Na Matabete kei na Kaukauwa ni Veisorovaki ni iVakabula
    Footnotes

    Na Matabete kei na Kaukauwa ni Veisorovaki ni iVakabula

    Me vakayacori na inaki nei Tamada Vakalomalagi, ena gadrevi me vakarautaki na kaukauwa ni veisorovaki i Karisito vei ira na luve ni Kalou. Era na solia na matabete na madigi oqo.

    Raitayalotaka vata kei au e dua na rokete sa muataki tiko ki na kena itavotavo me sa vakarau vukataki.Ia, raica sara na kena iwaqawaqa. Sa kama vinaka tiko na waiwai, me vuki me kasikasi katakata me cevuraki mai, me na tuvuca kaukauwa na rokete ki maliwa lala.Kena iotioti, raitayalotaka na iusana, se kako, e toka e dela ni rokete. Na yaga ni usana e kilai ga ni sa yaco ena kena vanua e gadrevi me tiko kina ka cakacaka me vakakina. E sega ni gadrevi mo dua na sainitisi ni rokete me marautaka ni dua na setilaite ni veitaratara raraba saulevu e sega ni yaga ni biu tu e valeniyaya. Na ilesilesi ni rokete o ya me vakauta na kena iusana.

    Nikua au na via vakatauvatana na matabete sa tu vei keda ki na dua na rokete kei na madigi meda kune vinaka mai na kaukauwa veisorovaki ni iVakabula ki na iusana e kauta tiko na rokete.

    Baleta na Nona solibula veisorovaki, sa tu vei Jisu Karisito na kaukauwa kei na lewa me vueta na tamata kecega.Me rawati na Nona kaukauwa ni veisorovaki, sa lesia mai o Koya e dua na tiki ni Nona kaukauwa kei na lewa vei ira na tagane e vuravura. Na kaukauwa kei na lewa sa lesi mai oqo e vakatokai me matabete. E vakatarai ira na lewe ni matabete me ra vukea na Nodrau cakacaka na Tamada Vakalomalagi kei Jisu Karisito—me ra vakabulai ka vakacerecerei na luveni Kalou.E yaco oqo me vakarautaki ira na Luvena ki na madigi me ra ciqoma na veivakalougatataki ni kaukauwa veisorovaki ni iVakabula.

    E yaga na kaukauwa veisorovaki i Jisu Karisito baleta ni sega ni rawa meda lesu rawa i vale vakalomalagi ke sega ni vukei. Ena bula oqo, eda dau cakacala ka voroka na lawa ni Kalou.Eda tauvi duka ni ivalavala ca ka sega ni vakatarai meda lesu vua na Kalou.Eda sa gadreva na kaukauwa veisorovaki ni iVakabula meda duabau tale kei Tamada Vakalomalagi.Sa mai tagutuva o Jisu Karisito na ivesu ni mate vakayago, me vueti na tamata kecega. Sa vosota na ivalavala ca, ke da talairawarawa ki na lawa kei na cakacaka vakalotu ni Nona kosipeli. Sa soli mai Vua na bula vakacerecerei. Na madigi ni kune vinaka mai na kaukauwa ni veisorovaki ni iVakabula sa iusana bibi duadua ni veibuli.

    Me vakayacori na inaki nei Tamada Vakalomalagi, ena gadrevi me vakarautaki na kaukauwa ni veisorovaki i Karisito vei ira na luve ni Kalou.1 Era na solia na matabete na madigi oqo. Sai koya na rokete. Sa ka bibi na matebete baleta ni cakacaka vakalotu kei na veiyalayalati e vuravura e caka ga ena kena lewa.Ke sega ni vakauta rawa na matabete na madigi oqo me kune vinaka mai na kaukawa veisorovaki ni iVakabula, e cava beka na kena inaki? Ena dua beka na rokete kacabote duatani ka via rogo me kilai? Sa inaki ni Kalou ki na matabete me uasivi cake mai na kena ena Siga Tabu se madigi ni veiqaravi.Sa nona inaki kina me vakauta na kena iusana.

    Na cala lalai e tiko ena rokete ena rawa me vakarusa na ilesilesi. Na idrega malumalumu kei na wawale ni dagona ena rawa me ca na rokete.Me taqomaki na matabete mai na idrega malumalumu kei na wawale ni dago, sa taqomaka na Kalou na veivakatikori kei na kena vakayagataki.2 Ena taqomaki na veivakatikori ni matabete mai na idola ni matabete, o ya na dodonu ni mataveiliutaki soli ki na tamata.3 Na vakayagataki ni matabete sa taqomaki talega ena idola ni matabete vakakina ena veiyalayalati e cakava o matabete.Na vakayagataki ni matabete sa na vakarurugi talega ena idola kei na veiyalayalati ni matabete. E soli ki na tamata yadua na ilesilesi ni nona matabete ka sega ni bula tiko vakai koya ga;4 na matabete e sega ni ivurevure lala ni kaukauwa ni galala.

    Na Matabete i Eroni kei na Melikiseteki e rau ciqomi ena veiyalayalati.5 E lewa mai na Kalou na kena lawa ka ciqoma na tamata. Ni tukuni vakararaba, era veiyalayalati na lewe ni matabete me vukea na Kalou kei na Nona cakacaka.Ena itekivu ni itabagauna oqo, e vakamacakataka kina o Jisu Karisito ni veiyalayalati ni matabete “sa vakadeitaki vei kemudou me yaga vei kemudou, e sega ni yaga walega vei kemudou, ia me yaga ki vuravura kecega … ni ra sa sega ni lako mai vei au.”6

    Oqo e vakavulica ni inaki ni matabete o ya me ra sureti na tamata me ra lako mai vei Karisito ena nodra vukei me ra ciqoma na kosipeli vakalesui mai. Sa tu vei keda na matabete meda vukei ira kina na luvena na Tamada Vakalomalagi me ra vagalalataki mai na icolacola ni ivalavala ca ka yaco me ra vakataki Koya.Mai na matabete, sa vakatakilai na kaukauwa ni bula vakalou ena nodra bula o ira kece era cakava ka maroroya na veiyalayalati ni kosipel ka ciqoma na kena cakacaka vakalotu.7 Ena sala vakaoqo, sa lako mai na kawatamata vei Karisito, vakasavasavataki, ka duavata kei na Kalou.Sa rawati na kaukauwa veisorovaki i Karisito mai na matabete, sa vakauta tiko na kena iusana.

    Sa ka bibi ka vakalou na veiyalayalati kei na Kalou. Na tamata me vakavakarau kina, vulica, ka curuma na kena veiyalayalati ena inaki me rokova kina. Sa yaco na veiyalayalati me nona bubului e dua. Ni cavuti vou na vosa nei daunivola ni Igiladi o Robert Bolt, na tamata e cakava na veiyalayalati, ena gauna ga e soli koya kina vakatabakidua ena dua na yalayala. E cakava e dua na ivakatakilakila ena tadrua ni dina ni yalayala kei na nona dodonu.Ni dua e cakava na veiyalayalati, sa tauri koya, vaka na wai, ena ikovu ni ligana.Ni na dolava na ligana, ena sega ni nuitaka me kunei koya tale. Sa sega ni tu vei koya e voroka na veiyalayalati na yalo me solia se vakadeitaka me cakava.8

    Ena veiyalayalati o lewe ni Matabete i Eroni me drotaka na butobuto, ka vukei ira eso mera duavata kei na Kalou, ka vakarau ciqoma na Matabete i Melikiseteki.9 Era sa vakayacori na ilesilesi tabu oqo ni sa veivakavulici, veipapitaisotaki, vaqaqacotaki ira na lewe ni Lotu, ka sureta na tamata mera ciqoma na kosipeli. Oqo na cakacaka ni nona “rokete.”Me kena isau, sa yalataka na Kalou na inuinui, veivosoti, nodra veiqaravi na agilosi, kei na idola ni kosipeli ni veivutuni kei na papitaiso.10

    Ena veiyalayalati o lewe ni Matabete i Melikiseteki me vakayacora na ilesilesi e sema ki na Matabete i Eroni ka vakarabailevutaka nona veikacivi ni Matabete i Melikiseteki.11 E vakayacora oqo ena nona maroroya na vunau e sema ki na veiyalayalati. E oka ena vunau oqo na “gumatua ni muria na veivosa ni bula tawamudu” ena bulataka na “vosa kecega e[lako mai] na gusuna na Kalou,”12 sa vakadinadinataki Jisu Karisito kei na Nona cakacaka ena iotioti ni gauna oqo,13 ka sega ni boletaki koya,14 ka yaco me itokani ni iVakabula, nuitaki Koya me vaka e dua naitokani.15

    Me kena isau, sa yalataka na Kalou ni na ciqoma na idola o lewe ni Matabete i Melikiseteki me kila vinaka na veika vuni ni Kalou.Ena yaco me tamata uasivi sara me rawa ni tu e mata ni Kalou.Sa rawa kina vua me cakava na nona itavi ena cakacaka ni veivakabulai. Ena vakarautaka o Jisu Karisito na sala vei lewe ni matabete ka na tiko vata kei koya. Ena tiko na Yalo Tabu ena yaloi lewe ni matabete ka ra laveti koya cake na agilosi.Ena vaqaqacotaki ka vakavoutaki na yagona. Ena taukena na veivakalougatataki nei Eparaama, vakakina vei watina, me taukei vata kei Jisu Karisito ena matanitu nei Tamada Vakalomalagi.16 Oqo na “vosa ni yalayala e levu sara ka talei.”17 E sega na yalayala cecere cake me vakaoqo.

    Na tamata yadua sa ciqoma na Matabete i Melikiseteki, sa vakadeitaka kina na Kalou Nona yalayala ena dua na bubului.18 Na bubului oqo sa baleta ga na Matabete i Melikiseteki,19 ni Kalou ga ena bubului tiko, sega o lewe ni matabete.20 Baleta ga ni okati ena cakacaka cecere oqo na Nona lewa kei na kaukauwa vakalou, sa bubului kina na Kalou, me taurivaka kina na vosa qaqa e rawata, me vakadeitaka vei keda ni Nona yalayala e veivauci ka sega ni vakasukai.

    Ena yaco na revurevu ca ni voroki na veiyalayalati ni matabete ka vakakina na gole tani mai kina.21 Na vakawaleni se cati na veikacivi ni matabete sa vaka na kena vakacurumi na wawale ni yago ki na gacagaca ni rokete.Ena vakacacana na veiyalayalati ni matabete baleta ni na vakarusa na ilesilesi.Na talaidredre ki na vunau ni Kalou ena voroka na veiyalayalati. O koya sa dau voroka na veiyalayalati, sega ni veivutuni, sa na vakasukai lesu na veivakalougatataki yalataki.

    Au sa mai kila vinaka cake na isema ni rokete ni “matabete” kei na iusana ni “madigi ni kune vinaka mai na kaukauwa veisorovaki i Karisito” ena vica na yabaki sa oti.Ena dua na mua ni macawa, a rua na noqu ilesilesi. Dua meu tauyavutaka na isevu ni iteki ni dua na vanua, kei na vakataroga e dua na cauravou, ke sa donu na ka kece, me na vakalesui na nona matabete kei na veivakalougatataki ni valetabu. A lewena na Lotu na tagane yabaki 30 oqo ni se cauravou lailai. A vakacavara vinaka na nona kaulotu.Ia ni lesu mai vale, a yali yani, ka yali talega kina nona lewena tiko na Lotu.Ni oti e vica na yabaki,“sa kilai yalona tale,”22 ka ra vukei koya na iliuliu ni matabete dauloloma kei na lewenilotu yalovinaka, ka veivutuni ka vakacurumi tale ena Lotu ena papitaiso.

    E muri, a kerea me vakalesui vua na veivakalougatataki ni nona matabete kei na valetabu. Sa lokuci sara na siga Vakarauwai ena 10:00 ena mataka e valenilotu. Niu yaco yani ki na veivakatarogi mera liu, sa tu mai o koya. Sa maqusa o koya me taura tale na matabete, sa sega tale ni via wawa o koya.

    Ena veivakatarogi, au a vakaraitaka vua na ivola ni sa raica sara ga o Peresitedi Thomas S. Monson na nona kerekere ka vakadonuya na veivakatarogi. A qai tagi na cauravou yaloqaqa oqo. Au a mani kaya vua ni sega ni vakaibalebale ena bula oqo na tikinisiga ni neirau veivakatarogi. A veiraiyaki o koya. Au a kaya vua ni oti noqu vakalesua nona veivakalougatataki, na nona itukutuku ni lewenilotu ena vakaraitaki ga kina na imatai ni papitaiso, veivakadeitaki, tabaki ni matabete, kei na tikinisga ni edaumeni.A luluvu tale.

    Au a kerei koya me wilika na Vunau kei na Veiyalayalati:

    “Raica ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale na nona ivalavala ca.

    “Ena ka oqo dou na kila kina na tamata sa veivutunitaka vakaidina na nona ivalavala ca—raica, ena tusanaka, ka biuta laivi sara vakadua.”23

    Sa baci tonawanawa tale na matana.Au sa qai tabaka na uluna ena yaca i Jisu Karisito, ena lewa ni Matabete i Melikiseteki, kei na lewa ni Peresitedi ni Lotu, au a vakalesua vua na nona veivakalougatataki ni matabete kei na valetabu.

    A vakilai vakalevu na marau a curumi keirau. Sa kila o koya ni sa vakadonui tale me taura ka vakayagataka na matabete ni Kalou. Sa kila ni nona vakalougatataki ni valetabu sa vakataucokotaki tale.A kalawa ena marau ka ramase sara mai na kena irairai. Au a qoroi koya vakalevu ka vakila ni sa qoroi koya na Tamada Vakalomalagi.

    Ni oti o ya, a tauyavu sara na iteki. Era tiko ena soqoni na Yalododonu mamarau, ka yalodina, ka ratou tokoni na mataveiliutaki totoka ni iteki.Ia, vei au, na itukutuku ni veigauna ni tauyavutaki na imatai ni iteki ena dua na vanua a uabaleti ena reki au a vakila niu vakalesua na veivakalougatataki vei cauravou oqo.

    Au raica ni inaki ni tauyavutaki e dua na iteki, se vakayagataka na matabete ni Kalou ena sala cava ga, sa vukea tiko na Nodrau cakacaka na Tamada Vakalomalagi kei Jisu Karisito—me soli na madigi ni veivueti kei na nodra bula vakacerecerei na luvena yadua na Kalou.Me vaka na inaki ni rokete o ya me vakauta na iusana, sa na solia tiko na matabete na kosipeli i Jisu Karisito, me rawa kece ni da veiyalayalati ka ciqoma na kena cakacaka vakalotu. Sa rawa ni vakayagataki “na dra ni veisorovaki i Karisito”24 ki na noda bula ni da vakila na veivakauqeti savasava ni Yalo Tabu ka ciqoma na veivakalougatataki yalataki ni Kalou.

    Me ikuri ni nomu talairawarawa ki na lawa kei na cakacaka vakalotu, au sureti iko mo cakava ka maroroya na veiyalayalati ni matabete. Ciqoma na bubului ni Kalou kei na Nona yalayala. Vakarabailevutaka na nomu ilesilesi ena matabete mo vukea na Tamada Vakalomalagi kei Jisu Karisito.Vakayagataka na matabete me vukea na kena solia rawa na matabete na madigi oqo me kune vinaka e dua mai na kaukawa veisorovaki ni iVakabula! Ni ko cakava, ena yaco vei iko kei na matavuvale na kalougata cecere. Au vakadinadinataka ni bula tiko na Dauveivueti ka dusimaka tiko na cakacaka oqo, ena yaca i Jisu Karisito, emeni.