jun ixq wiq’wo chiroq li Jesus

Kuyb’il xmaak, xb’aan laj Greg Olsen. Oksinb’il rik’in liceens. www.GregOlsen.com

1–7: abril: “K’amomaq wi’chik eerib’ sa’ usilal rik’in li Dios xb’aan lix tojb’al rix li maak xb’aan li Kristo”

Jakob 1–4

Eb’ laj Nefita ke’roxloq’i laj Nefi jo’ “nimla aj kolol rixeb’” (chi’ilmanq Jakob 1:10). A’an kixkoleb’ ajwi’ rix chiru li xiwxiw sa’ musiq’ej, kixtijeb’ chirix li maak, ut kirelajiheb’ chi chalk rik’in li Kristo. Anajwan kikana li k’anjel a’an sa’ xb’een laj Jakob, li kik’ojob’aak choq’ aj tij ut aj tzolonel re li tenamit xb’aan laj Nefi (chi’ilmanq Jakob 1:18). Laj Jakob kireek’a naq tento tixtijeb’ chi kaw xch’ool li ani yookeb’ “chixtikibʼankil kʼanjelak saʼ li maak,” ut naq tento tixk’ojob’ “li aamej tochʼenaq” reheb’ li ke’rahob’tesiik xb’aan xmaakeb’ lix komon (chi’ilmanq Jakob 2:5–9). Chan ru kixb’aanu li wiib’ chi ajom a’an? A’an kixjayaliheb’ rik’in li Jesukristo—xb’aan naq xkab’ichaleb’ li ch’uut chi kristiaan ke’raj k’irtesiik xb’aan li Kolonel (chi’ilmanq Jakob 4). Jo’ li raatin laj Nefi chi rub’elaj, lix ch’olob’ahom laj Jakob a’an li b’oqok a’in: “K’amomaq wi’chik eerib’ sa’ usilal rik’in [li Dios], xb’aan lix tojb’al rix li maak xb’aan li Kristo” (Jakob 4:11).

Li na’leb’ re tzolok sa’ li ochoch ut sa’ li iglees

Jakob 1:6–8, 15–19; 2:1–11

Wan “intaqlankil xb’aan li Qaawa’.”

Choq’ re laj Jakob, xk’utb’al li raatin li Dios a’an “xtaqlankil xb’aan li Qaawa’,” jo’kan naq kik’anjelak chi anchal xch’ool re “xnimob’resinkil ru li ropiis” (Jakob 1:17, 19). K’a’ru xyaalalileb’ li aatin a’in re laj Jakob choq’ aawe? K’oxla k’a’ru naxb’aanu jun li kaxlan lem. Ma nakataw aana’leb’ rik’in li eetalil a’an? Naq yooqat chixtz’ilb’al rix Jakob 1:6–8, 15–19 ut 2:1–11, k’oxlaheb’ laa taqlankil maare taak’ul rik’in li Qaawa’. K’a’ru eek’asinb’ilat chixb’aanunkil re “xnimob’resinkileb’ ru”?

Chi’ilmanq ajwi’ “A quien el Señor llama, Él capacita,” sa’ Enseñanzas de los presidentes de la Iglesia: Thomas S. Monson (2022), 209–219; “Elévense a la altura de su llamamiento” (video), Biblioteca del Evangelio.

Jakob 2:12–21

“Meekanabʼ lix qʼetqʼetil eechʼool aʼin chixsachbʼal lee raam!”

Eb’ laj Nefita ke’q’etq’eto’ ut ke’ok chixraab’al li b’ihomal (chi’ilmanq Jakob 2:13), a’ut li ch’a’ajkilal a’an moko reheb’ ta ka’ajwi’ a’an ut lix kutankileb’. Chan ru naq laj tza naxyal xq’e chixwaklesinkil li xraab’al li b’ihomal sa’ li kutan a’in? Chirix rilb’al Jakob 2:12–21, ch’olob’ rik’in tz’aqal aawaatin chan ru naraj li Dios naq taawil li b’ihomal. Jun li b’ich jo’ “Rik’in naq k’iila usilal xink’ul,” (Eb’ li B’ich, 140) naru naxk’e xkomon aana’leb’. K’a’ru nakatmusiq’aak chixb’aanunkil xb’aan li k’a’ru nakatzol?

Jakob 2:22–35; 3:10–12

reetalil li seminario

Li Dios nasaho’ xch’ool rik’in li saq ru ch’oolejil.

Naq nakawil Jakob 2:22–35; 3:10–12, k’a’ru nakataw li nakatxtenq’a chixtawb’al ru k’a’ut naq jwal aajel ru li saq ruhil ch’oolej sa’ rilob’aal li Dios? K’a’ruheb’ li ch’a’ajkilal li neke’chal rik’in li yib’ ruhil na’leb’—sa’ xkutankil laj Jakob jo’ ajwi’ sa’ li qakutankil laa’o? K’a’ru li osob’tesink li nachal rik’in wank chi saq ru qach’ool?

Li Elder David A. Bednar kixk’ut naq wanko “sa’ jun li ruchich’och’ li nareetz’u chi kok’ aj xsa’ lix santilal li k’iresink k’uula’al” (“Creemos en ser castos,” Liahona, mayo 2013, 41–44). Chan ru nakatenq’aheb’ laa was aawiitz’in chixtawb’al ru k’a’ut naq nakapaab’ li chaq’rab’ re saq ruhil ch’oolej? Re xch’olob’ankil a’an, naru nakawoksi li na’leb’ chirix li saqil eek’ahom ut wanjik re sumalil sa’ “Loq’ laa junxaqalil” sa’ Choq’ re Xkawilaleb’ li Saaj: Jun tenq’ re xsik’b’al ru laa b’e (eb’ li perel 22–29). K’a’ chik ru nakataw sa’ li hu a’an li tatxtenq’a raj chixch’olob’ankil k’a’ut naq nakayu’ami li chaq’rab’ re saq ruhil ch’oolej?

Naru nakataw xkomon chik li na’leb’ sa’ li raatin li Elder Bednar li ak yeeb’il resil sa’ li tusleb’ aatin a’in malaj sa’ li video “Yo escojo ser limpio” (Biblioteca del Evangelio).

Chan ru naq jalan lix chaq’rab’ li Dios chirix li saq ruhil ch’oolej rik’in jalaneb’ chik li na’leb’ maare taawil? K’a’ru li osob’tesink li nachal rik’in wank chi saq ru qach’ool?

Chi’ilmanq ajwi’ Temas del Evangelio, “Virtud,” Biblioteca del Evangelio; “Atracción hacia personas del mismo sexo” sa’ li perel “Ayuda para la vida” sa’ li Biblioteca del Evangelio.

Jakob 4

Naru tink’am wi’chik wib’ sa’ usilal rik’in li Dios xb’aan lix tojb’al rix li maak xb’aan li Jesukristo.

Laj Jakob kirelaji chiru lix tenamit naq “te’xk’am wi’chik rib’ sa’ usilal rik’in [li Dios], xb’aan lix tojb’al rix li maak xb’aan li Kristo” (Jakob 4:11). Li kamok-ib’ wi’chik sa’ usilal naru naraj naxye xk’ojob’ankil wi’chik li amiiwul malaj li tuqtuukilal. Naq nakatz’il rix laa yu’am, k’oxla jun hoonal naq xaweek’a naq najt wankat rik’in laa Choxahil Yuwa’. Chan ru naq li Kolonel nakatxtenq’a chixk’amb’al wi’chik aawib’ sa’ usilal rik’in? K’a’ruheb’ li na’leb’ nakataw sa’ li ch’ol a’in li nakate’xtenq’a chixk’amb’al wi’chik aawib’ sa’ usilal rik’in li Dios? (che’ilmanq li raqal 4–14).

K’a’ chik ru li na’leb’ nakak’ul sa’ Mateo 5:23–24? Chan ru naru nakatxtenq’a li Kolonel chixk’amb’al wi’chik aawib’ sa’ usilal rik’in li Dios—ut rik’ineb’ laa was aawiitz’in?

Chi’ilmanq ajwi’ 2 Nefi 10:24.

Jakob 4:8–18

Naru nawisi wib’ sa’ li musiq’ejil mutz’il rik’in xjayalinkil wib’ rik’in li Kolonel.

Naq laj Jakob kixyal xq’e chixb’eresinkileb’ lix tenamit chi tz’aqal rik’in li Qaawa’, a’an kixtijeb’ naq miwan xmusiq’ejil mutz’il ut naq ink’a’ xik’ te’iloq re “li aatin li saqen ru” re li evangelio (chi’ilmanq Jakob 4:13–14). Jo’ naxye sa’ Jakob 4:8–18, k’a’ru naru naqab’aanu xkolb’al qib’ chiru li mutz’il sa’ musiq’ej?

Chi’ilmanq ajwi’ Quentin L. Cook, “Traspasar lo señalado,” Liahona, marzo 2003, 20–24.

Naq kik’utuk, li Kolonel kixjuntaq’eeta lix k’utum rik’in li yu’am re wulaj wulaj. Eb’ lix jaljookil ru aatin li Kolonel ke’xtenq’aheb’ li kristiaan chixtawb’al li musiq’ejil yaal sa’ xyu’ameb’ wulaj wulaj. Yal xb’aanunkil a’an naq yooqat chi k’utuk. Qayehaq, naq yooqat chixk’utb’al Jakob 4:8–18, naru nakapatz’ reheb’ laj tzolonel ma xb’aanuhomeb’ jun examen choq’ re xsa’ ruheb’. K’a’ru kixb’aanu laj b’anonel re xk’eeb’al reetal ma chaab’il neke’ilok xsa’ ruheb’? Chan ru naru naqatz’il rix li qilob’aal sa’ musiq’ej?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Jakob 2:8

Li Dios naxk’irtesi li aamej toch’enaq.

• Re xtenq’ankileb’ laa kok’al chixtawb’al chan ru nak’ira jun “aamej toch’enaq,” naru neketz’il rix chan ru naq nak’ira li qajunxaqalil naq toch’enaq ut k’a’ru natenq’ank re chi k’iraak. Laa kok’al naru neke’aatinak chirix hoonal naq ke’xk’ul xrahil ut k’a’ru kitenq’ank reheb’ chi k’iraak. Naru ajwi’ nakak’ut chiruheb’ jun b’ak’leb’ tiq’il malaj li b’an jo’ xcha’al li aatinak a’in. Naru nakawotz rik’ineb’ chan ru li Kolonel ak xatxtenq’a naq laa musiq’ kiraj ru k’iraak.

Jakob 2:17–19

Nintenq’aheb’ li wankeb’ xmajelal naq ninwotzok rik’ineb’.

• Junjunqeb’ li kristiaan sa’ lix kutankil laj Jakob jwal b’ihomeb’ chaq, a’b’an ink’a’ ke’raj xwotzb’al li k’a’ru wan reheb’ rik’ineb’ li ras riitz’in. Naq yooqat chixyaab’asinkil lix k’utum laj Jakob sa’ Jakob 2:17–19 chiruheb’, naru nakak’e reheb’ laa kok’al jalam-uuch malaj k’a’aq re ru naru neke’xchap li wankeb’ xyaalalil rik’ineb’ li aatin malaj ch’ol aatin wankeb’ sa’eb’ li raqal a’in. Naru nakach’olob’ naq yookat chixwotzb’al li k’a’aq re ru a’an rik’ineb’; toja’ naq naru nakab’oqeb’ chixwotzb’aleb’ li k’a’aq re ru a’an aawik’in malaj chirib’ileb’ rib’. Aatinanqex chirix li nekereek’a naq nekexwotzok. K’a’ chik ru naru naqawotz rik’ineb’ li qas qiitz’in li naxtenq’aheb’ chi saho’k sa’ xch’ooleb’?

• Chirix rilb’al Jakob 2:17 sa’ komonil, laa kok’al naru neke’xye junjunq reheb’ li osob’tesink ak xwotz li qaChoxahil Yuwa’ rik’ineb’. K’a’ut naraj a’an naq toowotzoq chiqib’il qib’?

Jakob 4:6, 10–11

Naru ninkawob’resi lin paab’aal chirix li Jesukristo.

• Lix paab’aal laj Jakob chirix li Kristo jwal kaw jo’kan naq ink’a’ kiru chi eek’asimank. Re xk’utb’al chiruheb’ laa kok’al chan ru xkawob’resinkil li paab’aal chi jo’kan, naru nakapatz’ reheb’ k’a’ru naqab’aanu re xkawob’resinkil li qajunxaqalil. K’a’ru naru naqab’aanu re naq li qapaab’aal chirix li Jesukristo kawaq tz’aqal? Ilomaq Jakob 4:6 re xtenq’ankileb’ laa kok’al chixk’eeb’al reetal k’a’ru ke’xb’aanu laj Jakob ut lix tenamit re naq lix paab’aaleb’ “ink’a’ chik taa’eek’anq.”

• Re xtenq’ankileb’ laa kok’al chixtawb’al ru li naraj naxye li wank chi “ink’a’ chik na’eek’an” sa’ xpaab’aaleb’, naru nakataw jun nimla xtoonal che’ li nach’ wan, ut taapatz’ reheb’ naq te’xchiq’eb’ li ruq’ li che’. Chirix a’an, kanab’eb’ chixyalb’al xchiq’b’al lix toon li che’. K’a’ut naq ch’a’aj wi’chik xchiq’b’al lix toonal? B’ar wan reheb’ li ch’ol aatin re Jakob 4:6, 10–11 neke’xch’olob’ li k’a’ru naru naqab’aanu re naq li qapaab’aal chirix li Jesukristo ink’a’ chik taa’eek’anq?

  jun nimla che’ sa’ jun awimq

  Jo’ chanchan lix toonal jun li che’, li qapaab’aal chirix li Kristo naru naq “ink’a’ chik na’eek’an.”

• Re xtawb’al xkomon chik li na’leb’ re xtzolb’aleb’ laa kok’al chirix li paab’aal chirix li Jesukristo li ink’a’ chik na’eek’an, chi’ilmanq Neil L. Andersen, “Eb’ li musiq’ejil sut-iq’” (Jolomil ch’utub’aj-ib’ re abril 2014; ut li video “Torbellinos espirituales“) malaj “Li ochoch sa’ xb’een li pek” (B’ichleb’aal choq’ reheb’ li Kok’al, 132; chi’ilmanq ajwi’ Mateo 7:24–27).

Re xtawb’al xkomon chik li na’leb’, chi’ilmanq li hu Amigos re li po a’in.

laj Jakob natz’iib’ak chiruheb’ li perel ch’iich’ oor

Tintaqla li raatineb’ rik’ineb’ (laj Jakob aj k’utunel), xb’aan li xElspeth Caitlin Young

perel re kok’ k’anjel: Nintenq’aheb’ li wankeb’ xmajelal naq ninwotzok rik’ineb’