Wankeb’ naab’aleb’ li kristiaan li maji’ rab’ihomeb’ resil lix evangelio li Jesukristo. Wi chi jo’q’ehaq nakaweek’a naq luktajenaqat xb’aan lix nimal li k’anjel re xch’utub’ankileb’ sa’ lix Iglees li Qaawa’, li kixye laj Jakob chirix lix toonal li che’ olivo sa’ Jakob 5 naru naxk’ojob’ aach’ool: li Qaawa’ a’an laj eechal re li awimq. A’an kixk’e qe chiqajunjunqal jun ch’ina na’ajej re xtenq’ankil a’an sa’ lix k’anjel—li qajunkab’al, eb’ li qamiiw, ut li kristiaan li wankeb’ sa’ li qayu’am. Ut wan naq li xb’een kristiaan li naqatenq’a chixch’utub’ankil, a’ano ajwi’ laa’o qajunes qib’. A’b’anan maajo’q’e wanko qajunes sa’ li k’anjel a’in, xb’aan naq laj Eechal re li awimq nak’anjelak rochb’eeneb’ lix moos (chi’ilmanq Jakob 5:72). Li Dios naxnaweb’ ru ut naxraheb’ li ralal xk’ajol, ut a’an tixkawresi jun b’e re naq li junjunq taarab’i lix evangelio, jo’kaneb’ ajwi’ li ani ak xe’xtz’eqtaana junxil (chi’ilmanq Jakob 4:15–18). Ut naq choyb’ilaq li k’anjel, chixjunileb’ li “yalb’ileb’ xq’e chi k’anjelak rochb’een a’an … taawanq xsahil xch’ooleb’ rik’in sa’ xk’ab’a’ li ru li rawimq” (Jakob 5:75).
Chi’ilmanq ajwi’ “Jacob enseña sobre el recogimiento de Israel” (video), Biblioteca del Evangelio.
Li na’leb’ re tzolok sa’ li ochoch ut sa’ li iglees
Jakob 5 a’an jun seraq’ rik’in k’iila eetalil. Na’aatinak chirixeb’ xtoonal ut ru li che’ ut eb’ laj k’anjel, a’b’an chi yaal na’aatinak chirix lix k’anjel li Dios sa’ xyanqeb’ lix tenamit chalen chaq xtiklajik. Chi jo’kan, naq nakawil li seraq’ a’in, k’oxla k’a’ru neke’reetali li k’a’aq re ru li neke’yeeman resil sa’ li seraq’.
Qayehaq, wi li awimq nareetali li ruchich’och’, ut lix toonal li che’ olivo awb’il nareetali Israel (eb’ li ani okenaqeb’ sa’ sumwank rik’in li Dios; chi’ilmanq Jakob 5:3), k’a’ru nareetali lix toonal li che’ olivo re k’iche’? K’a’ru nareetali li chaab’il ut li ink’a’ usil ru che’? K’a’ chik ru li eetalil nakawil?
Sa’ Jakob 5 wan li na’leb’ chirixeb’ li ninqi tenamit ut li resilal li ruchich’och’, a’ut wan ajwi’ li na’leb’ chawix laa’at ut laa yu’am. K’a’ru li na’leb’ nakatzol li taak’anjelaq choq’ aawe sa’ Jakob 5?
Ut xb’een wa, Jakob 5 na’aatinak chirix li Jesukristo. Sik’ reetalil a’an naq yookat chi tzolok. K’a’ru nakatzol chirix a’an sa’eb’ li raqal 40–41, 46–47?
Re xtawb’al xkomon chik li na’leb’ chirix Jakob 5, chi’ilmanq li jalam-uuch sa’ xraqik li tusleb’ aatin a’in.
Li Qaawa’ nikinixb’oq chi k’anjelak wochb’een a’an sa’ li rawimq.
Li “xkomoneb’ li moos” (Jakob 5:70) li ke’b’oqe’ sa’ li rawimq li Qaawa’, a’aneb’ li kristiaan jo’ laa’at. K’a’ruheb’ li na’leb’ nakataw sa’ Jakob 5, ut ajwi’ tz’aqal sa’eb’ li raqal 61–62 ut 70–75, chirix k’anjelak sa’ li rawimq li Qaawa’? K’a’ru ak xatzol chirix li Qaawa’ naq xattz’aqon sa’ lix k’anjel?
Naq nakawil resil “li jun sut chik” naq nak’anjelak li Qaawa’ sa’ li rawimq, k’a’ru li naxwaklesi aach’ool chi k’anjelak chiru li Qaawa’ “rik’in xnimal aametz’ew”? (Jacob 5:71). Naru nakak’oxla jun aanumsihom naq xaweek’a xsahil aach’ool naq xatk’anjelak chiru laj Eechal re li awimq—maare naq xawotz li evangelio, naq xatk’anjelak sa’ li santil ochoch, malaj naq xakawob’resiheb’ laa was aawiitz’in. Naru ajwi’ nakatz’ileb’ rix li eetalil kixwotz li Elder Gary E. Stevenson sa’ “Chʼina-us—Moko chʼaʼaj ta” (Jolomil ch’utub’aj-ib’ re octubre 2021).
Li Awa’b’ej Russell M. Nelson kixye: “Yalaq jo’q’e nakab’aanu yalaq k’a’ru li naxtenq’a yalaq ani ma yo’yo malaj kamenaq—chi ok sa’ sumwank rik’in li Dios ut xk’ulb’al li kub’iha’ ut eb’ li k’ojob’anb’il k’anjel re li santil ochoch, yookat chi tenq’ank chixch’utub’ankil Israel. Saqen ru a’an” (“Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], ChurchofJesusChrist.org). Naru nakatikib’ xtz’iib’ankil k’a’ru naru nakab’aanu re xtenq’ankil chixch’utub’ankil Israel. Sa’ li xatz’iib’a, k’a’ru nakaweek’a naq li Qaawa’ naraj naq taab’aanu anajwan sa’ li rawimq? Jo’ naxye li raqal 75, chan ru nokoxq’ajkamu li Qaawa’ naq nokok’anjelak sa’ li rawimq?
K’ut li tzol’leb’. K’e reetal naq li seraq’ taawanq chi kab’lanb’il sa’ xb’eeneb’ li tzol’leb’ li neke’tawman sa’eb’ li loq’laj hu. Naru nekeb’aanu a’in rik’in rilb’aleb’ li loq’laj hu sa’ komonil, toja’ naq teewotz cherib’il eerib’ li na’leb’ teetaw, jo’ ajwi’ li k’a’ru xek’ul rik’in xyu’aminkileb’ li na’leb’ a’an.
Li Qaawa’ naxk’oxlaheb’ lix tenamit rik’in rahok ut uxtaan.
Jun xyaalalil li aatin jilok a’an xchapb’al rib’ chiru k’a’ruhaq chi ink’a’ na’eek’an. Chan ru nakatxtenq’a li na’leb’ a’an chixtawb’al ru Jakob 6:4–5? Sa’ li seraq’ chirix li xtoonal li che’ olivo, chan ru naq laj Eechal re li awimq kixye’ “li ruqʼ aj uxtaan”? (chi’ilmanq, jo’ eetalil, Jakob 5:47, 51, 60–61, 71–72). Chan ru xb’aanuhom a’in choq’ aawe?
Chan ru naru nakawotz li seraq’ chirixeb’ lix toonal li che’ olivo rik’ineb’ li kok’al re naq te’xtaw ru? Naru nekex’el chi b’eek re rilb’al jun li che’, ut taayeheb’ sa’ junpaat li jolomil na’leb’ re li seraq’. K’a’ru kixb’aanu aj Eechal re li awimq choq’ reheb’ lix che’? Chan ru naru nokowan jo’eb’ laj k’anjel sa’ li seraq’ ut naqatenq’aheb’ li qas qiitz’in chireek’ankil lix rahom li Kolonel?
Laj Jakob kixwotz li seraq’ chirixeb’ lix toonal li che’ olivo re xtenq’ankil lix tenamit chi chalk rik’in li Kristo. Naru ajwi’ nakab’aanu a’an choq’ reheb’ laa kok’al. Naru nakak’os ru li seraq’ rik’ineb’ li raqal jo’ Jakob 5:3–4, 28–29, 47, ut 70–72 (chi’ilmanq ajwi’ “La viña del Antiguo Testamento” [video], Biblioteca del Evangelio). Naru nekeril Jakob 5:11, 41, 47, ut 72, re xk’eeb’al reetal li k’a’ru naxk’ut chan ru naq jwal aajel ru li che’ olivo choq’ re laj Eechal re li awimq (li Jesukristo). K’a’ru naxb’aanu li Kolonel re xk’utb’al naq aajel qu choq’ re?
Lin Choxahil Yuwa’ nikinixra ut tixkuy lin maak naq tinjal ink’a’uxl.
Sa’ Jakob 6:4–5 wan jun xnimal ru na’leb’ choq’ qe naq xqasik’ ru li ink’a’ us. Naru nakatenq’aheb’ laa kok’al chixtawb’al. B’arwan reheb’ li aatin sa’eb’ li raqal a’in neke’xk’e qayo’onihom chirix lix rahom li Dios li natojok-ix? Naru natenqa’an lix seraq’ li Elder Allen D. Haynie naq kixtz’ajni rib’ sa’ jun li jul, li wan sa’ “Xjultikankil ani xqakanab’ wi’ qib’” (Jolomil ch’utub’aj-ib’ re octubre 2015). K’a’ru naxk’ut chiqu li seraq’ a’an ut Jakob 6:4–5 chirix li tento taqab’aanu re tookole’q sa’ li rawa’b’ejihom li Dios?
Chan ru naru nakamusiq’aheb’ laa kok’al chixkolb’al rix li yaal jo’ kixb’aanu laj Jakob? Laa kok’al naru neke’ril li video “Capítulo 10: Jacob y Sherem” (Biblioteca del Evangelio) ut te’xk’utb’esi li ke’xye laj Jakob ut laj Xerem, rik’in roksinkil Jakob 7:1–23 jo’ tenq’. Chan ru naq laj Jakob kixkol rix li k’a’ru naxnaw naq us? Patz’ reheb’ laa kok’al naq te’xwotz xnumsihomeb’ b’ar wi’ xe’xkol rix li k’a’ru us, malaj wotz laa we laa’at. Naru neke’xb’icha jun li b’ich chirix xkawilal li ch’oolej jo’ kiwan re laj Jakob, maare “Saqaq aawu,” B’ichleb’aal choq’ reheb’ li Kok’al, 81).
Re xtawb’al xkomon chik li na’leb’, chi’ilmanq li hu Amigos re li po a’in.
