“10–16 ni June: ‘Ko ni sa Vakila Li na Veisau Levu Oqo e Lomamuni?’ Alama 5–7,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)

“10–16 ni June. Alama 5–7,” Lako Mai, Mo Muri Au—Me Baleta na iTikotiko kei na Lotu: 2024 (2024)

iVakatakilakila

E vakavulici ira tiko na Soramu o Alama Lailai

10–16 ni June: “Ko ni sa Vakila Li na Veisau Levu Oqo e Lomamuni?”

Alama 5–7

E a sega ni kila o Alama na veisele vakavuniwai ni uto e yaco tu nikua me yaco na bula, e sosomitaka na uto ca se tauvimate me dua na uto vinaka sara. Ia, e a kila o koya e dua tale na mataqali “veisau ni lomamuni” mana (Alama 5:26)—e dua ka solia kina vei keda na iVakabula e dua na bula vakayalo vou, me vaka na “sucu tale” (raica na Alama 5:14,49). E a raica rawa o Alama ni veisau ni lomada oqo sai koya na ka e gadreva tu e vuqa vei ira na Nifaiti. Eso era vutuniyau ka so era dravudravua, eso era qaciqacia ka so tale era yalomalumalumu, eso era veivakacacani ka so era vakararawataki ena veivakacacani (raica na Alama 4:6–15). Ia, era a gadreva kece me ra lako mai vei Jisu Karisito me ra vakabulai—me vakai keda kece. Kevaka eda sasaga tiko meda uabaleta na qaciqacia se vosota tiko na dredre, na itukutuku nei Alama e tautauvata tikoga: “Lako mai ka kakua ni rere” (Alama 7:15). Laiva me veisautaka na iVakabula na yalo sa kaukauwa, ivalavala ca, se mavoa ki na dua e yalomalumalumu, savasava, ka vou.

Vakasama eso ni Vuli ena iTikotiko kei na Lotu

Alama 5:14–33

E dodonu meu sotava—ka vakila tikoga—e dua na yalo veisau levu.

E a kaya o Peresitedi M. Russell Ballard: “Au gadreva meu dau tarogi au vakawasoma na taro oqo, ‘Sa vakacava tiko beka oi au?’ … Me idusidusi voli vei au donuya na railesu vuni oqo, au vinakata meu wilika ka vakasamataka vagumatua na veivosa kauwai e kune ena ikalima ni wase ni Alama” (“Lesu ka Ciqoma,” Liaona, Me 2017,64).

Sa rawa mo wilika na Alama 5:14–33 me vakaga o vakatarogi iko tikoga vakataki iko ka dikeva tiko na lomamu. O na vinakata beka mo vola na nomu isaunitaro ki na taro eso oqo. Na cava o sa vulica baleti iko? Na cava o sa vakauqeti kina mo cakava ena macala ni nomu veivakatarogi oqo?

Raica talega na Dale G. Renlund,“Maroroi ni Yalo sa Veivutuni,” Liaona, Nove. 2009, 97–99.

Ni da gole vua na Kalou, e rawa ni yaco vei keda na “veisau ni lomada.”

Alama 5:44–51

Au na rawata na noqu ivakadinadina baleta na iVakabula kei na Nona kosipeli mai vua na Yalo Tabu.

Ena Alama 5, ni vakamacalataka o Alama na sala a rawata kina na nona ivakadinadina me baleta na iVakabula, a sega ni tukuna na veika a sotava ni a raica e dua na agilosi (raica na Mosaia 27:10–17). A yaco vakacava vei Alama me kila vakataki koya na dina? Sa rawa beka ni o vakayagataka na veika o kunea ena Alama 5:44–51 mo vola kina e dua na “icakacaka” ni kena rawati e dua na ivakadinadina baleti Jisu Karisito kei na Nona ivakavuvuli. Na “isaluwaki” cava (dina ni kosipeli) kei na “ivakasala” (na veika eda rawa ni cakava meda vakasaqara kina na dina) a okata o Alama? Na “isaluwaki” kei na “ivakasala” cava e rawa mo kuria ki na kena icakacaka mai na veika o sotava se veika tale era sotavi ena ivolanikalou?

Alama 7

“Ia au sa raica ni ko ni sa muria tiko na gaunisala dodonu.”

Ena so na gauna eda vakataki ira na tamata e Saraemala, ka gadrevi me ra kacivi me ra veivutuni (raica na Alama 5:32). Ena so tale na gauna eda vakataki ira vakalevu cake na tamata i Kitioni, era saga tiko me ra lakova “na gaunisala dodonu” (Alama 7:19). Na cava o raica ena itukutuku nei Alama mai Kitioni (ena Alama 7) e tautauvata kei na veika a tukuna mai Saraemala (ena Alama 5)? Na duidui cava o sa raica? Vakaraica na veika a vakavulica o Alama ka na rawa ni vukei iko mo tiko ga “ena sala sa basika ki na matanitu ni Kalou” (Alama 7:19).

iVakatakilakila

ivakatakilakila ni semineri

Alama 7:7–16

Na iVakabula e a taura vei Koya na noqu ivalavala ca, mosi, kei na rarawa.

O sa bau vakila ni sega ni dua e kila vakavinaka tu na nomu sasaga dredre kei na ibolebole? Ke vakakina, na dina e vakavulica o Alama e rawa ni veivuke. Ni o wilika, vakasamataka na veika era vakavulica na veitikina oqo me baleta na inaki ni nona solibula na iVakabula. Sa rawa mo cakava e dua na pepa levu ka vola kina na ulutaga Na veika cava a vakararawataki kina na iVakabula kei Na cava na vuna a vakararawataki kina o Koya ka vola na veika o kunea ena Alama 7:7–16 (raica talega na Aisea 53:3–5). E rawa beka ni o vakasamataka eso na gauna sara ga a sotava kina o Koya eso na ka oqo? Oqo eso na ivakaraitaki mai na ivolanikalou: Maciu 4:1–13; 26:55–56; 27:39–44; Marika 14:43–46; Luke 9:58. E rawa beka ni o vakuria e dua na ka ki na nomu lisi mai na veitikina oqo?

E dua na ka me vakabauti ni a vakararawataki na iVakabula ena vukumu. Ia e vakayaco veisau vakacava ki na nomu bula e veisiga na Nona vakararawataki? Oqo eso na ivolanikalou e vakaraitaka na sala e rawa ni veivueti kina o Jisu Karisito se “vukei” iko: Inosi 1:5–6; Mosaia 16:7–8; 21:15; 24:14–15; 3 Nifai 17:6–7; Ica 12:27–29; Vunau kei na Veiyalayalati 121:7–10. Na cava o sa vulica mai na veitikina oqo? Na cava eso tale na sala e lako mai kina o Koya me vukei iko? Na gauna cava o sa bau sotava kina na Nona veivuke?

E dua na serenilotu me vaka na “Au Rai vei Kemuni” se “Au Kila ni Bula Tu” (Serenilotu, naba 51, 75) ena rawa me vakatitobutaka na nomu vakavinavinakataka na nona veivuke na iVakabula. Na malanivosa cava soti ena serenilotu oqo e vakaraitaka na yalomu ki Vua?

Raica talega na Ulutaga ni Kosipeli, “Atonement of Jesus Christ,” Gospel Library; “His Grace” (vidio eso), Gospel Library.

Vakadinadinataki Jisu Karisito Vakasamataka na sala eso e rawa ni o wasea kina na nomu ivakadinadina me baleta na iVakabula kei na Nona ituvaki vakalou, loloma soliwale, kei na loloma. Sa rawa mo vakayaloqaqataki ira na tamata o vakavulica me ra vakadinadinataki Koya ena nomu taroga na taro eso e uqeti ira me ra wasea na nodra nanuma me baleti Koya.

Me ikuri ni vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama ni Nodra Tuberi na Gonelalai

Alama 5:44–48

Au na rawata na noqu ivakadinadina mai vua na Yalo Tabu.

Me vukei ira na luvemu me ra vulica me ra tubu na nodra dui ivakadinadina, sa rawa ni o vakaraitaka vei ira na iyaloyalo e ra ka tarogi ira ena sala eda vukei ira kina na luve ni manumanu me ra tubu. E rawa ni o qai vakatauvatana oqo ni kena taqomaki na noda ivakadinadina. Na veitaqomaki cava e gadreva na noda ivakadinadina? Eda na kila vakacava ni ra sa tubu tiko?

iVakatakilakila
e rua na gonetagane kei na luve ni manumanu

Ni da ciqoma na kosipeli, e vaka ni da tekivuna e dua na bula vou.
A rawata vakacava o Alama na nona ivakadinadina kaukauwa me baleti Jisu Karisito? Sa rawa mo wilika na Alama 5:44–46 vata kei ira na luvemu me ra kunea na isau ni taro oqo. De rawa ni ra vola na luvemu e dua na ituvatuva me ra cakava e dua na ka ena macawa oqo me vaqaqacotaki kina na nodra ivakadinadina.

Alama 7:10–13

Na iVakabula a taura Vua na noqu ivalavala ca, na mosi, kei na rarawa.

O na vukei ira vakacava na luvemu me ra kila vinaka na Alama 7:10–13 me rawa ni ra kila ni kauwaitaki ira o Jisu Karisito ka rawa ni vukei ira? Sa rawa mo kerei ira me ra wasea na veigauna eso era a tauvimate kina se ra mosi se ra sotava e dua tale na leqa ka a vakavuna nodra rarawa. A vukei ira vakacava eso tale me ra yalo vinaka cake? Wasea na nomu ivakadinadina ni a vakararawataki talega na iVakabula ena veika oqori, ka tukuna e dua na gauna a vakacegui ka vukei iko kina o Koya.
Ni o wilika kei ira na luvemuni na Alama 7:11–13, vakaraica na veika a vakararawataki kina o Jisu Karisito ena vukuda. Sureti ira na luvemu me ra vakayagataka na vosa kei na malanivosa era kunea me vakacavari kina na iyatuvosa oqo: “A vakararawataki o Jisu me rawa ni vukei au o Koya.” Ena vukei keda vakacava meda kila ni sa kila vakavinaka tu o Jisu na noda sasaga dredre tiko? Eda na ciqoma vakacava na Nona veivuke? Wasea na nomu ivakadinadina me baleti Jisu Karisito.

Alama 5:14; 7:19–20

Niu muri Jisu Karisito ena vakatudeitaki au tiko ena salatu dodonu ni lesu vua na Tamada Vakalomalagi.

Me ra raica na luvemu ena iloilo ni o wilika na Alama 5:14 (raica talega na tabana ni itaviqaravi ena macawa oqo). Na cava na kena ibalebale me da ucuya na iVakabula ena keda irairai?
O na vakayagataka vakacava na ivakamacala i Alama ena salatu lesu vei Tamada Vakalomalagi me vukei ira na luvemu me ra dau digidigi vinaka? E rawa ni o wilika vei ira na Alama 7:19–20 ka laiva me ra matanataka na nodra taubale ena “sala tatakelokelo” ka taubale ena dua na sala dodonu. Vukei ira me ra vakasamataka na digidigi ka na vukei keda meda tiko ga ena salatu kei na digidigi tale eso e kauti keda tani mai na salatu. E rawa talega ni o raica vata na iyaloyalo kei Jisu ka veivosakitaka na veika a cakava o Koya me vakaraitaka vei keda na sala lesu vua na Tamada Vakalomalagi. E dua na sere me vaka na “I’m Trying to Be like Jesus” (Nodra Sere na Lalai, 78–79) e rawa ni vakarautaka eso na vakasama.

Me ikuri ni vakasama tale eso, raica na ilavelave ni vula oqo ena iTokani ena kena mekasini.

iVakatakilakila

tabana ni itaviqaravi: Au sa rawa ni ucuya na iVakabula ena kequ irairai