sorenikau ena liga ni gone

July 22–28: “Tea na Vosa Oqo e Lomamuni”

Alama 32–35

Vei ira na Soramaiti, era masu ni ra duri tu ena vanua era laurai levu kina ka cavuta tiko na veivosa tawayaga ka dokai. Era sega ni vakabauti Jisu Karisito na Soramaiti—era cakitaka ni bula o Koya—ka vakararawataki ira na dravudravua (raica na Alama 31: 9–25). Kena veibasai, sa vakatavulica o Alama kei Amuleki ni masu e sa baleta vakalevu na ka e vure mai lomada mai na veika e rairai e matana votu. Ia kevaka eda sega ni yalololoma vei ira na vakaleqai tu, na noda masu sa “tawayaga, ka sega na kena yaga” (Alama 34:28). Ka bibi duadua, eda masu baleta ni da vakabauti Jisu Karisito, ka dolea tu na veivueti ena vuku ni Nona “isoro tawayalani ka tawamudu” (Alama 34:10). Na vakabauta vakaoqo, e vakamacalataka o Alama, sa yavutaki ena yalomalumalumu kei na “[gagadre meda] vakabauta” (Alama 32:27). Ni toso na gauna, ena kena vakabulabulataki tu, sa vawakana na vosa ni Kalou e lomada me yacova ni sa “vunikau tubu cake kina bula tawamudu” (Alama 32:41).

Vakasama eso ni Vuli ena iTikotiko kei na Lotu

Alama 32:17–43

Au cakacakataka na noqu vakabauti Jisu Karisito ena teivaki kei na vakabulabulataki ni Nona vosa e lomaqu.

Nio wilika na Alama 32:17–43, raica na vosa kei na malanivosa e vukei iko ni kila vakamatata na ivakarau ni kena cakacakataki na vakabauti Jisu Karisito. Na cava o sa vulica ena cava na vakabauta kei na cava e sega?

Dua tale na sala me vulici kina na Alama 32 oya mo droinitaka na yaloyalo eso e matataka na vakatagedegede duidui ni tubu ni sorenikau. Qai vakayacana na yaloyalo yadua ena vosa eso mai na Alama 32:28–43 e vukei iko ni kila vakamatata na ivakarau ni kena tei ka vakabulabulataki na vosa ni Kalou e lomamu.

Raici Russell M. Nelson talega, “Sa Tucake na Karisito; Na Vakabauti Koya ena Tosoya na Ulunivanua,” Liaona, Me 2021, 101–4.

Alama 32:26–43

Au rawa ni kila vakataki au.

Vei ira na Soramaiti ka sega ni vakadeitaka tu na ivakadinadina i Alama me baleti Karisito, a vakatura o Alama “e dua na vakatovotovo” (raica na Alama 32:26). Na vakatovotovo sa gadrevi kina na gagadre, lomatarotaro, cakacaka, kei na vakabauta lailai—ka rawa ni ra muataki ki na veika totoka e kunei rawa! Vakasamataka na vakatovotovo eso o sa raica se vakaitavi kina. Ena Alama 32:26–36, na mataqali vakatovotovo cava e rawa ni mua ki na vakabauti Jisu Karisito?

O sa “vakatovotovotaka” tu vakacava na vosa ni Kalou ka qai kila ni ”sa vinaka na vosa”? (Alama 32:28).

Alama 33:2–11; 34: 17–29

Au rawa ni qarava na Kalou ena masu, na gauna cavaga kei na vanua cavaga.

Na vakasala i Alama kei Amuleki me baleta na sokalou kei na masu a nakiti me vakadodonutaka na nodra tawakila vakatabakidua na Soramaiti. Navuca mo lisitaki ira (raica na Alama 31:13–23). Tarava na lisi oqori, rawa ni o lisitaka na ka dina eso me baleta na masu ena Alama 33:2–11 kei na 34:17–29. Ena rawa vakacava na ivakarau ni nomu masu kei na sokalou na veika o sa vulica mai na veitikina oqo?

O rawa talega ni kune veivakararamataki ena dua na serenilotu baleta na masu, vaka na “Sweet Hour of Prayer” (Hymns, no. 142).

Alama 34:9–16

Au sa gadrevi Jisu Karisito kei na Nona Veisorovaki.

Siqema na levu ni gauna e vakayagataka kina o Amuleki na vosa tawayalani kei na tawamudu me vakamacalataka kina na solibula sorovaki ena Alama 34:9–14. Cava na vuna e bibi kina me da kila ni sa tawayalani ka tawamudu na Veisorovaki ni iVakabula? Vakaraica na vosa kei na malanivosa ena veitikina oqo e vakamacalataka talega na Veisorovaki ni iVakabula: Iperiu 10:10; 2 Nifai 9:21; Mosaia 3:13.

Ena gauna mada ga eda kila kina ni sa tawayalani ka tawamudu na kaukauwa i Jisu me veivakabulai, eda rawa ni vakatitiqa eso na gauna ni sa baleti keda—se kina dua sa caka cala vei keda. O Elder David A. Bednar a tukuna baleti ira na tamata ka “rairai vakabauta tu na iVakabula, ia era sega ni vakadinata ni sa vakarautaki tu vei ira na Nona veivakalougatataki yalataki” (“Kevaka Dou sa Kilai Au,” Liaona, Nove. 2016, 104). Na cava e rawa ni tarovi keda mai na ciqomi vakaoti ni kaukauwa ni iVakabula? Vakasamataka vagumatua na sala o rawa ni kila kina ni sa tawayalani ka tawamudu na Veisorovaki i Jisu Karisito.

Mo tugana na levu ni nomu gadreva tu na Veisorovaki ni iVakabula, e rawa ni veivuke mo vakasamataka e dua na ka o gadreva e veisiga. Tarogi iko, “Ena vakacava tu na noqu bula ke sega oqo?” Oti, nio vulica na Alama 34:9–16, vakasamataka vagumatua se na vakacava tu beka na nomu bula ke sega o Jisu Karisito. Rawa nio raica na veivakararamataki tale eso ena 2 Nifai 9:7–9. O na vakalekalekataka vakacava na Alama 34:9–10 ena dua na yatuvosa?

Raici Michael John U. Teh talega, “Na Noda iVakabula,” Liaona, Me 2021, 99–101; Ulutaga ni Kosipeli, “Veisorovaki i Jisu Karisito,” Valenivola ni Kosipeli; “Reclaimed” (vidio), Gospel Library.

Alama 34:30-41

“Oqo na kena gauna kei na siga ni nomuni vakabulai.”

Raitayaloyalotaka nio via vakaitavi tu ena dua na cici balavu se ivakatagi. Na cava ena yaco kevaka o wawa toka me yacova na siga ni soqo mo qai vakarau tu? E semati vakacava na ivakaraitaki oqo kina ivakaro ni qaqarauni i Amuleki ena Alama 34:32–35? Na cava na rerevaki kina na lokuyarataki ni noda sasaga meda veivutuni ka veisau?

E tiko talega enatikina e 31 e dua na itukutuku me baleti ira na tamata ka rawa ni lomaleqataka ni ra sa lokuyara tu vakabalavu ka sa bera na veivutuni. Na cava o na kaya esa itukutuku oya?

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone .

Vakasama eso ni Nodra Vakatavulici na Gonelalai

Alama 32:1–16

Sa rawa ni vakavulici au na Turaga niu digitaka meu yalomalumalumu.

• A rawaka o Alama kei Amuleki ena nodra vakavulici na Soramaiti ka yalomalumalumu tu. Na cava na kena ibalebale meda yalomalumalumu? Vukea na luvemu mera raica na ivakamacala ni yalomalumalumu ena iDusidusi ki na iVolanikalou. Na ivakatakilakila cava tale eso ni balebale ni veivosa oqo eda rawa ni raica ena Alama 32:13–16? Sureta na luvemu mera vakacavara e dua na yatuvosa vaka na “Au sa yalomalumalumu tiko niu .”

Alama 32:28–43

Sa tubu na noqu ivakadinadina i Jisu Karisito niu vakabulabulataka.

• Na sorenikau, vunikau, kei na vuanikau eso sa yaya matau e rawa ni vukei ira na gone ni kila vakamatata na ivakavuvuli dei eso vaka na vakabauta kei na ivakadinadina. Mera taura na luvemu e dua na sorenikau ni o wilika na Alama 32:28. Mo qai kerea mera vukei iko ni vakasamataka na sala eso e sa vaka tu na teivaki kei na vakabulabulataki ni sorenikau na vakatuburi ni vakadinadina i Jisu Karisito (raica na “Wase 29: E Vakavulica o Alama na Vakabauta kei na Vosa ni Kalou,” iTalanoa ni iVola i Momani, 81). De na rawa nio tea na nomu sorenikau ka veivosakitaka na ka e gadrevi me vukea na sorenikau—se ivakadinadina—me tubu.

• E dua na yaloyalo vunikau e salavata na ituvatuva oqo; o rawa ni vakayagataka me vakamacalataka na vosa i Alama ena Alama 32:28–43. Se rawa nio lako voli mo raica na itei ena duidui ni vakatagedegede ni kedra tubu ka wilika na tikina eso mai na Alama 32 e vakatauvatana na itei bula ki na noda vakadinadina. Se rawa nira droinitaka na luvemu e dua na vunikau ena papa ka vakuria e dua na draunikau se vuanikau ena veigauna kece era vakasamataka kina e dua na ka era rawa ni cakava me vukea na tubu ni nodra ivakadinadina i Jisu Karisito.

• Sa rawa ni tovolea na luvemu mera tabaka e dua na sorenikau (matataka na vosa ni Kalou) kina dua na vatu (matataka na yalo dokadoka) kei na qele malumu (matataka na yalo malumalumu). Wilika vata na Alama 32:27–28. Veivosakitaka na ibalebale ni “vakarautaki ni tikina” (tikina e 27) me baleta na vosa ni Kalou e lomada.

Droinitaka na yaloyalo eso. Era vuli vinaka cake eso na tamata nira droinitaka na yaloyalo ni ka era sa vulica tiko. Era rawa ni marautaka na luvemu na droinitaki ni sorenikau ka tubu tu kina dua na vunikau nira vuliica na Alama 32.

Alama 33:2–11; 34:17–27

Au rawa ni masu vua na Tamada Vakalomalagi ena gauna cavaga, baleta na ka cavaga.

• Vukea na luvemu me ra raica na malanivosa eso e vakamacalataka na vanua eda rawa ni masu kina (ena Alama 33:4–11) kei na veika eda rawa ni masulaka (ena Alama 34:17–27). De rawa ni ra droinitaka na kedra yaloyalo ni masu tu ena veivanua oqo. Veiwaseitaka na veika e sotavi ni rogoca tu na Tamada Vakalomalagi na nomu masu. O rawa talega ni lagata e dua na sere ni masu, vaka na “A Child’s Prayer” (Children’s Songbook, 12–13).

Me baleta na vakasama tale eso, raica na ilavelave ni vula oqo ni mekasini Friend .

vuanikau e vuna

“Ena vuku ni nomuni gugumatua kei na vakabauta kei na vosota na vosa ka vakabulabulataka, … raica, qai yaco na gauna mo ni na betia na vuana ko ya, na ka sa taleitaki duadua” (Alama 32:42).

tabana ni taviqaravi: Au rawa ni vakabauti Jisu Karisito