Julai 1–7: “Au na Qisi Kemudou Mo Dou iYaya ni Cakacaka” Alama 17–22
“Julai 1–7: “Au na Qisi Kemudou Mo Dou iYaya ni Cakacaka” Alama 17–22,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2023)
“Julai 1–7. Alama 17–22,” Lako Mai, Mo Muri Au—Me Baleta na iTikotiko kei na Lotu: 2024 (2023)
iVakatakilakila
Vosa tiko o Amoni vei Tui Lamonai
Amoni kei Lamonai na Tui,, mai vei Scott M. Snow
Julai 1–7: “Au na Qisi Kemudou Mo Dou iYaya ni Cakacaka”
Vakasamataka na ulubale kece era na kaya na tamata ni sega ni wasei tu na kosipeli: “au sega ni kila vinaka sara” se “au sega ni vakadeitaka ni ra na maleleta” se “au madua niu na vakasevai.” Rairai o sa na vakasamataka tu na veika oqo ena so na gauna. A tiko e dua tale na vuna era sega ni wasea kina na kosipeli na Nifaiti vei ira na Leimanaiti: sa vakatokai mera “tamata kila, yalo kaukauwa ka itovo vakarerevaki; na mata tamata dau rekitaka me labati ira na Nifaiti” (Alama 17:14; raica talega na Alama 26:23–25). Ia sa kaukauwa sara na nodratou inaki na luvei Mosaia ni nanuma tu ni sa dodonu me ratou wasea na kosipeli vei ira na Lemanaiti: “Era sa gadreva me tukuni yani na veivakabulai vei ira na tamata kecega, ka ni ra sega ni vinakata me rusa e dua na yalo ni tamata” (Mosaia 28:3). Na loloma qo e vakauqeti Amoni kei ratou na tacina sa rawa talega ni vakauqeti iko ni wasea na kosipeli ki na nomu matavuvale, veitokani, kei na veikilai—o ira sara madaga ka na rairai sega ni ciqoma.
Sa veivuke na cakacaka rawarawa, matau eso ni yalodina vei Karisito meu ciqoma kina na Nona kaukauwa.
Na cava o vulica ena Alama 17:1–4 me baleta na kena vaqaqacotaki tu na nomu vakadinadina kei na yalodina kivei Jisu Karisito? Na cava e ratou cakava na luvei Mosaia, ka sa vakalougatataki iratou vakacava na Turaga?
Ni o wilika na veika e ratou sotava na luvei Mosaia ena Alama 17–22, dikeva na sala a vukea kina na nodratou veiqaravi na nodratou vakavakarau vakayalo ena kedra maliwa na Leimanaiti (me ivakaraitaki, raica na Alama 18:10–18, 34–36; 20:2–5; 22:12–16). Na cava o sa vakauqeti tu ni cakava mo muria kina na nodra ivakaraitaki?
Na itukutuku ni saumaki eso eda wilika tu ena ivolanikalou sa kilai levu sara, ia ena kena lomadonu eda raici ira na tamata ka yaloqaqa tu ni tukuna ka wasea na nodra vakabauti Jisu Karisito. Vakasamataka qo ni o wilika na veika e baleti Apisi kei iratou na luvei Mosaia ena macawa oqo.
Cava o nanuma e vakaibalebaletaki ki na yaya ni cakacaka ena liga ni Kalou? Ena rawa ni veivuke mo vakasamataka na yaya ni cakacaka eso o rawa ni vakayagataka ena nomu bula e veisiga. Ena Alama 17:6–12, vakaraica na ka ratou a cakava na luvei Mosaia me rawa kina ni ratou iyaya ni cakacaka ena liga ni Kalou. O rawa vakacava ni dua tu na yaya ni cakacaka yaga ena vukei ni tani mera lako mai kivei Karisito?
Na cava e vakauqeti iko me baleti Apisi ena Alama 19:16–36? Na cava o vulica mai vua ena nodra vukei na tani ni tara cake nodra vakabauti Karisito? Me ivakaraitaki, na cava o nanuma ena vukei ira na tamata o lomana me ra “vakabauta na kaukauwa ni Kalou”? (Alama 19:17).
O rawa talega ni vakatauvatana na veika a sotava o Apisi ki na ivakavuvuli e vakatavulica o Elder Dieter F. Uchtdorf ena “Cakacaka ni Kaulotu: Wasei ni Ka e Tiko e Lomamu” (Liaona, Me 2019, 15–18). A vakaraitaka vakacava o Apisi na “Lima na Vakatutu Rawarawa” i Elder Uchtdorf? Tovolea mo vola eso na ka o rawa ni tukuna me baleti Jisu Karisito. Me ivakaraitaki, “Vei au, o Jisu Karisito” se “Sa vukei au na iVakabula”
Raica talega na Ulutaga Vakosipeli, “Veiqaravi me Vakataka na iVakabula,” Gospel Library; “Cina Caudre ni Loloma,” Serenilotu, naba 199; “Come and See,” “Come and Help,” “Come and Belong” (vidio), Gospel Library.
Vakayagataka na lesoni vakaraitaki. Na gauna cava ga era raica se tara kina na tamata e dua na ka e semati ki na ka era sa vulica tiko, sa rawa ni ra nanuma tu vakabalavu. Kevaka o vakavulica tiko na Alama 17:11, me ivakaraitaki, navuca mo vakaraitaka na yaya ni vakatagi se yaya ni volavola eso ena vakauqeta na veivosaki me baleta na yaya ni cakacaka tu ena liga ni Kalou.
Ni da vakaraitaka na loloma vei ira na tani, sa rawa ni da vukei ira ni ciqoma na kosipeli i Jisu Karisito.
Vakaraica na tikina eso ena Alama 17–19 e vakaraitaka na sala a veivakauqeti kina na loloma i Amoni me baleti ira na Leimanaiti ena nona sasaga ni wasea na kosipeli i Jisu Karisito. Na dina cava tale eso me baleta na wasei ni kosipeli o sa vulica mai na ivakaraitaki oqo?
Raica talega na “Ammon Serves and Teaches King Lamoni” (vidio), Gospel Library.
iVakatakilakila
Vakabula tiko o Amoni na sipi ni tui
Teichert (1888–1976), O Amoni e Vakabula na Qele ni Sipi ni Tui,1935-1945, iboro waiwai ena papa masonite, 35 x 48 na idi. Vale ni Maroroi Cakacakaniliga e Brigham Young University, 1969.
Ni oti nona vakamacalataka na saumaki nei Lamonai kei ira na nona tamata, a vakalekalekataka o Momani na itukutuku ena dua na rai me baleti Jisu Karisito. Na cava e vakatura na Alama 19:36vei iko me baleta na itovo ni Turaga? Na cava tale e vakavulica vei iko na itukutuku ena Alama 19:16–36 me baleti Koya? Na gauna cava o sa bau vakila kina ni sa dodo tu vei iko na liga ni Turaga?
Veidutaitaka vata na ka a tuvakarau o tamai Lamonai me sorovaka na nona bula (raica na Alama 20:23) ena veika a qai tuvakarau e muri me soro me ciqoma na reki ni kosipeli ka kila na Kalou (raica na Alama 22:15, 18). Vakasamataka vakatitobu na veika o sa tuvakarau mo solibula me rawa ni o kila vakataucoko kina na Kalou.
Me baleta na vakasama tale eso, raica na ilavelave ni vula oqo ni Liaona kei na mekasini ni Me iSakisaki ni iTabagone.
E tubu na noqu ivakadinadina niu wilika na ivolanikalou, masu, ka lolo.
Ena vukei ira vakacava na luvemu na ivakaraitaki ni luvei Mosaia tagane mera tara cake na nodra ivakadinadina baleti Jisu Karisito? E rawa ni o vukei ira na luvemu me ra raica na veika e ratou a cakava na luvei Mosaia me ra tara cake na nodra kaukauwa vakayalo ena Alama 17:2–3. Mera qai droinitaka na iyaloyalo se vaqara eso na iyaya e matataka na veika oqo. Vukei ira me ra tuva na veika era na cakava me vaqaqacotaki kina na nodra ivakadinadina me baleta na iVakabula.
Mo vulica me baleta na iyaya ni cakacaka ena liga ni Kalou, me vakataki iratou na luvei Mosaia, o iko kei ira na luvemu e rawa ni o raica e dua na iyaya ni cakacaka se iyaya ni cakacaka ka veivosakitaka na veika e vakayagataki kina. Mo qai wilika na Alama 17:11 ka veivosakitaka na ibalebale ni iyaya ni cakacaka nei Tamada Vakalomalagi me vukei ira na tamata me ra vulica me baleti Jisu Karisito.
Na tabana ni itaviqaravi ena macawa oqo e tiko kina na iyaloyalo eso ka matataka na dina a vakavulica o Amoni vei Tui Lamonai. E rawa ni o vukei ira na luvemu me ra kunea na dina oqo ena Alama 18:24–40. Sureti ira na gone me ra vaka ni ra daukaulotu ka veiwaseitaka vakai ira na ka era kila baleta na dina eso oqo.
Ni o wilika oti na veika baleti Apisi kei ira na luvemu (raica na Alama 19:16–20, 28–29), e rawa ni ra vakatotomuri Apisi ena nodra cici, tukituki ena katuba, ka tukuna na veika a yaco ena Alama 19:1–17. Eda na vakataki Apisi vakacava ka wasea na veika eda kila baleti Jisu Karisito kei na Nona kosipeli? E rawa ni ra droinitaka na luvemu na kedra iyaloyalo ni ra wasea tiko na kosipeli vua e dua se lagata vata e dua na sere me baleta na wasei ni kosipeli, me vaka na “Called to Serve” (Children’s Songbook, 174–75).
Au rawa ni vukei ira na tani me ra lako mai vei Karisito ena noqu vakaraitaka vei ira na noqu loloma.
Taumada, rau a sotava ruarua na tui o Lamonai kei tamana na yalodrau ki na kosipeli. E muri, a vakamalumalumutaki na lomadra, ka ra vakabauti Jisu Karisito. A yaco vakacava oqo? Vukei ira na luvemu me ra kunea na isau ni taro oqo ni o railesuva vata kei ira na veika a sotava o Amoni. E rawa ni ra matanataka na “Wase 23: Amoni:”Dua na Dauveiqaravi Levu” kei na “Wase 24: Sotava o Amoni na Tamai Tui Lamonai” (iTalanoa mai na iVola i Momani, 64–68, 69–70). Ena rawa beka ni ra droinitaka na lewe ni vuvale na iyaloyalo e so ni veitikina duidui ena italanoa ka vakayagataka na iyaloyalo oqori me tukuna na italanoa. Na cava a cakava o Amoni me vukei Lamonai kei tamana me dolava na yalodrau ki na kosipeli i Jisu Karisito? (raica na Alama 17:21–25; 20:8–27; 22:1–3).
Ena rawa beka vei iko kei ira na luvemu mo vakasamataka e dua e gadreva me kila me baleti Jisu Karisito. Vukei ira me ra vakasamataka na sala eso e rawa ni ra ivakaraitaki vinaka kina ka vakaraitaka na loloma vua na tamata oya, me vakataki Amoni ena vukui Lamonai kei tamana.
Me baleta na vakasama tale eso, raica na ilavelave ni vula oqo ena mekasini ni Friend .