25–31 marzo: “Taawakliiq chaq … chi wanq li k’irtesink sa’ xxik’.” Li Paswa
“25–31 marzo: “Taawakliiq chaq … chi wanq li k’irtesink sa’ xxik’.” Li Paswa,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“25–31 marzo. Li Paswa,” Kim, Taaqehin—Choq’ re li ochoch ut li iglees: 2024 (2023)
Jalam-uuch
li Kristo chi waklijenaq chi yoʼyo, rikʼinebʼ lix apostol
Li Kristo ut eb’ li apostol, xb’aan laj Del Parson
25–31 marzo: “Taawakliiq chaq … chi wanq li k’irtesink sa’ xxik’”
Li Paswa
Eb’ li najteril apostol kaweb’ xch’ool sa’ xch’olob’ankil xyaalal li Jesukristo ut lix waklijik chi yo’yo (chi’ilmanq Hechos 4:33). K’iila millon chi kristiaan neke’xpaab’ li Jesukristo ut neke’xyal xq’e chixtaaqenkil a’an, xb’aan li raatineb’ li tz’iib’anb’il sa’ li Santil Hu. A’ut maare toj wankeb’ li neke’xpatz’: Wi li Jesukristo a’an aj Kolol re chixjunil li ruchich’och’, k’a’ut naq moko k’iheb’ ta li ke’ilok re ut k’a’ut naq ka’ajwi’ sa’ jun ch’ina tenamit kik’ulman chixjunil a’an?
Lix Hu laj Mormon wan choq’ jun chik ch’olob’anb’il esil naq li Jesukristo a’an ajwi’ laj Kolol re li ruchich’och’, “li naxk’utb’esi rib’ chiruheb’ chixjunil li tenamit” (perel re xjolomil li aatin saʼ lix Hu laj Mormon) ut li naxyeechi’i li kolb’a-ib’ re chixjunileb’ li te’chalq rik’in. Jo’kan ajwi’, li xkab’ aj yehol esil a’an naxch’olob’ ajwi’ chi saqen ru k’a’ru xyaalal li kolb’a-ib’. Xb’aan a’in naq laj Nefi, laj Jakob, laj Mormon, ut chixjunileb’ li profeet ke’k’anjelak chi yalb’ileb’ xq’e “re xtz’iib’ankil li aatin a’in chiruheb’ li perel ch’iich’”—re xyaab’asinkil reheb’ li tasal tenamit li toj te’chalq naq “kiqanaw chirix li Kristo, ut … ak qayo’on chaq lix loq’al” (Jakob 4:3–4). Sa’ xq’ehil li Paswa a’in, k’oxlaheb’ li ch’olob’ahom sa’ lix Hu laj Mormon naq lix wankil li Kolonel wan choq’ re chixjunileb’ jo’ ajwi’ choq’ re li junjunq—chixtojb’al rix chixjunil li ruchich’och’ ut chixtojb’al aawix laa’at.
Li na’leb’ re tzolok sa’ li ochoch ut sa’ li iglees
Jalam-uuch
reetalil li seminario
Sa’ xk’ab’a’ li Jesukristo, laa’in tinwakliiq chi yo’yo.
Chiru li Paswa, k’aynaqo chixk’oxlankil lix waklijik chi yo’yo li Jesukristo, a’ut k’a’ru tz’aqal xyaalal li wakliik chi yo’yo? K’a’ruheb’ li na’leb’ neke’tawman sa’ lix Hu laj Mormon chirix li wakliik chi yo’yo? Chiru li Paswa a’in, naru nakatz’iib’aheb’ li na’leb’ chirix li wakliik chi yo’yo li nakataw sa’ 2 Nefi 9:6–15, 22; Alma 11:42–45; 40:21–25; 3 Nefi 26:4–5.
Naru ajwi’ nakatz’iib’a chan ru naq eb’ li na’leb’ a’in chirix li wakliik chi yo’yo neke’xjal laa b’aanuhom ut laa yu’am. Qayehaq, k’oxla chan raj ru taatz’aqob’resiheb’ ru li ch’ol aatin a’in: Wi ta ink’a’ ninnaweb’ li k’a’aq re ru a’in … ut Rik’in naq ninnaweb’ li k’a’aq re ru a’in …
Jun bʼich joʼ “Ninnaw naq yoʼyo inKolonel” (Ebʼ li Bʼich, 77) naru nakatxtenqʼa chixkʼoxlankil kʼaʼut naq nim xloqʼal choqʼ aawe lix waklijik li Kolonel chi yoʼyo. Naq yooqat chixbʼichankil, chirabʼinkil, malaj chirilbʼal li bʼich, naru nakapatzʼ aawibʼ, “Chan ru naq jalan inyuʼam xbʼaan naq kiwakli chi yo’yo li Jesukristo?”
Wankebʼ li video chirix li Paswa saʼ li Biblioteca del Evangelio li naru nakateʼxtenqʼa naq yooqat chi tzolok. Naru nakawil jun malaj wiib’ oxib’ reheb’ li video a’an ut nakakʼoxla kʼaʼru nekeʼxbʼaanu re xnimobʼresinkil laa nawom malaj laa bʼantioxihom chirix lix waklijik li Kolonel chi yoʼyo.
Li Jesukristo kixk’ul sa’ xb’een a’an lin maak, lin rahilal, ut lin yajel.
Li Santil Hu naxk’ut chi saqen ru naq li Jesukristo kixtoj rix li qamaak. Lix Hu laj Mormon naxnimob’resi li qanawom chirix lix mayej ut li rahilal kixk’ul li Jesukristo. Naru nakataw junjunq reheb’ li k’utum a’an sa’ Mosiah 3:7; 15:5–9; Alma 7:11–13. Chirix naq nakawileb’ li raqal a’an, k’oxla xtz’iib’ankil li nakataw sa’ jun kaaxukuut jo’ a’in:
K’a’ru li rahilal kixk’ul li Kolonel?
K’a’ut naq kixk’ul li rahilal?
K’a’ru naraj naxye a’an choq’ we laa’in?
Naru nakatzoleb’ li raqal a’in chi jo’ka’in: Sik’eb’ li b’ich li nakaweek’a naq neke’xk’am rib’ rik’ineb’ li na’leb’ neke’xk’ut. Li tusulal “Eb’ li raqal sa’eb’ li loq’laj hu” sa’ xraqik li b’ichleb’aal naru nakatxtenq’a. Bʼarwan rehebʼ li chʼol aatin saʼebʼ li bʼich aʼin ut ebʼ li raqal aʼin re li loqʼlaj hu li nakateʼxtenqʼa chixbʼantioxinkil li mayej kixkʼe li Kolonel chi anchal aachʼool?
Li Jesukristo naru nikinixsaqob’resi ut nikinixtenq’a chi tz’aqlok we wu.
Naru nayeeman naq lix Hu laj Mormon a’an jun esil chirixeb’ li kristiaan li ke’jalaak xb’aan lix tojb’al rix li maak kixb’aanu li Jesukristo. Naru nakawil resil junjunq reheb’ a’an sa’ Mosiah 5:1–2; 27:8–28; Alma 15:3–12; 24:7–19. Naru nakak’oxlaheb’ jalan chik li esil taatzol ajwi’. K’a’ru nakak’e reetal li nak’ulman sa’ chixjunileb’ li esil a’in? K’a’ru li jalan li nakak’e reetal? K’a’ru neke’xk’ut li esil a’an chawu chirix lix wankil li Kolonel re xjalb’al aach’ool?
Sa’ xk’ab’a’ naq li Jesukristo kiwakli chi yo’yo, laa’in ajwi’ tinwakliiq chi yo’yo.
Naru nakawoksi “Ch’ol 53: Nak’ehe’ chiru krus li Jesus” ut “Ch’ol 54: Nawakli wi’chik chi yo’yo li Jesus” (sa’ Eb’ li Esilal sa’ li Ak’ Chaq’rab’, 136–138, 139–144, re xk’eeb’al xna’leb’eb’ laa kok’al chirix lix waklijik li Jesukristo chi yo’yo. Malaj naru nakakanab’eb’ laa kok’al chixyeeb’al li seraq’ rik’ineb’ li jalam-uuch wankeb’ sa’eb’ li ch’ol a’in.
Li rula’anihom li Kolonel chirix lix waklijik chi yo’yo sa’ li ch’och’ America a’an naxk’ut xyaalal lix waklijik chi yo’yo. Naru nakaseraq’i a’an reheb’ laa kok’al, ut re xb’aanunkil taawoksi 3 Nefi 11; 17; malaj li raqal sa’ xraqik li b’ich “Lix Hu laj Mormon naxk’ut” (B’ichleb’aal choq’ reheb’ li Kok’al, 62–63). Waklesi xch’ooleb’ laa kok’al chixk’oxlankil k’a’ raj ru xe’reek’a wi ta xe’xch’e’ xk’ob’olal li Jesus (chi’ilmanq 3 Nefi 11:14–15) malaj wi ta xe’wan sa’ xyanqeb’ li kok’al li kirosob’tesi (chi’ilmanq 3 Nefi 17:21). Wotzomaq cherib’il eerib’ lee reek’ahom chirix li Jesukristo ut lix waklijik chi yo’yo.
Re xtenq’ankileb’ laa kok’al chixnawb’al k’a’ru naxk’ut lix Hu laj Mormon chirix li wakliik chi yo’yo, naru nakapatz’ reheb’ naq te’xk’oxla naq maak’a’ nakanaw chirix ut naq te’xch’olob’ a’an chawu. Tenq’aheb’ chirilb’al 2 Nefi 9:10–15; Alma 11:41–45; ut Alma 40:21–23 re xtawb’al xsumenkileb’ li patz’om jo’eb’ a’in: K’a’ru naraj naxye naq jun kristiaan nawakli chi yo’yo? Ani taawakliiq chi yo’yo? Patz’ ajwi’ reheb’ naq te’xch’olob’ xyaalal lix waklijik chi yo’yo li Jesukristo jo’ xtz’aqob’ lix sumenkil laa patz’om.
Li Jesukristo naxnaw chan ru xk’ojob’ankil inch’ool.
Sa’ Mosiah 3:7 ut Alma 7:11 nayeeman junjunq k’a’aq re ru kixnumsi li Jesukristo jo’ xcha’al lix tojb’al rix li maak kixb’aanu. Naru nakawil jun reheb’ li raqal a’in choq’ reheb’ laa kok’al ut taapatz’ reheb’ naq te’xk’e reetaleb’ li aatin li neke’xk’ut chiruheb’ k’a’ru li rahilal kixk’ul li Jesus choq’ qe. Chirix a’an naru nakawil Alma 7:12 re xnawb’al k’a’ut naq kixk’ul li rahilal a’an. Ch’olob’ xyaalal naq li Jesukristo kireek’a chixjunil li qarahilal ut qayajel re naq taaruuq tixk’ojob’ qach’ool.
Ma wan jun b’ich chirix li Jesukristo ut lix tojb’al rix li maak li jwal nawulak chiruheb’? Naru nekeb’icha a’an—malaj naru nekeb’icha jun b’ich maji’ nekenaw. Aatinanqex chirixeb’ li aatin ut ch’ol aatin sa’ li raatinul li neke’xk’e eena’leb’ chirix li k’ojob’aak ut li tuqtuukilal naxyeechi’i li Kolonel qe.
Li Jesukristo naru nikinixsaqob’resi ut nikinixtenq’a chi jalaak.
Lix Hu laj Mormon naxk’e k’iila eetalil reheb’ kristiaan ke’jala sa’ xk’ab’a’ lix tojb’al rix li maak xb’aan li Kolonel. Laa kok’al naru neke’xsik’ ru jun reheb’ re tzolok chirix a’an, maare laj Enos (chi’ilmanq Enos 1:2–8), laj Alma li alalb’ej (chi’ilmanq Mosiah 27:8–24), malaj eb’ laj Anti-Nefi-Lehi (chi’ilmanq Alma 24:7–19). Chan ru naq neke’jala li kristiaan malaj ch’uut a’in sa’ xk’ab’a’ lix tojb’al rix li maak xb’aan li Jesukristo? Chan ru naru naqab’aanu jo’ xe’xb’aanu eb’ a’an?
Naru nekejuntaq’eeta jun k’a’aq re ru saq ru ut jun k’a’aq re ru tz’aj, ut teeye chan ru naq li k’a’ru tz’aj naru nasaqob’resiik ru. Ilomaq Alma 13:11–13. K’a’ru kixb’aanu li Jesus re naq taaruuq chi saqob’resiik qu chirixeb’ li qamaak? K’a’ru naxk’e a’in chiqeek’a chirix li maak? K’a’ru naxk’e chiqeek’a chirix li Kolonel?
Re xtawb’al xkomon chik li na’leb’, chi’ilmanq li hu Amigos re li po a’in.
Chatwanq chi k’ulub’ej re xk’ulb’al aab’eresinkil xb’aan li Musiq’ej. Li Santil Musiq’ej a’an tz’aqal aj k’utunel. Naq nakasik’ lix b’eresihom ut nakatwan chi k’ulub’ej, a’an tixk’e aana’leb’ ut tatreek’asi chixnawb’al chan ru xk’eeb’al li ajb’il ru xb’aaneb’ li tzolb’ileb’ aab’aan.
