vakatitobu na cava e vakavulica vei iko na tikina yadua me baleta na ibalebale ni “ivakavakacegu ni Turaga”. Na cava na kena duidui mai na vakacegu vakayago? Eda na kunea vakacava?
Raica talega na Russell M. Nelson, “Vakamalumalumutaki Vuravura ka Kunea na Vakacegu,” Liaona, Nove. 2022, 95–98; “Bau mai vei Jisu,” Serenilotu, naba 64.
Ena gauna ni noda rarawa, e dodonu meda nuitaka tikoga na Turaga.
O rairai vakataroga tiko beka, me vaka e vuqa na tamata, na cava e dau yaco kina na veika ca vei ira na tamata era saga tiko me ra bulataka na bula dodonu. Ena sega beka ni o kunea na isaunitaro ki na taro dredre oqo ena Alama 14, ia e levu na ka e tu meda vulica mai na sala erau sauma tiko kina o Alama kei Amuleki ena veika rau sotava. Na cava e vakavulica vei iko na nodrau vosa kei na ivalavala me baleta na vuna e dau vakatara kina na Turaga me ra vakararawataki na tamata yalododonu? Na ivakasala cava e rawa ni solia vei keda o Alama kei Amuleki ni da sotava tiko na veivakatovolei dredre?
Raica talega na Roma 8:35–39; 1 Pita 4:12–14; Vunau kei na Veiyalayalati 122:5–9; Dale G. Renlund, “Veika Tawadodonu Veivakacudrui,” Liaona, Me 2021, 41–45.
Dau tuvakarau e veigauna. Na gauna ni veivakatavulici e dau takali totolo yani, o koya me da vakayagataka ni ra yaco mai. E dua na gauna vakadomobula e vuravura, e kena ivakaraitaki, e rawa ni dua na madigi ni wasei ni vakavuvuli ena Alama 14 me baleta na i naki e dau vakatara ena so na gauna na Turaga na nodra vakararawataki na yalododonu.
Na bula vakatisaipeli e gadrevi kina na solibula.
E vinaka mo dou tuva talega na veika e solibulataka o Amuleki me ciqoma kina na kosipeli (raica na Alama 10:4–5; 15:16) ka vakatautauvatataka ki na veika e qai rawata (raica na Alama 15:18; 16:13–15; 34:8). Na cava e sa lomamu mo solibula kina mo tisaipeli yalodina vakalevu cake kina i Jisu Karisito?
Me ikuri ni vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.
Vakasama ni Nodra Tuberi na Gonelalai
Na kaukauwa ni matabete e vukei au meu toro voleka yani vei Karisito.
-
E dua na sala me vukei ira kina na luvemu me ra raica na sala e dusimaki keda kina vei Karisito na kaukauwa ni matabete oya me vakaraitaki vei ira na iyaloyalo ni sala e vakayagataki kina na kaukauwa vakamatabete (raica na iVola ni iYaloyalo Vakosipeli, naba 103–110). E rawa ni ra vukei iko na luvemu mo vakasamataka na sala eso e vakayagataka kina o Jisu na Nona kaukauwa (raica, me kena ivakaraitaki, Maciu 26:26–28; Marika 5:22–24, 35–43; iVola ni iYaloyalo Vakosipeli, naba 38–41). Mo qai wilika vata na Alama 13:2 ka veivosakitaka na sala e vukei keda kina na kaukauwa ni matabete meda “rai yani kina vua na Luvena na [Kalou]” ka yaco meda vakataki Koya vakalevu cake.
-
Na cava na vuna e solia kina vei keda na Kalou na cakacaka vakalotu ni matabete? Vukei ira na luvemu me ra kunea e dua na isaunitaro ena Alama 13:16 Kevaka era gadreva na veivuke me ra kila na cava na cakacaka vakalotu, era tiko na lisi ena iVoladusidusi Raraba, 18.1 kei na 18.2. Ena rawa beka vei iko kei ira na luvemu mo ni veivosakitaki na veika o sa sotava ena nomu ciqoma na cakacaka vakalotu oqo. E vukei keda vakacava na cakacaka vakalotu oqo me da “rai yani vei [Jisu Karisito] me bokoci noda ivalavala ca”? E dua na sere me vaka na “When I Am Baptized” (Nodra Sere na Lalai, 103) e rawa ni vukei ira na luvemu me ra vakasamataka eso tale na vuna me ra vakavinavinakataka kina na cakacaka vakalotu ni matabete.
Sa rawa ni cakava o Jisu Karisito meu savasava.
-
Ni wiliki oti vata na veitikina oqo, vakasamataka na sala eso mo vukei ira kina na luvemu me ra raitayaloyalotaka na veika era vakavulica. Ena rawa beka ni o savata vata e dua na ka. Na cava eda vakila nida duka tu? Na cava eda vakila ena gauna eda sa savasava tale kina? E tautauvata vakacava na veika eda vakila oqo ki na veika eda vakila ena gauna eda valavala ca kina ka veivutuni ka qai vakasavasavataki ena Veisorovaki ni iVakabula?
E vaqaqacotaki au na Tamada Vakalomalagi niu vakabauti Jisu Karisito.
-
Na tabana ni itaviqaravi ena macawa oqo ena rawa ni vukei iko—se na luvemu—me tukuni na italanoa ena Alama 14:18–29 (raica talega na “Chapter 22: Alma’s Mission to Ammonihah,” Book of Mormon Stories, 58–63). Vakabibitaka ni rau a vaqaqacotaki o Alama kei Amuleki ena vuku ni nodrau “vakabauti Karisito” (Alama 14:26). E rawa talega ni o tukuna e dua na gauna a vakaukauwataki iko kina na Kalou “me vaka na [nomu] vakabauta.” E rawa vakacava ni da vakataki rau o Alama kei Amuleki?
O Jisu Karisito e rawa ni veisautaka na yalo.
-
E veivakauqeti na veisau ni yaloi Sisoromi mai vei Jisu Karisito. Railesuva vata kei ira na luvemu na veika era a vulica ena macawa sa oti baleti Sisoromi. Mo ni qai wilika vata na Alama 15:3–12 me kilai na sala a veisau kina. Na cava eda vulica mai na veika a sotava o Sisoromi me baleta na kaukauwa ni Turaga? (raica na “Zeezrom Is Healed and Baptized” [vidio], Gospel Library).
Me ikuri ni vakasama tale eso, raica na ilavelave ni vula oqo ena iTokani ena kena mekasini.
Alama kei Amuleki e Valeniveivesu, mai vei Gary L. Kapp.