E vunau tiko o Alama Lailai

E Vunau Tiko o Alama Lailai, mai vei Gary L. Kapp

3–9 ni June: “Era sa Tudei ka Sega ni Yavalati Rawa”

Mosaia 29–Alama 4

Eso beka era na raica na vakatutu nei Mosaia na Tui mera sosomitaki na tui maivei ira na daunilewa sa digitaki me dua na veisau vakapolitiki vuku. Ia vei ira na Nifaiti, vakabibi vei ira era bula ena vakatulewa ni Tui Noa valavala ca, ni veisau oqo sa dua e vakaibalebale sara vakayalo. Era sa raica na kena vakauqeti ira na nona tamata e dua na tui tawadododonu, ka ra sa “gadreva vakaidina sara” me ra galala mai na veivakayarayarataki vakaoqo. Na veisau oqo e vakatarai ira me sa nodra ilesilesi ga na nodra bula dodonu ka “dui saumi ga vei ira na nodra ivalavala ca” (Mosaia 29:38

E dina sara, na kena mai cava na vakatulewa vakatui e sega ni kena ibalebale ni sa mai cava kina na leqa e sotavi tu ena veimatanitu vaka Nifaiti. O ira na tamata lawaki qaseqase vakataki Neori kei Emelesai era kauta mai na vakanananu lasu, era vakacacani ira na Yalododonu na tawavakabauta, ka vuqa na lewe ni Lotu era qaciqacia ka vuki tani. Ia “o ira na tamata yalomalumalumu ni Kalou” era “tudei ka sega ni yavalati rawa” se cava ga e yaco vakavolivoliti ira tu (Alama 4:15; 1:25).

Vakasama eso ni Vuli ena iTikotiko kei na Lotu

Mosaia 29:26–27; Alama 2:1–7

Sa rawa niu veivakauqeti donu ena veika vinaka ena noqu vanua.

Ni lima ga na yabaki ki na nodra vakatulewa na dauveilewai, e tubu mai e dua na veiba ka na vakatovolei kina na itukutuku i Mosaia ni domodra na tamata era na dau digitaka ga na veika dodonu (raica na Mosaia 29:26). Vulica na Alama 2:1–7 mo kila kina na veika a yaco kei na veika era a cakava kina na Nifaiti. Na cava a rawa ni yaco ke ra a sega ni tukuna na nodra nanuma “na lewe ni lotu”? Na cava tale o vulica mai na itukutuku oqo me baleta na sala e vinakata kina na Turaga mo vakaitavi ena nomu itikotiko raraba? (raica talega na Mosaia 29:26–27).

Na cava beka na leqa bibi e sotava tiko na nomu itikotiko? Ena rawa vakacava, ni o vakataki ira na Nifaiti, mo raica me oka talega na domomu ena “domodra na tamata”? Ena sala cava tale eso e rawa kina vei iko, me vaka ni o daumuri Jisu Karisito, mo vakauqeta na nomu itikotiko raraba me vinaka?

Raica talega na Dallin H. Oaks, “Lomani Ira na Kemudou Meca,” LiaonaNove. 2020, 26-29.

Alama 1

Na vosa ni Kalou e rawa ni vukei au meu kila na ivunau lasu.

E dina ga ni a qai vakatusa o Neori ni ka a vakatavuvulitaka e lasu, sa veivakauqeti tikoga vei ira na Nifaiti na nona ivakavuvuli ena vuqa na yabaki. Na cava o nanuma era a taleitaka kina na tamata na veika a vakavulica o Neori? Ena Alama 1:2–6, vakaraica na lasu ena ivakavuvuli nei Neori—kei na dina a vakayagataka me vunitaka kina na lasu oqori.

E vorati Neori rawa o Kitioni “ena vosa ni Kalou” (Alama 1:7,9 Oqo eso na ivolanikalou e saqata na veika lasu nei Neori: Maciu 7:21–23; 2 Nifai 26:29–31; Mosaia 18:24–26; kei na Ilamani 12:25–26. Tovolea mo vakalekalekataka na malanivosa yadua ni ivolanikalou. Na cava o sa vulica mai vei ira na parofita bula era dau saqata na ivakavuvuli lasu ena noda gauna oqo?

Alama 1:19–31; 4:6–15

O ira na tisaipeli dina i Jisu Karisito era sa “daumuria na Kalou ena yalomalumalumu.”

Na Wase 1 kei na 4 ni Alama e vakamacalataka na veigauna a sautu tu kina na Lotu, ia o ira na lewe ni Lotu era a raica vakatani na lewe ni Lotu na sautu o ya. Me kena ivakaraitaki, vakatauvatana na Alama 1:19–30 vata kei na Alama 4:6–15 me raici kina na nodra veisau na lewe ni Lotu ena vica ga na yabaki. Yavutaki ena veika o sa wilika, era nanuma vakacava na daumuri Jisu Karisito dina me baleti ira na tamata e duidui nodra vakabauta? Na ivakarau ni rai cava era dau muria dina tiko na Karisito me baleta na iyau kei na bula sautu? Na cava o sa vakauqeti kina mo veisautaka ena nomu itovo ni rai?

Vakatautauvatataka na ivolanikalou ki na nomu bula. Vakasamataka matua na italanoa kei na ivakavuvuli ni volanikalou e rawa ni o bulataka. Me vakataka, o na rairai raica na tautauvata ni leqa o raica tiko nikua kei na leqa era a sotava na Nifaiti ena Alama 1–4

ivakatakilakila ni semineri

Alama 4:6–20

Na noqu ivakaraitaki kei na ivakadinadina e rawa ni veisautaka na yalo ni tamata.

E rawa beka ni o sema ki na rarawa a vakila o Alama ni raica na veika sa yaco tiko ena kedra maliwa na nona tamata. Vakasaqara na leqa a raica o koya ena Alama 4:6–15. O sa bau raica e dua na leqa tautauvata vakaoqo? De o lomaleqataka beka e dua na daulomani ka sotava tiko na dredre ena leqa oqo. O sa vakataroga beka na cava o rawa ni cakava mo veivuke kina?

Eso era na kaya beka ni o Alama, me vaka ni turaganilewa levu, sai koya na tamata vinaka duadua me walia na leqa oqo. Ia e nanuma o Alama ni tiko e dua tale na sala e vinaka cake. Ni o wilika na tikina e 16–20,, na cava e vakauqeti iko me baleta na ivakarau ni nona lewa me vukei ira na nona tamata?

E cecere sara na vakabauta nei Alama ena vosa ni Kalou kei na “ivakadinadina savasava” (tikina e 19). Na ivakaraitaki cava o sa raica kina na kaukauwa ni “ivakadinadina savasava”? Ni o vakasamataka vakatitobu na sala eso e rawa ni o wasea kina na nomu ivakadinadina baleti Jisu Karisito kei na Nona kosipeli, e rawa ni o wilika tale na Alama 4:6–14. Na cava era sa vakatakila na lewe ni Lotu ena veitikina oqo me baleta na nodra ivakadinadina baleti Jisu Karisito kei na Nona ivakavuvuli? Na cava o sa raica me baleta na vakayaco-ka ni nodra ivalavala—vakai ira kei ira tale eso? O na rairai vakasamataka talega na sala eso o sa vakalougatataki kina mai na ivakadinadina savasava ni tamata tale eso, a wasei ena vosa se ivalavala.

Vakasamataka na sala eso e rawa ni o wasea kina na nomu ivakadinadina baleti Jisu Karisito—ena vosa se ivalavala. O cei ena yaga vua na nomu ivakadinadina?

Raica talega na Gary E. Stevenson, “Na Susugi kei na Wasei ni Nomu iVakadinadina,” Liaona, Nove. 2022, 111–14; “Testimony,” Serenilotu, naba 137; “Alma the Younger Steps Down as Chief Judge” (vidio), Gospel Library; Gospel Topics, “Revelation,” Gospel Library.

Me ikuri ni vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama ni Nodra Tuberi na Gonelalai

Alama 1:2–9

E rawa ni vukei au na Turaga meu kila na ivakavuvuli lasu.

• E dua na sala me vulici kina na Alama 1:2–4 vata kei ira na luvemu sai koya me vukei ira me ra bulia e dua na kilakila mada ni dina se lasu ena kena vakayagataki na itukutuku e vakavulica o Neori, e dua na qasenivuli vakailasu. Sa rawa ni o qai veivosakitaka vata kei ira na vuna e dau semata kina o Setani na dina ena veika lasu. Vukei ira na luvemu me ra vakasamataka eso na ivakaraitaki. Ena tikina e 7–9, a vorata vakacava o Kitioni na lasu nei Neori? (Raica talega na “Wase 20: Alama kei Neori,” iTalanoa ena ivola i Momani, 54–55.)

Alama 1:19–25

Niu lewe ni Lotu i Jisu Karisito, au sa lomana ka qaravi ira na tamata.

• Eso na lewe ni Lotu ni Turaga ena gauna nei Alama era dau lomasoli ka veisolisoli, ka so na lewenilotu era a yaloca ka dokadoka. Me vukei ira na luvemu me ra vuli mai na veika oqo, sa rawa mo ni wilika vata na Alama 1:27, 30 ka vola na veimataqali tamata era a veivuke kina na lewe ni Lotu ni Turaga. O cei eda kila era “gadreva [tu] na veivuke” (Alama 1:30) ni noda loloma kei na veivuke? Sa rawa mo ni lagata vata e dua na sere baleta na loloma kei na veiqaravi, me vaka na “Kindness Begins with Me” (Nodra Sere na Lalai, 145), ka vukei ira na gone me ra vakasamataka na ivukivuki me salavata kei na sere.

• Na cava e dodonu me da cakava ni ra yaloca vei keda na tamata? Sa rawa mo wilika vata kei ira na luvemu na sala era a veiqaravi kina na imuri i Karisito ena Alama 1:19–20. Veivosakitaka na nodra ivukivuki ena tikina e 22 kei na 25. E rawa talega vei iko mo cakava eso na sala matau ena gauna era loma ca kina eso.

Alama 4:8–20

E rawa ni vaqaqacotaki ira tale eso na noqu ivakadinadina.

• E vakavuqa e rawa ni veivakauqeti vakaukauwa sara vei ira tale eso na nona “ivakadinadina yalododonu” (Alama 4:19) e dua na gone. Me vukei ira na luvemu me ra kila oqo, e rawa ni o wilika vata kei ira na Alama 4:8–12, 15, ka vukei ira me ra raica na leqa e yaco tiko ena Lotu. Na cava e rawa ni cakava o Alama me walia kina na leqa oqo? Vukei ira me ra raica na veika a nanuma o Alama me cakava ena Alama 4:16–20. Sa rawa mo ni veiwaseitaka na sala sa vaqaqacotaki iko kina na nona ivakadinadina e dua tale me baleti Karisito.

• Kevaka era gadreva na luvemu na ivakaraitaki ni cava na ivakadinadina, sa rawa mo vakaraitaka e dua na vidio ni dua e cavuta tiko na nona ivakadinadina ena koniferedi raraba. E rawa talega ni o vakayagataka na tabana ni itaviqaravi ni macawa oqo se lagata vata e dua na sere me vaka na “Testimony” (Serenilotu, naba 137). Na cava eda vulica baleta na ivakadinadina mai na veivurevure oqo? Me ra vakatovotovotaka na luvemuni na wasei ni nodra ivakadinadina.

Me ikuri ni vakasama tale eso, raica na ilavelave ni vula oqo ena iTokani ena kena mekasini.

E valuti ira tiko na Emelesaiti na Nifaiti

Alama kei Emelesai, mai vei Scott M. Snow

tabana ni itaviqaravi: E rawa ni vaqaqacotaki ira tale eso na noqu ivakadinadina.