“17–23 ni June: ‘Ena Lako Mai ko Jisu Karisito Me Sereki Ira na Nona Tamata.’ Alama 8–12 ,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“17–23 ni June. Alama 8–12,” Lako Mai, Mo Muri Au—Me Baleta na iTikotiko kei na Lotu: 2024 (2024)
Vakavulici na Vunau Dina, mai vei Michael T. Malm
17–23 ni June: Ena Lako Mai ko Jisu Karisito Me Sereki Ira na Nona Tamata
Alama 8–12
Na cakacaka ni Kalou ena sega ni druka. Ia na noda sasaga meda veivuke ena Nona cakacaka esa na vaka e druka ena so na gauna—ena sega beka, ni da raica vakatotolo na kena macala eda nuitaka. Ena so na gauna eda na vakila beka vakalailai me vakataki Alama ena gauna a vunautaka kina na kosipeli mai Amonaia—cati, kasiviti, ka cemuri tani. Ia ena gauna a vakaroti koya kina e dua na agilosi me lesu ka tovolea tale, a “lesu kusarawa” ena yaloqaqa o Alama (Alama 8:18), ka a vakarautaka vua na sala na Kalou. E sega walega ni vakarautaka o Koya vei Alama na kakana me kania kei na vanua me tiko kina, ia a vakarautaki Amuleki talega, o koya a yaco me itokani vaka cakacaka, ka dua e tutaka vakaukauwa sara na kosipeli, ka itokani yalodina. Ni da sotava na veika e veivakadrukai ka veivakararawataki ni da veiqaravi ena matanitu ni Turaga, eda rawa ni vakananuma na sala a tokoni Alama kina na Kalou ka liutaki koya, ka sa rawa ni da nuitaka ni na tokoni keda ka liutaki keda talega na Kalou, ena gauna sara madaga ni veituvaki dredre.
Vakasama eso ni Vuli ena iTikotiko kei na Lotu
Na noqu sasaga meu wasea na kosipeli i Jisu Karisito ena gadrevi kina na vosota.
O sa bau tovolea mada mo wasea na kosipeli i Jisu Karisito vua e dua, ia a sega ni ciqomi na nomu veisureti? A sotava talega o Alama na ka oqori. Na cava o sa vulica mai vua ena Alama 8:13–16 me baleta na wasei ni kosipeli se cava ga na bolebole kei na veisaqasaqa? Tomana tiko na wiliwili ena tikina e 17–32, ka vakaraica na malanivosa e vakauqeti iko mo wasea tikoga na kosipeli, ena gauna mada ga o sega ni gugumatua kina.
O ira na parofita kei na iapositolo era sa ivakadinadina digitaki i Karisito, ka sa tiko e vuqa na ivakasala veivakauqeti me ra wasea me baleta na vakadinadinataki Koya. Raica na veika a kaya o Elder Dieter F. Uchtdorf ena “Ia Vakacava ke Dredre?” (e dua na wase ena “Cakacaka ni Kaulotu: Wasea na Veika e Tu e Lomamu,” Liaona, Me 2019, 18) se na ka a wasea o Elder Gary E. Stevenson ena “Loloma, Wasea, Sureta,” (Liaona, Me 2022, 84–87). Na cava o raica e kea e rawa ni vukea e dua ka sa tekivu me yalolailai me wasea na kosipeli?
O na vakalekalekataka vakacava na veika kece o sa vulica eke ki na dua se rua na itukutuku veivakayaloqaqataki me baleta na wasei ni kosipeli? Vakasamataka mo cakava e dua na posita se ivakaraitaki e rawa ni vakauqeti iko (kei ira tale eso) mo tovolea tikoga.
Raica talega na “Help Me Teach with Inspiration,” Serenilotu, naba 281; “Alma Is Commanded by an Angel to Return to Ammonihah” (vidio), Gospel Library; Gospel Topics, “Inviting All to Receive the Gospel of Jesus Christ,” Gospel Library.
Na veivakalougatataki ni Kalou e lako vata kei na itavi cecere.
Ni da wilika na veika era cakava na Nifaiti mai Amonaia vei ira na italai ni Turaga, e rawarawa ni guilecavi ni ra a daubulataka tu e liu na kosipeli ena dua na gauna ka “ni sa daulomani ira sara na Turaga” (Alama 9:20). Ni o wilika baleta na veivakalougatataki cecere a solia na Kalou vei ira na tamata i Nifai (raica na Alama 9:19–23), mo vakasamataka vakatitobu na veivakalougatataki cecere eso sa solia vei iko o Koya. Na itavi cava e lako vata mai na veivakalougatataki oqo? Na cava o sa cakava tiko mo dina tikoga ki na ilesilesi eso oqo?
Raica talega na Vunau kei na Veiyalayalati 50:24; 82:3; 93:39.
Na ituvatuva ni Turaga e ituvatuva ni veivueti.
Ena Alama 11–12, erau vakatoka kina o Alama kei Amuleki na ituvatuva ni Kalou me ituvatuva ni veivueti. Ni o wilika na veiwase oqo, vakasamataka vakatitobu na cava e vakayagataki kina na vosa na veivueti me vakamacalataka na ituvatuva ni Kalou. E rawa talega ni o vola e dua na ivakaleka ni ka rau a vakatavulica o Alama kei Amuleki me baleta na veitikina ena ituvatuva eso oqo.
-
Na Lutu
-
Na Dauveivueti
-
Veivutuni
-
Mate
-
Tucaketale
-
Veilewai
Raica na vakayaco-ka ni vosa nei Amuleki vei ira na tamata (raica na Alama 11:46). Ena vakayaco-ka vakacava vei iko na nomu kila na ituvatuva ni Kalou?
Raica talega na Dallin H. Oaks, “Na iTuvatuva Cecere,” Liaona, Me 2020, 93–96; “Amulek Testifies of Jesus Christ” (vidio), Gospel Library.
Kevaka au na sega ni vakaukauwataka na yaloqu, au na rawa ni ciqoma vakalevu cake na vosa ni Kalou.
Eso beka era na vakataroga na cava e sega ni vakaraitaka kina na veika kece vei keda na Tamada Vakalomalagi. Ena Alama 12:9–14, a vakamacalataka o Alama e dua na vuna. Na veitaro oqo e rawa ni vukei iko mo vakasamataka vakatitobu na veika a vakatavulica o koya:
-
Na cava e kena ibalebale mo vakaukauwataka na yalomu? Na cava na revurevu ni kena tiko e dua na yalo kaukauwa? (raica talega na Alama 8:9–11; 9:5, 30–31; kei na 10:6, 25).
-
Na cava o rawa ni cakava mo vagolea kina na yalomu vua na Kalou? (raica na Jeremaia 24:7; Alama 16:16; Ilamani 3:35).
-
Na cava o rawa ni cakava mo vakadeitaka ni vosa ni Kalou sa “kunei vei [iko]”? (Alama 12:13). Kevaka e tiko e lomamu na vosa ni Kalou, na cava na kena vatuka vei iko ena nomu “vosa,” “cakacaka,” kei na “vakasama”? (Alama 12:14).
Na cava e vakavulica vei iko na veika a sotava o Amuleki me baleta na veivakalougatataki ni yalo malumalumu? (raica na Alama 10:1–11).
Raica talega na “Alma Warns Zeezrom” (vidio), Gospel Library.
Me ikuri ni vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.
Vakasama ni Nodra Tuberi na Gonelalai
Au rawa ni wasea na kosipeli i Jisu Karisito.
-
Na tabana ni itaviqaravi ena macawa oqo e rawa ni vukei iko mo vakalekalekataka na veika a yaco ena Alama 8–10 me baleti ira na luvemu. O na gadreva beka mo vukei ira me ra kunea na ivakavuvuli ka vakavuna me rau daukaulotu vinaka o Alama kei Amuleki. Me vakataka, rau a sega ni soro (raica na Alama 8:8–13), rau a vakadinadinataki Karisito (raica na Alama 9:26–27), ka rau a cakacaka vata (raica na Alama 10:12).
-
E dua na sere baleta na cakacaka ni kaulotu, me vaka na “I Want to Be a Missionary Now” (Nodra Sere na Lalai, 168) e rawa ni solia vei ira na luvemu na vakasama eso me baleta na sala eso me ra wasea kina na kosipeli vei ira na nodra itokani. Sureti ira me ra vola na vakasama eso era kunea kei ira na tamata e rawa ni ra wasea kina na kosipeli. Sa rawa sara mada mo vakadonuya me ra matanataka na veika era na kaya se cakava.
Vakayaloqaqataka na vakaitavi Ni ko vakavakarau mo veivakavulici, ka sega ni tuvana na veika eso mo kaya, mo tarogi iko mada, “Na cava era na cakava na gone mera vuli kina?” Era na vuli vakavinaka cake na gone ka dau nanuma tikoga vakabalavu ni ra vakaitavi vagumatua.
Na ituvatuva ni Turaga e ituvatuva ni veivueti.
-
E rawa beka ni ra droinitaka na luvemu e dua na iyaloyalo ka matataka na ivakavuvuli ni ituvatuva ni veivueti, me vaka na Lutu i Atama kei Ivi, na Veisorovaki i Jisu Karisito, veivutuni, mate, tucake tale, kei na veilewai. Mo qai vukei ira mera vakasotara donu vata na nodra iyaloyalo ki na tikina eso ena Alama 11–12 e vakavulica na ivakavuvuli oqo.
E rawa niu dua na itokani vinaka.
-
Sa rawa mo sureta e dua na gone me vaka ni o koya o Amuleki kei na dua tale na gone me vaka ni o koya o Alama ni o tukuna na italanoa ena Alama 8:18–22 A itokani vinaka vakacava nei Alama o Amuleki? Sa rawa vei ira na luvemu me ra wasea na sala a nodra itokani kina e dua kei na ituvaki ni yalodra ni ra sotava oya.
-
Sa rawa mo cakava e dua na iba ni veitokani: ka raica se droinitaka e dua na iyaloyalo me matataka na veitokani ka kotiva ki na tiki ni iba. Ena daku ni veitikina yadua, vola e dua na ka eda rawa ni cakava me da itokani vinaka kina, oka kina na veika erau a cakava o Alama kei Amuleki. Sureti ira na gone me ra veivukevuke me ra digitaka e dua na tikina ka vakasotara ki na iba ni o wilika na ka e volai tu e dakuna. O cei e gadreva tu na noda veiqaravi?
E rawa ni da itokani vinaka vei ira tale eso.
Ena vukui Jisu Karisito, au na tucake tale.
-
Vakasamataka e dua na lesoni vakaraitaki vakaoqo mo vakavulica kina na Tucaketale: na ligamu e rawa ni matataka na yalomu, kei na dua na qaniliga e rawa ni matataka na yagomu. Luvata na qaniliga mai na ligamu me vakaraitaka vei ira na gone ni na veitawasei na yaloda kei na yagoda ena gauna eda mate kina. Oti mo qai vakadarama tale na ligamu ki na qaniliga me vakaraitaka ni na vakaduavatataki tale na yaloda kei na yagoda ena Tucake tale. Me ra veivukevuke na gone ena nodra dara ka luvata na qaniliga ni o wilika na Alama 11:43 vei ira. Vakaraitaka na iyaloyalo ni iVakabula sa tucaketale (raica na Kato ni iYaloyalo Vakosipeli, naba 59), ka vakadinadinataka ni o Jisu Karisito sa mai rawata vei keda kece na tucake tale.
Me ikuri ni vakasama tale eso, raica na ilavelave ni vula oqo ena iTokani ena kena mekasini.
Droini kei Alama ni kana vata tiko kei Amuleki, mai vei Dan Burr